ئه‌ڤرۆ نیۆز، عه‌زیز هه‌ورامیی:

نه‌خۆشخانه‌ی به‌ركه‌وتوانی چه‌كی كیمیاوی له‌ ماوه‌ی ڕابردوو كرایه‌ نه‌خۆشخانه‌ی چاره‌سه‌ری هه‌ڵگرانی ڤایرۆسی كۆرۆنا، ئه‌وه‌ش وای كرد، به‌ركه‌وتوانی چه‌كی كیمیاوی نه‌توانن ڕو له‌نه‌خۆشخانه‌كه‌ بكه‌ن بۆ وه‌رگرتنی چاره‌سه‌ری.

لو‌قمان عه‌بدولقادر سه‌رۆكی كۆمه‌ڵه‌ی قوربانیانی كیمیابارانی هه‌ڵه‌بجه‌، تایبه‌ت به‌ ئه‌ڤرۆ نیۆز گوتی، پاش ئه‌وه‌ی نه‌خۆشخانه‌ی به‌ركه‌وتوانی چه‌كی كیمیاوی كراییه‌ نه‌خۆشخانه‌ی كۆرۆنا، به‌ركه‌وتوانی چه‌كی كیمیاوی بێ چاره‌سه‌ری ماونه‌ته‌وه‌، پێویستیان به‌ چاره‌سه‌ری خێراییه‌.

عه‌بدولقادر ئاماژه‌ بۆ ئه‌وه‌ده‌كات، به‌رگری لاشه‌ی به‌ركه‌وتوانی چه‌كی كیمیاوی زۆر لاوازه‌ ناتوانن بڕۆنه‌ نه‌خۆشخانه‌ی به‌ركه‌وتوان بۆ وه‌رگرتنی چاره‌سه‌ر، ئه‌گه‌ربێت و هه‌ر به‌ركه‌وتوێكی چه‌كی كیمیاوی توشی ڤایرۆسی كۆرۆنا ببێت ئه‌وه‌ مه‌ترسی جدی ده‌كه‌وێته‌ سه‌ری ئه‌گه‌ری گیان له‌ ده‌ستدانی هه‌یه‌.

سه‌رۆكی كۆمه‌ڵه‌ی قوربانیانی كیمیابارانی هه‌ڵه‌بجه‌ ئاماژه‌ به‌وه‌شده‌كات، ته‌ندروستی هه‌ڵه‌بجه‌ وتویانه‌ ڕۆشتوونه‌ته‌ ماڵه‌وه‌ بۆلای 150 به‌ركه‌وتو چاره‌سه‌ریان بۆ كردوون و ده‌رمانیان پێداون، به‌ڵام زۆرینه‌ی به‌ركه‌وتوان هێشتا هیچ چاره‌سه‌رێكیان له‌م ماوه‌ی دوو مانگه‌دا بۆ نه‌ڕۆشتووه‌، 15 به‌ركه‌وتوی چه‌كی كیمیاوی ئێستا دۆخی ته‌ندروستیان زۆر خه‌راپه‌ و به‌رده‌وام له‌ ماڵه‌وه‌ ده‌بێت ئۆكسجین به‌كار بهێنن.

ناوبراو گوتی، به‌ركه‌وتوانی چه‌كی كیمیاوی چه‌نده‌ پێویستییان به‌ چاره‌سه‌ری پزیشكی هه‌یه‌ ئه‌وه‌نده‌ش پێویستیان به‌ چاره‌سه‌ری ده‌رونی هه‌یه‌.