ئه‌ڤرۆنيوز:

سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ دياركر كو ژلايێ وه‌زاره‌تا دارايى وئابوورى يا هه‌رێما كوردستانێ دو داخوازى ل دۆر مووچه‌ى خستنه‌ دبوارێ بجهئينانێ دا.

ئومێد خوشناو، سه‌رۆكێ فراكسيۆنا پارتى ل په‌رله‌مانێ كوردستانێ ل به‌رپه‌رێ خوه‌ ل سه‌ر تۆرا جڤاكى يا فه‌يسبووكى به‌لاڤكر” پشتى نه‌رازيبوونێ ل سه‌ر رێزبه‌ندا ليستا مووچه‌ى، ب تايبه‌تى دره‌نگ مه‌زاختنا مووچێ وه‌زاره‌تا پێشمه‌رگه‌، وه‌زاره‌تا ناڤخوه‌، ده‌زگه‌هێ ئاسايش، ليوايێن په‌ترۆلێ وغازێ وخانه‌نشينێن له‌شكرى ومه‌ده‌نى، فراكسيۆنا پارتى ده‌نگێ نه‌رازيبوونا خوه‌ خسته‌ پال ده‌نگێ نه‌رازيبوونا پێشمه‌رگه‌ى وپۆليس وئاسايشێ ودوى چارچۆڤه‌ى دا بزاڤێن تاك تاك يێن ئه‌ندامێن فراكسيۆن ولژنێن په‌يوه‌نديدار خستنه‌ كار، ل گه‌ل ده‌زگه‌هێن په‌يوه‌نديدار ب گه‌رمى ل سه‌ر هێلێ بوون”.

ئومێد خوشناو ئاماژه‌ ب وێ چه‌ندێ كر كو ل رۆژا ئه‌ينيێ 1/6/2018 دبه‌ياننامه‌كێ دا دو داخوازى پێشكێش كرينه‌، يا ئێكێ ئينانا پێشمه‌رگه‌ى بوو بۆ رێزبه‌ندا ئيكێ د وه‌رگرتنا مووچه‌ى دا، يا دويێ ژى به‌لاڤكرنا مووچێ وه‌زاره‌تا پێشمه‌رگه‌ ووه‌زاره‌تا ناڤخوه‌ وده‌زگه‌هێ ئاسايش وليوايێن په‌ترۆلێ وغازێ وخانه‌شنينێن له‌شكرى ومه‌ده‌نى بوو.

سه‌رۆكێ فراكسيۆنا پارتى ئاشكراكر كو ژلايێ وه‌زاره‌تا دارايى ڤه‌ هاتنه‌ ئاگه‌هداركرن كو هه‌ردو داخوازيێن وان هاتينه‌ بجهئينان ول هه‌يڤا بهێت رێزبه‌نديا پێشمه‌رگه‌ دێ ڤه‌گه‌ريت بۆ يا ئێكێ دبه‌لاڤكرنا مووچه‌ى دا.

ل دووماهيا نڤيسينا خوه‌ دا، ئومێد خوشناو دووپاتى ل سه‌ر به‌رده‌وميا بزاڤێن خوه‌ وه‌كو فراكسيۆن كر بۆ وێ چه‌ندێ ب هه‌ر جۆره‌كێ بيت، به‌رى جه‌ژنێ مووچێ پێشمه‌رگه‌ى بهێته‌ به‌لاڤكرن، هه‌ڤده‌م پێشمه‌رگه‌ وهێزێن ئارامى پارێزێن كوردستانێ ژى پشت راست كرن كو به‌رده‌وام ده‌نگێ مه‌ ده‌نگێ هه‌وه‌يه‌ وب شانازيه‌كا مه‌زن ل سه‌نگه‌رێ داخوازيێن هه‌وه‌ينه‌ ودێ ل گه‌ل هه‌وه‌ بين.

ئه‌ڤرۆنيوز:

به‌رپرسێ ميحوه‌رێ رۆژئاڤايێ ديجله‌ يێ هێزێن پێشمه‌رگه‌ى، بابه‌كر زێبارى، ل دووڤ مالپه‌رێ فه‌رميێ پارتى راگه‌هاند، هاتنا هێزه‌كا ئه‌مريكى بۆ شنگالێ، پێنگاڤه‌كا ئه‌رێنى يه‌ بۆ وێ چه‌ندێ ئيدارا هه‌ڤپشك دناڤبه‌را هێزێن عيراقێ وپێشمه‌رگه‌ى دا بهێته‌ دروستكرن ودياركر ئه‌مريكا مامه‌لێ ل گه‌ل حه‌شدا شه‌عبى وپه‌كه‌كێ ناكه‌ت.

دوهى هێزه‌كا ئه‌مريكى گه‌هشته‌ شنگالێ وشه‌ڤا بۆرى ژى ئه‌و هێز چو سه‌ر چيايێ شنگالێ وهێزه‌كا له‌شكرێ عيراقێ ل گه‌ل وێ هيزا ئه‌مريكى بوو.

ل دووڤ گۆتنا سه‌رۆكێ جڤاتا قه‌زا شنگالێ، وه‌يس نايف، هاتنا وێ هێزێ بۆ شنگالێ جهێ دلخوه‌شيا خه‌لكێ شنگالێ يه‌ ووان پێ خوه‌شه‌، چونكى دبه‌رژه‌وه‌نديا خه‌لكێ وێ ده‌ڤه‌رێ دايه‌ وره‌نگه‌ ببيته‌ ئه‌گه‌رێ وێ چه‌ندێ جاره‌كادى خه‌لكێ شنگالێ ڤه‌گه‌رن بۆ سه‌ر مال وحالێ خوه‌.

هه‌ر گرێداى ڤێ پرسێ ول دووڤ پێزانينێن بابه‌كر زێبارى به‌رپرسێ ميحوه‌رێ رۆژئاڤايێ ديجله‌ يێ هێزێن پێشمه‌رگه‌ى، هێزه‌كا ئه‌مريكى وله‌شكرێ عيراقێ چووينه‌ وێ ده‌ڤه‌رێ تاكو سنورێ دناڤبه‌را عيراقێ وسووريێ دا بپارێزين وهاريكاريا پۆليسێن ل سه‌ر سنورى بكه‌ن، وه‌كو زێبارى ب مالپه‌رێ فه‌رميێ پارتى گۆتى” شيانێن هێزێن پۆليسان دكێمن وره‌وش ژى يا باش ننيه‌ وهێشتا داعشێ هه‌بوون يا هه‌ى، ئه‌مريكا كو هاتى ب و شيوه‌كى مامه‌لێ ل گه‌ل حه‌شدار شه‌عبى وپه‌كه‌كێ ناكه‌ت، له‌وما هێزه‌كا له‌شكرێ عيراقێ ل گه‌ل وێ هيزا ئه‌مريكى هاتيه‌”.

بابه‌كر زێبارى، هاتنا وێ هێزا ئه‌مريكى بۆ شنگالێ ب پێنگاڤه‌كا باش دزانيت وب ديتنا وى ئه‌ڤ پێنگاڤه‌ ده‌ستپێكه‌كه‌ بۆ وێ چه‌ندێ هيزێن پێشمه‌رگه‌ى ژى جاره‌كادى ڤه‌گه‌رن بۆ وان ده‌ڤه‌ران ول گه‌ل له‌شكرێ عيراقێ ئيدارا هه‌ڤپشك دروست بكه‌ن.

بابه‌كر زێبارى دياركر ژى” ب هاتنا وێ هيزا ئه‌مريكى ئومێده‌ك بۆ خه‌لكێ شنگالێ دروستبوو  كو ژ حه‌شدا شه‌عبى وپه‌كه‌كێ قورتال ببن. چونكى حه‌شدا شه‌عبى چه‌ندين گرۆپن ل ده‌ڤه‌رێ وره‌فتارێن خراب به‌رامبه‌ر خه‌لكێ ده‌ڤه‌رێ دكه‌ن، له‌وما وان پێ خوه‌شه‌ ئه‌و هێزا ئه‌مريكا هاتى بۆ شنگالێ”.

ئێك ژ ئه‌گه‌رێ دى يێن چوونا وێ هێزێ بۆ سه‌ر چيايێ شنگالێ، ل دووڤ بۆچوونا بابه‌كر زێبارى ئه‌وه‌ كو ل ده‌مێ خوه‌ رژێما به‌عس ل وى چياى مووشه‌ك ئاراسته‌ى ئيسرائيلى دكرن، نوكه‌ ژى مه‌ترسى يا هه‌ى ل وێ چه‌ندێ كو ئيران شانێن خوه‌ وێ ده‌ڤه‌ري كربيت وگۆت” ده‌ڤه‌را چل مێرا ل چيايێ شنگالێ گه‌له‌ك يا هه‌ستياره‌، له‌وما ئه‌و جهێ گرنگ دده‌ستێ كێ دابيت، دشێت كونترۆلا هه‌موو ده‌ڤه‌رێ بكه‌ت، چوونا هێزێن ئه‌مريكى ژى بۆ وى جهى هه‌ر ئه‌و چه‌نده‌ ئه‌گه‌ره‌”.

ئه‌ڤرۆنيوز:

ژه‌گه‌رێ گرتنا ئاڤا زێ بچووك ژلايێ ئيرانێ ڤه‌ هزاران ماسى ژناڤچوون، هه‌روه‌سا كێشه‌ بۆ ئاڤا ڤه‌خوارنێ ل قه‌لادزێ په‌يدابوو.

ريڤه‌به‌ريا گشتى يا به‌نداڤ وعه‌مبارێن ئاڤێ ل وه‌زاره‌تا چاندنێ وژێده‌رێن ئاڤێ ل هه‌رێما كوردستانێ د رۆهنكرنه‌كێ دا به‌لاڤكر” بۆ جارا دويێ ئيرانێ ئاڤا زێ بچووك ل سه‌ر هه‌رێما كوردستانێ گرت، هه‌ر چه‌نده‌ نوكه‌ ده‌مێ گرتنا ئاڤێ ژى نينه‌”.

ژئه‌گه‌رێ گرتنا وێ ئاڤێ، هزاران ماسى دناڤ زێ بچووك ژناڤچوون، رێڤه‌به‌ريا گشتى يا به‌نداڤێن هه‌رێمێ دياركر كو گرتنا ئاڤا زێ بچووك كێشه‌ بۆ ئاڤا ڤه‌خوارنێ ل قه‌لادزێ دروست بوو.