ئەڤرۆ نیوز:
پشتی کو مستەفا کازمی ب فەرمی وەکو سەرۆک وەزیران بۆ ئاڤاکرنا کابینا نوو یا حوکمەتا عیراقێ هاتە راسپاردن، سەرۆک مەسعود بارزانی د پەیوەندیەکا تەلەفونی دا پشتەڤانیا خوە بۆ کازمی دیار کر و داخوازا سەرکەفتنێ بۆ خواست.
سەرۆک بارزانی هێڤی خواست کو کازمی بشێت ب پشتەڤانیا هەموو هێزێن سیاسی ئاریشێن ل عیراقێ چارەسەر بکەت.
ئەڤرۆ نیۆز، قائید میرۆ:
لایەنێن سەرەکی یێن شیعە رێکەفتینە مستەفا کازمی ل جھێ عەدنان زورفی بھێتە راسپاردن بۆ پێک ئینانا کابینا نوویا حوکمەتا عێراقێ و کورد و سونەژی پشتەڤانیێ دکەن.
مستەفا کازمی ژلایێ ھژمارەک ھێزێن شیعەڤە ھاتیە بەربژێرکرن بۆ پۆستێ سەرۆک وەزیران و گورەی داخویانیا سەرۆکێ ھەرێما کوردستانێ ژی کورد پشتەڤانیا کازمی دکەن.
دکتۆر مەحموود عوسمان، سیاسەتمەدارێ کورد بۆ ئەڤرۆ نیۆز دیارکر” راستە مستەفا کازمی نوکە ھاتیە بەربژێرکرن ژلایێ ھژمارەک ھێزێن شیعەڤە، بەلێ ھندەک ھێزێن شیعە ھێشتا رژدن لسەر مانا عادل عەبدولمەھدی وەک سەرۆک وەزیرێن عێراقێ و ئێکلا نەبوویە دناڤبەر کازمی و عەبدولمەھدی دوماھیێ شیعە دێ لسەر کێ رازیبن.
دکتۆر مەحموود عوسمان گۆتژی” بڕیاربو شەڤا بۆری سەرۆک کۆمارێ عێراقێ داخویانیەکێ بەلاف بکەت و مستەفا کازمی راسپێریت بۆ پێک ئینانا حوکمەتا نوو عەدنان زورفی ژی خوە ڤەکێشیت، چونکە زێدەتر پشتەڤانی بۆ مستەفا کازمی ھەنە و ھەموو لایەنێن عێراقی پشتەڤانیا زورفی ناکەن.
ئەڤرۆ نیوز:
ئاژانسا سپوتینگ د راپۆرتەکێ دا دیار کر کو دوهی روسیا کاروانەکێ مەزن یێ سەربازی کو ژ ٥٠ ترۆمبێلان پێک دهات و گەلەک چەکێن گران ژی ل گەل وان بوون رەوانەی باژێرێ قامشلۆ یێ رۆژئاڤایێ کوردستانێ کریە و ل بنگەهەکێ نوو یێ سەربازی بجه بووینە.
د راپۆرتێ دا ئاماژە ب هندێ ژی هاتیە کرن کو روسیا ل منبجێ و چەندین دەڤەرێن دی یێن رۆژئاڤایێ کوردستانێ ژی بنگەهێن نوو یێن سەربازی ئاڤا دکەت و ئەو یەک ژی ب دلێ تورکیا نینە و هەروەسا ئەمریکا ژی نەرازیبوونا خوە ل هەمبەر بهێزبوونا پێگەهێ روسیا ل رۆژئاڤایێ کوردستانێ دیار کریە.
ئەڤرۆ نیوز:
وەزارەتا ساخلەمیێ یا ئیرانێ راگەهاند کو د ماوەیێ ٢٤ دەمژمێرێن بۆری دا ١١٧ کەسان ل وی وەلاتی ژ بەر ڤایرۆسێ کۆرۆنایێ جانێ خوە ژ دەست داینە و ب گشتی هژمارا کەسێن کو هەتا نها ل ئیرانێ ژ بەر کۆرۆنایێ جانێ خوە ژ دەست داینە گەهشتیە ٤ هزار و ١١٠ کەسان.
ئەو یەک د دەمەکێ دایە کو گەلەک نوشدار و چاڤدێرێن سیاسی ل ئیرانێ دیار دکەن کو هەتا نها نێزیکی ٢٠ هزار کەسان ژ بەر کۆرۆنایێ ل ئیرانێ جانێ خوە ژ دەست داینە لێ دەستهەلاتا ئیرانێ ئامارا دروست بۆ رایا گشتی ئاشکرا ناکەت.
ئەڤرۆ نیوز:
ئەڤرو 9/4/2020 د. رێواز فایق سەرۆكا پەرلەمانێ كوردستانێ و شاندێ دگەلدا سەرا كوچكا پارێزگەها دهوكێ دا و ژلایێ فەرهاد ئەمین ئەتروشی پارێزگەرێ دهوكێ و فەهیم عەبدوڵا سەرۆكێ جڤاتا پارێزگەها دهوكێ پێشوازی لێ هاتە كرن.
فەرهاد ئەمین ئەتروشی پارێزگەرێ دهوكێ د كونگرەكێ روژنامەڤانی دا دیار كر كو: ” ب تێروتەسەلی بەحسێ كار و ئەركێن ژوورا ئوپەراسیونا یا بەرهنگاربوونا ڤایروسێ كورۆنا كر و پێگریا زۆر یا باش یا خەلكێ پارێزگەهێ ب رێنما و بریارێن حكومەتا كوردستانێ و ژورا ئوپەرسیونا بۆ خوە پارستن ژڤایروسێ كورونا ، هەروەسا بەحسێ وێ هەڤكاریێ هاتە كرن یا دناڤبەرا هەموو لایەنان ل پارێزگەهێ و سازیێن پەیوەندیدار وخەلكێ پارێزگەهێ كر”.
د. ریواز فایق، سەرۆكا پەرلەمانێ كوردستانێ د پەیڤەكێدا بناڤێ سەرۆكاتیا پەرلەمانی و فراكسیونێن پەرلەمانی سوپاسی و دەست خوشی ل پارێزگەرێ دهوكێ و ژورا ئوپەراسیونا و هەموو خەلكێ پارێزگەهێ كر كو هەموویان پێگری ب رێنما و بریارێن حكومەتا كوردستانێ كریە ژ بۆ خوە پاراستن ژ ڤایروسێ كورونا”.
خۆیا ژی كر كو: “ئەم وەكو پەرلەمانێ كوردستان دزانین بریارا قەدەغەیا گشتی و قەدەغەیا هاتنوچونێ زۆر كارتێكرن ل سەر ژیانا رۆژانە یا پیشەكار و كاسبكاران كریە لێ پاراستنا تەندورستیا گشتی یا هاولاتیان زور گرنكترە ژ وێ چەندێ هیڤیدارین ئەم ب هەڤكاری دگەل حكومەتا هەرێمێ بشێین ب هەر جورەكی وێ بارگرانیێ ل سەر وان كاسبكاران سڤكەین و هەكە پێدڤی ب دەركرنا یاسایێن پەرلەمانی ژی كر ئەم وەكو سەرۆكاتیا پەرلەمانی و ب هەڤكاریا فراكسیونێن پەرلەمانی دێ پشتگیریێ ل بریارێن حكومەتێ كەین”.
ئەڤرۆ نیوز:
یلماز ئوزدیل نڤیسەرێ ناڤدارێ تورکیا کو ل رۆژناما سوزجو یا وی وەلاتی کار دکەت راگەهاند کو حوکمەتا تورکیا راستیا مریان ل باژێرێ ئستەنبولێ ئاشکرا ناکەت و ئەو ئامارێن کو دهێنە بەلاڤکرن ژ راستیێ دوورن، چونکو رێژا مرنا گەلەک زێدەترە و دەستهەلاتا ئاکپارتیێ راستیان بۆ خەلکی ئاشکرا ناکەت.
ناڤهاتی راگەهاند کو دوهی بەرپرسێن تورکیا دیار کربوون کو ل هەموو تورکیا ٧٣ کەسان ب کۆرۆنایێ جانێ خوە ژ دەست داینە، لێ هەر ل وێ رۆژێ تنێ ل ئستەنبولێ ١٠٠ کەسان جانێ خوە ژ دەست دابوون لێ حوکمەتا تورکیا راستیان ئاشکرا ناکەت.
ئه‌ڤرۆ نیوز:
مسته‌فا كازمی پشتی هاتیه راسپاردن بۆ پیك ئینانا حكومه‌تا نوو یا عیراقێ په‌یامه‌ك ب زمانێ كوردی ل هژمارا خۆ یا تویته‌ری به‌لاڤكر و تێدا هاتیه، سوز بیت حوكمه‌تا بهێت كار بۆ چاره‌كرنا قه‌یران و به‌ره‌ڤ پیشڤه‌برنا ئابووری بكه‌ت.
د ئه‌وێ په‌یاما كوردی دا یا راسپاردیێ نوو بۆ پێك ئینانا كابینا نوو یا حكومه‌تا عیراقێ مسته‌فا كازمی به‌لاڤكری و تێدا هاتیه كۆ، راسپاردنا من بۆ سه‌رۆكاتیا حكومه‌تا عیراقێ، سوزێ دده‌م هه‌مبه‌ر گه‌لێ به‌خشنده، كاركرن ل سه‌ر پێك ئینانا حكومه‌ته‌كێ كۆ خواست و هیڤین عیراقیان بكه‌ته كارێن پێشیێ، سه‌روه‌ریا نیشتمانی و مافێن وان پاراستی بن و كار بۆ چاره‌كرنا قه‌یرانان و ئابووری به‌ره‌ڤ پێشڤه ب بكه‌ین.
ئه‌ڤرۆ نیوز:
سه‌رۆكێ حكومه‌تا هه‌رێما كوردستانێ پشته‌ڤانیا خۆ بۆ سه‌رۆك وه‌زیرێ راسپاردیێ عیراقێ راگه‌هاند.
ئه‌ڤرۆ، مه‌سرور بارزانی سه‌رۆكێ حكومه‌تا هه‌رێما كوردستانێ د په‌یوه‌ندیه‌كا ته‌له‌فونی دا ل گه‌ل مسته‌فا كازمی سه‌رۆك وه‌زیری راسپاردیێ عیراقێ بۆ پێك ئینانا كابینا نوو یا حكومه‌تێ، پشته‌ڤانیا خۆ بۆ پێك ئینانا حوكمه‌تێ ده‌ربری.
هه‌ڤده‌م مسه‌رور بازرانی سه‌رۆك وه‌زیری هه‌رێما كوردستانێ ته‌ئكید ل ئه‌ویێ چه‌ندێ ژی كر كۆ پێكڤه كار بكه‌ین بۆ چاره‌كرنا ئاریشه‌یێن هه‌لاویستی یێن ناڤبه‌را حكومه‌تا هه‌رێمێ و حكومه‌تا فیدرال ل سه‌ر بنه‌مایێ دستوری.
ئه‌ڤرۆ نیوز:
په‌یڤدارێ حكومه‌تا هه‌رێما كوردستانێ د راگه‌هاندنه‌كێ دا به‌لاڤكر و تێدا هاتیه هنده‌ك كه‌نالێن میدیایی یێن ناڤخۆ ب مه‌به‌ست تێكدانا رایا گشتی، نوچه‌یێن بی بنه‌ما به‌لاڤ دكه‌ن، كۆ دێ حكومه‌ت ترۆمبێلێن مودێل 2020 بۆ وه‌زیرێن كابینا نوو كریت.
د.جوتیار عادل په‌یڤدارێ حكومه‌تا هه‌رێما كوردستانێ ئه‌و چه‌نده ژی راگه‌هاند: ئه‌ڤ بابه‌ت دووره ژ راستیێ و چ هه‌بوون بو نینه، دڤی ده‌مێ هه‌ستیار دا پاراستن و سلامه‌تی و ساخله‌میا وه‌لاتیان و دابینكرنا خوارنێ و مووچه‌ی ژ كارێن هه‌ره گرنگێن حكومه‌تێ نه.
د.جوتیار عادل په‌یڤدارێ حكومه‌تا هه‌رێما كوردستانێ د ئه‌وێ راگه‌هاندنێ دا ئاماژه ب وێ چه‌ندێ ژی دایه كۆ ئه‌ندامێن كابینا نوو یا حكومه‌تا هه‌رێما كوردستانێ و هه‌ستكرن ب به‌رپرسیاریا ئه‌ڤێ ره‌وشێ، وان بخو پێشنیار كریه كو نیڤا مووچه‌یێن وان بۆ ده‌مێ دو هه‌یڤان بۆ هه‌وا به‌رهنگاربوونا ڤایرۆسێ كورونایی بهێته ته‌رخانكرن و هه‌ر ئێك لگۆری بسپوریا خو ب ته‌مامی خۆ بۆ پارستن و ساخله‌میا گشتی یا وه‌لاتیان ته‌رخانكریه.
په‌یڤدارێ حكومه‌تا هه‌رێما كوردستانێ د وێ راگه‌هاندنێ دا داخاز ژ داواكارێ گشتی كر كۆ رێكارێن پێدڤی هه‌مبه‌ر ئه‌و كه‌س و لایه‌نان بهێنه بكارئینان كۆ دبنه ئه‌گه‌رێ نه سه‌قامگیریا جڤاكی و ئاژاوه‌یێ بۆ مه‌ره‌مێن سیاسی یێن دیاریكری و نها پێدا رێك ب ئه‌ڤان جورێن تێكدانێ ناهێته دان.
ئه‌ڤرۆ نیوز:
مایك پومپیو وه‌زیرێ ده‌رڤه‌یێ ئه‌مریكا راگه‌هاند وه‌لاتێ وی سزایان سه‌ر ئیرانێ هه‌لناگریت، به‌لێ سزا رێگر نابن ژ هنارتنا هه‌ڤكاریێن نوژاری بۆ ئیرانێ.
مایك پومپیو وه‌زیرێ ده‌رڤه‌یێ ئه‌مریكا د كۆنفرانسه‌كێ رۆژنامه‌ڤانی دا راگه‌هاند واشنتون هه‌ر ژ رۆژا ئێكێ به‌رهه‌ڤیا خۆ نیشاندایه بۆ گه‌هاندنا هه‌ڤكاریێن مرۆڤی بۆ ئیرانێ، به‌لێ به‌رپرسێن تارانێ ئه‌و چه‌نده ره‌تكریه، هنده‌ك وه‌لات دبێژن سزایێن سه‌ر ئیرانێ بهێنه هه‌لگرتن تاكۆ ئیران ب شێت به‌رهنگاریا ڤایرۆسێ كورونایێ بكه‌ت، به‌لێ سزا رێگر نینن ل هه‌مبه‌ر گه‌هاندنا هه‌ڤكاریێن مرۆڤی و نوژداری ده‌رمانان بۆ ئیرانێ.
وه‌زیرێ ده‌رڤه‌یێ ئه‌مریكا ئه‌و چه‌نده ژی دازانین نوكه ژی به‌رهه‌ڤین بۆ هه‌ڤكاریكرنا ئیرانێ، به‌لێ سزایان ل سه‌ر ئه‌وی وه‌لاتی هه‌لناگرین.
به‌ریا نوكه نه‌ته‌وه‌یێن ئێكگرتی و چه‌ند وه‌لاته‌كێن دی تایبه‌ت هه‌ر ئێك ژ روسیا وچینێ داخازاكر بوو ب ئه‌گه‌رێ به‌ربه‌لاڤبوونا ڤایرۆسێ كورونایێ ل جیهانێ، سزایێن ئابووری سه‌ر ئه‌وی وه‌لاتی بهێنه راكرن.
نيشاندان