ئه‌ڤرۆ نيوز:

پشتی پەیدابوونا شەرێ داعشێ چەندین بوویەر و روودانێن گرێدای بیاڤێ قانوونی ھاتینە پێش کو ل سەر پێشمەرگەی دھێنە سەپاندن. موقەدم ئەمیر بەرواری ژ ھۆبا قانوونی ل فەرماندا دھۆکێ راگەھاند، گرنگیا ھەبوونا قانوونێن گرێدای پێشمەرگەی داخوازا گەلەک پێشمەرگانە، دەربارەی وێ ئێکێ کو کەسێن ھەست بکەن د مەغدۆرن یان ھەکە ھات و د حالەتەکێ یێ مەزلۆم بیت.

موقەدم ئەمیر بەرواری ژ ھۆبا قانوونی ل فەرماندا دھۆکێ ل دۆر قانوونێن د ناڤ پێشمەرگەی دا برێڤەدچن بۆ ئەڤرۆ دیار کر، سەبارەت تاوانەک یان سەرپێچیەک رووبدەت د ناڤ یەکێن سەربازی دا دو حالەت مە یێن ھەیین:، حالەتێ ئێکێ ھەکە ئەو تاوان بیت رەوانەی دادگەھا سەربازی دکەین و پێرابوونێن قانوونی ژی دھینە وەرگرتن، حالەتێ دویێ ھەکە سەرپێجی بیت، مە سزا دەسپلین یا ھەیی (عقوبات انڤباگیە) وەک گیرۆبوون د ئەرکی دا، یان تەوقیفکرن پاشی سۆزنامە ژێ دھێتە وەرگرتن کو دوبارە نەبیتەڤە.

ل دۆر شێوازێ ھەماھەنگیێ ل گەل دادگەھا مەدەنی ژی، موقەدمێ مافپەروەر گۆت: ئەم وەک فەرماندەیا دھۆک فەرمانگەھا قانوونی ب شێوەیەکێ ئێکجار باش مە ھەماھەنگی ل گەل دادگەھێ یا و دەزگەھێن پۆلیسان ھەیە، ئەڤە وەکو تەنسیق، بەلێ من دڤیت ئاماژێ پێ بدەم کو ئەڤ ھەماھەنگیە دزڤریت بۆ فەرماندێ فەرماندا دھۆک شێخ عەلی کو ھەر یێ ھاریکارە ل گەل قانوونێ.
ل دور تاوانان دبێژیت: ئەز دو خالان دەستنیشان دکەم، یا ئێکێ جەریمە مەشھودە ھەکە رووودا، بۆ نموونە پێشمەرگەکی تاوان ئەنجام دا و ل پێشچاڤێن دەزگەھێن پۆلیسان، پۆلیسان ماف یێ ھەیی دەستەسەر بکەن و رەوانەی دادگەھێ بکەن. یا دویێ تاوانا نە مەشھود، بۆ نموونە فەرمانا دەرکەفتنا پێشمەرگەکی دەرکەت و سکالا ل سەر ھەبوون، ڤی حالەتی نڤیسینا فەرمی ژ لایێ دادگەھێ ڤە بۆ مە دھیت و ئەم ب رێیا خوە ھاریکارین ل گەل قانوونێ و رەوانەی دادگەھێ دکەین.
موقەدمێ مافپەروەر دبێژیت: تاوانبار ئانکو یێ سەرپێچی کر بیت، یێ بێگونەھە ھەتا بەلگە نەھێتە پشتراستکرن کو یێ تاوانبارە یان سەرپێچی یا کری. د ڤی حالەتی دا چو بەندێن قانوونێ یێن تایبەت نینن کو مەزولم بیت دڤێت مافێ وی بدەینێ.
د خالەکا گەلەکا گرنگ دا قانوونێن گرێدای شەھیدبوونێ ناڤبری دیار کر کو شەھید ناڤەکێ پیرۆزە و قوربانیدانە ژ بۆ پاراستنا ئاخا کوردستانێ، بێگومان شەھیدێن سەنگەرس~یی، ل وی دەمێ شەھیدبووی ئێکسەر جڤاتا شەھیدبوونێ بۆ ئەنجامددەین ژ لایێ ئیدارا فەرماندا دھۆکێ ڤە و ئەم وەک فەرمانگەھا قانوونێ ل دووڤ بەندا قانوونی ددانین، قانوونا خزمەت و خانەنشینا پێشمەرگە ژمارە 38 ل سالا 2007 و ل دووڤ بەندا 34 برگا 2 پێشمەرگە دەمێ شەھید دبیت د سەنگەری دا ئەڤ بەندا قانوونی ل سەر دھێتە بجھئینان و ھەموو ماف و ئیمتیازاتێن شەھیدی بۆ دھێنە تەرخانکرن وەکو نڤیسینا فەرمی یا ئەنجوومەنی وەزیران 42 ـ 31 رێککەفتی 3/7/ 2014 دو پلە بۆ شەھیدێن سەنگەری دھێنە بەخشکرن ب تنێ بۆ یێن شەرێ داعش.
ئەمیر بەرواری خویاژی کر، جڤاتێن ڤەکۆلینان دھێنە دروستکرن ژ لایێ ئیدارا فەرماندا دھۆک ڤە، تشتێ کرنگ من دڤیا بەحس لێ بکەم کو نڤیسنا دادنڤیسی (کاتب عەدلی) ل گەل بیت و دیار کر بیت کا چاوا ھاتیە شەھیدکرن وەک گولە، tnt کو ھەر وەسا گۆتنێن دو دیدەڤانان ل دەمێ شەھیدبوونێ ل گەل (قەسام شەرعی) و ناسنامێن مەدنی و عیراقی و ل گەل یێن زارۆیێن شەھیدی ھەکە خێزاندار بیت، ب رێیا فەرمانگەھا قانوونی رەوانەی وەزارتا پێشمەرگەی دکەین و ئیمتیازات بۆ دھینە تەرخان کرن وەک دو پلە بۆ دھێنە دان ھەیڤانە و گۆژمەکێ پارەی و گومان تێدا نینە دێ پتر ئیمتیازات ھەبن بۆ رۆژین بھێن.
پاشی موقەدمی ب دۆرھێلێ کارێ خوە ئەڤ پێشنیازە کرن: دادگەھەکا لەشکری ل پارێزگەھا دھۆکێ بھێتە دانان، ژ بەر کو گەلەک پێدڤینە و مافێ پێشمەرگەی ل دادگەھا لەشکەری ل دھۆکێ بھێتە برێڤەبرن، ھەروەسا پێشنیاز کر کو گرتیخانەک یا تایبەت بۆ پێشمەرگەی ھەبیت بۆ مەحکۆم و مەوقۆفان، ژ بەر کو نوکە مەحکۆمێن پێشمەرگەی ل ناڤ ھەر کەسەکێ مەحکۆم دا بیت یێن ھەین و بێ جوداھی، لەورا وەک مافێ پێشمەرکەی، داخواز دکەم گرتیخانەکا تایبەت بۆ پێشمەرگەی ھەبیت.