ئەڤرۆ نیوز:
سیروان بارزانی بەرپرسێ مێحوەرێ گوێر – مەخمور یێ هێزێن پێشمەرگێن کوردستانێ راگەهاند کو لڤینێن چەکدارێ داعشێ ل دەڤەرێن قەراچ و چیایێ قەرەچووخ گەلەک زێدە بووینە و د ماوەیێ دو مەهێن بۆری دا د ئۆپەراسیۆنێن هەڤپشک یێن هێزێن پێشمەرگێن کوردستانێ و هەڤپەیمانان دا پتر ژ سەد چەکدارێن داعشێ هاتینە کوشتن.
سیروان بارزانی ئەو یەک ژی دیار کر کو هەماهەنگیەکا باش د ناڤبەرا هێزێن پێشمەرگێن کوردستانێ و تیمێن هەڤپەیمانان دا هەیە.
شێخان، بارزان مزوورى:
عه‌مید ئیحسان حسێن به‌رپرسێ دارستان و پاوانى ل ناحیا ئه‌ترۆش بۆ ئه‌ڤرۆ نیوز گۆت: (ل پێنج شه‌مبیا بورى رێكکه‌فتى 18/7/2020 ئاگره‌كێ مه‌زن ب ئاقارێ ده‌ڤه‌را ئه‌ترۆش كه‌فت ژ ئه‌گه‌ره‌كێ نه‌دیار پولیسێن دارستانێ دگه‌ل تیمێن ئاگرڤه‌مراندنا ئه‌ترۆش و قه‌سرۆك پێشمه‌رگه‌یێن زێره‌ڤانى هه‌تا نها ئه‌و ئاگر نه‌هاتینه كونترۆلكرن د ئه‌نجام دا زێده‌ترى هزار دونه‌مێن عه‌ردى یێن پیش و په‌له‌خى و پاوانى هاتینه سوتن دگه‌ل سوتنا سه‌دان ره‌زێن سمقامێ و یێن مێوێن ترى، كونترۆلكرنا ڤى ئاگرى ئاسته‌نگێن مه‌زن بۆ مه دروست كرن ژ به‌ر كۆ ئه‌و ئه‌لغامێن ل سه‌ر ده‌ستێ رژێما به‌عس هاتینه چاندن دڤى ئاگرى دا په‌قین به‌لێ سوپاس بۆ خودێ پولیس و تیمێن مه ب سلامه‌ت وان ته‌قینا ده‌رباز بون).
ناڤهاتى خویاكر ئه‌ڤ ئاگره ژ به‌ر پیش و په‌له‌خى بله‌ز به‌لاڤ بوو چیایێن پشتا ده‌ڤه‌را ئه‌ترۆش هه‌موویێ به‌لاڤ بوو هزاره‌ها دارێن كاژێن ژیێ وان 100 سالى هاتنە سوتن ئه‌و كاژێن وه‌كو دارستانه‌كا كه‌ڤنار دهاتنە هژمارتن ل ده‌ڤه‌را ئه‌ترۆش وه‌كو جهه‌كێ گه‌شتیارى یێ كه‌ڤنار دهات هژمارتن).
ناڤهاتى گۆت: (پێشبینى دهێتە كرن ئه‌و ئاگر ئه‌ڤرۆ بهێت كونترۆلكرن ب هاریكاریا تیمێن به‌شدار و وه‌لاتیێن ده‌ڤه‌رێ).
ئەڤرۆ نیوز:
پەیڤدارێ وەزارەتا دەرڤە یا عیراقێ دیار دکەت کو چو رێککەفتن د ناڤبەرا تورکیا و حوکمەتا عیراقێ دا ل دۆر ئۆپەراسیۆنا تورکیا ل هەرێما کوردستانێ نەهاتینە کرن و هەکە تورکیا هێرشێن خوە نەدەتە راگرتن عیراقێ گەلەک کارت هەنە کو ل دژی تورکیا بکار بینیت.
ئەحمەد سەحاف دیار ژی دکەت کو پێدڤیە تورکیا رێزێ ل سەروەریا عیراقێ بگریت و نابیت ب چو رەنگەکێ تورکیا ئاخا عیراقێ داگیر بکەت و عیراق دێ گەلەک کارتان ل دژی تورکیا بکار ئینیت.
ئه‌ڤرۆ نیوز:
پارێزگارێ دهۆكێ دیاركر پرۆژه‌یێ ده‌ڤه‌را پیشه‌سازیا خوراكی ستراتیژیه ل هه‌رێما كوردستانێ.
عه‌لی ته‌ته‌ر پارێزگارێ دهۆكێ راگه‌هاند دڤان 10 رۆژان دا سێ پرۆژه‌یێن گرنگ ل سه‌ر ئاستێ هه‌رێما كوردستانێ هاتنه دامه‌زراندن، ب وێ هیڤیێ كۆ پرۆژه دێ به‌رده‌وام بن كارتێكرنا خوه هه‌بیت ل سه‌ر ژیانا خه‌لكی و ده‌ستخوشیێ ل ئه‌وان كه‌سان دكه‌ین یێن كۆ پرۆژه‌یێ بجهـ و دادمه‌زرینن.
پارێزگاری دهۆكێ ئه‌و چه‌نده ژی راگه‌هاند پرۆژه‌یێ ده‌ڤه‌را پیشه‌سازیا خوراكی ل دهۆكێ ل سه‌ر 1423 دونه‌مێن عه‌ردی كۆ زیده‌تره ژ 275 كارگه‌هێن جودا جودایێن پیشه‌سازیا خوراكی دناڤ دا دهێنه دامه‌زراندن،
ته‌ته‌ر پارێزگارێ دهۆكێ ئه‌و چه‌نده دا زاینن كۆ پرۆژه‌یێ ده‌ڤه‌را پیشه‌سازیێ پرۆژه‌یه‌كێ ستراتیژی یه و ل ده‌مه‌كێ نێزیك دا دێ كارتێكرنا خوه هه‌بیت ل سه‌ر پیشه‌سازیا خوراكی.
ئەڤرۆ نیوز:
عەبدولفەتاح سیسی سەرۆکێ مسرێ پرۆژا دەستێوەردانێ سەرەدانا ل لیبیا هنارتە پەرلەمانێ وی وەلاتی دا گەنگەشە ل سەر بهێتە کرن و پشتی پەرلەمان رازی بیت وی دەمی سەرۆکێ مسرێ دێ ئەو دەستهەلاتە هەبیت کو بریارا دەستێوەردانا سەربازی بدەت.
چاڤدێرێن سیاسی ژی دیار دکەن کو مسر خوە بۆ شەرەکێ ل لیبیا بەرهەڤ دکەت و پرانیا وەلاتێن عەرەبی ب تایبەتی ژی سعوودیێ و ئیمارات پشتەڤانیێ ل مسرێ دکەن.
ئەڤرۆ نیوز، عەلی حاجی:
ئێک ژ فەرماندەیێن هێزێن پێشمەرگەیێ کوردستانێ بۆ ئەڤرۆ نیوز دیار کر هێزێن پێشمەرگێ کوردستانێ یا سەر ب فەرماندەیا دهوکێ بەردەوامن ل سەر زێدەکرنا بارەگایێن خوە ل دەڤەرێن سنوری دناڤبەرا کوردستانێ و تورکیا دا ژ بۆ زێدەتر پاراستنا وان سنوران .
زێدەتر رائید جەمال سیاری گۆت: (پشتی دەستپێکرنا ئوپەراسیونا سوپایێ تورکیا ل دژی هێزێن پەکەکێ ل سنورێ دەڤەرێن زاخۆ، ل دووڤ بریارەکا وەزارەتا پێشمەرگەی وەکو فەرماندەیا دهوک یا هێزێن پێشمەرگێ کوردستانێ رابووینە ب زێدەکرنا بارەگایێن خوە ل ناحیێن دەرکارێ و باتیفا و هەر دیسان ل دەڤەرێن سلێڤانەیان یا سەر ب ناحیا رزگاری ڤە ل زاخۆ کو ب رەنگەکێ ل درێژیا وان دەڤەران کو جودا ژ بارەگایێن کەڤن مە ١٠ بارەگایێن دیتر داناینە و هێزا پێشمەرگەی راستەوخوە چاڤدێریا وان دەڤەران دکەت دا کو ئەو دەڤەر نەکەڤنە بن توپبارانا فروکە و سوپایێ تورکیا و پاراستنا ئەمنیەتا وان دەڤەران د ستویێ هێزێن پێشمەرگەی دایە).
ناڤبری خویا کر بۆ ڤێ قوناغێ بریار ل سەر زێدەکرنا ١٠ بارەگایێن نوو هاتیە دان و هەر دەمێ بریار لدور زێدەکرنا بارەگایان هاتە دان بێی دو دلی دێ بارەگایێن خوە زێدەتر کەین و ل سنورێ ناحیا کانی ماسێ ژی هێزێن زێرەڤانی ژی هندەک بارەگایێن خوە داناینە دا کو ئەو دەڤەر بهێنە پاراستن و وەلاتیێن مە نەکەڤنە بن هەرەشەیا هەر هێزەکێ دا کو ل دەرڤەی کونترولا حکومەتا هەرێما کوردستانێ بیت.
ئەڤرۆ نیوز، عەلی حاجی:
دکتور هوگر تاهر راگرێ ڤەکولتیا زانستێن مروڤایەتی ل زانکویا زاخۆ بۆ ئەڤرۆ نیوز دیار کر ل دۆر پێڤاژویا مێژویا کوردان مە دخواست کارەکێ ئەنجام بدەین کو تایبەت بیت ب سەرکردەیێن کاریگەرێن کوردان ژ بەر کو دهێتە گوتن کو کوردان مێژوویا خو یا تایبەت نینە.
زێدەتر دکتور هوگر تاهر گۆت: (د وێ پێڤاژویا مێژوویا کوردان چەند تابلویەک هاتنە نیشان دان کو ب مێژوویا راستەقینەیا کوردان ڤە گرێدای بوو کو ژ وان ژی میر و سەرکردە تێدا هەنە و ئەڤە ئەو کەسەنە کو کارتێکرنەکا باش ل سەر مێژوویا کوردان هەیە و هەر کەسەکێ ڤان وێنەیان ببینیت ژی دێ هەستەک ل دور مێژوویا کوردان بۆ دروست بیت و ئەو هەشت تابلویە ژی پشتی ڤێ چالاکیا مە دێ دناڤ زانکویا زاخۆ دا مینن ژ بەر کو ئەو هەشت سەرکردە خودانێن مێژوویەکا مەزنن و ئەڤ هزرە ژی ژبەریا هاتنا کورونایێ پەیدا ببوو بەلێ ژ ئەگەرێ کورونایێ هاتبوو پاشئێخستن).
ناڤبری گۆت ژی کەڤالێن گەلەک کەسایەتیێن دیتر ل بەر دەستێ مە هەبوون بەلێ بۆ قوناغێ مە کەڤالێن هەشت کەسان د مێژوویا جودا دا هەلبژارتن و ئەز باوەر ناکەم پێشتر کارەکێ ب ڤی رەنگی ل زانکویەکا دیتر ل کوردستانێ دا هاتبیتە ئەنجام دان .
ئه‌ڤرۆ نیوز:
د رێ و رسمێن به‌رێ بنیاتێ پرۆژه‌یێ ده‌ڤه‌را پیشه‌سازیا خوراكی ل پارێزگه‌ها دهۆكێ، وه‌زیری پیشه‌سازیا حوكمه‌تا هه‌رێما كوردستانێ راگه‌هاند گه‌شه‌كرنا كه‌رتێ پیشه‌سازیێ دبیته ئه‌گه‌ر بۆ كێمكرنا بێكارێ و پێشڤه‌برنا داهاتێ ناڤخۆ و وه‌لات ژ هاوه‌رده‌كرنێ ب بیته هنارده‌كار.
كه‌مال موسلیم وه‌زیرێ پیشه‌سازیا حوكمه‌تا هه‌رێما كوردستانێ راگه‌هاند د كابینه‌یا نه‌هێ دا پێنج ده‌ڤه‌رێن پیشه‌سازی یێن خوراكی و شه‌ش ده‌ڤه‌رێن پیشه‌شسازی یێن بووینه جهێ گرنگی پێدانا مه، ده‌ڤه‌رێن پیشه‌سازییێ ستینه‌كا بهزا ئابووری یه د هه‌ر وه‌لاته‌كی دا، هه‌كه ل ئه‌ڤان ده‌ڤه‌ران هه‌موو خزمه‌تگۆزاریی تێدا بهێنه دابینكرن، دبنه ئه‌گه‌رێ راكێشانا وه‌به‌رهێنان و سه‌رمایه‌داران تاكو كار خانه‌یان دا بمه‌زرینن، پیشه‌سازی دبیته ژێده‌ره‌ك ژبووی وه‌لات پشت به‌ستنێ بتنێ ل سه‌ر ئێك ژێده‌ریا داهاتی نه‌كه‌ت، ئه‌ڤ كه‌رته گه‌شه‌یێ بكه‌ت، دێ بیته ئه‌گه‌رێ كێمكرنا بێكاریێ و پێشڤه‌برنا داهاتێ ناڤخۆ و وه‌لاتی ژ هاوه‌رده‌كرنێ بكه‌ته هه‌نارده‌كار و پێدڤیێن ناڤخۆ بهێنه دابینكرن و گرنگه بۆ دابینكرنا ئاسایشا خوراكێ وه‌لاتی.
وه‌زیرێ پیشه‌سازیا هه‌رێما كوردستانێ ئه‌و چه‌نده ژی راگه‌هاند داخازێ ژ سه‌رۆكێ حوكمه‌تێ دكه‌م چه‌وا پشته‌ڤان بوو بۆ پێشڤه‌برنا ئه‌ڤی كه‌رتی هوسا پشته‌ڤان بیت بۆ دامه‌زراندنا ئه‌ڤان ده‌ڤه‌رێن پیشه‌سازیێ ل ته‌ڤایا كوردستانێ، هه‌ولده‌ین ئه‌ڤان جۆرێن پرۆژه‌یان ژی ل باژێرێ هه‌له‌بجه ژی دابمه‌زرینن كۆ ده‌ڤه‌ره‌كا پیشه‌سازی ل وێرێ د به‌رنامه‌ی دایه ئه‌و ژی ده‌ڤه‌ره‌كا پیشه‌سازیا گرنگه.
نيشاندان