ئەتلەتیکو مەدرید بۆ قوناغا ١٦ پێدڤی حنێرەکێ یە
ئەڤرۆ،ھەژار:
بریارە ئەڤ شەڤە بەردەوامی ب یاریێن گەرا پێنجێ ژ قارەمانیا چامپیونیز لیگا ئورۆپا بھێنەکرن کو دبیت پێنج یانە ئەڤ شەڤە بەری گەرا دووماھیێ پلێتا دەربازبوونێ بۆ قوناغا شازدێ مسوگەر بکەن کو ئەڤ شەڤە دێ یاریێن گرنگ بەرامبەر ھەڤرکیێن خوە کەن ھەردیسان چەند یانە ئەڤ شەڤە د دەلیڤا دووماھیێ دا نە ژبلی سەرکەفتنێ چو ئەنجامێن دی بەرژوەندیا ئەوان دا نابن ئەوژی یانێن ئەتلەتیکو مەدرید و سپورتینگ لەشبونا بازل و سیسکا موسکو کو ئەڤ یانە ل بەر دەلیڤەیا دووماھیێ نە.

مان یوناید ب خالەکێ دێ دەربازبوونا خوە مسوگەر کەت 

د یاریێن کوما ئێکێ دا بریارە یانا مانچستەر یوناید سەرکێشا کومێ ب ١٢ خالان بیتە مێڤانا یانا بازل خودانا رێزا دوێ ب شەش خالان کو دڤێ یاریێ دا یانا مان یوناید بتنێ پێدڤی خالەکێ یە داکو دەربازبوونا خوە مسوگەر بکەت بۆ قوناغا بھێت بەرامبەر یانا بازل پێدڤی ب سەرکەفتێ و ھەردیسان دەلیڤەیا بازل دێ یا ڤەکری بیت بۆ دەربازبوونێ لێ ب مەرجەکی خوسارەت نەبیت و یانا سیسکا موسکو د ھەردو یاریێن خوە یێن مای دا سەرکەفتنێ تومارنەکەت، د یاریەکا دی دا د ھەمان کوم دا یانا سیسکا موسکو دێ یاریا خوە بەرامبەر بەنڤیکا کەت ل یاریگەھا خوە کو ئەڤ یانە پێدڤی ب سەرکەفتنێ یە و د ھەمان دەم دا یانا بازل ئەنجامەکێ نە چاڤەرێکری توماربکەت کو ھەردو یانێن سیسکا موسکو بازل ھەر ئێکێ شەش خال ھەنە و دڤێ کومێ دا ھەکە یانا مانچستەر یوناید خوسارەت بوو ل گەل بازل و سیسکا موسکو ب سەرکەفت ل سەر بەنڤیکا دێ گەرا دووماھیێ بیتە گەرا ئێکلاکرنێ دناڤبەرا سیسکا موسکو مان یوناید دا .

د یاریێن کوما دوێ دا ھەردو یانێن پاریس سانجێرمان و بایرن میونیخ دەربازبوونا خوە بەری ڤێ قوناغێ مسوگەر کریە بتنێ ھەڤرکی دناڤبەرا بایرن و پاریس دا مایە بۆ سەرکێشیا کومێ و ھەردیسان پلێتا سیێ دناڤبەرا سلتیک و ئەندلخت بۆ دەربازبوونێ بۆ یورۆپا لیگ کو ئەندلخت ل رێزا دووماھیێ دھێت بێ خال دێ بەرامبەر بایرن میونیخ کەت خودانا رێزا دوێ ب نەە خالان و پاریس سانجێرمان خودانا رێزا ئێکێ ب ١٢ خالان دێ بەرامبەر سلیتیک کەت خودانا رێزا سیێ ب سیێ خالان.

ئەتلەتیکو مەدرید بۆ قوناغا ١٦ پێدڤی حنێرەکێ یە

د یاریێن کوما سیێ دا کو ھەتا نوکە ھەڤرکی یا ب ھێزە دەلیڤە ھەیە بۆ ھەر چار یانە کو یانا ئەتلەتیکو مەدرید خودانا رێزا سیێ د کومێ دا ب سێ خالان دێ ئەڤ شەڤە مێڤانداریا یانا روما کەت خودانا رێزا ئێکێ ب ھەشت خالان و یانا ئەتلەتیکو مەدرید پێدڤی ب سەرکەفتێ یە ھەر ئەنجامەکێ دی د بەرژوەندیا ئەوێ دا نینە و پلێتا دەربازبوونێ دێ ژ دەست دەت و ژلایێ خوڤە یانا چێلسی خودانا رێزا دوێ ب حەفت خالان دێ بەرامبەر یانا کارباکا ئەگدام یا ئەزەربێجانی کەت کو دڤێ یاریێ دا ھەردو یانە ل بەر دەلیڤەیا دووماھیێ دا نە یانا چێلسی ب سەرکەفتنێ دێ دەربازبوونا خوە مسوگەر کەت و ھەر ئەنجامەکێ دی یێ نە چاڤەرێکری دێ رەوشا ئەوێ ب زەحمەت کەڤیت ژبەرکو دێ یاریا خوە یا دووماھیێ بەرامبەر یانا ئەتلەتیکو مەدرید کەت.

د یاریێن کوما چارێ دا ژی ھەتا نوکە چارەنڤیسێ ڤێ کومێ دیار نەبوویە ھەر چەندە ھەردو یانێن بەرشەلۆنە و یوڤانتوس پێنگاڤەکا مەزن ھاڤێتی یە بۆ دەربازبوونێ کو بریارە ئەڤ شەڤە یوڤانتوس خودانا رێزا دوێ د کومێ دا ب حەفت خالان ل یاریگەھا خوە مێڤانداریا بەرشەلۆنە خودانا دەە خالان و سەرکێشا کومێ کەت سەرکەفتیێ ڤێ یاریێ دێ ھەتا رادەیەکێ مەزن دەربازبوونا خوە مسوگەر کەت و یانا سپورتینگ لەشبونا خودانا رێزا سیێ ب چار خالان دێ ھەمبەری یانا ئولومپیاکوس یا یونانی کەت کو ئەڤ ھەردو یانە ئارمانجا ئەوان پلێتا دەربازبوونێ بوو یورۆپا لیگە لێ یانا سپورتینگ لەشبونا دەلیڤەک ھێشتا مایە بۆ قوناغا شازدێ ژ چامپیونیز لیگ ئەوژی ھەکە ل ھەردو یاریێن بھێت سەرکەفتنێ توماربکەت بەرامبەر ئولومپیاکوس و بەرشەلۆنە .

ئەڤرۆ نیوز،ھەژار مەعروف:
نوونەرا ھەرێما کوردستانێ دخولا پل نایابا عیراقێ تیما تەپا پێ یا زاخۆ د یاریا خوە یا ڤەکرنا خولێ دا توشی خوسارەتیێ بوو ل سەر دەستێ یانا نەفت ئەلجنوب بەسرا ب گولەکێ بێ بەرامبەر کو دڤێ یاریێ دا راھێنەرێ یانا زاخۆ د پێکھاتیێ یاریێ دا پتر پشت بەستن ل سەر یاریزانێن ھەرێمێ کر بوو ئەوژی ھەشت یاریزانا د پێکھاتیێ سەرەکی دا بوون ژ ھەرێما کوردستانێ.
تیما نەفت ئەلجنوب دڤێ یاریێ دا ھەر زیکا دەست ب گڤاشتنا ل سەر گولا تیما زاخۆ کر چەندین مەترسی ل نیڤا ئێکێ ل سەر گولا یانا زاخۆ پەیداکرن ئەو بوو ل دقیقا ٣١ یاریزان حسێن عەلی گولا ئێکێ بوو یانا خوە تومارکر و ل نیڤا دوێ دا یانا زاخۆ گەلەک گڤاشتن ل سەر گولا تیما میڤان کرن ل شارەزایا یاریزانێن تیمێ کو چەندین یاریزانێن یانا زاخۆ ئەو بوون بۆ جارا ئێکێ پشکداری دخولا عیراقێ دا کەن و یاری ھەر ما وەکو خوە ھەتا فیرکا دووماھیێ یا دادڤانێ یاریێ و تیما زاخۆ د یاریا ئێکێ ژ خولێ سێ خال ژ دەست دان.
بۆ ڤێ یاریێ راھێنەرێ تیمێ محەمەد یوسف د پەیوەندیەکا تەلەڤونی دا ژ بەسرا بۆ رۆژناما ئەڤرۆ دیارکر سەرەرای کێماسی د ناڤا تیمێ دا ھەین ھەردیسان نەبوونا بەرھەڤیێن باش کو ئەو ھەتا ئەڤرۆ ژی ئەوان چو یاریێن ب ھێز یێن ھەڤالینی نە ئەنجامدابوون کو یاریا بەرامبەر نەفت ئەلجنوب د بیتە تاقیکرنا ئێکێ یا تیمێ یا ب دروستی لێ سەرەرای ئەڤان ھەمی کێماسی ئەو ژ ئاستێ تیمێ یێ رازیبوو ھەتا رادەیەکی ژبەرکو یاریزانێن ئەوی شیان ئەوا ل سەر مللێن خوە پێکشێش بکەن و ب شاشیەکێ بچووک ژی گول سەر ئەوان ھاتە تومارکرن لێ ئەوی باوەری ب تیما خوە ھەیە ل گەل بوراندنا یاریان دێ ئاستێ تیمێ بەر ب باشی ڤە چیت ھەردیسان کێماسی ل ناڤا پێکھاتیێ تیمێ دا ھەنە لێ بۆ یاریێن بھێت دێ ئەو کێماسی ژی ھێنە چارەسەرکرن و .
ھەردیسان محەمەد یوسف ئاماژە ب وێ چەندێ ژی کر دڤێ یاریێ دا ئەوان چو یاریزانێن بەرنیاس ل سەر تیمێ نەبوون ژبلی ھەردو یاریزانان ستار یاسین و میران خسرو کو ئەڤان ھەردو یاریزانان شارەزایەکا باش ھەیە ئەو یاریزانێن دی زوربەیا ئەوان ئەون یێن بۆ جارا ئێکێ پشکدار دخولا عیراقێ دا ھەردیسان ل وەرزیێن بوری ژی ل گەل یانێ بوون لێ نە وەکو یاریزانێن سەرەکی لێ ئەوان یاریزانێن نوو دڤێ یاریێ دا خوە ئاشکراکر کو پاشەرۆژەکا گەش بۆ تەپا پێ یا زاخۆ یا ھەی و من باوەریەکا مەزن ب تیمێ ھەیە یاری بۆ یاری دێ ئاستێ تیمێ باشتر بیت و ھەردیسان ئەوان پشکداری ب دو یاریزانێن تیمێ کر کو تیما پێگەھشتیان سەرئێخستی نە تیما ئێکێ.

راھێنەرێ نەفت ئەلجنوب: تیما زاخۆ پاشەرۆژەکا گەش ھەیە
ژلایەکێ دویڤە راھێنەرێ یانا نەفت ئەلجنوب عادل ناسر گوت: تیما ئەوان دڤێ یاریێ دا بێ پشکداریا ھەرسێ پیشەکارێن خوە کر کو ھەتا نوکە ئاریشەیا فیزا ئەوان یاریزانان چارەسەر نەبوویە لێ یاریزان نافخوی ھەمی د بەرھەڤبوون و سوپاس بوو خودێ شیان د یاریا ئێکێ دا سەرکەفتی بین و سێ خالێن گرنگ ب دەستخوڤە توماربکەین، ناڤبری سەبارەت تیما زاخۆ دیارکر تیمەکا گەنچ و ھەکە پشتەڤانی ل ئەڤێ تیمێ بھێتەکرن دێ پاشەرۆژەکا گەش ھەبیت ژبەرکو شیانێن باش ھەبوون چەند یاریزانێن گەنج ل ناڤا تیمێ دا ھەبوون دبینم دێ ئەوان یاریزانان پاشەرۆژەکا باش ھەبیت دخولا عیراقێ دا و ئەنجامێ یاریێ ژی باشترین گروڤەیە کو ژ دەرڤەی یاریگەھا خوە ب گولەکێ بێ بەرامبەر خوسارەت بوویە و ب ئەنجامەکێ نورمال دبینت .
ژ ئەنجامێن دی یێن خولا عیراقێ یێن حەفتیا ئێکێ ژ یاریێن دوھی نەجەف ل یاریگەھا خوە وەکھەڤبوو ل گەل نەفت بێ گول و شورتە ژ دەرڤەی یاریگەھا ب سەرکەفت ل سەر یانا کەربەلا ب گولەکێ بێ بەرامبەر ب ھەمان ئەنجام تەلەبە ب سەرکەفت ل سەر نەفت میسان و مینا جەویە بێ گول وەکھەڤبوون و د کارەبا ب سەرکەفت ل سەر نەفت وەست ب سێ گولان بەرامبەر گولەکێ و بەحری ل سەر حسێن ب گولەکێ بێ بەرامبەر دیوانیە ل گەل حدود وەکھەڤ بوو ب گولەکێ و زەورا ب سەرکەفت ل سەر سیناعات کارەبای ب گولەکێ بێ بەرامبەر .