ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ پلا گه‌رمێ يا ئه‌ڤرۆ وسوباهى ل پارێزگه‌ها دهۆكێ دياركرن.
ريڤه‌به‌ريا ناڤبرى به‌لاڤكر كو پلا گه‌رمێ ئه‌ڤرۆ پێنجشه‌مبى 6/9/2018 ل پارێزگه‌ها دهۆكێ دێ 39 بيت.
ئاماژه دا كو پلا گه‌رمێ يا سوباهى ئه‌ينيێ 7/9/2018 ل پارێزگه‌ها دهۆكێ دێ 38 بيت.
ئه‌ڤرۆنيوز:
رێبه‌رێ ره‌وتێ سه‌درى، موقته‌دا سه‌در، دكۆنگره‌كێ رۆژنامه‌ڤانى دا ئه‌ڤرۆ پێنجشه‌مبى 6/9/2018 ل دۆر كێشێن به‌سرا چه‌ندين داخوازى به‌رچاڤكرن وراگه‌هاند، هه‌كه نه‌هێنه بجهئينان، دێ مه هه‌لويسته‌كێ توند هه‌بيت كو د هزرا كه‌سێ دا نه‌بيت.
موقته‌دا سه‌در گۆت” داخوازا سزادان ولادانا وان به‌رپرسان دكه‌ين كو ئه‌گه‌رين كێشێن به‌سرا نه وهه‌ر ب خوه ده‌مێ ده‌ستهه‌لاتا وان يا ب سه‌رڤه‌چووى”.
گۆت ژى ” حوكمه‌تا عيراقێ شانده‌كێ تايبه‌ت بۆ وه‌لاتێن ده‌وروبه‌ر ڤرێكه‌ت تاكو پتر ئاڤێ بۆ عيراقێ به‌رده‌ن”.
رێبه‌رێ ره‌وتێ سه‌درى دياركر” خوه‌نيشانده‌ر مولكێ گشتى بپارێزن وخوه‌نيشادانێن ئاشتيانه ئه‌نجام بده‌ن وئێدى لايه‌ن وميليشيا وگه‌نده‌لكار ده‌ستێوه‌ردانێ دكاروبارێن وه‌لاتيان دا نه‌كه‌ن”.
ل دووماهيێ هوشدارى دا وگۆت” هه‌كه ئه‌ڤ چه‌نده نه‌هێنه بجهئينان دێ مه هه‌لويسته‌كێ توند هه‌بيت كو د هزرا كه‌سێ دا نه‌بيت”.
موقته‌دا سه‌در داخواز ژ هه‌موو باژێران كر پشته‌ڤانيا به‌سرا بكه‌ن وخوه‌نيشادانه‌كا سه‌رانسه‌رى رێك بێخن وگۆت” ل ده‌مه‌كێ دێ دێ ژڤانێ وێ خوه‌نيشادانا سه‌رانسه‌رى راگه‌هينين”.
سه‌در ديسا داخواز ژ هه‌موو خه‌لكێ عيراقێ كر هه‌وا كۆمكرنا هاريكاريان بۆ به‌سرا ئه‌نجام بده‌ن وهه‌موو پشكدار ببن، هه‌كه ب خوه ب تشته‌كێ كێم ژى بيت.
وەزاەرتا کارەبێ: دەمژمێرێن دانا کارەبا نشتیمانی دێ زێدە بن
ئەڤرۆ نيوز، نیوار محەمەد سەلیم:
ئاخفتنکەرێ ب ناڤێ وەزارەتا کارەبا ھەرێمێ راگەھاند کو د دەمێ چەند رۆژێن بھێت دا ژ ئەگەرێ کێمبوونا خواستا وەلاتیان ل سەر کارەبێ و ھاتنەخوارا پلێن گەرمێ دەمژمێرێن پێدانا کارەبا نشتیمانی دێ زێدە بن.
محەمەد ئەمین ھەورامی، بۆ رۆژناما ئەڤرۆ راگەھاند کو پێدانا کارەبێ ب وەلاتیان د رێیا سیمکارتی دا چوویە د وارێ بجھئینانێ دا و زێدەتر ژ 300 ملیۆن دۆلاران ژ لایێ حوکمەتێ ڤە بۆ ھاتینە دابینکرن.
ئاماژە ب وێ چەندێ ژی کر کو بۆدجە و گرێبەستا پرۆژەیی ھاتیە بجھئینان و ھەموو پشکدارێن کارەبێ ل سەرانسەری ھەرێما کوردستانێ دێ ڤەگریت کو نێزیکی ملیۆنەک و 500 ھزار پشکدارانە.
دا زانین ژی کو نوکە 35%ێ کارەبا ھەرێما کوردستانێ دھێتە دزین، ب جھئینانا پرۆەیی پێدانا کارەبێ ب سیمکارتی پێدانا کارەبا نشتیمانی ب وەلاتیان دێ زێدە بیت، ژ بەر کو ئەڤێن کارەب ب رەنگەکێ نەیێ شەرعی بری، ب کەیفا خوە کارەبێ د مەزێخن و ھەموو ژی ئەو جھێن مەزنن، ژ بەر ھندێ ھەکە ل سەر بھێتە ھژمارتن ئێدی ئەو دێ گەلەک کێمتر ژ وێ رێژێ کارەبێ مەزێخیت.
ئاخفتنکەرێ ب ناڤێ وەزارەتا کارەبا ھەرێمێ راگەھاند ژی کو پرۆژێ پێدانا کارەبا ب سیمکارتی قۆناغ قۆناغ دھێتە بجھئینان و ل سەر ئاستێ ھەموو پارێزگەھان کارێ خوە دکەن و نوکە ل چەند تاخێن باژێرێ ھەولێرێ دەسپێکریە و چوویە وارێ بجھئینانێ و پاشان ل پارێزگەھێن دھۆک و سلێمانی ژی دێ دەست پێ کەت.
پرۆژێ پێدانا کارەبێ ب سیماکارتی د دەمەکی دایە کو نوکە بەرھەمئینانا کارەبێ ژ لایێ وەزارەتا کارەبێ ڤە دو ھزار و 700 مێگاواتە و خواستا بکارئینانێ ژی ژ لایێ وەلاتیان ڤە نێزیکی پێنج ھزار مێگاواتایە.
دەربارەیی بھایێ کارەبێ ب رەنگەکێ سیمکارت و ب تایبەت شێوازێ مالان، بازرگانی و پێشەسازی و چاندنێ، محەمەد ئەمین ئاشکەرا کر کو ھەتا نوکە بەحس ل سەر بھایێ کارەبا ب شێوازێ سمکارتی نەھاتیە کرن، کا دێ جوداھی د ناڤبەرا ڤان جۆران دا ھەبیت یان ژی نە و گۆت: “دێ بزاڤ ھێتە کرن ب رەنگەکێ بیت کو ل گەل رەوشا وەلاتیان بگۆنجیت”.
ئەڤرۆ نیوز، نەوزاد ھلۆری:
ئەڤرۆ بەری نیڤرۆ ژ ئەنجامێ روودانەکا ترافیکێ لسەر رێیا گشتی دناڤبەرا قەزا سێمێل و کومەلگەھا دومیز دوو کەس برینداربوون.
دڤی واریدا ئازاد تەھا بەرپرسێ راگەھاندنا ھاتنوچۆنا دھۆکێ بۆ ئەڤرۆ نیوز گۆت: (ئەڤرۆ بەری نیڤرۆ ژ ئەنجامێ روودانەکا ترافیکێ دناڤبەرا دوو ترومبێلێن ژ جورێ نیسان و فاوا لسەر رێیا گشتی دناڤبەرا قەزا سێمێل و کومەلگەھا دومیز دوو کەس برینداربوون ).
زێدەتر گۆت: (بریندارێن رودانێ بو نەخوشخانێ ھاتینە رەوانەکرن و تیمێن ھاتنوچۆنێ ڤەکولینێ لسەر ئەگەرێن روودانێ دکەن).
ئه‌ڤرۆ نيوز:
ته‌هرانێ هه‌تا 4ى چريا دويێ مۆله‌ت دا وه‌لاتێن ئورۆپا كو گره‌نتيا به‌رده‌وامبوونا رێكه‌فتنا ئه‌تۆمى پێشكێش بكه‌ن، د وێ هه‌يڤێ دا سزايێن كو واشنتۆن ب سه‌ر په‌ترۆلا ئيرانێ دا سه‌پاندنيه دێ چنه د وارێ بجهئينانێ دا.
ئاژانسا بلۆمبێرگ ل سه‌ر زارێ جێگرێ وه‌زيرێ ژ ده‌رڤه يێ ئيرانێ عه‌باس عيراقچى به‌لاڤكر كو ئيرانێ ب روونى بۆ وه‌لاتێن ئورۆپا راگه‌هانديه كو هه‌كه به‌رژه‌وه‌نديێن وان يێن سه‌ره‌كى د چارچۆڤێ رێكه‌فتنا ئه‌تۆمى دا پێك نه‌ئينن، چو مفا ژ مانا وێ رێكه‌فتنێ نينه.
هه‌روه‌سا گۆتژى: “هه‌تا 4ى چريا دويێ مۆله‌ت هه‌يه، پشتێ وێ ب رۆژه‌كێ ژى چ بكه‌ن يا بێ مفايه”.
ناڤبرى ته‌كست ل سه‌ر وێ چه‌ندێ ژى كريه كو هه‌كه رێكه‌فتنا ئه‌تۆمى به‌رژه‌وه‌نديێن ئيرانێ يێن سه‌ره‌كى وه‌كو به‌رده‌وامبوونا فرۆتنا په‌ترۆلێ و سه‌ره‌ده‌ريا بانكێ و تشتێن دى مسۆگه‌ر نه‌كه‌ت، ته‌هران دێ ژ رێكه‌فتنێ خوه ڤه‌كێشيت، ژ به‌ر كو چو مفا نامينيت.
60 % خەلکێ ھەرێمێ دەیندارێن کارەبا گشتی نە
ئه‌ڤرۆ نيوز:
ژ ئەگەرێ قەیرانا دارایی یا ل سالا 2014 ب سەر ھەرێما کوردستانێ دا ھاتی و ھەتا نھا ب ھزارەھا خێزان ھەنە پارێ کارەبا گشتی نادەن و ل گۆرەی دووماھی ئامارێن وەزارەتا کارەبا حۆکمەتا ھەرێما کوردستانێ نھا 60% خەلکێ ھەرێمێ دەیندارێن کارەب گشتی نە و ب ئێک ترلیۆن دینار حۆکمەت و خەلک دەیندارێن کارەبا گشتی نە
محەمەد ئەمین ھەورامی، پەیڤدارێ وەزارەتا کارەبا حۆکمەتا ھەرێما کوردستانێ بۆ ئەڤرۆ دیار کر، ژ سالا 2014 و ھەتا نوکە ھژمارەکا زۆر یا خێزانان پارێ کارەبا گشتی نادەن و نھا ب ئێک ترلیۆن دینار خەلک و دەزگەھێن میری دەیندارێن حۆکمەتێ نە و حۆکمەت نەشیایە خوە 10% ژی ژ قەرێن خوە ژ وەلاتیان و دەزگەھێن حۆکمەتێ وەربگریت.
ئاشکرا ژی کر کو بەری ھاتنا قەیرانا دارایی ب تنێ 250 ملیار دینارێن حۆکمەتێ ل سەر خەلکی بووینە، بەلێ پشتی قەیرانا چار قاتی ئەو دەینە زێدەتر لێ ھاتیە و گۆت: نوکە حۆکمەتێ سیستەمێ قستان دایە کارە و ئەو وەلاتیێن پارەیەکێ مەزن دەین ل سەر ھەبیت، دشێن ھەیڤانە ب رێیا قست دەینێ خوە بدەت.
محەمەد ئەمین ھەورامی، پەیڤدارێ وەزارەتا کارەبا حۆکمەتا ھەرێما کوردستانێ ئاماژە دا وێ چەندێ، ھندەک خەلک ھوسا ھزردکەن کو رۆژەک دێ ھێت و حۆکمەت دێ ل خەلکی بۆریت و وی پارەی وەرناگریت، بەلێ حۆکمەتێ چو دەستھەلات نینن ل خەلکی ببووریت و ب چو رەنگان ژی ل خەلکی نابۆریت و ھەموو پارە و دەین ھاتینە تۆمارکرن و پێدڤیە خەلک و دەزگەھێن میری وی دەینی بدەن.
ئەو یەک ژی دیار کر کو ب دانانا بیڤەرێن کارەبێ چو زیان ب حۆکمەتێ ناکەڤن د بوارێ دەینان دا و ھەردەمێ ئەو سیستەمە کەفتە کاری ژی، خەلک ھەر دڤێت دەینێ خوە بدەت و چو پەیوەندیا پاشکەفتێ مۆچەیان ژی ب پارێ کارەبێ و دەینان ڤە نینە و گۆت: ل ھەرێما کوردستانێ ملیۆنەک و 500 ھزار بەشداربوویێن کارەبێ ھەنە.
پەیڤدارێ وەزارەتا کارەبا حۆکمەتا ھەرێما کوردستانێ دا زانین ژی کو مە نڤیسارەک بۆ ئەنجوومەنێ وەزیران ھنارتیە کو قەرێن کارەبا گشتی ژ پاشکەفتێ مۆچێ ماموستایان بھێتە بڕین، بەلێ ڤی بابەتی ھەتا نوکە چو بەرسڤ بۆ نەبووینە و گۆت: نێزیکی 300 ملیۆن دۆلاران دێ ل پرۆژەیێ دانان پیڤەرێن کارەبێ ھێنە مەزاختن.
ئەڤرۆ نيوز:
رێڤەبەرێ رێک و پرا ل پارێزگەھا دھۆکێ دیار کر، شەش رێیێن سەرەکی د ناڤبەرا دھۆکێ و مووسلێ دا ھەنە و دبێژیت: پشتی ھاتنا تیرۆرستێن داعشێ و داگیر کرنا پارێزگەھا نەینەوا و پاشی رزگارکرنا وێ پارێزگەھێ و روودانێن 16 ئوکتۆبەرێ و ھاتنا حەشدا شەعبی، ھەتا نوکە ژ سەرجەمێ وان شەش رێیان ب تنێ دو رێ ھاتینە ڤەکرن.
ئەندازیار دێوالی حەمێ بریندار، رێڤەبەرێ رێک و پرا ل پارێزگەھا دھۆکێ بۆ رۆژناما ئەڤرۆ خویا کر، ھەتا نوکە ژی حوکمەتا عیراقێ رێگریێ ل ڤەکرنا رێیێن د ناڤبەرا دھۆک و مووسلێ دا دکەت، لەو ژ سەرجەمێ شەش رێیێن سەرەکی د ناڤبەرا دھۆک و مووسلێ دا، ھەتا نکە ب تنێ رێیەکا سەرەکی و رێیەکا لاوەکی ھاتینە ڤەکرن و گۆت: “رێیا سەرەکی ژی ب تنێ بۆ ترۆمبێلێن بچووک دھێتە بکارئینان و چار رێ ژی ھەتا نوکە نەھاتینە ڤەکرن و ھاتنوچوون ل وان رێیان بۆ مووسلێ ب چو رەنگان ناھێتە کرن”.
ناڤھاتی ئاماژە ب وێ چەندێ ژی کر کو ھەتا نوکە رێیا رەبیعە و زۆمار و ناوەران و تلکێف ب شێوەکێ فەرمی نەھاتینە ڤەکرن، ب تنێ رێیا مووسل یا سەرەکی و باشیک ھاتینە ڤەکرن و گۆت: “دھۆکێ چو ئاریشە ل گەل ڤەکرنا وان رێیان نینە، بەلێ دەستھەلاتا مووسلێ یا سەربازیە و رێ نادەت ئەو رێ بھێنە ڤەکرن”.
ئەندازیار دێوالی گۆتژی: “داخستنا وان رێیان زیانەکا مەزن گەھاندیە وەلاتیان و خەلکێ ئاوارە، ھندەک وەلاتی چەند دەمژمێران دبڕن ھەتا دگەھنە جھێ خوە، ژ بەر نەڤەکرنا وان رێیان”.
ئه‌ڤرۆ نيوز:
موختارێ گوندێ حەردان ل قەزا شنگالێ بۆ رۆژناما ئەڤرۆ دیار کر کو تیمەکی ژ بەغدا قەستا دەڤەرا شنگالێ کریە و نوکە ل گوندێ حەردان پشکنینا DNA بۆ کەسوکارێن قوربانیێن کارەساتا شنگالێ دکەت ب مەرەما ڤەکرنا گۆڕێن ب کۆم.
سەعدون موراد قاسم، موختارێ گوندێ حەردان ل قەزا شنگالێ ئاشکرا ژی کر کو نوکە ل حەردان پشکنین بۆ وان کەسان دھێتە کرن؛ یێن کەسوکارێن وان ل کارەساتا شنگالێ بووینە قوربانی، ل تەباخا سالا 2014ێ ژ لایێ رێکخراوا تیرۆرستی یا داعش ڤە و گۆت: “نوکە پشکنینا DNA دەستپێکریە، ل دووڤ پێزانینێن مە بەغدا بزاڤێ دکەت بزانیت ئەو کەسێن ل کارەساتا شنگالێ ھاتینە شەھیدکرن و د ناڤ گۆڕێن ب کۆم دا ھاتینە ڤەشارتن کینە، داکو دەست ب کۆلانا وان گۆڕێن ب کۆم بھێتە کرن، ل دۆریانا حەردان ل قەزا شنگالێ سێ یان چار گۆڕێن ب کۆم ھەنە و ھەتا نوکە ھژمارا کەسێن تێدا ھاتینە شەھیدکرن ئاشکرا نەبوویە”.
ئەو ژی دیار کر کو د کارەساتا شنگالێ دا دۆرین 400 کەسێن خەلکێ گوندێ حەردان ژ ھەردو رەگەزان ھاتنە گرتن و رەڤاندن و بێ سەروشوونکرن، ب پشتەڤانیا نڤیسینگەھا رزگارکرنا رەڤاندیێن ئێزدی ھژمارەک ژ خەلکێ گوندێ حەردان ھاتینە رزگارکرن، لێ درۆین 60 ھەتا 70 زەلامان ھاتبوونە گرتن و ھەتا نوکە چارەنڤیسێ وان یێ دیار نینە.
موختارێ گوندێ حەردان خویا ژی کر، بەری تیرۆرستێن داعش ھێرشی سەر حەردان بکەن، دۆرێن دو ھزار کەسان ل گوندی د ناڤ 300 خانیان دا دژیان و بەردەوام گوندێ حەردان بەرفرەە دبوو، خەلکێ بۆ خوە خانی ئاڤادکرن و ژیانا خوە دبۆراند، لێ تیرۆرستێن داعش ژیان ل دەڤەرێ تێکدا و ھەتا نوکە دۆرێن 20 مالان یێن زڤڕینە حەردان یێن دیتر ھێشتا ئاوارەنە و د ناڤ کەمپان دا دژین.
ل دووڤ ئامارێن رێڤەبەریا گشتی یا کاروبارێن ئێزدیان ل ھەرێما کوردستانێ، رۆژێن ئێکێ ژ جینۆسایدا شنگالێ ھزار و 293 کەس ھاتینە شەھیدکرن و ھەتا نوکە 69 گۆڕێن ب کۆم یێن ھاتینە دیتن و 68 مەزارگەھێن ئێزدیان ژی ژ لایێ تیرۆرستێن داعش ڤە ھاتینە پەقاندن، دۆرێن 100 ھزار کەسان ژی کۆچبەر بووینە و یێن چووینە ژ دەرڤەی وەلاتی.
ئەڤرۆ نيوز:
سەرۆک کۆمارێ تورکیا رەجەب تەیب ئەردۆگان بۆ دەزگەھێن راگەھاندنا تورکیا ل دۆر رێککەفتنا بەری نھا یا د ناڤبەرا ئەمریکا و تورکیا دا ل دۆر منبجێ راگەھاند کو رێککەفتن تنێ ل سەر کاغەزێ مایە و د کریاری دا چو نەھاتیە کرن و گۆت: (بەرپرسێن ئەمریکی دبێژن ئەم و تورکیا ل منبجێ پێکڤە کار دکەین، لێ مخابن ھەتا نھا چو نەھاتیە کرن و تشتێن راگەھاندنا ئەمریکا بەحس دکەن وەسا نینە).
سەرۆک کۆمارێ تورکیا ئەو یەک ژی دیار کر کو رێککەفتنا مە و ئەمریکا ل دۆر منبجێ گرنگە، لێ ھەتا نھا چو نەھاتیە کرن و ئەمریکی بزاڤێ دکەن کو دەمی بکوژن دا رێ نەدەن ھێزێن مە بچنە منبجێ و ئەو یەک ژی ل دژی رێککەفتنا د ناڤبەرا مە دایە و گۆت: (ئەم ھێڤیدارین د کۆمبوونێن داھاتی یێن ل دۆر منبجێ دا ئەمریکا ل سەر سۆزا خوە بیت و ئاریشان بۆ مە دروست نەکەت).
ئەڤرۆ نيوز:
ل گۆر چەندین راپرسیێن نوو ل فرەنسا پێگەھێ سەرۆک کۆمارێ فرەنسا ئیمانوئێل ماکرۆنی گەلەک لاواز بوویە و ماکرۆنی ١٠% ژ پشتەڤانیا خەلکی ژ دەست دایە و ھەکە نھا ل فرەنسا ھەلبژارتن بھێنە کرن ماکرۆن نەشێت ببیتە سەرۆکێ فرەنسا.
دەزگەھێن راگەھاندنێ ل فرەنسا ژی دیار دکەن کو سەرۆکێ گەنج یێ فرەنسا نەشیایە پرسێن وەلاتی چارە بکەت و د سیاسەتا دەرڤە دا فرەنسا سەنگێ خوە یێ جاران نەمایە و ھەروەسا بێکاری ژی ل وەلاتی زێدە بوویە و ماکرۆنی سۆزێن خوە بجە نەئیناینە و خەلک ئێدی پشتەڤانیێ لێ ناکەن و سەنگێ خوە ژ دەست دایە.
نيشاندان