ئه‌ڤرۆ نيوز:‏

حوکمەتا ھەرێما کوردستانێ بڕیارەک ل دۆر ھاتنوچوونا تڕۆمبێلێن وەزارەتان بۆ پشتی ‏دەواما فەرمی دەرکر و بەرپرسەکێ ھاتنوچوونێ دبێژیت، ھەر تڕۆمبێلەکا تابلۆیا حوکمەتێ ‏پێڤەبیت و باج نەبیت بۆ پشتی دەوامێ دێ ھێتە سزادان.‏

فازل حاجی، پەیڤدارێ ھاتنوچوونا پارێزگەھا ھەولێرێ بۆ رۆژناما ئەڤرۆ دیار کر کو ‏وەزارەتا ناڤخۆ بڕیارەک ل دۆر تڕۆمبێلێن حوکمەتێ یێن تابلۆیێ وان شین دەرکریە و ل ‏گورەی بڕیارێ ھەر تڕۆمبێلەکا تابلۆیا میری پێڤەبیت و پشتی دەواما فەرمی بھێتە دیتن دێ ‏ژ لایێ پۆلیسێن ھاتنوچوونێ ڤە دەست ب سەر دا ھێتە گرتن و ل گورەی قانوونێ دێ ‏سەرەدەری دگەل دا ھێتەکرن، چونکی نابیت ژبلی کارێ فەرمی یێ حوکمەتێ تڕۆمبێلێن ‏تابلۆیێن وان شین بۆ چو مەرەمێن دی بھێنە بکارئینان، بتایبەتی پشتی ب دووماھی ھاتنا ‏دەواما فەرمی.‏

ناڤھاتی ئاماژە دا وێ چەندێ کو ئەڤ بڕیارە ژ وان تڕۆمبێلێن حوکمەتێ ناگریت یێن باج ‏ھەی بۆ پشتی دەوامێ، چونکی ھژمارەکا فەرمانگەھێن خزمەتگوزاری ھەنە 24 دەمژمێران ‏کار دکەن، مینا پۆلیس و ساخلەمی و کارەب و چەندین فەرمانگەھێن دی، بەلێ بەرۆڤاژی ‏یێ دەستووری نەبیت بۆ پشتی دەوامێ دێ پشتی دەست ب سەر دا دھێتەگرتن دێ ھێنە ‏رەوانەکرن بۆ دادگەھێ.‏

ئه‌ڤرۆ نيوز:

مامۆستایەکێ زانکۆیێ ئاماژە بڤێ چەندێ دکەت، نابیت ‏ئیدی پارتی زێدەتر دەستھەلاتان ب ئێکەتیێ بدەت و ‏پێدڤیە گورەی کۆرسی و رێژا دەنگێن ئێکەتیێ سەرەدەری ‏دگەلدا بھێتەکرن نەک زێدەتر ھەروەسا دیارکر، رێژا ‏حەقیقی یا دەنگێن پارتی دیارە چەندە و نابیت ل سەر ‏حیسابا جەماوەرێ خوە پارتی پۆست و پلەیان بدەتە چو ‏لایەنەکێ دی.‏

دکتۆر سەباح سوبحی، مامۆستایێ زانکۆیێ بۆ رۆژناما ئەڤرۆ ‏دیارکر” یەکێتی وەک ھێزەکا سیاسی پێگەھێ خوە ھەیە ل ‏ھەرێما کوردستانێ، بەلێ پێدڤیە پشکداریا ئێکەتیێ گورەی ‏قەبارێ کۆرسیێن وێ بیت یێن د ھەلبژارتنێن پەرلەمانێ ‏کوردستانێ بدەستڤە ئینای، نابیت وەک بەرێ پارتی پلە و ‏پۆستێن زێدەتر بدەتە ئێکەتیێ، چونکە بەری نوکە ل زۆر ‏بیاڤاندا وەک ھێزەکا ھەڤپشک سەرەدەری دگەلدا کریە، ‏زۆر پۆست داینە ئێکەتیێ مافێ وان نەبوویە، ئیدی ھندەک ‏پۆست ھەبوون سالێن بۆری مینا پۆستێ جێگرێ سەرۆک ‏وەزیرێن ھەرێما کوردستانێ دەستھەلاتێن سەرۆک وەزیران ‏بکار دئینان، بۆ نموونە جێگرێ سەرۆکێ حوکمەتێ ‏دەستھەلاتێن دامەزراندنا فەرمانبەران و دانا پلەیێن تایبەت ‏ھەبوون، ھەتا گۆتارێن سەرۆک وەزیران ددان، بەلێ ‏بدیتنامن دڤێت ئێکەتی پشکداربیت د پێک ئینانا حوکمەتێ، ‏بەلێ وەک من ئاماژە بۆکری، کادر و ئەندامێن پارتی گازندە ‏ھەنە پارتی ھند گرنگیێ ب ئێکەتیێ نەدەتە ئێکەتیێ ‏گورەی ئەنجامێن ھەلبژارتنان بەھرا ئێکەتیێ چەندە ھند ‏پۆست و دەسھەلات ھەبن نەک زێدەتر.‏

دکتۆر سەباح سوبحی گۆتژی” دڤێت پارتی کار بۆ قۆناغا ‏داھاتی و ھەلبژارتنێن چوار سالێن داھاتی بکەت ھەتا وەکی ‏ھێزا ئێکێ یا عیراقێ و ھەرێما کوردستانێ بمینیت، دەرکرنا ‏ئێکەتیێ ل پڕۆسا سیاسیا ھەرێما کوردستانێ و حوکمەتا ‏ھەرێما کوردستانێ د جھێ خوەدا نینە، چونکە ئێکەتیێ مە ‏بڤێت و نەڤێت پێگەھێ خوە ھەیە ل دەڤەرێ، لێ تەنازۆلێن ‏پارتی ژی جھێ خوەدا نینە بۆ ئێکەتیێ، ژبەرکو قەبارێ ‏حەقیقی یێ پارتی دیاربو چەندە، پارتی شیا دگەل ھێزێن ‏دیکە یێن نێزیکی خوە ھەڤپەیمانیەکێ پێک بینە، پشکداریا ‏پارتی بتنێ د ھەلبژارتنێن ھەردو پەرلەمانێن عیراقێ و ‏ھەرێما کوردستانێ پێنگاڤەکا ئەرێنی بو، چونکە بۆ ھەموو ‏خەلکێ کوردستانێ و ھێزێن سیاسی خویابو رێژە و پێگەھێ ‏پارتی دیموکراتی کوردستان لھەرێما کوردستانێ و عیراقێ ‏چەندە و ئیدی چو کەس و لایەنەک نەشێت بێژیت پارتی ‏زێدەی رێژەیا خوە دەستھەلات ھەنە، ئەڤە جەماوەری ‏بڕیاردا دەستھەلاتێن پارتی چەندن و کۆرسیێن پارتی ل ‏ھەلبژارتنێن 30ی ئەیلوولێ دیاربوون.‏