ئه‌ڤرۆ نيوز:‏

سەرۆکێ دەستەیا بلندا بنگەھێ لالش یێ رەوشەنبیری و جڤاکی ل دھۆکێ دیار ‏کر کو پشتی بۆرینا چار سالان ل سەر جینۆسایدا شنگالێ، رەوشا شنگالێ ب ڤی ‏رەنگی نامینیت و سەرکردایەتیا کوردستانێ دەستبەرداری شنگالێ نابیت و ‏دبێژیت: ئەڤە چار سالا ل سەر جینۆسایدا شنگالێ بۆرین و ھێشتا دۆرێن سێ ‏ھزار ئێزدیان ژ زارۆ، زەلام و ژنان د بێ سەروشوونن، پتری (200) ھزار ئێزدی ‏ھێشتا د کەمپان دا دژین و ئاوارەنە.‏

شێخ شامۆ، سەرۆکێ دەستەیا بلندا بنگەھێ لالش یێ رەوشەنبیری و کۆمەلایەتی ‏ل دھۆکێ دیار کر کو ئەڤ سالە کارگێڕیا پارێزگەھا دھۆکێ ل گەل دام و ‏دەزگەھێن پەیوەندیدار و بنگەھێ لالش ل سەر ئاستەکێ بلند ل پارێزگەھا ‏دھۆکێ، سالڤەگەڕا چارێ یا جینۆسایدا شنگالێ دێ ھێتە ساخکرن و گۆت: ‏‏”بڕیارە ل ئێڤاریا ئەڤرۆ 2/8/2018 سالڤەگەڕا چارێ یا جینۆسایدا شنگالێ ب ‏چەند چالاکیان و ب پشکداریا رزگاربوویێن ئێزدی بھێتە ساخکرن”. ‏

گۆتژی: “ھەکە ھەوێن قرکرنێ یێن ل بەرێ تووشی ئێزدیان بووین ژ بەر ئایینی ‏بن، ئەگەرێن نەدیار ل پشت ڤێ کارەساتا داویێ نە، ل پێشیێ ھێرشکرنا سەر ‏ھەبوونا ئێزدیان ژ بال گرۆپێن ئیسلامی یێن رادیکالێن توندرەو ڤە یێن کوشتن ‏و سەرژێکرن و کەنیزێ دکەن، دیسا کۆنترۆلکرنا پێگەھێ شنگالێ یێ ستراتیژی ب ‏پشتەڤانیا ھەوالگێریا ھەرێمی کو ئەڤ روودانێن ڤێ داویێ سەلماندن پیلانەکا ‏ھەوالگیریا ھەرێمی دڤیا چەند ئارمانجان ب دەستڤە بینیت، ژ وانا کێمکرنا رێژا ‏ئاکنجیێن ئێزدی و گرتنا ئالیێ رۆژائاڤایێ باشوورێ ھەرێما کوردستانێ، ھەموو ‏دزانن کو دەڤەرێن ئێزدیان پشکەکا دیرۆکی نە و ژ کوردستانا دەیک نائێنە ‏ڤەقەتاندن، پاشی کوردستان یا ئارمانج کری بوو پشتی ئێزدیێن بێ گونەهـ”.

شامۆی ئاشکرا ژی کر کو ئەو جوگرافیا کوردێن ئێزدی تێدا دژین وەکر، ئەو ‏باجەکا مەزن د درێژاھیا چەرخێن بۆری دا بدەن، بەلێ خەلکێ شنگالێ ئەڤ ‏ھەموو بارێ گران ھەلگرت و گۆت: “ب مخابنی ڤە ل دەمێ رزگارکرنا شنگالێ ژ ‏دەستێ گرۆپێ داعش ل سەر دەستێ ھێزێن پێشمەرگێ قارەمان و ب پشتەڤانیا ‏ئاسمانی یا فڕۆکێن ھەڤپەیمانیا نێڤدەولەتی، پیلانێن ھەوالگێری یێن ھەرێمی ژ ‏ناڤبرن، پاشی شنگال بوو گۆڕەپانا بەرھنگاربوون و ھەڤڕکیێ ل سەر دەستھەلاتێ ‏د ناڤبەرا پڕانیا ھێز و گرۆپێن ھەرێمی دا، ئەوێن کو بۆ چاڤێن تاری یێن ‏خەلکێ شنگالێ و خزمەتکرنا وێ ھاتبن، بەلێ ب تنێ ژ بۆ پێگەھێ وێ یێ ‏جوگرافی ھاتینە”.‏

شێخ شامۆ گۆتژی: “رەوش ل شنگالێ وەکو خۆ نامینیت، چنکو سەرکردایەتیا ‏سیاسی یا کوردستانێ گرنگیەکا زۆر ددەتە شنگالێ، د سەر ھەر کاودانەکی ڕا ‏دەستان ژێ بەرنادەت، سەرۆک مەسعود بارزانی گرنگیەکا تایبەت ددەتە شنگالێ و ‏خەلکێ وێ، دیسا مە ھەڤال ل ئورۆپا و ئەمریکا ھەنە، ئەو باش ئاگەھدارن ل ‏سەر رەوشێ، ئەم دبینین پرۆژێن ئاڤەدانیێ و سەقامگیریێ بۆ شنگالێ ھەنە، بەلێ ‏ئەڤ چەندە گرێدای پێشھات و رێککەفتنێن د ناڤبەرا ھەولێر و بەغدا دا دھێنە ‏کرن”.‏

خویا ژی کر کو ل سەر مە ئێزدیان پێدڤیە ھەدارێ بکێشین و خودان ئیرادەکا ‏بھێز بین، شاشیان دوبارە نەکەینە ڤە، ب بێھنفرەھی پێشدا بچین، باش بزانین ‏ھندەک ھەنە پلانان بۆ ب دەستڤەئینانا ئارمانجێن خوە ل سەر کیستێ مە و ‏برینێن خەلکێ مە ددانن، ب بەلگەڤە پرسا سۆتنا دەنگێن ب ھزاران دەنگدەرێن ‏خەلکێ مە د کەمپێن ئاوارەبوونێ دا وەکو جینۆسایدەکا ھەلبژارتنان بوو ھات ‏پشتی جینۆسایدا ئەردی و مرۆڤی، ئەو ژی ژ بۆ کێمکرنا پێگەھێ پارتی ‏دیموکراتی کوردستان بوویە کو دەڤەرێن ئێزدیان ژ گرنگترین پێگەھێ پارتی نە.‏

شێخ شامۆ ل دووماھیێ دیار کر کو بابەتێ گرتیێن ئێزدی ناھێتە ژبیرکرن و ‏گۆت: ” ئەم دوپات دکەین کو ل سەر جڤاکێ ئێزدی ب بۆچوونێن خوە یێن ‏جوداڤە رێزێ ل رەڤاندیان بگرن، ئەو شەرەفا مەنە، شانازیێ پێ دبەین، دوپات ‏دکەین کو دیرۆک دلۆڤانیێ ب کەسێ نابەت یێن دەستدرێژی کرینە سەر ‏رەڤاندیێن ئێزدی،‎ ‎ژ بەرکو ئەڤ کارێن ھۆڤانە و دڕندانە دقانوونا جیھانا سەردەم ‏دا نەماینە، بەلێ ئەو ژ دەمەکی بۆ دەمەکێ دی ل نک گەل و چینێن جودا دیار ‏دبنە ڤە”. ‏

ئه‌ڤرۆ نيوز:

پشتی ھەلبژارتنێن ھەرێما کوردستانێ نێزیک بووین، گەشتا سیاسی یا ھاڤین و زڤستانێ ‏دەپیکر، ھە نوکە دناڤا رێزێن ھەڤپەیمانی بۆ یموکراسی و دادپەروەری و بزاڤا گۆڕان و ل سەر ‏ئاستێن بلند، دەست ژکارکێشانا سیاسی دەستپێکرن، ئێکەتی نیشتمانی کوردستانی دبێژیت ھەر ‏کەسەکێ ڤەگەریت دێ پلە و پۆستە بۆ ھەبن. ‏

مام رۆستەم ئێک ژ وان کەسان بوویە کو ھەڤالەکێ نێزیکێ نەوشیروان بوویە، ل ‏‏25-7-2009 ، ل گرێ زەرگەتە ل سلێمانبێ دامەزرێنەرێ بزاڤا گۆڕان بوویە، و ھەردەم ‏ھەوار راگەھاندنا ھەلبژارتنان بۆ گۆڕانێ کریە، بەلێ نوکە ل مال روونشتیە و چو پەیوەندی ‏ب گۆڕانێ ڤە نەمایە.‏
ھەر ددەمێ بۆری دا و ھەبوونا کێشێن ناڤخوەیی گۆڕان پشکەکا مەزنا ھەودارێن و پشتەڤانێن ‏وی حزبێ دەستبەرداری کارێن حزبی بووینە، کو دیارترین کەس عوسمان حاجی مەحمود ‏ئەندامێ جڤاتا خانا ڕاپەرین و عەبدوللا کویخا موبارک ئەندامێ جڤاتا نشتیمانی، دەست ژ ‏بزاڤا گۆڕان بەردان. ‏
مامو رۆستەک بۆ رۆزناما ئەڤرۆ گۆت: نوکە من دەست ژ بزاڤا گۆڕان بەردایە، و چوو ‏پەیوەندی من ل گەل گۆڕانێ نەماینە، و ل گەل چو جزبێن سیاسی نینە بتنێ ل مال ‏روونشتیە.‏
دلشاد عەبدولرەحمان کو بەری نوکە شیرەتکارێ مەکتەبا سیاسی یا ئێکەتیێ بوو، وەزیرێ ‏پەروەدا حوکمەتا ھەرێما کوردستانێ ژی بوو، ل گەل دروستبوونا حزبا بەرھەم سالح ‏ھەڤپەیمانی بۆ دیموکراسی و دادپەروەریێ چوو داڤا وێ حزبێ دا.. ‏
دلشاد عەبدولرەحمان بۆ رۆژناما ئەڤرۆ راگەھاند، و گۆت: ئەز گەھشتیمە وێ باوەریێ ئەو ‏ئارمانجا ھەڤپەیمانی وەک قەوارەکێ سیاسیێ ھەلبژارتنان بۆ ھاتیە دروستکرن، ب رێیا وێ ‏ھەڤپەیمانیێ بجە ناھێتن و بەردەوام بوون ل گەل ھەڤپەیمانیێ و پشکداریا ھەلبژارتنێن ‏کوردستانێ، بتنێ ژمارەکا دیا بێکاری و کارتێکرنێ دئێختە سەر لیستا ھێزێن سیاسی و پرت و ‏بەلاڤکرنا وانا ل کوردستانێ، بتایبەتی ل زۆنا کەسەک. ‏
‏ دلشاد عەبدولرەحمان ھەروەسا ئاشکراکر، دناڤا ھەڤپەیمانیێ ژبلی گەھشتنا ھندەک ‏کەسان بۆ پلە و پۆستان د پەرلەمان و حوکمەتێ دا، چو تشتەکێ دیتر ناھێتە گوھۆڕین، کو ئەو ‏نەئارمانجا من بوویە، دەمێ ئەز چوویمە ل گەل ھەڤپەیمانیا بەرھەم سالحی، لەورا مانا من ل ‏گەل بەریێ ناڤبری ب باشی نزانم و من دەست ژکارێن خوە کێشا.‏
سەعدی ئەحمەد پیرە پەیڤدارێ ئێکەتی نیشتیمانی کوردستان بۆ رۆژناما ئەڤرۆ گۆت: مە ‏بانگەوازی بەلاڤ نەکرینە، کو ھەر بەرپرسەکێ ژ گۆڕان یان ھەڤپەیمانیێ تۆڕە ببیت، ‏دەرگەھێن مە بۆ دڤەکرینە، بەلێ ئێکەتی چو جارەکێ دەرگەھێن خوە ب سەر کەسەکێ ‏نەگرتینە، داکو نوکە ڤەکەت، لەوڕا دەرگەھێ ئێکەتیێ د ڤەکرینە بۆ ھەر کەسەک یان ‏بەرپرسەکێ بزاڤا گۆڕان یا ھەڤپەیمانیێ بڤێت بھێتە ناڤا ئێکەتیێ دا، و درێژە ب خەباتا خوە ‏بدەت. ‏
سەعدی پیرەی گۆت: پشکەکا زۆرا ئەندامێن ھەڤپەیمانیێ و بزاڤا گۆڕان چالاکڤانێن ‏ئێکەتیێ بوون، کارەکێ سرۆشتیە جارەکا دی ڤەگەرن، چونکی ژ بەر ھندەک ئەگەرێن ‏دەستنیشانکری چووینە، ئەڤە ژی وێ چەندێ ناگەھینیت کو دانوستاندنێ ل گەل گۆڕانێ ‏ناکەین، بەلکی ھەردەم ئەم د ئامادەینە بۆ دانوستاندنا ل گەل گۆڕان. ‏