ئه‌ڤرۆ نيوز:

نوونەرێ پارتیا ماف و ئازادیان ل ھەرێما کوردستانێ دیار دکەت کو پشتی ئەردۆگانی ل گەل پارتیا بزاڤا نەتەوەپەرست ھەڤپەیمانی دروست کری نھا ئەردۆگان ب ھەموو رەنگەکێ خوە ژ چارەکرنا پرسا کوردی دوور دکەت و مخابن ب ھەلویست و سیاسەتا نھا کو پەکەکێ برێڤە دبەت ژی پرسا کوردی ناھێتە چارەکرن و مخابن دێ بێژم پاشەرۆژا تورکیا و کوردان باش نینە.

زانا سەزەن نوونەرێ پارتیا ماف و ئازادیان (HAK-PAR) ل ھەرێما کوردستانێ د دیدارەکا تایبەت دا ل گەل رۆژناما ئەڤرۆ بەحسێ رەوشا نھا یا تورکیا و پرسا کوردی و ھەروەسا پەیوەندیێن تورکیا و ئەمریکا کر و دیار کر کو ناکۆکیێن ئەمریکا و تورکیا ستراتیژی نە و تشتێ نھا دیار دبیت تورکیا رۆژ ب رۆژێ ژ ئەمریکا و وەلاتێن رۆژئاڤایی دوور دکەڤیت و خوە نێزیکی روسیا و ئیرانێ دکەت، ئەو یەک ب چو رەنگەکێ ژ ئالیێ ئەمریکا و وەلاتێن رۆژئاڤا ڤە ناھێتە قەبوول کرن و ژ بەر ھندێ ژی نھا ئەمریکا ب فەرمی دەست ب سزادانا تورکیا یا کری و گۆت: (تورکیا ب فەرمی ئەندامێ ناتویێ یە و وەلاتێن ئەندامێن ناتۆ ژی قەبوول ناکەن کو تورکیا خوە نێزیکی روسیا و ئیرانێ بکەت. چونکو روسیا و ئیران دوژمنێن ستراتیژی یێن ئەمریکا و وەلاتێن رۆژئاڤا نە و نابیت تورکیا خوە نێزیکی وان بکەت، ژ بەر ڤێ یەکێ ژی نھا ئەمریکا دەست ب سزادانا تورکیا کریە و بابەتێ گرتنا قەشەیێ ئەمریکا کو ئەمریکی دبێژن مە ژ بەر ھندێ دەست ب سزادانا تورکیا یا کری ژی بەھانەیە و بابەت گەلەک ژ ھندێ مەزنترە، چونکو ناکۆکیێن تورکیا و ئەمریکا نھا ستراتیژی نە و ئەز باوەرم دێ ئەڤ قەیرانا نھا یا د ناڤبەرا ئەمریکا و تورکیا دا بەردەوام بیت).

نوونەرێ پارتیا ماف و ئازادیا ل ھەرێما کوردستانێ ئەو یەک ژی دیار کر کو ھەکە تورکیا بخوازیت خوە ژ ڤێ رەوشێ قورتال بکەت بەری ھەر تشتەکێ دڤێت تورکیا پرسا کوردی چارە بکەت، مە گەلەک جاران یا گۆتی ھەکە پرسا کوردی ل تورکیا بھێتە چارەکرن دێ گەلەک دەرگەە بۆ تورکیا ڤەبن و دێ تورکیا بەر ب وەلاتەکێ دیموکرات و پێشکەفتی ڤە بچیت، لێ مخابن رەوشا نھا یا تورکیا بەرۆڤاژی ڤێ یەکێ یە و تورکیا ب تایبەتی ژی سەرۆک کۆمار ئەردۆگانی چو بەرنامە بۆ چارەکرنا پرسا کوردی نینن و تورکیا رۆژ ب رۆژێ پتر بەر ب سیستەمەکێ گرتی و دکتاتۆری ڤە دچیت و ئەو یەک ژی بێگومان مەترسیا خوە بۆ ھەموو رۆژھەلاتا ناڤین یا ھەی و گۆت: (ئەمریکا و پرانیا وەلاتێن ئورۆپا ژی ڤێ دزانن و ھەکە نھا رێگری ل ئەردۆگانی نەھێتە کرن ئەز باوەرم د پاشەرۆژێ دا دێ ئەردۆگان تورکیا بەر ب چارەنڤیسەکێ نەدیار ڤە ببەت و بێگومان دێ بیتە ئەگەرێ ھندێ کو رەوشا رۆژھەلاتا ناڤین ژی پتر ئالۆز ببیت).

زانا سەزەن ئەو یەک ژی دیار کر کو ئەمریکا نھا گەفان ل تورکیا دکەت کو دڤێت خوە ژ ئیرانێ دوور بکەت، مخابن ئەردۆگان ڤێ یەکێ قەبوول ناکەت و دبێژیت ئەم ژی دێ ئەمریکا سزا دەین، ئەز باوەرم ھەکە رەوش وەسا بەردەوام بکەت دێ ئەمریکا دەست ب پێنگاڤێن دیتر ژی کەت و دێ تورکیا تووشی قەیرانەکا مەزن یا ئابووری بیت و گۆت: (ئەز دشێم بێژم تورکیا دێ تووشێ چارەنڤیسێ نھا یێ ئیرانێ بیت و ئەو یەک دێ کارتێکرنەکا خراب ل جڤاکێ تورکیا کەت، چونکو تشتێ نھا دیارن ئەردۆگانی چو بەرنامە بۆ چارەکرنا پرسا کوردی و پرسێن دی یێن تورکیا نیننو بۆ ھەموو ئالیەکێ ژی دیارە کو تورکیا ئەڤ شیان نینن بشێت شەرێ ئەمریکا بکەت).

ناڤبری د دووماھیا ئاخڤتنا خوە دا ئەو یەک ژی دیار کر کو چارەکرنا پرسا کوردی ل تورکیا دێ ب رێیا سیستەمەکێ فیدرالی بیت وەکو ھەرێما کوردستانێ، ھەرچەندە ناکۆکی د ناڤبەرا ھەرێما کوردستانێ و عیراقێ دا گەلەکن لێ وەکو سیستەم ئەم دبێژین ھەتا کورد ل تورکیا نەگەھنە مافێن خوە و ئیدارا خوە نەکەن پرسا کوردی چارە نابیت و گۆت: (پرسا کوردی ل تورکیا ب شەری چارە نابیت و دڤێت ب رێیا دستووری و ل پەرلەمانێ تورکیا بھێتە چارەکرن و کورد بگەھنە مافێن خوە یێن رەوا).