ئەڤرۆ نیۆز، قائید میرۆ:

بۆ دەمێ حەفتیەکێ یە چەکدارێن داعش ل کەرکووکێ بەردەوام ھێرشی سەر ھێزێن عێراقی دکەن و بەرپرسەکێ پارتی ژی ل کەرکووکێ ھۆشداریێ ددەت ل زێدەبوونا مەترسیێن داعش.

دکتۆر محەمەد خورشید، بەرپرسێ لقا پارتی ل کەرکووکێ بۆ ئەڤرۆ نیۆز دیارکر” چەکدارێن داعش ل دەوروبەرێ کەرکووکێ چەند رۆژەکە خوە بەرھەڤ دکەن و ل دەلیڤان دگەڕن بۆ ئەنجامدانا کریارێن تیرۆرستی، بتایبەتی پشتی ئەمریکا ھێزێن خوە ل کەرکووکێ ڤەکێشای لڤینێن داعشێ زێدەتربووینە و بۆدەمێ چەند رۆژانە لسەر ئێک ھێرشی سەر ھێزێن عێراقی دکەن.

دکتۆر محەمەد خورشید گۆت ژی” پێشبینی دھێتەکرن ھێشتا داعش گورزێن دی ل ھێزێن عێراقی بدەت و مەترسیەکا زۆر لسەر وان دەڤەران ھەیە، چونکە ھێزێن عێراقی تنێ دناڤا سەنتەرێ باژێڕ و قەزاو ناحیێن کەرکووکێ دا ھەنە و دەڤەرێن دی ھەموو بن کۆنتڕۆلا داعشن.

ئەڤرۆ نیۆز، قائید میرۆ:
ل دەوروبەرێ مووسل مەترسیێن داعش زێدەبووینە و رێڤەبەرێ ناحیا زوممارژی دبێژیت، مەترسی ھەیە بۆ ڤەگەڕیانا داعش و خەلکێ دەڤەرێ ب کورد و عەرەبڤە داخوازا ڤەگەڕیانا پێشمەرگەی کەن.
ئەحمەد جەعفەر، رێڤەبەرێ زوممار بۆ ئەڤرۆ نیۆز دیارکر” ل دەڤەرێن دەروبەرێ مووسل لڤینێن چەکدارێن داعش زێدەکریە و ل چەند رۆژێن بۆری دا ل دەڤەرا محەلەبیە ھژمارەک وەلاتیێن سڤیل کرینە ئارمانج و سەرێ وان ھاتیە بڕین ژلایێ داعشڤە، خەلکێ دەڤەرێ دلگرانن ب لڤینێن داعش.
رێڤەبەرێ ناحیا زوممار گۆتژی” ل چوار دوورێن زممار داعش پەیدابوویە ھەر دەڤەرا حەزەر و محەلەبیە و بادۆش ھەتا دگەھیتە سینورێ سووریێ ل ناحیا رەبیعە یا ڤەکریە.
ئەحمەد جەعفەر ئاشکراکر” پێدڤیە رێکەفتن دناڤبەرا ھێزێن پێشمەرگە و عێراقی بھێتەکرن ژبۆی کۆنتڕۆلکرنا رەوشا ئەمنیا زومار و دەڤەرێن دی یێن کوردستانی، ژبلی کوردان عەرەبێن زوممار دخوازن پێشمەرگە ڤەگەڕیت بۆ دەڤەرێ، ژبەرکو بەری نوکە سەربور دگەل ھێزا پێشمەرگەی ھەیە و دەمێ پێشمەرگە ل دەڤەرێ رەوشا ئەمنی یا پاراستی بوو.