ئه‌ڤرۆ نیۆز، عه‌زیز هه‌ورامی:
له ده‌ستووری هه‌میشه‌ی عێراق هاتووه هه‌رێمه‌كان مافی خۆیانه ده‌ستووری تایبه‌ت به‌خۆیان هه‌بێت، سیاسه‌ت مه‌داران و شاره‌زایانی ده‌ستووری ده‌ڵێن، كورد ململانێ ناوخۆی خۆی هۆكاربووه نه‌بێته خاوه‌ن ده‌ستووری خۆی، ده‌ستوور شه‌رعییه‌تی گه‌وره‌تر ده‌دات به پێگه‌ی قه‌واره‌ی كوردستان له‌سه‌ر ئاستی نێوده‌وڵه‌تی.
دكتۆر مه‌حموود عوسمان سیاسه‌ت مه‌داری دیاری كوردستان، به ئه‌ڤرۆ نیۆز ڕاگه‌یاند:” ده‌ستووری هه‌میشه‌ی عێراق مافی به‌هه‌رێمی كوردستان داوه ده‌ستووری خۆی هه‌بێت ناكۆكی خۆمان بووه تاكو ئێستا نه‌بوینه‌ته خاوه‌ن ده‌ستوور، گرنگه بۆ هه‌رێمی كوردستان ببێته هه‌رێمێكی ده‌ستووری، سه‌نگ و قورسایی زیاترده‌بێت له‌سه‌ر ئاستی وڵاتانی ناوچه‌كه و جیهان،ڕه‌شنوسێكی ده‌ستوریش نوسراوه به‌ڵام حزبه‌كان له‌سه‌ری ناكۆكبوون نه‌خرایه ده‌نگدانه‌وه بۆ په‌سه‌ندكردنی له‌لایه‌ن هاوڵاتییانه‌وه بۆیه پێویسته هه‌موولایه‌ك هه‌وڵبده‌ن كوردستان بكه‌نه خاوه‌نی ده‌ستووری خۆی”.
مه‌حموود عوسمان ئاماژه‌ی به‌وه‌شكرد:”ده‌ستوور ده‌سه‌ڵاتی سه‌رۆكایه‌تییه‌كان و سنووری هه‌رێمی كوردستان دیاری ده‌كات و ده‌ستوور پێوه‌ندی هه‌رێم و ده‌وڵه‌ته‌كان ڕێكده‌خات و هه‌ركه‌س و حزبێك ناتوانێت پێوه‌ندی له‌گه‌ڵ وڵاتان هه‌بێت یاسا ته‌واوی ده‌سه‌ڵاته‌كان ڕێكده‌خاته‌وه له ناكۆكییه‌كان دادگای باڵا ده‌بێت و ناكۆكییه‌كان یه‌كلای ده‌كاته‌وه چوارچێوه‌ی یاسایی ده‌بێت،بۆیه پێویسته په‌له بكرێت له‌وه‌ی كوردستان ده‌ستووری خۆی هه‌بێت”.
نيشاندان