ئەڤرۆ نیوز:
وەزارەتا ساخلەمی و ژینگەها عیراقێ راگەهاند، د ٢٤ دەمژمێرێن بوری دا 17 حالەتێن نوویێن توشبوون ب کۆرۆنایێ هاتینە تۆمار کرن و ٢١ کەس ژێ چێبووینە.
ئەڤرۆ دوشەمبی وەزارەتا ساخلەمی و ژینگەها عیراقێ راگەهاند، ” د ٢٤ دەمژمێرێن بوری دا، ١٧ حالەتێن نوویێن توشبوون ب کۆرۆنا یێ هاتینە تۆمارکرن، کو هەشت ل بەغدا، حەفت ل موسەنا، ئێک ل بەسرە، ئێک ژی ل نەجەف”.
ئەو ژی هاتیە، 21 کەسێن دی ب تەمامی چێبووینە، کو هەشت ل بەسڕە، شەش ل زیقار، سێ ل بەغدا، دو ل واست، ئێک ل نەجەف و ئێک ل میسان.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند، سێ کەسێن دی ل سلێمانیێ تووشی کۆرۆنا یێ بووینە، کو هەموو وان بەرکەفتیێن توشبوویێن بەرێ نە.
وەزارەتا ساخلەمیا هەرێمێ بەلاڤکریە ژی، د بەردەوامیا پشکنین و لێگەریانێ لدووڤ گومانلێکریان، سێ توشبوویێن دی یێن کۆرۆنا یێ ل پارێزگەها سلێمانیێ هاتنە دەست نیشانکرن.
دیار کر ژی، ژنەکا د ژیێ ٢٦ سالیێ و کچەکا د ژیێ ١٤ سالیێ و زارۆیەکێ د ژیێ ٨ سالیێ دا تووشی کۆرۆنا یێ بووینە، کو ئاکنجیێن شارباژێر بووینە ل سلێمانیێ و تێکەلی توشبوویێن بەرى نوکە بووینە.
ئەڤرۆ نیوز:
ئەڤرۆ 27.4.2020 ژوورا ئۆپەراسیۆنا ل پارێزگەها دهوکێ روونکرنەک بەلاڤکریە و تێدا هاتیە:
ژ بۆ پاراستنا ساخلەمیا خەلکێ پارێزگەها دهوکێ و ژ پێخەمەت جێبەجێکرنا بریارا قەدەغەكرنا هاتنوچوونێ دناڤبەرا پارێزگەهان و ب تايبەت پارێزگەها دهۆكێ و نەینەوا، هندەك وەلاتیێن خۆجهێن پارێزگەها دهوكێ ل زالگەها خەتارێ ماینە.
وەکو ئەرکەکێ نيشتيمانى و مرۆڤایەتی مە ب فەر دیت کو رێک بهێتە دان بۆ هاتنا وان بو پارێزگەها دهوکێ و لپەی پێرابوونێن ساخلەمیێ، ئاگەهداریا وان وەلاتیان دکەین یێن کو دڤێن بهێنە دناڤ پارێزگەها دهۆکێ ب رێیا زالگەها ئاماژەپێکری کو ئەڤ زالگەهە دێ هێتە گرتن بەرامبەر هاتنێ بو ناڤ پارێزگەهێ هەر ژ رێکەفتی 28-4-2020 هەتاکو 5-5-2020 و ب تنێ رێک دێ هێتە دان بۆ چوونێ بەرەف پاریزگەها نەینەوا بۆ کارێن بازرگانی و حالەتێن فەر یێن دەستووردایی ژ لایێ ژوورا ئوپەراسیونا ل پارێزگەها دهوکێ.
کارێ ئاماژە پێکری دێ هێتە ئەنجامدان لدووڤ داخوازیا رێڤەبەریا گشتی یا ساخلەمیا پارێزگەها دهۆکێ بۆ مەرەما زێدەتر لێگەریان و دووفچوون و کونترولکرنا تیمێن ساخلەمیێ پێخەمەت زانینا ژێدەرێن پەیدابوونا توشبوویێن نوو ب ڤایروسێ کۆرۆنا ل پارێزگەها دهوکێ.
گۆتیە ژی، سوپاس بۆ ئاسايشا دهۆكێ ب تايبه ت و تیمێن زالگەها خەتارێ بۆ ئەنجامدانا کارێ رۆژانە ب رەنگەکێ رێکوپێک بۆ خزمەتکرنا وەلاتیان.
ئه‌ڤرۆ نیوز، ره‌مه‌زان هه‌رنی:
سه‌رۆكێ رێكخراوا رەوشەنبیری و سه‌لامه‌تیا رێ و بانا ل كوردستانێ دیاركر د هه‌یڤا ره‌مه‌زانێ دا ل ده‌مێ ب روژی بوونێ مرۆڤ پتر هه‌ست ب ماندیبوونێ و تووره‌بوونێ دكه‌ت و پتریا جارا له‌زێ دكه‌ت بگه‌هیتە وی جهێ وی دڤێت له‌ورا روودانێن هاتنوچوونێ دروست دبن.
یوسف بازیانی سه‌رۆكێ رێكخراوا رەوشنبیری و سلامه‌تیا رێ و بانا ل كوردستانێ بۆ ئه‌ڤرۆ نیوز گوت: (ل هه‌یڤا ره‌مه‌زانێ دا شوفێر تووشی هنده‌ك ره‌فتارا دبن تایبه‌ت روژی گر كو دبیته سه‌ده‌مێ تووره‌بوونێ و ل ده‌ستدانا ئارامیێ) .
ناڤهاتی دیار ژی کر کو دڤێت ل هه‌یڤا ره‌مه‌زانێ شوفێر پتر ئاگه‌هداری نیشانێن ترافیكا بیت و لێ ده‌رنه‌كه‌ڤیت، ب تایبه‌ت زڤرینێ، پێدڤیه شوفێر ئاگه‌هداری هێلێن ده‌ربازبوونا وەلاتیان بن، ل هه‌موویێ باشتره هەکە شوفێر یێ ماندی بیت ب ترومبێلێن گشتی هاتنوچوونێ بكه‌ت.
ئەڤرۆ نیوز:
وەزارەتا ساخلەمیێ یا هەرێما کوردستانێ راگەهاند کو ٥ کەسێن دی ل باژێرێ هەولێرێ تووشی ڤایرۆسێ کۆرۆنایێ بووینە.
وەزارەتا ساخلەمیێ دیار دکەت کو ئافرەتەکا ٣٦ سالی ل گەل سێ زارۆیێن خوە یێن د ژیێ ١١،١٥ و ١٦ سالی ل گەل زەلامەکێ دی ئەو ژی د ژیێ ٣٣ سالیێ دایە، ل باژێرێ هەولێرێ تووشی ڤایرۆسێ کۆرۆنایێ بووینە.
ل گۆر وەزارەتا ساخلەمیێ هەر ٥ تووشبوویێن نوو هەموو ژی بەرکەفتیێن تووشبوویێن بەرێ نە.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ پێشوازی ل جینین پلاسخارت نوونەرا تایبەت یا سکرتێرێ گشتی یێ نەتەوێن ئێکگرتی ل عیراقێ کر.
د کۆمبوونێ دا سەرۆکێ حوکمەتا هەرێما کوردستانێ راگەهاند کو راگرتنا مووچێ فەرمانبەرێن هەرێما کوردستانێ ژ ئالیێ حوکمەتا عیراقێ بنپێکرنا دستووری یە و نابیت عیراق بابەتێ مووچێن فەرمانبەران وەکو کارتەکا فشارێ ل دژی هەرێما کوردستانێ بکار بینیت.
سەرۆکێ حوکمەتێ ئەو یەک ژی دیار کر کو دەمێ کابینا نەهێ یا حوکمەتێ دەست ب کارێ خوە کری وان سەرەدانا بەغدا کرینە و نیازپاکیا خوە بۆ چارەسەریا هەموو پرسێن د ناڤبەرا هەرێما کوردستانێ و بەغدا دا دیار کرینە.
مەسرور بارزانی ئەو یەک ژی دیار کر کو هەرێما کوردستانێ بەرهەڤە هەموو ئاریشێن هەی ل گۆر دستووری ل گەل بەغدا چارەسەر بکەت.
ئەڤرۆ نیوز:
پشتی کو حالەتەکێ ڤایرۆسێ کۆرۆنا ل ئێک ژ تاخێن باژێرێ نسێبینێ یێ باکورێ کوردستانێ هاتە تۆمار کرن، بریار هاتە دان کو سێ تاخێن وی باژێری بهێنە کەرەنتین کرن.
بەرپرسێن ساخلەمیێ دیار دکەن کو رەنگە وی کەسی تێکەلی ل گەل چەندین کەسان ل هەر سێ تاخێن باژێری هەبن و ژ بەر هندێ ژی بۆ پاراستنا باژێری ئەو نەچار ماینە هەر سێ تاخێن” گرمەلی، تەپەئوستو و دوروجا یێ باژێرێ نسێبینێ کەرەنتین بکەن.
ئەڤرۆ نیوز:
ناڤەندا چاڤدێریا مافێن مرۆڤی یا سووریێ دیار کر کو پشتی بزاڤێن تورکیا و روسیا بۆ چارەسەریەکا بەروەخت ل ئدلبێ، پرانیا ئەو گرۆپێن چەکدار یێن کو بەری نها تورکیا پشتەڤانیا وان دکر نها ل دژی بزاڤێن تورکیا نە و ژ بەر هندێ ژی دوهی تورکیا ب رێیا فرۆکێن بێ فرۆکەڤان هێرشی کاروانەکێ سەربازی یێ هێزێن چەکدار کریە کو د ئەنجام دا دو چەکدار هاتینە کوشتن و وان گرۆپان ژی هۆشداری داینە تورکیا.
دەزگەهێن راگەهاندنا تورکیا ژی دیار دکەن کو تورکیا دڤێت گرۆپێن چەکدار ل ئدلبێ ئالۆزیان بۆ قۆناغا نوو دروست نەکەن و ئەو یەک ژی ب دلێ وان گرۆپێن چەکدار نینە.
ئەڤرۆ نیوز:
د. دلۆڤان محەمەد رێڤەبەرێ گشتی یێ ساخلەمیا هەولێرێ راگەهاند کو دو تووشبوویێن دی یێن کۆرۆنایێ ل هەولێرێ ب تەمامی باش بووینە و پشتی چەندین پشکنینێن نوو بۆ وان هاتیە کرن دیار بوویە کو ب تەمامی ژ کۆرۆنایێ باش بووینە.
رێڤەبەرێ گشتی یێ ساخلەمیا هەولێرێ دیار ژی دکەت کو ب گشتی هەتا نها ١٥٩ نەخوشێن کۆرۆنایێ ل هەولێرێ باش بووینە.
ئەڤرۆ نیوز:
پەیڤدارێ هێزێن سووریا دیموکرات راگەهاند کو چەند رۆژن هندەک مالپەرێن تورکیا یێن فەرمی ب تایبەتی ژی هندەک مالپەرێن سەر ب وەزارەتا بەرەڤانیێ داخۆیانیێن دوور ژ راستی ل دۆر چالاکیێن مە ل سەرێ کانیێ و گرێسپی بەلاڤ دکەن.
کینو گابرێل ئەو یەک ژی دیار کو ئەو گرێدای وان رێککەفتنانە کو بەری نها ل دۆر وان دەڤەران هاتنە ئیمزا کرن، تورکیا و گرۆپێن چەکدار هەتا نها گەلەک جاران ئاگربەست بنپێکرینە و هێرشی هێزێن وان کرینە، لێ هەسەدە دڤێت ل گەل هەڤپەیمانێن خوە ل سەر رێککەفتنێن کو بەری نها هاتینە ئیمزا کرن، بەردەوام بیت.
نيشاندان