ئەڤرۆ نیوز، نەوزاد ھلۆری:

ژ ئەنجامێ چەند ھێرشەکان ژلایێ ھێزێن عیراقێ ب پشتەڤانیان ھێزێن ئەسمانی یێن ھەڤپەیمانان، سپێدەھیا ھژمارەکا سەرکردە و چەکدارێن داعش ل پارێزگەھا سەلاحەدین ھاتنە کوتن.

ھەرئێک ژ دژە تیرورا عیراقی و ھێزێن ئەمنی یێن عیراقی ب ھەڤکاری ل گەل فروکێن ھەڤپەیمانان ھژمارەکا ھێرشان ل چیایێ خانوکە ل پارێزگەھا سەلاحەدین بو سەر چەمدارێن داعش کر د ئەنجام دا پێنج سەرکردە و 30 چەکدارێن داعش کوشتن کو ئەوان سەرکردەیان سەرپەرشتی و سەرکرداتیا ھێزێن داعش دکر ل سەلاحەدین، کەرکوک، موسل و دەڤەرا باشوورێ ئەنبارێ).

ئەوان چەکدارێن داعش ل وان دەڤەران ب رێیا بومبەیان خەلکێ سڤێل ل وان دەڤەران دکرنە قوربانی و جار جار ژ نیشکەکێڤە دەردکەڤن و زیانێن گیانی و ماددی دگەھینن خەلکێ وان دەڤەران ب تایبەتی ل شەرگات و گەیارە ل نێزیک کەرکوکێ.

ئه‌ڤرۆ، قائید میرۆ:

پەرلەمانتارەکێ کورد ل پەرلەمانێ عیراقێ ئاماژە دا، ھەموو فڕاکسیۆنێن کوردستانی ل بەغدا ل ‏سەر پرسێن نەتەوی و نیشتیمانی درژدن و ئێک ھەلویست ھەیە ، بڕیارە ل گەل عادل ‏عەبدولمەھدی لدۆر پرسێن ھەلاویستی د ناڤبەرا ھەرێم و بەغدا کۆمببین، چونکە مە بمەرج دەنگ ‏ب کابینا نوویا عیراقێ دایە.‏

دکتۆر محەمەد شاکر، پەرلەمانتارێ پارتی ل پەرلەمانێ عیراقێ بۆ رۆژناما ئەڤرۆ گۆت: ھەرچەندە ‏ئەم وەک کورد ل بەغدا پەرتبووینە و ھەر ئێک جودا چووینە ناڤا پەرلەمان و حوکمەتا نوویار ‏عیراقێ، بەلێ خۆش بەختانە ھەموو فڕاکسیۆنێن کوردستانی یێن پەرلەمانێ عیراقێ سەرەڕای ‏بۆچوونێن جودا ھەڤڕاینە لسەر پرسێن نەتەوەیی و نیشتیمانی یێن پەیوەندی بھەرێما کوردستانێ ‏ڤە ھەی، لەوڕا حەفتیا بۆری جێگرێ سەرۆکێ پەرلەمانی گەل ھەموو فڕاکسیۆنێن کوردستانی ‏کۆمبو تێدا ب ھویری بەحسێ کومەکا بابەتێن گرنگ و پەیوەندی ب ھەرێما کوردستانێ ڤە ھەی ‏ھاتەکرن ژوانا بابەتێ ڤەگەڕاندنا پڕۆژە قانوونا بودجێ گشتیێ عیراقێ بۆ حوکمەتێ، ھەموو ‏کۆتلەیێن کوردی ئێک دەنگن ھەمبەر ئەڤێ غەدرا د پڕۆژە قانوونا بودجەی دا ھەمبەر ھەرێما ‏کوردستانێ ھاتیەکرن، چونکە پشکا ھەرێما کوردستانێ دڤێت 17%ێ بیت نەک وەکی ھاتیە ‏دیارکرن 12%ێ بیت، ئەف ئێک ھەلویستیا کوردان ل بەغدا گرنگە بۆڤێ قۆناغێ و دناڤا ھۆلا ‏پەرلەمانی ژی مە ھەموویا پێکڤە نەڕازیبوونا خوە ئاشکراکر و ئەف بودجەیە نیکمە یێ رازیبوونێ ‏نینە و پێدڤی ب راستڤەکرنێ ھەنە.‏

ل دۆرداخوازیێن کوردان دناڤا حوکمەتا نوویا عیراقێ ئەڤی پەرلەمانتارێ پارتی گۆ: مە ب مەرجەکی ‏دەنگ ب کابینا عادل عەبدولمەھدی دایە ل ھەیڤا بۆری ئەوژی راستڤەکرنا کارناما حوکمەتێ یە و ‏پێدڤیە داخوازیێن مەژی وەک ھەرێما کوردستانێ بھێنە بجھئینان، دناڤا کارناما حوکمەتا نوودا، ‏لەوڕاژی بڕیارە ئەف مەرجێن مە بھێنە جێھگیرکرن و بچنە ناڤا کارناما کابینا نوودا، بێی بەرچاف ‏گرتنا داخوازیێن کوردان ب چو شێوەیەکی پشتەڤانیا حوکمەتا نوکەیا عیراقێ ناکەین و دێ دژی ‏حوکمەتێ راوەستین، چونکە دەنگدانامە بۆ کابینێ دناڤا پەرلەمانی دا گرێدایی داخوازیێن مەیە و ‏حوکمەتێ ب حوکمەتا خوە نوزانین ھەگەر کارنامێ دا داخوازی بەرچاف نەھێنە وەرگرتن.‏