ئه‌ڤرۆ:
په‌یڤدارێ حوكمه‌تا هه‌رێما كوردستانێ سه‌باره‌ت خونیشادانێن ئیرانێ رۆنكرنه‌ك به‌لاڤ كریه‌ و دیاركریه‌: هه‌رێما كوردستانێ ب كریار سه‌لماندیه‌ كو هه‌رده‌م فاكته‌رێن ئارامى و سه‌قامگیریا ده‌ڤه‌رێ بوویه‌ و هه‌رده‌م رێ نه‌دایه‌ و ناده‌ت ژى ببیته‌ ئه‌گه‌رێ ئالوزى و دروستبوونا ئالوزیێ ل وه‌لاتێن جیران.
دزه‌یى دبێژیت” مالپه‌رێ ته‌سنیمى یێ ئیرانێ ل سه‌ر زارێ ئاغایێ موحسن ره‌زایى ، سكرتێرێ جڤاتا ده‌ستنیشانكرنا به‌رژه‌وه‌ندیێن ئیرانێ تومه‌تێن بێ بنه‌ما به‌رامبه‌ر هه‌رێما كوردستانێ به‌لاڤ كریه‌ كو خونیشادانێن ئیرانێ ل هه‌ولێرێ دهێنه‌ برێڤه‌برن، ئه‌م ب هه‌موو ره‌نگه‌كێ ڤان ره‌نگه‌ تومه‌تێن دروستكرى ره‌ت دكه‌ین و چو راستى بۆ نینن”.
دزه‌یى دیاركریه‌” هه‌رێما كوردستانێ ل گه‌ل وه‌لاتێن جیران و ده‌ڤه‌رێ و جیهانێ هه‌رده‌م هیڤى خوازه‌ په‌یوه‌ندیێن دوستانه‌ ل سه‌ر بنه‌مایێ رێزگرتن و به‌رژه‌وه‌ندیێن هه‌ڤپشك هه‌بیت و ئه‌ڤ جوره‌ داخویانیه‌ چو خزمه‌ته‌كێ ناگه‌هینته‌ جیرانه‌تى و په‌یوه‌ندیێن هه‌رێما كوردستانێ و ئیرانێ”.

ئەڤرۆ نيوز، ئەمیر ئەترووشی:
نوونەرێ ئەرمەنان ل پەرلەمانێ کوردستانێ راگەھاند، کەنیسا ئەرمەنی یا ئەرسودوکسی، سالانە ل 6ی مەھا ئێکێ جەژنا حەزرەتی مەسیح و جەژنا مەعمودیە دگێرن و ڤێ رۆژێ دھژمێرن وەکو جەژنا سالانە.
یەروانت ئەمینیان نوونەرێ ئەرمەنان ل پەرلەمانێ کوردستانێ، بۆ ئەڤرۆ نيوز دیارکر، دوھی ھەموو ئەرمەنێن کوردستانێ ب ناڤێ کەنیسا ئەرمەنی یا ئەرسودوکسی، جەژنا بوونا حەزرەتێ مەسیح و جەژنا مەعموودیە پێکڤە ساخ کر و ئەڤ جەژنە ھەر سال ھەر ژ دەستپێکا پەیدابوونا مەسیحیەتێ ل ناڤ ئەرمەنان دا دھێتە ساخکرن.
نوونەرێ ئەرمەنان ل پەرلەمانێ کوردستانێ ئاشکرا کر، د ناڤ ئەرمەنان دا، کەنیسا ئەرمەنی یا ئەرسودوکسی یا ئێکانەیە پاراستن ل سەر ڤێ جەژنێ و ڤی کەلتووری کری و ھەتا نوکە سالانە ئەڤ جەژنە دھێتە ساخکرن.
گۆتژی ھەبوونا ئەرمەنان ل کوردستانێ دەستکەفتەکێ گرنگە و وەرگرتنا ئەرمەنان بۆ پۆستێ ئەندامەتیا پەرلەمانی دەستکەفتەکێ مێژوویی یە.
ئاشکراژی کر ئەرمەنان شەش جەژن ھەنە؛ ژدایکبوونا حەزرەتێ مەسیح، قیامە مەسیح، ڤەگوھاستنا کچینێ، جەژنا خاچێ، جەژنا رەشاش و جەژنا سعود.
دیار کر کو پشتی ئەو ھاتینە کوردستانێ و ئاکنجی بووین، فێری زمانێ کوردی بووینە و ب کرمانجی د ئاخڤن. نوکە 47 خێزانێن ئەرمەنی ل قەزا دھۆکێ دژین. ھەروەسان دو گوندێن ئەرمەنان ل پارێزگەھا دھۆکێ ل قەزا زاخۆ ھەنە. گوندێ ئاڤزریک کو ب 50 خێزانان و گوندێ ھاوریسکێ کو 107 خێزانان ب خۆ ڤە دگریت. ھەروەسا 55 خێزانێن ئەرمەنی ل قەزا سێمێلێ ھەنە. دیسان نێزیکی 90 خێزانێن ئەرمەنان ل پارێزگەھا ھەولێرێ ھەنە، لێ ھەموو دەربەدەرن و ب تنێ سێ تا چوار خێزان ل پارێزگەھا سلێمانیێ ھەنە.
پشتی سالا 1914 تورکان سەرژێگەھەک بۆ ئەرمەنان ل تورکیا چێکری و فەرمانا وان راکرین. ملیون و نیڤ ژ ئەرمەنان ھاتە کوشتن و ھژمارەکا مەزن دەربەدەر بوون و ھەر ھندەک بەرەڤ جھەکی چوون. ھژمارەکا وان بەرەڤ کوردستانێ ھاتن و پتریا وان ژی بەرەڤ دھۆکێڤە، نھا نێزیکی 3200 وەلاتیێن ئەرمەن کو ب زمانێ کوردی دئاخڤن ل کوردستانێ ھەنە و پتریا وان ژی ل دھۆکێ نە.