ئه‌ڤرۆ نيوز:
روسیا، ئیران و سووریا ئۆپەراسیۆنا ئدلبێ دەستپێ کرن و تورکیا ژ بەر ئۆپەراسیۆنا سەربازی نەرازیە و ژ روسیا دخوازیت کو ب دیالۆگێ پرسا ئدلبێ چارە بکەت و ل ھەمبەر دا روسیا ژی راگەھاند کو ئەو رژدن د پاقژکرنا ئدلبێ ژ تیرۆرستان و کۆمێن چەکدار دا.
سیرگێی لاڤرۆڤ وەزیرێ دەرڤە یێ روسیا د داخۆیانیەکی دا راگەھاند کو کۆمێن چەکدار و تیرۆرست ل ئدلبێ بۆ پاشەرۆژا سووریێ و ھەرێمێ مەترسیێن مەزن دروست دکەن و دڤێت بھێنە ژناڤبرن و گۆت: (فرۆکێن شەری یێن مە ناڤەندێن تیرۆرستان ل ئدلبێ بۆمبەباران کرینە و ئەڤە پێنگاڤا ئێکێ یە بۆ رزگارکرنا ئدلبێ ژ تیرۆرستان و پشتی پاقژکرنا ئدلبێ دێ قۆناغا چارەسەریا سیاسی دەستپێ کەت و وی دەمی گەلێ سووریێ دشێت بریارێ ل دۆر پاشەرۆژا وەلاتێ خوە بدەت).
لاڤرۆڤی راگەھاند ژی کو بەری نھا دەمەکی دەستنیشانکری داینە کۆمێن چەکدار و تیرۆرست کو ژ باژێرێ ئدلبێ و دەوروبەرێن وێ دەرکەڤن لێ ھەتا نھا ژی تیرۆرست ژ ئدلبێ ھێرشی دەڤەرێن دی یێن سووریێ دکەن و خەلکێ سڤیل دکوژن و گۆت: (پرانیا کۆمێن چەکدار و تیرۆرستێن ل ئدلبێ بیانینە و نە خەلکێ سووریێ نە و نابیت ئەو ل ئاخا سووریێ بمینن و بۆ ڤێ چەندێ ژی د ئۆپەراسیۆنا رزگارکرنا ئدلبێ دا دێ پشتەڤانیا حوکمەتا سووریێ کەین و دێ بنگەھێن تیرۆرستان ب فرۆکێن شەری بۆمبەباران کەین).
ھەر د ڤێ مژارێ دا وەزیرێ دەرڤە یێ ئیرانێ محەمەد جەواد زەریف ژی راگەھاند کو مافێ حوکمەتا سووریێ یە ھەموو ئاخا خوە ژ تیرۆرستان و کۆمێن چەکدار پاقژ بکەت و گۆت: (ئەم ب ھەموو رەنگەکێ پشتەڤانیێ ل ئۆپەراسیۆنا رزگارکرنا ئدلبێ دکەین و ل دووڤ ھزرا مە ئۆپەراسیۆن درەنگ کەڤتیە و کۆمێن تیرۆرست بەردەوام ژ ئدلبێ ھێرشی دەڤەرێن دی یێن سووریێ دکەن و ل ئدلبێ چالاکی و پیلانێن ھێرشێن خوە ئامادە دکەن و بۆ ڤێ چەندێ ژی دڤێت د زووترین دەم دا ئدلب بھێتە رزگار کرن).
د ڤێ بابەتێ دا وەزیرێ دەرڤە یێ چینێ جارەکا دی راگەھاند وان بەرھەڤیێن خوە تەمام کرینە دا کو پشکداریێ د ئۆپەراسیۆنا سەربازی یا ئدلبێ دا بکەن و گۆت: (یا گرنگ ئەڤە کو ئاخا سووریێ ژ ھەموو کۆمێن چەکدار و تیرۆرست بھێتە پاقژ کرن و ھژمارەکا زێدە تیرۆرستێن کۆما ئویگور ژی ل ئدلبێ دمینن و دڤێت کۆمێن تیرۆرست یێن ئویگور و یێن دی ب تەمامی بھێنە ژناڤبرن و بۆ ڤێ چەندێ ژی ئەم ئامادەینە ب فرۆکێن شەری و شیرەتکارێن سەربازی د ئۆپەراسیۆنا ئدلبێ دا جە بگرین).
ل ئالیێ دی جێمس جێفری نوونەرێ ئەمریکا بۆ قەیرانا سووریێ ژی راگەھاند کو دڤێت حوکمەتا سووریێ ژیانا خەلکێ سڤیل نەکەتە مەترسیێ و گۆت: (ئەم دووڤچوونا ئۆپەراسیۆنا ئدلبێ دکەین و دڤێت رژێما ئەسەد خوە ژ بکارئینانا چەکێن کیمیاوی دوور بکەت و ب چو رەنگەکێ ڤان چەکان بکار نەئینیت).
وەزیرێ دەرڤە یێ تورکیا ژی راگەھاند کو ئۆپەراسیۆنا ئدلبێ دێ بیتە ئەگەرێ کارەساتێن مرۆڤی ل سووریێ و ژ بەر ھندێ ژی جارەکا دی دژبەریا وەلاتێ خوە ل ھەمبەر ڤێ ئۆپەراسیۆنێ دوپات کر.
نيشاندان