ئەڤرۆ نیو، عەلی حاجی :
رێڤەبەرێ کاروبارێن شەهید و ئەنفالکریان ل زاخۆ بۆ ئەڤرۆ نیوز دیار کر: ب رێیا دو خێرخوازان ل زاخۆ ئەو شیان جلکان بۆ ١٦٠ زارۆیێن شەهیدێن شەرێ دژی تیرۆرستێن داعش و حەشدا شەعبی دابین بکەن وەکو دیاریێن جەژنێ.
زێدەتە ئەحمەد خەمو گۆت : بۆ جارا ئێکێ یە ب ریێا رێڤەبەریا مە جلوبەرگ بۆ زارۆیێن شەهیدان دهێتە دابین کرن، هەروەسا دێ بەردەوام بین دا کو بشێین زێدەتر خزمەتا زارۆیێن شەهیدان بکەین.
ئەڤرۆ نیوز:
مالپەرێ (وورلد ئومیتەر) یێ جیهانی بۆ داتایان بەلاڤكریە: کو هژمارا سەرجەم تووشبوو یێن ڤایرۆسێ كۆرۆنا یێ ل سەرانسەری جیهانێ گەهشتیە چار ملیون و 927 هزار و 566 كەسان.
هەمان مالپەر دیار کریە: کو هەر ژ دەستپێكا سەرهەلدانا ڤایرۆسێ كۆرۆنا یێ ل باژێرێ ووهان یێ چینێ و هەتا نوكە، 320 هزار و 892 كەسان ژ ئەگەرێ ڤایرۆسێ كۆرۆنا یێ گیانێ خوە ژ دەستدایە، دیسان نێزیكی دو ملیون توشبوویان ژی ب تەمامی چێبووینە.
ئەڤرۆ نیوز:
وەزارەتا ساخلەمیا هەرێما کوردستانێ تووشبوونا نەهـ کەسان ل سلێمانیێ و کەسەکێ ل هەولێرێ ب ڤایرۆسێ کۆرۆنا یێ راگەهاند.
هەروەسا گۆتیە: د بەردەوامیا پشکنین و لێگەریانێ لدووڤ گومانلێکریان، دەهـ تووشبوویێن دی یێن ڤایرۆسێ کۆرۆنا یێ ل هەرێما کوردستانێ هاتنە دەست نیشانکرن، ئێک ژ وان زەلامەکێ د ژیێ (٤٤) سالیێ دایە تووشبوویەکێ نوو یە و نیشانێن ڤێ نەخۆشیێ هەنە و خۆجهێ گەرەکا قەتەوی یە ل هەولێرێ.
هەروەسا گۆتیە: نەهـ تووشبوویێن دیتر ل سلێمانیێ نە و چار ژ وان ژنن و د ژیێن (٥٣)، (٥٢)، (٢٩)، (٢٤) سالیێ دانە و چارێن دی زەلامن و د ژیێن (٥٣)، (٣٦)، (٣٤)، (٣٠) سالیێ دانە و کچەکا گەنج یا د ژیێ (١٥) سالیێ دایە، هەموو خۆجهێن ناڤا سلێمانیێ نە، هەشت ژ وان بەرکەفتیێن تووشبوویێن بەرێ نە و ئێک ژ وان تووشبوویەکێ نوو یە و نیشانێن وێ نەخۆشیێ هەنە.
ئەڤرۆ نیوز:
مستەفا کازمی، بریار دا مووچێ ڤێ هەیڤێ یێ فەرمانبەرێن عیراقێ بێی برین و پاشەکەفتکرن بهێتە دابەش کرن.
ئەڤرۆ نڤێسینگەها راگەهاندنا مستەفا کازمی، سەرۆک وەزیرێن عیراقێ راگەهاندیە: کو مووچێ ڤێ هەیڤێ یێ فەرمانبەرێن عێراقێ بێی برین و پاشەکەفتکرن دێ هێتە دابەش کرن، دێ هەر وەکی هەیڤێن بوری هێتە دابەش کرن.
ژبەر داکەفتنا بهایێ نەفتێ، دەنگۆیێ برین و پاشکەفتکرنا پشکەک ژ دەرمالەیێن فەرمانبەرێن عێراقێ هەبوویە.
ئەڤرۆ نیوز، عەلی حاجی :
رێڤەبەرێ چاندنێ ل زاخۆ بۆ ئەڤرۆ نیوز دیار کر مە پێشبینیا وەرگرتنا ٣٠ هزار تەنێن گەنمێ جوتیاران ل سایلویا زاخۆ کری یە و هەمی بەرهەڤی ژی هاتینە کرن ل سایلویا زاخۆ ئەو بەرهەم بهێتە وەرگرتن.
زێدەتر ئەحمەد سامی گۆت: (بۆ وەرگرتنا بەرهەمێ گەنمێ جوتیاران ل زاخۆ هەمی بەرهەڤی هاتینە کرن و مە پەیوەندی دگەل رێڤەبەریا سایلویا زاخۆ هەنە لەورا ئەم پێشبینی دکەین د ئەڤ سالە دا نێزیکی ٣٠ هزار تەنێن گەنمێ جوتیاران ل سایلویا زاخۆ بهێتە وەرگرتن و هەمی بەرهەڤی ژی هاتینە کرن بۆ دەست پێکرنا وێ پروسەیێ و دبیت ل ١/٦ هەتا ١٠/٦/٢٠٢٠ دەست ب درینا گەنمی بهێتە کرن،د ئەڤ سالە دا گەنم ب شێوەیەکێ باشتر و بەرفرەهتر هاتیە چاندن و ٩١ هزار و ٣٠٠ دونەمێن ئەردی ژلایێ ژلایێ ٤٠٥ جوتیاران ڤە ئەڤ سالە گەنم هاتیە چاندن و ئەم چاڤەرێ دکەین بەرهەمێ ئەڤ سالە ژ سالا بوری باشتر بیت ژبەر کو باران د دەمێن خوە دا هاتن و کارتێکرنەکا خراب ل سەر بەرهەمێ جوتیاران نەبوو و زێدەباری وێ چەندێ ژی ٥٠ تەنێن گەنمێ پلە ئێک ژی هاتیە چاندن ل زاخۆ و ئەم نوکە یێ تاقیکرنێ ل سەر دکین و هەر دەما هاتە درین دێ سەحکەینە بەرهەمێ وی گەنمی و هەکە ژ گەنمێ باش بیت دبیت حکومەتا هەرێمێ وی بەرهەمی بکڕیت) .
ناڤهاتی خویا کر ژی ” لژنا سەر ب رێڤەبەریا مە ڤە بۆ زانینا نەخوەشیان دناڤ بەرهەمێن گەنمێ جوتیاران دا روژانە سەرەدانا ناڤ گەنمی دا دکرن و دەرمانەکێ قرکەر ژلایێ حکومەتێ ڤە هات بوو دابین کرن بۆ ژ ناڤبرنا نەخوەشیێن دناڤ گەنمی دا و هەتا نوکە ژی بەردەوام چاڤدێری دهێتە کرن”.
ل دوماهیێ ئاشکەرا کر د دەما دەست پێکرنا پروسەیا وەرگرتنا گەنمی ل سایلویا زاخۆ هەژمارەکا فەرمانبەرێن مە دگەل فەرمانبەرێن سایلویا زاخۆ دەست ب وەرگرتنا گەنمی دکەن و دخازین د ئەڤ سالە دا پلانا مە یا سەرکەڤتی بیت د وەرگرتنا گەنمی دا.
ئه‌ڤرۆ نیۆز، عه‌زیز هه‌ورامی:
سه‌رۆكی نوێنه‌رایه‌تی حكوومه‌تی هه‌رێمی كوردستان له به‌غدا ،ده‌ڵێ حكوومه‌تی عێراق و هه‌رێمی كوردستان پاش جه‌ژن دانوستانه‌كانیان ده‌ست پێده‌كاته‌وه، حكوومه‌تی نوێ عێراق ڕوانگه‌ی زۆر باشه له‌هه‌مبه‌ر ڕێكه‌وتن له‌گه‌ڵ كوردستان.
فارس عیسا، به ئه‌ڤرۆ نیۆز ده‌ڵێ:” له پاش جه‌ژنی ڕه‌مه‌زان كۆبوونه‌وه‌ی هه‌ردوو حكوومه‌تی هه‌رێمی كوردستان له باره‌ی بوودجه و مووچه‌ی فه‌رمان به‌رانی كوردستان ده‌ست پێده‌كاته‌وه ،دانوستانه‌كان هه‌نگاوی باشیان بڕیوه لێكتێگێشتن بۆ ڕێكه‌وتن له نێوان هه‌ردوو حكوومه‌ت هه‌یه.
فارس عیسا وتیشی:” دانوستانه‌كانی به‌غدا و هه‌ولێر هه‌نگاوی زۆر باشی نابوو ئه‌رێنی بوون به‌ڵام حكوومه‌تی عادلعه‌بدلمه‌هدی كۆتایی هات و حكوومه‌ته‌كه‌ی مسته‌فا كازمی هاته‌سه‌ر حكووم له پاش جه‌ژنی ڕه‌مه‌زان بڕیاردراوه دانوستانه‌كان ده‌ست پێبكه‌نه‌وه له‌و خاڵه‌وه‌ی كه وه‌ستێندراوه به‌هۆی پێكهێنانی حكوومه‌تی نوێ له عێراق.
عیسا زیاتر زانیاریدا و گوتی:” مسته‌فا كازمی سه‌رۆك وه‌زیرانی نوێ عێراق له‌هه‌مبه‌ر ڕێكه‌وتن له‌گه‌ڵ هه‌رێمی كوردستان ،قسه‌ی باشی كردووه ڕوانگه‌ی بۆ ڕێكه‌وتن باشه ودووای جه‌ژن دانوستان له‌گه‌ڵ حكوومه‌تی نوێ ده‌ست پێده‌كات.
نيشاندان