ئەڤرۆ نیوز، زنار تۆڤی:

پەیڤدارێ ساخلەمیا پارێزگەها دهۆکێ راگەهاند، ل سنۆرێ پارێزگەها دهۆکێ ب ئەگەرێ تەقەکرنا خۆشیێ 13 کەس بریندار بوون.

هەمزە رەزیکی، پەیڤدارێ ساخلەمیا پارێزگەها دهۆکێ بۆ ئەڤرۆ نیوز گۆت، ل سنۆرێ پارێزگەها دهۆکێ ب ئەگەرێ تەقەکرنا خۆشیێ و سەرکەفتن ب سەر کۆرۆنا یێ دا 13 کەس برینداربوون، کو سێ کەس ژ وان ل زاخۆ نە، کەسەک ژی ل ئاکرێ، سێ کەس ل سێمێلێ و چار کەس ژی ل ناڤ سەنتەرێ دهۆکێ دانە.
هەروەسا گوت ژی، پرانیا وان کەسان برینێن وان دسڤکن، بەلێ سێ بریندارێن دهۆکێ پێدڤی ب نەشتەرگەریێ هەیە.
ئێک ژ بریندارێن زاخۆ ژنەکا د ژیێ 40 بۆ 42 سالیێ دایە، ئێکا دیتر ژی ژنەکا د ژیێ 55 سالیێ دایە و زەلامەک ژی دناڤا کەمپا چەمشکۆ دایە.

 
ئەڤرۆ نیوز، عەلی حاجی :

هاریکارێ رێڤەبەرێ نەخوشخانا تەنگاڤیان ل زاخۆ بۆ ئەڤرۆ نیوز دیار کر، ژ ئەگەرێ تەقەکرنا بەری دەمەکێ کێم ل زاخۆ سێ کەس ب سڤکی بریندار بووینە و رەوشا وان باشە و ل بن چاڤدێریا نۆشداران دانە.

زێدەتر خەلات مستەفا گوت : ژ ئەگەرێ تەقەکرنا ب شێوەیەکێ بەرەلایی ل باژێرێ زاخۆ ژ لایێ کەسانێن نە بەرپرس ڤە بەری دەمەکێ کێم دو ژن و زەلامەک ژ ئەگەرێ فیشەکێن چەکی بریندار دبن و نوکە ل نەخوشخانا تەنگاڤیان ل زاخۆ د بن چاڤدێریا تیمێن نوشداری دانە و رەوشا وان باشە،ژنەک ژیێ وێ دناڤبەرا ٤٠ بۆ ٤٢ سالێی دایە و ژنەکا دیتر ژی ژیێ وێ دناڤبەرا ٥٠ بۆ ٦٠ سالیێ دایە و زەلام ژی هێشتا نەهاتیە زانین ژیێ وی چەندە ،ئەو تەقە کرنا بەری دەمەکێ کێم هاتیە کرن ئەرکێ تیمێن ساخلەمیێ گرانتر لێکرینە و هیڤی خازین وەلاتیێن مە خوە ژ ڤان جورە کریارێن نەجوان دوور بکەن.
و گوت ژی : دبیت هێشتا بریندار هەبن و ئەم چاڤەرێ نە هەتا دەمەکێ دیتر زێدەتر رەوش زەلال بیت.

ئه‌ڤرۆنیۆز، سالار دۆسكی:

لدووڤ گۆتنا سه‌رۆكێن زانكۆیێن پارێزگه‌ها دهۆكێ‌ به‌رهه‌ڤی ته‌مام بووینه‌ و ده‌سپێكا هه‌یڤا گولانێ‌ دێ‌ ده‌ست ب خواندنا ئه‌لكترونی هێـته‌ كرن.

پرۆفیسور د.موسلح دهۆكی، سه‌رۆكێ‌ زانكۆیا دهۆكێ‌، بۆ ئه‌ڤرۆ نیۆز ئاشكرا كر كو وه‌ك زانكۆیا دهۆكێ‌ به‌رهه‌ڤیێن ته‌مامكرینه‌ كو ده‌سپێكا هه‌یڤا گولانێ‌ ده‌ست ب خواندنا ئه‌لكترونی بهێته‌كرن، پێشتر به‌رهه‌ڤی هاتبوونه‌كرن و نوكه‌ خول بۆ مامۆسستا هاتینه‌ڤه‌كرن بۆ ده‌سستپێكرنا ڤێ‌ پرۆسێسێ‌ و هه‌موو كار ب دووماهی هاتیه‌.

سه‌رۆكێ‌ زانكۆیێ‌ ئه‌و ژی ئاشكراكر كو بابه‌ت راسته‌وخۆ بۆ قوتابیان ناهێنه‌ گۆتن به‌لكو دێ‌ تۆماركری بن خۆیاكر ژی ئاریشه‌ بتنێ‌ ل هنده‌ك بابه‌تێن پراكتیكی دێ‌ هه‌بیت وه‌ك كولیژێن (پلاندانێ‌ و ئه‌ندازیاری و ده‌رمانسازی و پزیشكی و د دان) ئه‌ڤه‌ ئه‌لكترونی ناهێنه‌ گۆتن، ره‌نگه‌ بچن بۆ پشتی ده‌وام ئاسایی بیت.
د.موسلح ئه‌و ژی ئاشكراكر كو بتنێ‌ شه‌ش حه‌فتی ژ خواندنێ‌ ماینه‌ و هه‌شت ده‌ربازبووینه‌ و خواندن دێ‌ هێته‌ ده‌ستپێكرن هه‌تا پشتی جه‌ژنێ‌ دێ‌ به‌رده‌وام بیت.
د.له‌زگین عه‌بدی سه‌رۆكێ‌ زانكۆیا زاخۆ ل دور هه‌مان بابه‌ت گۆت: ماوێ‌ خواندنێ‌ به‌ر ب دووماهیێ‌ ڤه‌ چووینه‌ و یا مای دێ‌ ب شێوازێ‌ ئه‌لكترونی هێته‌ ده‌سپێكرن و پێشتر ژی مه‌ به‌رهه‌ڤی كربوون و ئه‌ڤه‌ دا قوتابی زێده‌تر ژ خواندنێ‌ نه‌هێته‌ دووركرن.
سه‌رۆكێ‌ زانكۆیا زاخۆ ئه‌و ژی گۆت: به‌ری چێبوونا ڤایرۆسی مه‌ به‌رهه‌ڤی هه‌بوون چنكو ل زاخۆ ل هه‌رسێ‌ قوناغێن ئێك و دو و سێ‌ سیسته‌مێ‌ پولونی دهێتـه‌ خواندن و خواندن و ب ئه‌لكترونی ژی وانه‌ دهێنه‌ گۆتن.
د. له‌زگینی ئه‌و ژی خویاكر كو هه‌موو قوتابیان ئیمیل و پاسپورتێ‌ خوه‌یێ‌ تایبه‌ت هه‌یه‌ و دشێت بچیته‌ دناڤ ئیمێلێن زانكۆیێ‌ دا و بابه‌تێن پێدڤی وه‌ربگریت، پتریا قوتابیان نێت هه‌یه‌ و هه‌كه‌ خێزانه‌كێ‌ نه‌بیت ئه‌و قوتابی دشێت بخوه‌ په‌یدا بكه‌ت یان هه‌تا دشێت ب په‌یوه‌ندیێ‌ ژی په‌یدا بكه‌ت.
سه‌رۆكێ‌ زانكۆیا زاخۆ هیڤی خواستن هه‌تا ده‌سپێكا هه‌یڤا شه‌ش كاودان ئارام بن و مه‌ترسیا ڤایرۆسێ‌ كورونا كێم ببیت و ده‌رگه‌هێن زانكۆیان بهێنه‌ڤه‌كرن.
سه‌رۆكێ‌ زانكۆیا زاخۆ ئه‌ وژی پێشبینی كر كو 90% دێ‌ خواندنا ئه‌لكترونی یا سه‌ركه‌فتی بیت هه‌كه‌ مامۆستا و قوتابی ب رژدی بابه‌تی وه‌ربگرن.

پرۆفیسور د.عه‌دنان محسن، سه‌رۆكێ‌ زانكۆیا پولیته‌كنیك / دهۆك بۆ ئه‌ڤرۆ نیۆز ئاشكراكر كو به‌رهه‌ڤیێن ته‌مامكرینه‌ كو ده‌ست ب خواندنا ئه‌لكترونی بهێـته‌كرن و بریار وه‌زاره‌تێ‌ بوویه‌ كو 2/5 خواندنا ئه‌لكترونی بهێتـه‌ ده‌ست پێكرن و ئه‌ڤ خواندنه‌ نه‌ یا هه‌ڤده‌م و ئه‌ڤه‌ رێكه‌كا ب ساناهی یه‌ و بتنێ‌ چه‌ند حه‌فتی ماینه‌ ژ خواندنێ‌ و پشتی ئه‌و حه‌فتی ب دووماهی بهێن ما باوه‌ره‌ دو حه‌فتی مه‌ پێدڤی هه‌یه‌ بۆ خواندنا پراكتیكی پشتی ئه‌لكترونی و دێ‌ سالا خواندنێ‌ ب دووماهی هێت و دێ‌ ده‌ست ب تاقیكرنا هێته‌كرن.

ل دووماهیێ‌ سه‌رۆكێ‌ زانكۆیا پولیته‌كنیك ئه‌و ژی گۆت: بۆ هه‌موو قوتابیان ئیمێل هاتینه‌ دروستكرن و پولێن ئه‌كترونی هاتینه‌ دروستكرن.