ئه‌ڤرۆ نيوز:

ده‌سته‌يا هه‌لبژارتنێن هه‌رێما كوردستانێ ل كۆمسيۆنا بلند يا هه‌لبژارتنێن عيراقێ، ل دۆر وان ده‌نگده‌رێن كارتێن نوو يێن ده‌نگدانێ به‌رزه‌ دكه‌ن، يان ب هه‌ر ئه‌گه‌ره‌كى بيت كارتا وان يا ده‌نگدانێ نه‌ميينت، رۆهنكرنه‌كێ دده‌ت.

 مازن عه‌بدوالقادر، سه‌رۆكێ ده‌سته‌يا هه‌لبژارتنێن هه‌رێما كوردستانێ ل كۆمسيۆنا بلند يا هه‌لبژارتنێن عيراقێ بۆ مالپه‌رێ فه‌رميێ پارتى ديموكراتى كوردستان، گۆت” چو چاره‌يه‌ك بۆ نينه‌، چونكى ته‌نها رێ بۆ ده‌نگدانێ، هه‌بوونا كارتا ده‌نگدانێ يه‌، بريارا دووماهيێ يا كۆمسيۆنێ ئه‌وه‌ بێ كارت چو كه‌سه‌كى مافێ ده‌نگدانێ نينه‌”.

برياره‌ ل رۆژا 12/5/2018 پرۆسا هه‌لبژارتنێن جڤاتا نوونه‌رێن عيراقێ بهێنه‌ ئه‌نجامدان وپارتى ديموكراتى كوردستان ب ليستا هژمار 184 دێ پشكداريێ دهه‌لبژارتنێن عيراقێ دا كه‌ت.

ئه‌ڤرۆنيوز:

سه‌رۆكێ ده‌سته‌يا هه‌لبژارتنێن هه‌رێما كوردستانێ ل كۆمسيۆنا بلند يا هه‌لبژارتنێن عيراقێ،

هژمارا ده‌نگده‌ران وكورسيان وهه‌روه‌سا هژمارا ليست وبه‌رژارێن هه‌رێما كوردستانێ بۆ هه‌لبژارتنێن جڤاتا نوونه‌رين عيراقێ ئاشكرا دكه‌ت.

مازن عه‌بدولقادر، سه‌رۆكێ ده‌سته‌يا هه‌لبژارتنێن هه‌رێما كوردستانێ ل كۆمسيۆنا بلند يا هه‌لبژارتنێن عيراقێ، ئه‌ڤرۆ ئێكشه‌مبى 15/4/2018 دكۆنگره‌كێ رۆژنامه‌ڤانى دا گۆت” سێ مليۆن و144 هزار و730 كه‌سان مافێ ده‌نگدانێ ل هه‌رێما كوردستانێ يێ هه‌ى و 25 قه‌واره‌ دێ پشكداريێ دهه‌لبژارتنان دا كه‌ن كو 19 ژوان حزبن وچار هه‌ڤپه‌يمانى و2 به‌ربژارێن سه‌ربخوه‌”.

گۆت ژى” 503 كه‌سان خوه‌ به‌ربژاركريه‌ كو 357 كه‌س ژ ره‌گه‌زێ نێرن و146 به‌ربژار ژى ژ ره‌گه‌زێ مێ نه‌”.

ئاماژه‌ دا كو هژمارا كورسيێن هه‌رێما كوردستانێ ل جڤاتا نوونه‌رێن عيراقێ 46 كورسى نه‌ كو ب ڤى شێوه‌ى يێن هاتينه‌ به‌لاڤكرن:

• پارێزگه‌ها هه‌ولێرێ: 16 كورسى كو ئێك بۆ كۆتا مه‌سيحيايه‌
• پارێزگه‌ها سلێمانيێ: 18 كورسى.
• پارێزگه‌ها دهۆكێ : 12 كورسى كو ئێك بۆ كۆتا مه‌سيحيايه‌

ئه‌ڤرۆنيوز:

جڤاتا بلند يا كاروبارێ خانمان يا ب سه‌ر جڤاتا وه‌زيرێن هه‌رێما كوردستانێ ڤه‌، دووڤچوونێ بۆ هه‌موو وان ناڤزراندنان دكه‌ت كو دده‌مێ بانگه‌شا هه‌لبژارتنان دا دژى به‌ربژارێن ژن دهێنه‌ كرن وهوشداريا روو ب روونا وێ دياردێ ل به‌رامبه‌ر قانوونێ دكه‌ت.

په‌خشان زه‌نگه‌نه‌، سه‌رۆكا جڤاتا بلند يا كاروبارێن خانمان، پشتى كۆمبوونه‌كێ دناڤبه‌را جڤاتا ناڤبرى وكۆمسيۆنا بلند يا هه‌لبژارتنان، دكۆنگره‌كێ رۆژنامه‌نڤيسى دا راگه‌هاند” دهه‌وێن به‌رێ يێن بانگه‌شا هه‌لبژارتنان دا، رۆژانه‌ ناڤزراندنا جڤاكى وره‌وشتى ل به‌رامبه‌ر به‌ربژارێن ژن هاتيه‌ كرن”.

په‌خشان رۆهنكر” ئه‌م ل جڤاتا بلند يا كاروبارێن خانمان، بێ جوداهى دناڤبه‌را به‌ربژارێن ئاليێن سياسى دا، دێ دووڤچوونێ بۆ هه‌موو وان دوسييان كه‌ين كو تێدا ناڤزراندن وسڤكاتى ب به‌ربژارێن ژن بۆ هه‌لبژارتنێن جڤاتا نوونه‌رێن عيراقێ بهێته‌ كرن”.

بانگه‌شا هه‌لبژارتنان ل هه‌رێما كوردستانێ ئه‌ڤرۆ ئێكشه‌مبى 15/4/2018 ده‌ستپێكريه‌ وتاكو 24 ده‌مژمێران به‌رى ئه‌نجامدانا هه‌لبژارتنان، دێ يا به‌رده‌وام بيت,

هه‌لبژارتنێن جڤاتا نوونه‌رێن عيراقێ ل 12/5/2018 دێ هێنه‌ ئه‌نجامدان.

ئه‌ڤرۆنيوز:

سه‌رۆكێ ده‌سته‌يا هه‌لبژارتنێن هه‌رێما كوردستانێ ل كۆمسيۆنا بلند يا هه‌لبژارتنێن عيراقێ راگه‌هاند، هه‌موو كارتێن نوويێن ده‌نگده‌رين هه‌رێما كوردستانێ يێن گه‌هشتين وب رێيا ده‌هان بنگه‌هێن كۆمسيۆنێ رۆژانه‌ ل سه‌ر وه‌لاتيان دهێنه‌ به‌لاڤكرن.

مازن عه‌بدولقادر، سه‌رۆكێ ده‌سته‌يا هه‌لبژارتنێن هه‌رێما كوردستانێ ل كۆمسيۆنا بلند يا هه‌لبژارتنێن عيراقێ گۆت” هه‌موو ئه‌و ده‌نگده‌رێن پشتى هه‌لبژارتنێن 2014 پشكدارى دپرۆسا بايۆمه‌تريا كۆمسيۆنێ دا كرى، كارتێن ده‌نگدانێ يێن نوو يێن بۆ هاتينه‌ چاپكرن وهه‌موو ژى يێن گه‌هشتينه‌ هه‌رێما كوردستانێ و ب رێيا 173 بنگه‌هێن كۆمسيۆنێ ل سه‌ر وه‌لاتيان دهێنه‌ به‌لاڤكرن”.

مازنى زێده‌تر گۆت” پێدڤيه‌ هه‌موو ده‌نگده‌رێن پشكدارى دبا‌يۆمه‌تريێ دا كرى، سه‌ره‌دانا بنگه‌هێن كۆمسيۆنێ بكه‌ن بۆ وه‌رگرتنا كارتێن خوه‌ يێن ده‌نگدانێ”.

دياركر ژى” به‌راوردكرن ل گه‌ل پارێزگه‌هێن دى يێن عيراقێ دوه‌رگرتنا كارتا ده‌نگدانێ دا، پارێزگه‌هێن هه‌رێما كوردستانێ گه‌له‌ك دباشن، دنوكه‌ دا وه‌لاتى زێده‌تر سه‌ره‌دانا بنگه‌هێن كۆمسيۆنا هه‌لبژارتنان دكه‌ن، چونكى ئاليێن سياسى لايه‌نگرێن خوه‌ هان دده‌ن بۆ وه‌رگرتنا كارتێن خوه‌ يێن ده‌نگدانێ”.

ديسا گۆت” ل دووڤ دووماهى ئامار، ل سه‌رانسه‌رى هه‌رێما كوردستانێ زێده‌تر ژ 60% ژ ده‌نگده‌ران، كارتێن خوه‌ يێن نوو يێن ده‌نگدانێ يێن وه‌رگرتين وهه‌تا رۆژا 9/5/2018 پرۆسا به‌لاڤكرنا كارتێن ده‌نگدانێ دێ يا به‌رده‌وام بيت”.

برياره‌ ل رۆژا 12/5/2018 پرۆسا هه‌لبژارتنێن جڤاتا نوونه‌رێن عيراقێ بهێنه‌ ئه‌نجامدان وپارتى ديموكراتى كوردستان ب ليستا هژمار 184 دێ پشكداريێ دهه‌لبژارتنێن عيراقێ دا كه‌ت.

ئه‌ڤرۆنيوز:

سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ، په‌يامه‌كێ ئاراسته‌ى پارتيان دكه‌ت وژ هێرشه‌كا ئه‌لكترۆنى ئاگه‌هدار دكه‌ت.

ئومێد خوشناو، سه‌رۆكێ فراكسيۆنا پارتى ل په‌رله‌مانێ كوردستانێ دبه‌رپه‌رێ خوه‌ يێ تايبه‌ت دا ل سه‌ر تۆرا جڤاكى يا فه‌يسبووكى په‌يامه‌كێ ئاراسته‌ى ئه‌ندامێن پارتى دكه‌ت ووان ژهێرشه‌كا ئه‌لكترۆنى ئاگه‌هدار دكه‌ت.

ئومێد خوشناو، دبێژيت” ل دووڤ پێزانينێن دروست، ل گه‌ل نێزيكبوونا هه‌وا بانگه‌شا هه‌لبژارتنان، گرۆپه‌كێ نه‌فس نزم يێ هاككه‌ر ژئاليێ لايه‌نه‌كێ بێ مورال ڤه‌ يێ هاتيه‌ به‌رهه‌ڤكرن ول گه‌ل ده‌ستپێكا بانگه‌شا هه‌لبژارتنان، دێ ده‌ست ب كاربن”.

ئومێدى دووپاتكر كو ئه‌و گرۆپه‌ دێ كار ل سه‌ر به‌رپه‌رێن كادرێن پارتى ل سه‌ر فه‌يسبووكى كه‌ت وگۆت” هه‌ما لايه‌نى ب ده‌هان په‌يچ وئه‌كاونتێن ب ناڤێ خوازراو يێن به‌رهه‌ڤكرين تاكو هه‌وا نه‌شرين ودوور ژ بهايێن سياسى وديموكراسى بكه‌ن”.

سه‌رۆكێ فراكسيۆنا پارتى ب پێدڤى دزانيت كو” هه‌ڤالێن مه‌ يێن پارتى، بزاڤه‌كا مه‌زن بكه‌ن بۆ سه‌ركه‌فتنا ليستا پارتى دهه‌لبژارتنان دا”.

ئه‌ڤرۆنيوز، عه‌زيز هه‌ورامى

ل دووڤ پێزانينێن ئه‌ڤرۆنيوز، دكۆمبوونا سه‌ركردايه‌تيا ئێكه‌تى نيشتمانى كوردستان دا كو ئه‌ڤرۆ ئێكشه‌مبى 15/4/2018 هاتيه‌ ئه‌نجامدان، بريارا ده‌ركرنا ئالا تاله‌بانى ژ رێزێن ئێكه‌تيێ هاتيه‌ دان.

ژێده‌ره‌كێ تايبه‌ت ژ سه‌ركردايه‌تيا ئێكه‌تيێ بۆ ئه‌ڤرۆنيوز گۆت” ئه‌ڤرۆ دكۆمبوونا سه‌ركردايه‌تيا ئێكه‌تيێ دا، بريار ل سه‌ر ده‌ركرنا ئالا تاله‌بانى ئه‌نداما سه‌ركردايه‌تيا ئێكه‌تيێ ژ رێزێن ئێكه‌تيێ هاته‌ ده‌ركرن”.

وى ژێده‌رى گۆت ژى” ئه‌گه‌رێ ده‌ركرنا ئالا تاله‌بانى ژ رێزێن ئێكه‌تيێ په‌يوه‌ندى ب وێ چه‌ندێ ڤه‌ هه‌يه‌ كو ئالايێ خوه‌ ل سه‌ر ليسته‌كا عه‌ره‌بى به‌ربژاركريه‌ بۆ جڤاتا نوونه‌رێن عيراقێ”.

ئالا تاله‌بانى، ئه‌نداما سه‌ركردايه‌تيا ئێكه‌تيێ وئه‌نداما جڤاتا نوونه‌رێن عيراقێ ژ فراكسيۆنا ئێكه‌تيێ، يا ناڤداره‌ كو به‌رده‌وام يا نێزيك بوو ژ نه‌ته‌وا عه‌ره‌بى ودژى داخوازيێن گه‌لێ كوردستانێ بوو، دده‌مه‌كى دا ب ده‌نگێن كوردێن كه‌ركووكێ بوويه‌ ئه‌نداما جڤاتا نوونه‌ران.