ئەڤرۆ نیوز:
به‌رى نوكه‌ نووچه‌یێ چوونا یاریكه‌رێ یانا شاهانا ئیسكوى بۆ هه‌ر ئێك ژ یانێن ئێڤه‌رتون یا ئنگلیزى و یۆڤێنتوس یا ئیتالى هاتبوونه‌ به‌لاڤ كرن، چونكى زێدانێ راهێنه‌رێ ریال مه‌درید وه‌كو پێدڤى پشت به‌ستنێ ل سه‌ر وى یاریكه‌رى ناكه‌ت.

رێڤه‌به‌رێ كاروبارێت ئیسكوى ئه‌و نووچه‌ هه‌موو ره‌تكرن و گۆت: ئه‌وان هزر ل چ گرێبه‌ستا نه‌كریه‌ ئه‌وێن گه‌هشتینه‌ به‌رده‌ستێ وان و ئه‌و دێ ل گه‌ل یانا ریال مه‌درید یێ به‌رده‌وام بیت.

د هه‌مان ده‌مدا، رێڤه‌به‌رێ كاروبارێت ئیسكوى وه‌سا دبینیت، كو د شیانێت وى دا هه‌نه‌ جاره‌كا دى باوه‌ریا زێدانێ راهێنه‌ر بده‌ست خوه‌ڤه‌ بینیت و ببیته‌ یاریكه‌ره‌كێ سه‌ره‌كى د پێكهاتیێ ریال مه‌درید دا.

ئەڤرۆ نیوز:

یانا بارسێلۆنا د یاریا به‌رامبه‌ر ئه‌تله‌تیكۆ مه‌درید‌ دا شیانێن هه‌ردو یاریزانێن خوه‌ جیرارد پیكێ و سێرجی رۆبێرتۆی ژ ‌ده‌ست دان، هه‌ردو یاریزان تووشی هنگافتنێن گران بووینه‌.

یانا بارسێلۆنا ل هژمارا خوه‌ یا فه‌رمى ل تویته‌رى راگه‌هاندیه‌، كو جیرارد پیكێ ل ئه‌نیشكا راستێ تووشی هنگافتنێ بوویه‌، سێرجی رۆبێرتۆ ژى ل رانێ راستێ تووشی ئێشانا ماسولكان بوویه‌.

رۆژناما سپۆرت یا كه‌ته‌لۆنی ئاشكرا كریه‌، سوبه‌هى دێ پشكنینێن زێده‌تر بۆ پیكێ هێنه‌ كرن، به‌لێ لدووڤ زانیاریێن ده‌ستپێكێ‌ ئه‌و به‌رگریكارێ‌ كه‌ته‌لۆنی دێ‌ بۆ ده‌مێ چار بۆ شه‌ش هه‌یڤان ژ یاریكرنێ هێته‌ دابرین، لێ رۆژنامه‌یا مۆندۆ دیپۆرتیڤۆ و ئاس یا ئیسپانی دیار كرینه‌، پیكێ دێ دو هه‌یڤان ژ یاریكرنێ هێته‌ دابرین.

هه‌روه‌سا رۆژنامه‌یا ئاس راگه‌یاندیه‌، سێرجی رۆبێرتۆ ژى دێ ژ ئه‌گه‌رێ هنگافتنێ بۆ ده‌مێ هه‌یڤه‌كێ ژ یاریكرنێ هێته‌ دابرین، ب ڤێ چه‌ندێ دێ یانا بارسێلۆنا د‌ یاریا بهێت دا ‌بێى سێرجی رۆبێرتۆ، جیرارد پیكێ، ئانسو فاتی، سێرجیۆ بۆسكێتس و ئاراخۆ یاریێ كه‌ت.

ئەڤرۆ نیوز:

كارگێریا یانا یۆڤێنتوس یا ئیتالى دایه‌ دیار كرن، ئێدى ئه‌و نه‌شێن 30 ملیۆن یۆرۆیان بده‌ته‌ رونالدۆى، بابه‌تێ چوونا وى هێرشبه‌رێ پورتۆگالى زێده‌تر بوویه.
‌
میدیایێن جیهانى، به‌حسێ ڤه‌گه‌ریانا وى دكه‌ن بۆ یانا مانچسته‌ر یۆنایتد، هنده‌ك ژێده‌ر ژى دبێژن دێ ڤه‌گه‌ریته‌ یانا ریال مه‌درید و نوكه‌ ئه‌ڤ نووچه‌یه‌ زێده‌ به‌لاڤ بوویه‌،‌ ب تایبه‌تى پشتى ل ده‌مێ بورى چه‌ندین وێنێن خوه‌ ل گه‌ل رامۆسى و مودرێچى یاریكه‌رێن ریال مه‌درید به‌لاڤ كرین.