ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: د روودانەکا ترافیکێ دا کەسەکێ گیانێ خوە ژ دەستدا.
ناڤهاتی زێدەتر دیارکر: ل شەڤا بوری ل سەر جادا سه‌ره‌كی یا دناڤبه‌را كومه‌لگه‌ها چره بۆ شێخان و ل نێزیك گوندێ زیناڤا روودانه‌ك روودایه ژ جورێ لێدان، کو ترومبێله‌كا تایبه‌ت ژ جۆرێ ئۆدی ل ژنەکێ دایه و د ئه‌نجامدا وێ ژنێ گیانێ خۆ ژ ده‌ست دایە.
ئه‌ڤرۆنيوز:
ژێده‌ره‌كێ ئه‌منى ئه‌ڤرۆ پێنجشه‌مبى 8/11/2018 راگه‌هاند، ئه‌ندامه‌كێ خۆلا بۆرى يا په‌رله‌مانێ عيراقێ ب تۆمه‌تا تيرۆرێ يێ هاتيه ده‌سته‌سه‌ركرن.
وى ژێده‌رى بۆ مالپه‌رێ(بغداد اليوم) گۆت” هێزێن ئه‌منى په‌رله‌مانتارێ خۆلا بۆرى يا په‌رله‌مانێ عيراقێ ژ پارێزگه‌ها سه‌لاحه‌دين (زيا محێ خه‌له‌ف عه‌بدوللا ئه‌لدورى) ده‌سته‌سه‌ركر”.
دياركر ژى” زيا ئه‌لدۆرى ب تۆمه‌ته‌كا گرێداى ب تيرۆرێ ڤه يێ هاتيه ده‌سته‌سه‌ركرن”.
ئه‌ڤرۆنيوز:
پشتى مراربوونا مليۆنان ماسيان ل باشوور وناڤه‌راستا عيراقێ ژئه‌گه‌رێ ژه‌هراوى بوونێ، حوكمه‌تا هه‌رێما كوردستانێ ب فه‌رمى بريارا قه‌ده‌غه‌كرنا كرينا ماسيان ژ باشوور وناڤه‌راستا عيراقێ ده‌ركر، هه‌موو بازرگان ژى ئاگه‌هداركرن كو ماسيێن وان ده‌ڤه‌ران بۆ هه‌رێمێ نه‌ئينن.
جڤاتا وه‌زيرێن هه‌رێمێ ووه‌زاره‌تا چاندنێ وژێده‌رێن ئاڤێ ورێڤه‌به‌ريێن ڤێتێرنه‌ريان هاتينه راسپاردن كو مامه‌لا بازرگانى وئينانا ماسيان ژ باشوور وناڤه‌راستا عيراقێ رابگرن ژبه‌ر ژه‌هراوى بوونێ.
ل دۆر چاوانيا پركرنا خواستا بازارێ ناڤخوه‌يى ل هه‌رێمێ بۆ ماسيان ورێگريكرنێ ل گرانبوونا بهايێ وان، سيروان سه‌عيد رێڤه‌به‌رێ سامانێ ماسى ل رێڤه‌به‌ريا گشتى يا سامانێن ئاژه‌لى وڤێتێرنه‌رى ل وه‌زاره‌تا چاندنێ وژێده‌رێن ئاڤێ راگه‌هاند، دێ رێ ده‌ين بۆ ئينانا ماسيێن زێده‌تر ژ ئيرانێ وتوركيا بۆ هه‌رێما كوردستانێ.
ئه‌ڤرۆنيوز:
رێڤەبەرێ گشتی یێ ساخلەمیا پارێزگەھا دھۆکێ دیارکر کو ئەڤرۆ ٨-١١-٢٠١٨ وەلاتیەکی ب ناڤێ (ھاشم سالح سادق) ھژمارەکا کەرەسته و پێدڤیێن نوشداری و ساخلەمیێ بۆ دەزگەھێن ساخلەمیێ ل دھۆکێ دابينكرن.
نزار عسمەت، رێڤەبەرێ گشتی یێ ساخلەمیا پارێزگەھا دھۆکێ، ل دووڤ نوش نيوز، سۆپاسیا وى و وان کەسێن خێرخواز كر يێن ڤان ره‌نگه هاريكاريان بۆ ساخله‌ميێ دابين دكه‌ن و پشتەڤانیا كه‌رتێ ساخله‌ميێ دكه‌ن و ھيڤى خواست نموونێن وەکو وان زێدە بن بۆ پشتەڤانى و ھاریکاریکرنا ساخلەمیا دھۆکێ و گۆت: “ئەڤ کەرەسته و پێدڤیێن ساخلەمیێ دێ بۆ دەزگەھیێن ساخلەمیێ ھێنە رەوانەکرن دا کو وەلاتی مفایی ژێ وەربگرن دەمێ قەستا دەزگەھێن ساخلەمیێ دکەن ب تایبەتی ژی کەسێن خودان پێدڤیێن تایبەت و پەكکەفتی”.
وەلاتی ھاشم سالح سادق گۆت: “من وەکو ئەرکەکێ مرۆڤایەتی ب فەر دیت ھژمارەکا کەرەسته و پێدڤیێن ساخلەمیێ ژ وەلاتێ ئەلمانیا بینم و پێشکێشی رێڤەبەریا گشتی یا ساخلەمیا پارێزگەھا دھۆکێ بکەم ئەڤە بۆ جارا ئێکێ يه ڤی کاری د گەل ساخلەمیا دھۆکێ ئەنجام ددەين، به‌لێ دێ بەردەوام بين بۆ ئینانا کەرەسته و پێدڤیێن ساخلەمیێ و نوشداری بۆ دھۆکێ”.
دياركر ژى کو ٩٥ کارتۆنیێن جلکان ژی د گەل خۆ یێن ئیناین دێ ل سەر ئاوارێن سنۆرێ پارێزگەھا دھۆکێ ھێنە بەلاڤکرن.
ئەڤرۆنیوز:
رێكخەرێ راسپاردێن نێڤدەولەتی ل حوكمەتا هەرێما كوردستانێ، دیندار زێباری راگەهاند،
پشتی هێرشێن تیرۆرستی یێن داعشێ ژبلی رەڤاندنا وەلاتیێن كوردێن ئێزدی، پەیرەوێن ئاینێن دی ژی ژ وی كارێ درندانە بێ بەهر نەبووینە وهژمارەكا زۆر ژێ هاتینە رەڤاندن ژوان ژی مەسیحی كو نیزیكی 200 هزار كەس ژێ ئاوارەی هەرێما كوردستانێ ببوون، هەروەسا هژمارەكا وەلاتیێن مەسیحی ژی ژلایێ داعشێ ڤە هاتبوونە رەڤاندن ب ڤی شێوەی: هژمارا وان رەڤاندیێن كو كەیسێن وان ژ 3/4/2017 تاكو 18/7/2017 هاتینە دیكیۆمێنتكرن 250 كەس بوون، ژوان 82 ژن و168 زەلام ژوێ هژمارێ ژی 174 كەس ب شێوازێن جۆراوجۆر، بەلێ هەتا نوكە 76 كەس نەهاتینە رزگاركرن كو هژمارەكا وان ژنن.
دیندار زێباری، ل دۆر رەڤاندیێن ئێزدی ژی گۆت” حوكمەتا هەرێما كوردستانێ دبزاڤێن بەردەوام دایە بۆ رزگاركرنا وان ئێزدیێن كو هەتا نوكە دبێ سەروشوینن”. دیاركر ژی” ئەوێن هاتینە رزگاركرن ژی هەمان مافێ ژنێن هەرێما كوردستانێ هەی ول دووڤ وان قانوونێن ل هەرێمێ دهێنە پەیرەوكرن دێ مافێن وان ژی دپاراستی بن وبزاڤێن جدی هاتینە كرن بۆ دوبارە ڤەگەراندنا ژنێن رزگاركری بۆ ناڤ جڤاكی ول دۆر ڤێ چەندێ سەنتەرێ راوێژكاریا خێزانی ل پاریزگەها دهۆكێ هاتیە دامەزراندن كو ژ چەندین خەلكێ بسپۆرێن قانوونی ودەروونی پێك دهێت.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى ئه‌ڤرۆ پێنجشه‌مبى 8/1/2018 پێشوازى ل هندريك ڤان دێفێلد باليۆزێ به‌لجيكا ل عيراقێ وئوردنێ وشانده‌كێ دگه‌لدا كر.
دديداره‌كێ دا دووماهى پێشهاتێن سياسى وله‌شكرى وته‌نگه‌ژێن ده‌ڤه‌رێ ب گشتى ولڤينين تيرۆرستێن داعشێ ل چه‌ند ده‌ڤه‌ره‌كێن عيراقێ هاته به‌حسكرن.
هه‌ردو لايه‌نا دووپاتى ل چاره‌كرنا كێشێن بنه‌ره‌تى ب كێشێن سياسى وئابوورى كر كو بووينه ئه‌گه‌رێ په‌يدابوونا گرۆپێن تيرۆرستى.
مه‌سرور بارزانى دووپاتى ل چاره‌كرنه‌كا بنه‌ره‌تيانه بۆ كێشه وكێماسيان ل ده‌ڤه‌رێن رزگاربووى كر كو ئه‌و چه‌نده دێ بيته ده‌ليڤه‌كا باش بۆ زڤرينا ئاواران.
دته‌وه‌ره‌كێ دى دا، هه‌ردو لايه‌نان دانوستاندن ل دۆر بزاڤێن به‌رده‌وام يێن رێكخستن وتێكهه‌لكرنا ليوايێن پێشمه‌رگه‌ى وئه‌و چه‌ندا ل حوكمه‌تا عيراقى دهێته پێشبينيكرن بۆ چاره‌كرنا كێشێن دناڤبه‌را هه‌ولێرێ وبه‌غدا.
ئه‌ڤرۆنيوز:
وه‌زيرێ ساخله‌ميێ ل هه‌رێما كوردستانێ ئه‌ڤرۆ پێنجشه‌مبى دچارچۆڤێ سميناره‌كێ دا ل هه‌ولێرێ راگه‌هاند، دامه‌زراندنا ده‌زگه‌هێ نيشتمانى يێ ده‌رمانان يێ دقۆناغا دووماهيێ دا.
رێكه‌وت حه‌مه ره‌شيد، وه‌زيرێ ساخله‌ميێ ل هه‌رێما كوردستانێ گۆت” پشتى جڤاتا وه‌زيرێن هه‌رێما كوردستانێ چه‌ند برياره‌ك ل دۆر ده‌رمانان ده‌ركرين، مه بزاڤێن خوه زێده‌تر لێكرينه ونوكه ژى ئه‌م يێن دقۆناغا دووماهيێ يا دروستكرنا ده‌زگه‌هێ نيشتمانى يێ ده‌رمانان”.
ئەڤرۆنيوز:
وەزارەتا ناڤخوەیا عیراقێ دمالپەرێ خوە یێ فەرمی دا لۆگۆیێ نوو یێ وەزارەتێ بەلاڤكر كو تێدا زمانێ كوردی ژی ل سەر لۆگۆیێ خوە زێدەكریە كو بەری نوكە تنێ ب زمانێن عەرەبی وئینگلیزی بوو.
لۆگۆیێ وەزارەتا ناڤخوەیا عیراقێ ب شێوەكێ نوو هاتیە دانان، كو بۆ جارا ئێكێ زمانێ كوردی چوویە سەر وی لۆگۆی هەر ژدامەزراندنا دەولەتا عیراقێ ل 1921 وهەتا نوكە.
بەری نوكە وب شێوەكێ فەرمی، زمانێ كوردی ل سەر هەر ئیك ژ پاسەپۆرتا عیراقێ وفۆرما ئاهێن خوارنێ وكارتا نیشتمانی هاتیە دانان.
ئه‌ڤرۆ نیوز، نه‌وزاد هلۆرى:
كارمه‌ندێن ئوفیسا دهۆك يا كۆمسیۆنا بلند یا هه‌لبژارتنان ل عیراقێ خرڤه‌بوونه‌كا ئه‌نجامدا و خواست كو د بودجا سالا 2019 دا مافێن وان به‌رچاڤ بهێنه وه‌رگرتن و بهێنه دامه‌زراندن.
سه‌كڤان دێره‌شى، به‌رپرسێ راگه‌هاندن وپه‌يوه‌نديێن ئوفیسا دهۆك یا كۆمسیۆنا هه‌لبژارتنان یا عیراقێ بۆ ئه‌ڤرۆ نیوز گۆت: (ئه‌ڤرۆ به‌شه‌ك ژ كارمه‌ند و فه‌رمانبه‌رێن ئوفیسا دهۆك یا كۆمسیۆنا هه‌لبژارتنان ل عیراقێ ل به‌رامبه‌ر ئاڤاهیێ كۆمسیۆنێ خرڤه‌بوونه‌كا نه‌رازیبونێ ئه‌نجامدا و خواست د بودجا 2019 دێ دا مافێن وان به‌رچاڤ بهێنه وه‌رگرتن و بهێنه دامه‌زراندن یان گرێبه‌ستێن وان بهێنه درێژكرن).
زێده‌تر گۆت: (پشتى بدوماهى هاتنا هه‌لبژارتنان ل عیراقێ نوكه گرێبه‌ستێن هه‌موو فه‌رمانبه‌رێن كۆمسیۆنێ يێن گرێبه‌ست هاتینه راگرتن كو نێزیكێ 300 كارمه‌ند و فه‌رمانبه‌رانه ل دهۆكێ ، ئه‌م وه‌كو ئۆفیسا دهۆك پشته‌ڤانیا خوه بۆ وان رادگه‌هینین، مه داخوازیێن وان به‌رچاڤ وه‌رگرتن و دێ بۆ ئوفیسا نیشتمانى یا عیراقێ ل به‌غدا ره‌وانه‌كه‌ین).
ئه‌ڤرۆ نیوز، نه‌وزاد هلۆرى:
گوندێ دێره‌شێ كو دكه‌ڤیته ده‌ڤه‌را به‌رێ گارێ یا سه‌ر ب قه‌زا ئامێدیێ ڤه، ئێكه ژ وان گوندێن كو زورترین سلك لێ دهێنه چاندن و ناڤوده‌نگییه‌كا تایبه‌ت يا هه‌ى، ژبه‌رڤێ ره‌واجه‌كا باش ل بازارى هه‌یه.
ئامینا محه‌مه‌د، ژنه‌كا جوتیاره ل گوندێ دێره‌شێ بۆ ئه‌ڤرۆ نیوز گۆت: (هێشتا ئه‌م زاروك بووین هه‌تا نوكه ئه‌م ل گوندێ خوه سلكا دچینین و چاندنا سلكا ل گوندێ دێره‌ش خێر و به‌ره‌كه‌ته ژبه‌ركو ئاخا وێ یا باش و گونجایه بۆ چاندنا سلكا، ئه‌م سلكا ل بازارێن ناڤخوه‌یێن ئامێدیێ و دهۆكێ دفروشین، خه‌لك گه‌له‌ك حه‌ژ سلكێن مه دكه‌ت).
زێده‌تر گۆت: (هه‌ر چه‌نده قه‌یرانا دارایى و گیرووبوونا مووچه‌یان بوویه ئه‌گه‌ر كو وه‌كو به‌رێ بهایێ خوه نه‌بیت، به‌لێ دهه‌مان ده‌م دا خه‌لكێ گوندى ده‌ست نه‌داهێلایه و دبه‌رده‌وامن ل سه‌ر چاندن و به‌رهه‌مئینانا سلكا).
ئیبراهیم دێره‌شى، موختارێ گوندێ دێره‌شێ دیاركر كو هه‌موو وه‌لاتیێن گوندێ دێره‌شێ سلكان دچینن و بۆ ئه‌ڤرۆ نیوز گۆت: (چاندن و به‌رهه‌مئینانا سلكا ل ده‌ڤه‌را به‌رێ گارێ ب گشتى و گوندێ مه ب تایبه‌تى بوویه پێشه‌یه‌كا سه‌ره‌كى و سالانه هزاران ته‌نێن سلكا ل گوندێ مه و گوندێن دى یێن سنوورێ به‌رێ گارێ دهێنه به‌رهه‌مئینان، ئه‌م وه‌كو جوتیارێن ده‌ڤه‌رێ دخوازین كو حوكمه‌تا هه‌رێما كوردستانێ هاریكاریا جوتیاران بكه‌ت ب تایبه‌تى د په‌یداكرنا بازاره‌كێ بۆ فرۆتنا به‌رهه‌مێن وان و دانا هاریكاریێن دى وه‌كو ده‌رمان و كێمیا و توڤێ باش).
زێده‌تر گۆت: (ئه‌ڤ ساله من زه‌ڤییه‌كا مه‌زن كریه سلك و به‌رهه‌مه‌كێ باش هه‌یه، نوكه وه‌رزێ ئینانه‌ده‌را سلكایه و ئه‌م رۆژانه پیكئابه‌كا سلكا دهه‌لكێشین و ل بازارێن دهۆك و شێلادزێ دفروشین، هه‌رچه‌نده كیلۆیا سلكا ئه‌رزانه به‌لێ وه‌ستيانا جوتیاران دئینیت ده‌رێ و به‌لاش ناچیت، نوكه كیلۆیا سلكا ب شێوازێ كۆم 750 بۆ هزار دینارایه).
رێبه‌ر رێكانى، خودانێ ئێك ژ بازارێن فرۆتنا به‌رهه‌مێن وه‌كو باقلك و شێلم و سلكایه ل شێلادزێ بۆ ئه‌ڤرۆ نیوز گۆت: (ل بازارێن ده‌ڤه‌را ئامێدیێ ب گشتى و شێلادزێ ب تایبه‌تى خه‌لك گه‌له‌ك حه‌ز ژ سلكا دكه‌ت ب تایبه‌تى سلكا گوندێ دێره‌شێ، ژبه‌ركو خه‌لكێ دێره‌شێ شاره‌زایه‌كا باش د چاندن و به‌رهه‌مئینانا وان هه‌یه و دزانن كه‌نگى بچینن و كه‌نگى ژى ده‌ربینن، ئانكو به‌رهه‌مێ وان درۆست پێدگه‌هیت ژ نوو ده‌ردئینن، دیسان سلكا دێره‌شێ ب ره‌نگ و تام و شێوازێ خوه جوانتر و خوشتره، ئه‌م ژى زێده‌تر سلكا دێره‌شێ دئینین و دفروشین و شه‌ڤانه دو سێ قازانێن وان دفروشم).
نيشاندان