ئەڤرۆ نیوز:
نەتەوێن ئێکگرتی دیار دکەت کو نها نێزیکی نیڤا خەلکێ رۆژئاڤایێ کوردستانێ نەشێن پێدڤیاتێن ژیانا رۆژانە بۆ خوە دابین بکەن و هاریکاری ژی ناگەهنە دەستێ خەلکی، ژ بەر هندێ ژی پێدڤیە دەرگەهێ سنوری یێ تل کۆچەر د زووترین دەم دا بهێتە ڤەکرن دا رێکخراوێن مرۆڤی بشێن هاریکاریا خەلکی بکەن.
نەتەوێن ئێکگرتی هەروەسا دیار دکەت کو خەلکێ باژێرێن عەفرین، گرێ سپی و سەرێکانیێ کو ئاوارەی دەڤەرێن دی یێن رۆژئاڤایێ کوردستانێ بووینە د رەوشەکا گەلەک خراب دا دژین و دڤێت رێکخراوێن جیهانی هاریکاریا خەلکی بکەن.
ئه‌ڤرۆ نیوز:
وه‌زاره‌تا دارایی و ئابووری یا حكومه‌تا هه‌رێما كوردستانێ خشته‌یه‌كێ نوو یی موچه‌ی راگه‌هاند و لگۆری ئه‌ڤی خشته‌یی رۆژا ئێك شه‌مبێ و دوشه‌مبێ 5-6/7/2020 موچه‌یێ وه‌زاره‌تا شه‌هیدان و جڤاتا ئاسایشێ هێنه دان.
وه‌زاره‌تا دارایی د راگه‌هاندنه‌كێ دا ئه‌و چه‌نده ژی دیاركریه كۆ رۆژا سێ شه‌مبێ 7/7/2020 وه‌زاره‌تا شه‌هیدان و شه‌هیدێن وه‌لاتی و زیندانیین سیاسی و كۆ شایسته‌یێن وان ماینه و ده‌گه‌هی ئاسایشێ هێنه دان.
رۆژا چارشه‌مبێ 8/7/2020 موچه‌یی وه‌زاره‌تا په‌روه‌ردێ یه.
ئەڤرۆ نیوز،عەلی حاجی :
عەمید دلێر زێباری بەرپرسێ لیوا ئێک یا هێزێن پاسەوانێن سنوری یا عێراقێ بۆ ئەڤرۆ نیوز دیار کر پشتی شەرێ هێزێن سوپایێ تورکیا دناڤ سنورێ ئاخا هەرێما کوردستانێ و ئەڤ چەندە ژی بۆ ئەگەر سوپایێ تورکیا ١٢ خالان کۆنترول بکەن .
زێدەتر عەمید دلێر گۆت : پشتی حکومەتا عێراقێ ل دور شەرێ هێزێن سوپایێ تورکیا و پەکەکێ لژنەیەک پێک ئینای بریار هاتە دان کو ئێدی وه‌کو لیوا ئێک یا هێزێن پاسەوانێن عێڕاقی هندەک خالێن خوە ب دانیت ل هندەک دەڤەرێن ستراتیژی ل سنورێ ناحیا دەرکارێ و باتیفا و مەرەما سەرەکی ژی ژ دانانا وان خالان ئەوە دا کو مەترسی ل سەر وەلاتیان زێدەتر نەبیت و شەرێ وان دوو هێزێن زێدەتر ژ چیا و جهێن نەهێتە خار و نەهێتە دناڤ وەلاتیان دا و هەر خالەکا ژلایێ هێزێن مە ڤە هاتیە دانان چو ڤەگەریانەک یان ژی پاشڤە زڤرینەک ل وان خالان ناهێتە کرن ژبەر کو ئەو جهێن هێزێن مە لێ هاتینە جێگیر کرن ژ جهێن ستراتیژی نە و ل دور ڤێ چەندێ ژی دێ هێزێن پێشمەرگەی دگەل مە دا هاریکار بن دا کو بشێن زێدەتر چاڤدێریا وان دەڤەران بکەین و هەتا نوکە ل پێنچ جهـان هێزێن مە هاتینە بنەجهـ کرن هەر ژ چیایێ خامتیر و کەلها شابانیێ.
ناڤبری گۆت ژی : ژبەریا هێزێن مە ل وان پێنچ جهان بهێنە جێگیر کرن سوپایێ تورکیا هات بوو ئاگەهدا کرن و ئەوا نوکە هێزێن تورکیا ئەنجام دەت قوناغا ئێکێ یە و بۆ قوناغا دووێ ژی ئەن نوزانین دێ چو پێنگاڤان هاڤێژیت و هەر دیسان بۆ مە ژی بۆ قوناغا ئێکێ بریار ل سەر وان پێنچ جهان هاتیە دان و دێ چاڤەرێ هەر بریارەک نوو و پێشهاتەکا نوو بین،چوونا مە بۆ وان جهێن ستراتیژی دێ بیتە رێ خوەشکەرەک بۆ وەلاتیێن مە زێدەتر بچنە سەر گوندێن خوە،هەر ژ سالا ٢٠٠٤ هەتا نوکە هێزێن مە ل ڤان دەڤەرێن سنوری هاتینو جێگیر کرن و چو هێزەکا نوو نەهاتیە دگەل هێزێن مە و هێزێن مە هەتا کانی ماسێ و شێلادزێ هەنە و هەکە پێدڤی ژی کر دێ ل وان جهان ژی خالان دانین.
ل دور شەرێ سوپایێ تورکیا و پەکەکێ ناڤبری گۆت : تیمێن ئەندازیاریێن هێزا پێشمەرگەیی دگەل مە دا هاریکارن و پێکدادان دناڤبەرا سوپایێ تورکیا و پەکەکێ دا دروست بویە و سوپایێ تورکیا ژی چەندین کێلومەتران هاتینە دناڤ ئاخا هەرێما کوردستانێ دا و ئەو دەسەلات ب مە ژی هاتیە دان هەر دەست درێژیەکا بۆ سەر خالێن مە بهێتە کرن دێ بەرسڤەکا توند هەبیت دگەل هەر کەس و جهەکێ دەست درێژیێ بکەت.
ئەڤرۆ نیوز،عەلی حاجی :
بەرپرسێ نڤێسینگەها شنگالێ یا دەزگایێ خێرخوازیێ بارزانیێ نەمر بۆ ئەڤرۆ نیوز دیار کر نوکە نڤێسینگەه ژ شنگال ڤەگوهاستیە بۆ نێزیک زالگەها سحێلا دا کو ب رێیا خوە ئەو ژی هاریکاریێن دەست پێکی بگەهینە دەستێ وان ئاوارەیێن ئێزدی یێ کو ب ئێکجاری ڤەدگەرن جهێن خوە.
زێدەتر پیر دەیان گۆت : مژوولی بەلاڤ کرنا هاریکاریێن دەست پێکی نە کو پێک دهێن ژ ( کارتونەک کەرەستەیێن خوارنێ و تەندروستی و جل و بەرگ و ئاڤ و هندەک شریناهی ) کو بۆ هەر خێزانەکا ڤەدگەریت جهـ و وارێن خوە ئەو کەرەستە ب وان دهێنە دان و هەتا نوکە نێزیکی ٨٠٠ خێزانان ئەڤ هاریکاری ب وان هاتینە دان و ئەو خێزانێن ڤەدگەرن ژی ئێدی دووبارە ڤەناگەرن ڤە دناڤ کەمپێن هەرێما کوردستانێ دا و ئەو هاریکاری دێ د بەردەوام بن بۆ وان هەمی خێزانێن بشێن ڤەگەرنە جهێن خوە د ناڤ شنگال و دەوروبەرێن وێ و دهێتە پێشبینی کرن ژی رێژەیا چوونا وان خێزانان بەرەڤ زێدەبونێ ڤە بچیت.
ناڤبری ئەو چەندە ژی گۆت : ئەو هاریکاری بتنێ بۆ وێ چەندێ نە دەما کو ئەو خێزان ڤەدگەرن جهێن خوە پێدڤیێن خوەیێن ژیانێ ب وان هاریکاریان دەرباز بکەن و پیچەکێ بارێ وان سڤکتر ببیت .
ئه‌ڤرۆ نیوز:
هنارتنا پترۆلا هه‌رێما كوردستانێ بۆ ده‌رڤه كێمكریه و لگۆری زانیاریان، كێمكرن ژی ڤه‌دگه‌ریت بۆ ئه‌وێ چه‌ندی كۆ عیراق پێگیری رێكه‌تنا رێكخراوا ئوپێك بۆ كێمكرنا به‌رهه‌مێ پترۆلێ و پێدڤیه هه‌رێم ژی پێگیر بیت.
ناڤه‌ندا (S&P Global Platts) كۆ ناڤه‌نده‌كا تایبه‌ته ب كارۆبارێن ووزه‌یێ یه راگه‌هاند هنارتنا پترۆلا هه‌رێما كوردستانێ ل هه‌یڤا حوزه‌یرانا بووری دا، گه‌هشتیه 267 هزار به‌رمیلان د رۆژێ دا ئه‌ڤه ژی ل چاڤ هه‌یڤا ئایارا بوری زێده‌تری 100 هزرا به‌رمیلان كێمكریه.
ناڤه‌ندا ناڤبری ئه‌و چه‌نده ژی دیاركر ل هه‌یڤا ئایارا بوری هه‌رێما كوردستانێ رۆژانه 368 هزار به‌رمیلێن پترۆلێ ره‌وانه‌ی بازارێن جیهانێ دكر، به‌لێ ل هه‌یڤا حوزه‌یرانا بوری رۆژانه 267 هزار به‌رمیل هنارتینه ده‌رڤه.
ل ده‌مێن بوری ئیحسان عه‌بدلجه‌بار وه‌زیڕێ پترۆلا عیراقێ راگه‌هاند بوو كۆ د دانوستاندنێن به‌رده‌وام داینه ل گه‌ل هه‌رێما كوردستانێ بۆ ئه‌وێ چه‌ندی د چارچوڤه‌یێ دا هه‌رێم پیگیر بیت كۆ رۆژانه 370 هزار به‌رمیلین پترۆلێ به‌رهه‌م بینیت.
ئه‌ڤرۆ نیوز:
هاتنا سوپایێ توركیا بۆ ناڤ ئاخا هه‌رێما كوردستانێ به‌رده‌وامه حكومه‌تا عیراقێ ب ئه‌ڤان لڤینان دلته‌نگه و وه‌زیرێ ده‌رڤه‌یێ عیراقێ راگه‌هاند دێ په‌نایێ به‌ینه به‌ر بكار ئینانا چه‌كێ ئابووری و بازرگانیێ بۆ رێگرتنا سوپایێ توركیا بۆ ناڤ هه‌رێما كوردستانێ.
وه‌زاره‌تا ده‌رڤه‌یا عیراقێ راگه‌هاند توركیا به‌رده‌وامه ژ هێرشین خوه یێن له‌شكه‌ری بۆ سه‌ر ئاخا عیراقێ، له‌ورا داخازا راوه‌ستاندنا ئه‌وان هێرشان دكه‌ین، هه‌كه دێ په‌نایێ بۆ بكار ئینانا چه‌كێ ئابووری بازرگانیێ به‌ین، بۆ ئه‌ڤێ چه‌ندێ ژی توركیا هێرشیێن خو بۆ سه‌ر هه‌رێما كوردستانێ راوه‌ستینیت.
ئه‌ڤرۆ نیوز:
رێكخراوا ساخله‌میا جیهانێ ئامیرێن هه‌ناسه‌دانا ده‌ستكرد گه‌هاندنه عیراقێ و ب سه‌ر پارێزگه‌هێن وی دا پارڤه‌كرن، ئامیران پێدڤی ب گرێدانا بتلێ ئوكسجینێ نینه و ئه‌و بخو ژ هه‌وایی ئوكسجینێ دروست دكه‌ن.
ئه‌دهه‌م ئیسماعیل نوونه‌رێ رێكخراوا ساخله‌میا جیهانێ ل عیراقێ راگه‌هاند: رێكخراوێ 300 ئامیرێن هه‌ناسه‌دانێ بۆ عیراقێ دابینكرن، كۆ ژ گه‌نجینه‌یا دوبه‌ی ئینان ژ ئه‌وێ ژماره‌یێ 200 ئامیر گه‌هشتینه عیراقێ و بریاره ب سه‌ر پارێزگه‌هێن وێ دا بهێنه پارڤه‌كرن، ل چه‌ند رۆژێن بهێت 100 ئامیرێن دی ژی گه‌هنه عیراقێ.
نوونه‌رێ رێكخراوا ساخله‌میا جیهانی ل عیراقێ ئه‌و چه‌نده ژی راگه‌هاند ئه‌وان ئامیران پێدڤی ب بتلێ ئوكسجینێ نینه، به‌لكۆ ژ هه‌وای ئوكسجینی كۆمڤه دكه‌ت، هه‌ر چه‌نده ئه‌و 300 ئامیر تێرا پێدڤیێن نه‌خوشخانه‌یین عیراقی ناكه‌ت، به‌لێ ئه‌و فشارێ كێم دكه‌ت كۆ ب ئه‌گه‌رێ نه‌بوونا ئوكسجینێ ل سه‌ر نه‌خوشخانه‌یان دروست بوویه.
ئه‌ڤرۆ نیوز:
حه‌سه‌ن ته‌میمی وه‌زیرێ ساخله‌میا عیراقێ راگه‌هاند ل گه‌ل كۆمپانیا ئه‌سترازینیكا ده‌ست ب دانوستاندن و په‌یوه‌ندیكرنێ بۆ دابینكرنا چاره‌سه‌ریا ڤایرۆسێ كورونایێ كریه.
حه‌سه‌ن ته‌میمی وه‌زیرێ ساخله‌میا عیراقێ ئه‌و چه‌نده ژی راگه‌هاند كۆ وه‌زاره‌تا ساخله‌میێ په‌یوه‌ندی ب كۆمپانیا ئه‌سترازینیكا كریه كۆ ل قوناغا دوێ یا پرۆسه‌یا به‌رهه‌م ئینانا چاره‌سه‌ریێ دایه و پشكه‌كا ژ ئه‌وی به‌رهه‌می بۆ عیراقێ هاته دابینكرن، د ده‌مه‌كی دا تا نو چ چاره‌سه‌ری بۆ ڤایرۆسێ كورونایێ نه‌هاتینه دیتن، ده‌رمانێ روسی ژ هه‌ر ده‌رمانه‌كێ دی یێ هه‌تا نوكه هاتیه چێكرن باشتر بوویه.
سه‌یف به‌در په‌یڤدارێ وه‌زاره‌تا ساخله‌میا عیراقێ راگه‌هاند مه بریار دایه ده‌رمانێ ئه‌ڤیفاڤیر یێ روسی تایبه‌ت ب ڤایرۆسێ كورونایێ ب ئاوایه‌كێ ئه‌زموونی بكار بینن و پێشوازیێ ژی ل هه‌ر كۆمپانیه‌كا ئه‌هلی و حكومی دكه‌ین ده‌رمانی بهینته عیراقێ.
ئه‌ڤرۆ نیوز، بیستێر حکمه‌ت:
کورێ باژێرێ دهۆکێ و راهێنه‌رێ شیانێن له‌شی یێ یانا شورته و هه‌لبژارتیێ عیراقێ یێ به‌ری نوکه سه‌ردار محه‌مه‌د نێزیکی ئیمزاکرنا هه‌ڤبه‌ستا یانا عه‌جمان یا ئیماراتی یه ئه‌وا دخۆلا پلا نایاب یا وی وه‌لاتی دا که‌ت.
ژێده‌ره‌کێ نێزیک ژ وی راهێنه‌رێ ناڤبری بۆ ئه‌ڤرۆ نیوز دیار کر: سه‌ردار محه‌مه‌د ل گه‌ل راهێنه‌ره‌کێ فره‌نسی نوکه د به‌ربژارن بوو پوستێ وه‌رگرتنا راهێنه‌ریا شیانێن له‌شی ل یانا عه‌جمان یا ئیماراتی.
هه‌ردیسان ناڤبری دیار کریه: ژی به‌رپرسێن وی یانێ ب فه‌رمی په‌یوه‌ندی ب سه‌ردار کریه و نوکه که‌ڤتی نه د دانوستاندنان دا و دبیت ل ڤێ حه‌ڤتیێ به‌رپرسێن وێ یانێ بریارا دووماهیێ ل سه‌ر ئیمزاکرنا هه‌ڤبه‌ستێ بده‌ن کو سه‌ردار به‌ربژاره‌کێ ب هێزه بوو وه‌رگرتنا وی پوستی کو ناڤبری به‌ری نوکه ژی ٢ جاران ل گه‌ل وێ یانێ کارکربوو.
ئەڤرۆ نیوز:
وەزارەتا ساخلەمیا هەرێما کوردستانێ تووشبوونا 187 کەسێن دی ب ڤایرۆسێ کۆرۆنایێ راگەهاند و دیسان دیار کریه: کو هەشت کەسێن دی ب کۆرۆنایێ گیانێ خوە ژ دەستداینە.
هەروەسا گۆتیە: د 24 دەمژمێرێن بوری دا هزار و 790 پشکنین هاتینە ئەنجامدان، کو پترترین ل دهۆکێ بوون و هژمارا وان 656 پشکنینن بوون، ل هەولێرێ 396 پشکنین، ل سلێمانیێ 496 پشکنین، ل گەرمیان 153 پشکنین و ل راپەرین ژی 89 پشکنین.
دیسان تووشبوویێن نوو ژی: 39 ژ وان ل هەولێرێ نە، 89 تووشبوویی ل سلێمانیێ، 44 تووشبوویی ل گەرمیان، 10 تووشبوویی ل راپەرین و پێنج تووشبوویی ل دهۆکێ، دیسان 88 تووشبوویین کۆرۆنایێ ژی چێبووینە، کو 36 کەس ژ وان ل سلێمانیێ، 41 کەس ل هەولێروێ، 11 کەس ل هەلەبجە و گەرمیان و راپەرینن.
نيشاندان