ئەڤرۆ:
پشتی ل ماوێ چەند رۆژێن بوری دا یانا مانچستەر یوناید ھەڤبەستا ھێرشبەرێ بەرنیاس یێ بەلجیکی و یانا ئیڤەرتون لەکاکو ئیمزاکری ب کوژمێ ٧٥ ملیون یورۆیا یانا مان یوناید بۆ ب ھێز ئێخستنا ھێلا ھێرشبەریا یانێ راھێنەرێ پرتوگالی جوزێ مورینھو ھزر ل ئینانا ھێرشبەرەکێ دی ژی کریە بۆ وەرزێ بھێت پێکھاتیەکێ نمونە بەرھەڤبکەت و ھەڤرکیێ ل سەر ناسناڤێن نافخوی و ئورۆپی بکەت.
رۆژناما گاردیان یا برێتانی ئاشکراکریە یانا مانچستەر یوناید نێزیکی ئیمزاکرنا ھەڤبەستا ھێرشبەرێ کرواتی و یانا ئەنتر میلان پێرسیچ بوویە پشتی یانا ئنگلیزی کوژمێ ٤٠ ملیون جینێ ئیسترلینی پێشکێشی یانا ئیتالی کری و ھەر چەندە یانا ئیتالی ھەتا نوکە رازینەبوویە ژبەرکو ئەو کوژمێ ئەنتر ژ مانچستەر داخوازکری ھێشتا نەە ملیون یورۆ ماینە لێ دویڤ ژێدەرێن بەر دەستێ رۆژناما گاردیان ھەردو یانە نێزیکی رێکەفتنێ بووینە و چاڤەرێ دھێتەکرن ل چەند رۆژێن بھێت ھەڤبەستا ئیڤان پێرسیچ ب فەرمی ل گەل یانا مانچستەر یوناید بھێتە راگەھاندن.
پێرستیچ یاریزانێ نیڤدەولی کرواتی ئێک ژ ھێرشبەرێن بەرنیاس نوکە ل سەر ئاستێ خولا ئیتالیا ھەردیسان ل ئورۆپا ل گەل ھەلبژارتیێ خوە کرواتیا ٥٧ یاری ئەنجامداینە شیا ١٥ گولان توماربکەت ھەردیسان یاری ل یانێن بوردو یا فەرەنسی و کلوپ بروچ یا بەلجیکی و بروسیا دورتموند و ولفسبورگ یێن ئەلمانی کریە و ژ ٢٠١٥ وەرە ل گەل ئەنتر میلان.

ئەڤرۆ:

یاریزانێ ھێلا بەرەڤانیا یانا ریال مەدرید و ھەلبژارتیێ ئیسپانیا دانی کارفاخال د دیدارەکێ دا ل گەل کەنالێ یانا ریال مەدرید ئاشکراکر ئەوان بۆ وەرزێ بھێت کارەکێ مەزن ل بەرە و ھیڤی و ئومێدێن یانا ریال دێ ل وەرزێ بھێت زێدەتر بن ژ یێن ئەڤ سالە ژبەرکو ئەوان نوکە تیمەکا خوە جە ھەیە و زوربەیا یاریزانێن وەرزێ بوری ماینە ل گەل تیمێ ب رێژەکا مەزن ھەمان یاریزان .

ھەردیسان کارفاخال ئاشکراکر ژی یانا ئەوان دێ بۆ وەرزێ بھێت ھەڤرکیێ ل سەر شەش ناسناڤان کەن و شیانێن برنا ئەوان شەش ناسناڤان ئەوان ھەیە ژبەرکو تیما مە نوکە ژ باشترین یانا ل سەر ئاستێ جیھانێ خودان یاریزان و راھێنەرەکێ شارەزا و خودان شیانین و ئارمانجا مە بۆ وەرزێ بھێت دێ ھەر ئێک ژ ناسناڤێن خولا لالیگا و چامپیونیز لیگ و سوپەرا ئورۆپا و ئیسپانیا و ھەردیسان موندیالا جیھانی یا یانان و کاسا شاھێ ئیسپانیا بیت.

ئەڤرۆ:
رۆژنامەیێن بەرازیلی ئاشکراکریە پاولینھو یاریزانێ ھەلبژارتیێ بەرازیل و یانا گوانزو ئیڤرگرائد یا چینی نێزیکی ئیمزاکرنا ھەڤبەستا یانا بەرشەلۆنە یا ئیسپانی بوویە پشتی یاریزانێ ناڤبری داخوازیا یانا بەرشەلۆنە رازیبووی و حەزا خوە دیارکری جارەکا دی ڤەگەریتە خولێن ئورۆپی.
رۆژناما سپورت یا ئیسپانی ژلایێ خوڤە ئاشکرا کریە پاولینھو ل گەل سەرۆکێ یانا گوانزو شو چیایین و راھێنەرێ یانێ یێ بەرازیلی ڤلیپ سکولاری کومبوویە بۆ ھەردوکان دیارکریە ئەوی حەزا کرنا یاری جارەکا دی ل ئورۆپا ھەیە و دخوازیت ئەو بەر ب یانا بەرشەلۆنە ڤە بچیت .
ھەردیسان ئەوێ رۆژنامێ ئاشکرا کریە ژی ئەڤە جارا دوێ یە یانا کەتەلونی داخوازیا پاولینھوی دکەت د مێرکاتویا ھاڤینا ئەڤ سالە دا پشتی جارا ئێکێ ئەوی رەتکری لێ ناخوازیت جارا دوێ ئەو داخوازیا یانا بەرشەلۆنە رەتبکەت لەورا ئەوی ھەتا رادەیەکێ مەزن خوە ل گەل یانا گوانزو ئێکلا کریە و دبیت ل چەند رۆژێن بھێت ھەڤبەستا یاریزانێ بەرازیلی و یانا توتنھام یێ بەری نوکە ل گەل یانا بەرشەلۆنە بھێتە راگەھاندن.
ھەردیسان رۆژناما سپورت دیارکر ژی یانا بەرشەلۆنە کوژمێ ٢٥ ملیون یورۆیا پێشکێشکریە بۆ ئیمزاکرنا ھەڤبەستا پاولینھو ھەردیسان یانا بەرشەلۆنە دێ کوژمێ ھەڤبەستا ئەوی زێدەکەت ھەکە ئاستێ ھونەری یێ یاریزانی بلندتر بوو ژ ئاستێ نوکە .
ل دووماھیێ وێ رۆژنامێ ئاشکرا کر ژی یانا بەرشەلۆنە ل سالا ٢٠١٣ گەلەک نێزیکی ئیمزاکرنا پاولینھوی ببو پشتی وێ و یانا توتنھام ھەڤرکی ل گەل ئێک کری و ل دووماھیێ یانا توتنھام شیا شیانێن ئەوی ب دەستخوڤە بینت و ل وەرزێ بوری ب کوژمێ ١٤ ملیون یورۆیا ژ یانا توتنھام بەر ب یانا گوانزو چو .
راپورتێن رۆژنامەڤانی ل بەرازیل ئاماژە ب وێ چەندێ کریە نیمار یاریزانێ بەرشەلۆنە ییچ بزاڤێن مەزن کەت ئەڤ ھەڤبەستە سەربگریت و پاولینھو یاری ل یانا بەرشەلۆنە بکەت ژبەرکو ئەو یاریزان نێزیکترین ھەڤالێ نیماری یە .

ئەڤرۆ:
رێڤەبەرێ ھونەری ھەلبژارتیێ فەلەستین سەبارەت ئەو دەنگوباسێ ل ڤێ دووماھیێ ل راگەھاندنا عیراقی ھاتیە بەلاڤەکرن کو راھێنەرێ ھەلبژارتیێ عیراقێ دیارکر بوو ل ٢٣ ڤێ ھەیڤێ دێ یاریەکا ھەڤالینی ل گەل ھەلبژارتیێ فەلەستین ئەنجامدان ل یاریگەھا بەسرا پشتی سەرۆکێ ئێکەتیا تەپا پێ یا عیراقی بۆ راھێنەرێ ھەلبژارتیێ عیراقێ دیارکری بەرھەڤیا بکەن بۆ ئەنجامدانا وێ یاریا ھەڤالینی و رێڤەبەرێ ھونەری ھەلبژارتیێ فەلەستین بۆ کورە بەحرێنی دیارکر چو پێزانین ل سەر ئەڤی دەنگوباسی نین و ھەتا نوکە کەسێ ئەو ئاگادار نەکرینە بۆ کرنا یاریەکا ھەڤالینی ل گەل ھەلبژارتیێ عیراقێ ل باژێرێ بەسرا .
ھەردیسان عەبدولناسر بەرەکات ئاماژە ب وێ چەندێ ژی کر ئەو دەنگوباسێن ل راگەھاندنا عیراقێ ھاتینە بەلاڤەکرن ئەوان ئاگادار نینە و ھەتا نوکە کەسێ ئەو ئەو وەکو رێڤەبەرێ ھونەری ھەلبژارتیی ئاگادار نەکرینە و ئەو بەرھەڤ نین یاری ل ڤی دەمی بکەن ژبەرکو ماوێ ئەنجامدانا یاری نێزیکی دەە رۆژا مایە و د ڤی دەمێ کورت دا ئەو نەشێن ھەمی یاریزانان کومبکەن ژبەرکو پشتی یاریا ل گەل ھەلبژارتیێ عومان ژ ڤاڤارتنێن ئاسیا ئەوان بێنڤەدان دایە ھەمی یاریزانان و ھەکە ڤی دەمی ب فەرمی ژی داخوازی ژ ئەوان بھێتەکرن ئەو دێ داخوازا لێبورینێ خوازن ژبەرکو کومکرنا یاریزانان د دەمەکێ کورت دا بۆ ئایندەیێ ھەلبژارتیێ ئەوان دێ خراب بیت ل ڤاڤارتنا .

ژ ٢٠١٤ وەرە ٨٣ یاری ئەنجامدای نە ل گەل ھەلبژارتیێ عیراقێ و دھۆک و زەورا جەویە بتنێ سێ یاریان خوسارەت بوویە
ئەڤرۆ،ھەژار مەعروف:
راھێنەرێ بەرنیاس یێ عیراقی و راھێنەرێ بەری نوکە یێ یانا دھۆک باسم قاسم ئەوێ نوکە سەرپەرشتیا راھێنەریا ھەلبژارتیێ عیراقێ و یانا جەویە کەت ھەتا نوکە د ماوێ دو وەرزان دا ل گەل یانا جەویە و زەورا ژ یاریێن خولا پلا نایابا عیراقێ ٥٥ یاری ئەنجامدای نە و بتنێ یاریەکێ خوسارەت بوویە و ٣٤ یاریان شیا سەرکەفتنێ توماربکەت ل گەل ١٩ وەکھەڤیان و ل گەل ھەردو یانێن زەورا و جەویە ل دو سالێن بوری ٨٤ گول تومارکرینە و ٣٠ گول سەر تیمێن وی ھاتینە تومارکرن دخولا عیراقێ دا.
باسم قاسم ل وەرزێ بوری ل گەل یانا زەورا ناسناڤێ خولێ ب دەستخوڤە ئینا پاش بۆ وەرزێ ئەڤ سالە ھەڤبەستا جەویە ئیمزاکر راھێنەرێ ناڤبری ل گەل یانا زەورا د یاریێن خولا عیراقێ دا ل وەرزێ بوری ٢٧ یاری ئەنجامدان کو پازدە یاریان شیا سەرکەفتنێ توماربکەت بەرامبەر نەە وەکھەڤیا و وەرزێ ٢٠١٥-٢٠١٦ ژ خولێ ب دووماھی ئینا بێ خوسارەتی و ناسناڤێ خولێ ژی ب دەستخوڤە تومارکر پشتی یاریزانێن وی ٣٧ گول تومارکرین بەرامبەر پازدە گول سەر ھاتنە تومارکرن ھەردیسان ل وەرزێ بوری باسم قاسم یانا زەورا گەھاندبوو دووماھیا قارەمانیا کاسا عیراقێ پشتی ل گەل یانا جەویە خوسارەت بوو کو شەش یاریان دا ل گەل زەورا دو یاریان خوسارەت بوو ئانکو سەرجەمێ یاریێن راھێنەرێ ناڤبری کاس و خولا عیراقێ ل گەل زەروا یێن وەرزێ بوری بوونە ٢٩ یاری.
پشتی وەرزێ ٢٠١٥-٢٠١٦ باسم قاسم ب سەرکەفتیانە ل گەل زەورا ب دووماھی ئینا راھێنەرێ ناڤبری ھەڤبەستا ھەڤرکا سەرەکی یا یانا زەورا جەویە ئیمزاکر و ل گەل ڤێ یانێ ژی ھەر ل پێنگاڤا ئێکێ شیا کاسا ئێکەتیا ئاسیا بو جارا ئێکێ دیروکا یانێ دا ب دەستخوڤە بینت پشتی سەرپەرشتیا ئەوان کری ل پێنج یاریان دا بێ خوسارەتی تیم گەھاندە دووماھیا قارەمانیێ و شیا ناسناڤی ژی ب دەستخوڤە بینن و راھێنەرێ ناڤبری ھەتا نوکە ٣٠ یاریا دخولا عیراقێ دا سەرپەرشتیا راھێنەریا یانا جەویە کریە ل وەرزێ ئەڤ سالە شیا ١٩ یاریا سەرکەفتنێ توماربکەت بەرامبەر دەە وەکھەڤیا و ئێک خوسارەتی کو ٤٧ گول تومارکرینە و ١٥ گول سەر ھاتینە تومارکرن و ھەردیسان شەش یاری ژی خولێ ماینە و ھەتا رادەیەکێ مەزن نێزیکی برنا ناسناڤێ خولا عیراقێ بوویە بۆ جارا دویێ ل دویڤ ئێک ھەردیسان جارا سیێ ل دەە سالێن بوری دا.
باسم قاسم ل گەل یانا جەویە ل وەرزێ ئەڤ سالە ھەشت یاریا سەرپەرشتیا یانێ کریە د کاسا ئێکەتیا ئاسیا دا ئەوژی چار سەرکەفتن تومارکریە بەرامبەر چار وەکھەڤیا و بەرامبەر یاریەکا کاسا عیراقێ ئەوژی سەرکەفتن تومارکریە کو سەرجەمێ یاریێن وی گەھشتینە ٤٤ یاریان ھەتا نوکە ل گەل یانا جەویە ئەوژی ٢٧ سەرکەفتن ل گەل ١٦ وەکھەڤیا و ئێک خوسارەتی .
راھێنەرێ ناڤبری ژبلی ئەڤان ھەردو وەرزان وەرزێ بەری وی ژی توشی خوسارەتیێ نەبوو کو ٢٠١٤-٢٠١٥ سەرپەرشتیا یانا دھۆک کربوو ل پێنج یاریێن دەستپێکێ کو ل گەل یانا دھۆک سێ سەرکەفتن ل گەل دو وەکھەڤیا پاش ژبەر ئەو قەیرانا دارایی یا یانا دھۆک ھەڤبەست ھاتبو ھەلوەشاندن و ھەردیسان سێ یاریان ل سالا ٢٠١٧ سەرپەرشتیا ھەلبژارتیێ عیراقێ کریە کو یاریەکێ سەرکەفتن تومارکریە بەرامبەر دو وەکھەڤیان ئانکو سەرجەمێ یاریێن باسم قاسم ھەر ژ سالا ٢٠١٤ ھەتا ٢٠١٧ ل گەل دھۆک و زەورا و جەویە و ھەلبژارتیێ عیراقێ ٨٣ یاریا وەکو راھێنەر سەرپەرشتیا ئەوان کریە ٥١ یاریان شیا سەرکەفتنێ توماربکەت بەرامبەر ٢٩ یاریان وەکھەڤبوویە و سێ یاریان بتنێ خوسارەت بوویە کو دو ژ ئەوان ژ کاسا عیراقێ بوون .

ئەڤرۆ:
خودانێ کومپانیا فێسبوکی کو ئێک ژ بەرنیاسترین مالپەرێن چڤاکی و مەزنترین داھاتی نوکە بۆ ڤێ کومپانیێ دھێت ل جیھانێ وەکو مالپەرێن کومەلایەتی و خودانێ وێ یێ گەنج مارک زوکربیگ یێ ٣٣ سالی حەزا کرینا یانەکا ئینگلیزی ھەیە ئەوا دخولا پرێمرلیگ دا یاری کەت کو سێ سالە ئەڤی گەنجی ئەو یانا کریە ئارمانجا خوە .
رۆژنامەیێن برێتانی ئاشکراکریە مارک خودانێ کومپانیا فێسبوک یێ بزاڤێن مەزن دکەت بوو کرینا یانا توتنھام خودانا رێزا دوێ دخولا ئنگلتەرا دا کو ئێک ژ بەرنیاسترین یانێن خولا ئنلگتەرا یە کو مارک بەری سێ سالان ژی بزاڤێن کرینا ئەڤی یانێ کربوون لێ خودانێ یانا توتنھام وی دەمی ٨٨٢ ملیون پاوند ژی داخوازکربوون لێ پشتی بورینا سێ سالان جارەکا دی مارک ھزر ل کرینا ئەڤێ یانێ کریە و راپورتێن رۆژنامەڤانی وەسا دیاردکەن گەنجێ ئەمریکی مارک زوکربیگ نێزیکی کرینا ئەڤێ یانێ بوویە ژبەرکو ئەوی ئێک ملیار پاوەند بەرھەڤکرینە بۆ کرینا ئەڤێ یانێ.

ئەڤرۆ:
بریارە ل دووماھیا ڤێ ھەیڤێ ھەردو یانێن بەرشەلونە و ریال مەدرید یاریەکا ھەڤالینی ل باژێرێ مەیامی یێ ئەمریکی ھەمبەری ئێک بن ژ چارچوڤێ قارەمانیا ھەڤالینی یا کاسا نیڤدەولی یا جیھانی کو چەندین سالە یاریگەھا ھارد روک یا ئەمریکی ب رێکخستنا یاریەکا ھەڤالینی رادبیت بۆ ئەنجامدانا یاریەکا ھەڤالینی یا دو یانێن بەرنیاس ل جیھانی .
رۆژناما ئاس یا ئیسپانی ئاشکراکریە نوکە بھایێ پلێتا فروتنا یاریێ گەلەک گران بوویە و ب رێژەکا مەزن ژ بھایێ بەری نوکە کو پلێتا یاریێ نوکە ل چەند جھێن تایبەت گەھشتی یە ١٠ ھزار دولاران کو ئەڤە دبیتە گرانترین بھایێ فروتنا پلێتی ل چەندین سالێن بوری دا ل ڤێ یاریگەھێ ھەردیسان ئەوێ رۆژنامێ ئاشکرا کریە ژی بەری نوکە ل سەر مالپەرێ فەرمی یێ فروتنا پلێتێن یاریا کلاسیکویا ئیسپانی ل ئەمریکا بھایێ فروتنا پلێتێ ٢٨٣ دولار بوون لێ نوکە ھەر ئەوان پلێتا خوە ل ١٠ ھزار دولاران دایە ئەڤە ژی بوو وێ چەندێ دگەھینت حەژێکەرێن ھەردو یانا گەلەک حەزا دیتنا ڤێ یاریێ ھەیە تایبەت ل وەلاتێ ئەمریکا.
بریارە ئەڤ یاری یە ل ٣٠-٧-٢٠١٧ بھێتە ئەنجامدان ل یاریگەھا ھارد روک ل باژێرێ مەیامی یێ ئەمریکی کو ئەڤ یاریگەھە یا تایبەت ب یانا مەیامی یا ئەمریکی ڤە سەرۆکێ ڤێ یانێ ئێک ژ بازرگانێن بەرنیاس ل ئەمریکا دیارکر مێڤانداریا کلاسیکویا ئیسپانیا ل یاریگەھا مەیامی ئێک ژ خەونێن ئەوان بوو ئەو شیان ئەڤێ چەندێ ب جە بینن و دبینت ئێک ژ گرنگترین و خوشترین یاریێن جیھانێ یە و مێڤانداریا ڤێ یاریێ ژی بتنێ بۆ پێشکەڤن و ناڤ دەنگیا وەلاتێ خوە کریە .