ئەڤرۆ نیوز:
عەلی ئەکبەر حەقدوست سەرۆکێ لیژنا بەرهنگاریا کۆرۆنا ل ئیرانێ راگەهاند کو ل گۆر ڤەکۆلینێن وان دەرکەفتیە ئێکەم حالەتێ تووشبوویێ ڤایرۆسێ کۆرۆنا ل ئیرانێ ل رۆژا ٢٠/١٢/٢٠١٩ بوویە، لێ نەهاتیە ئاشکرا کرن.
ئەو یەک د دەمەکێ دایە کو بەری نها گەلەک دەزگەهێن راگەهاندنا جیهانی حوکمەتا ئیرانێ ب هندێ تومەتبار دکرن کو ئیرانێ راستیا کۆرۆنا یێ ڤەشارتیە و بۆ خەلکێ خوە ئاشکرا نەکریە، ژ بەر هندێ ژی کۆرۆنا بلەز ل ئیرانێ بەلاڤبوو و دەربازی گەلەک وەلاتێن دی یێن دەڤەرێ بوو.
ئەڤرۆ نیوز، نەوزاد هلوری:
ب مەرەما هاریکاریکرنا وان کەسێن کو ژ ئەگەرێ باران و لەهیێن چەند روژێن بوری زیانپێکەفتی، سەرۆکاتیا باژێرڤانیا مسێریکێ و دەڤەرداریا سێمێلێ دەست ب قەرەبوکرنا زیانڤێکەفتیێن لەهیان ل کومەلگەها مسێریکێ کر.
خالد لەزگین، ژ راگەهاندنا باژێرڤانیا مسێریکێ بو ئەڤرۆ نیوز گۆت: (باژێرڤانیا مسێریکێ و قایمقامیا دەڤەردارییا سێمێلێ دەست ب دابەشکرنا پارێ زیانڤێکەفتیێن لەهیان کرن کو چەند روژێن بوری ب هژمارەکا مال و دوکان و خەلکێ دەڤەرێ کەفتبوون).
زێدەتر گۆت: (هەتا نوکە کوژمێ 37 ملیون هاتینە دابەشکرن و پروسە بەردەوامە و دێ 79 کەس هێنە قەرەبوکرن کو زیان ب مال و ترومبێل و کوڤێن وان یێن تەرش و کەوالی کەفتینە، قەرەبوکرن ژی دێ ل گورەی زیانێ بیت، ئەڤ برە پارە ژی ژلایێ حوکمەتا هەرێما کوردستانێ هاتیە تەرخانکرن).
ئەڤرۆ نیوز:
وەزارەتا دەرڤە یا ئەمریکا ئەڤرۆ راگەهاند کو بیست کەسایەتی و هندەک سازی ل عیراقێ هاریکاریا فەیلەقێ قودس یێ سەر ب سوپای پاسداران یێ ئیرانێ کرینە و ژ بەر هندێ ژی ئەمریکا دێ وان کەسان سزا دەت.
د داخۆیانیا وەزارەتا دەرڤە یا ئەمریکا دا ناڤێ چو کەسێن عیراقی نەهاتیە راگەهاندن، لێ هاتیە دیار کرن کو بەلگەیێن تەمام ل بەر دەست دا هەنە کو وان کەسان هاریکاریا سوپای پاسداران کرینە و هەروەسا وان دڤێت بەردەوام عیراق د بیاڤێ وزێ دا پێدڤی ب ئیرانێ بیت کو ئەو یەک ژی دهێتە رامانا پێشیلکرنا سەروەریا عیراقێ.
ئەڤرۆ نیوز:
ئایدەمیر ئاکتاش ئەکتەرێ ناڤدارێ تورکیا کو د هەمان دەمی دا هەڤالەکێ نێزیکی هونەرمەندێ ناڤدار ئیبراهیم تاتلیسەسە و ل گەلەک فلمان دا پێکڤە رۆل گێراینە تووشی کۆرۆنا یێ بوویە.
دەزگەهێن راگەهاندنا تورکیا دیار کرن کو نها ئایدەمیر ئاکتاش ل مالا خوە دا خوە کەرەنتین کریە.
هەژی ئاماژەپێدانێ یە کو مەها بۆری وی هونەرمەندی دیار کربوو ئەو ژ کۆرۆنا یێ ناترسیت لێ نها ژ هەلویستێ خوە پەشیمانە.
ئەڤرۆ نیوز، هۆشەنگ تاجر:
ئەحمەد محەمەدی چاڤدێرێ سیاسی یێ رۆژهەلاتێ کوردستانێ بۆ ئەڤرۆ نیوز دیار کر کو شەڤا بۆری ل زیندانا باژێرێ سەقز یێ رۆژهەلاتێ کوردستانێ پتر ژ ٨٠ گرتیێن کورد کو هندەک ژ وان سزایێ سێدارەدانێ ژی ل سەر وان هاتبوو سەپاندن شیان ژ زیندانێ برەڤن.
ناڤهاتی راگەهاند کو رەڤا وان کەسان بوویە جهێ گومانێ و هندەک کەس وەسا دبینن کو مەرەما دەولەتا ئیرانێ ژ وان کەسان ئەو بیت دا کۆرۆنا ب رێیا وان کەسان د ناڤ کوردان دا بەلاڤ ببیت و گۆت: (کەسێن کو رەڤینە هەموو ژ بەر تاوانێن جڤاکی و مادێن بێهوشکەر ل زیندانێ بوونە، ئانکۆ چو گرتیێن سیاسی د ناڤ وان کەسان دا نەبوویە، ئەو یەک ژی بوویە جهێ گومانێ).
چاڤدێرێ سیاسی ئەو یەک ژی دیار کر کو ل هەموو زیندانێن رۆژهەلاتێ کوردستانێ پێرابوونێن گەلەک باش هاتینە وەرگرتن و ل هەموو جهەکێ ژی کامیرێن چاڤدێریێ هەنە، کەس نەشێت وەسا ب ساناهی ژ زیندانێ برەڤیت، ژ بەر هندێ ژی ئەوا دوهی روو دای جهێ گومانێ یە.
ئه‌ڤرۆ نیوز:
سه‌رۆك كۆمارێ ئیرانی راگه‌هاند: نێزیكی 100 هزار ملیار تیمه‌ن بۆ به‌رهنگاربوونا نه‌خوشیا ڤایرۆسێ كورونایێ ته‌رخانكرن.
میدیایێن فه‌رمی یێن ئیرانێ به‌لاڤكرن حه‌سه‌ن روحانی سه‌رۆك كۆمارێ ئه‌ڤرۆ ل جڤینا نیشتمانی بۆ به‌رهنگاربوونا كورونایێ راگه‌هاند: توشبوویێن ب ڤایرۆسی كورونایێ ری ل داكه‌تنێ كریه ل سه‌ر ئاسته‌كی راوه‌ستیاینه و دشیێن دڤێ ره‌وشێ دا ده‌ست پێ بكه‌ین و ساخله‌میێ بۆ وه‌لاتی ڤه‌گه‌رینن.
سه‌رۆك كۆمارێ ئیرانێ ئه‌و چه‌نده ژی دیاركر د ئه‌ڤێ ره‌وشا دژوار دا، به‌لێ 20% یا بودجا ئیسال كۆ نێزیكی 10 ملیار تیمه‌نان دبیت بۆ به‌رهنگاربوونا كورونایێ ته‌رخان بكه‌ین ئه‌ڤ چه‌نده بۆ هه‌موو جیهانێ جهێ حێبه‌تی بوونێ یه.
ئه‌ڤ چه‌نده ل ده‌مه‌كی دایه كۆ زێده‌تری 30 هزار وه‌لاتی یێن ئیرانی تووشی ڤایرۆسێ كورونایێ بووینه .
ئەڤرۆ نیۆز، قائید میرۆ:
ب ئەگەرێ بەلافبوونا ڤایرۆسا کورونا چەندین بڕیارێن گرنگ ل ھەرێما کوردستانێ ھاتینە بەلاڤکرن و بسپۆرەکێ دەروونی ژی ئاشکراکر، وەلاتیێن پێگریێ ب رێنمایان دکەن کێمتر مەترسیا کورونایێ لسەرە.
دکتۆر کەریم قەرەچەتانی، بسپۆرێ دەروونی بۆ ئەڤرۆ نیۆز دیارکر” راستە بەلاڤبوونا ڤایرۆسا کورونا مەترسی بۆسەر ژیانا مرۆڤان ل سەرانسەری جیھانێ پەیداکریە، بەلێ ژلایێ زانستێ دەروونی ڤە نابیت مرۆڤ ھند خوە بترسینیت ئەڤە نەک تنێ بۆ ڤایرۆسا کورونا بەلکۆ بۆ ھەموو نەساخیێن دیژی راستە، ژبەرکو ترسا بێ سنور بخوە دبیتە ئەگەرێ پەیداکرنا چەندین نەساخیان د لەشێ مرۆڤی دا، ئەز نابێژم بلا کەس نەترسیت، بەلێ ھندەک ترسیانا زۆرژی بخوە نەساخیە.
ئەڤی بسپۆرێ دەروونی گۆت” دەزگەھێن راگەھاندنێ و تۆڕێن کۆمەلایەتی رۆلەکێ بەرچاف ھەیە ل بەلافکرنا ترسێ دناڤا جڤاکی دا و نابیت ب چو شێوەیەکی ھەموو کەس لدۆر ڤایرۆسا کۆرۆنایێ زانیاریان بەلاف بکەن، چونکە ژ قەبارێ خوە زێدەتر دھێتە مەزنکرن، بەرۆڤاژی وەک خوە ب ھشیاری سەرەدەری دگەل کۆرۆنایێ بھێتەکرن، بۆ نموونە بابەتێ ڤایرۆسا کۆرۆنایێ ھند یێ مەترسی نینە ھندی ئەم وەک مەترسی دبینین، ل حەفتیا بۆری د ئێک دەقیقەکێ کەسەکی ل سلێمانیێ چوار ئەندامێن خێزانا خوە کوشتن، ئەڤە ھەیڤەکە ڤایرۆسا کۆرۆنا لھەرێما کوردستانێ ھەیە و تنێ دو کەس ب کۆرۆنایێ گیانێ خوە ژدەستدایە.
دکتۆر کەریم قەرەچەتانی ئەویەکژی ئاشکراکر” شیرەتا من بۆ وەلاتیان ئەڤە گڤاشتنێن زۆر نە ئێخن سەر مەژیێ خوە، زێدەتر بزاڤان بکەن رێنمایێن ساخلەمیێ بجە بینن و گوھێ خوە بدەن کەسێن بسپۆر و شارەزا، ژبەرکو دوماھیێ تنێ ئەو دێ مفادار و پاراستی بن یێن پێگریێ ب رێنمایان دکەن، کێمتر ڤایرۆسا کۆرۆنا مەترسی لسەر وان ھەیە.
ئه‌ڤرۆ نیوز:
دو فه‌رمانده‌یین بلندێن سوپایێ عیراقێ ب تومه‌تا گه‌نده‌لیێ ره‌وانه‌ی دادگه‌ها سه‌ربازی هاتنه‌كرن.
لگۆری نفیساره‌كێ كۆ ئیمزایا عوسمان غانمی سوپا سالارێ عیراقێ ل سه‌ره لیوا روكن ناسر ئه‌حمه‌د غنام داود فه‌رمانده‌یێ ئوپراسیونێن ئه‌نبار و موقه‌دم سه‌میر عابد حه‌مادی ل فه‌رمانده‌ییێ ره‌وانه‌ی دادگه‌ها سه‌ربازی هاتنه‌كرن.
ئه‌و دو فه‌رمانده‌یێن عیراقی ب تومه‌تا گه‌نده‌لیێ و دزینێ ژ پارێن سوپای ب ماده‌یا 63 ئێكێ و چارێ ل یاسایا سزادانا سه‌ربازی ل دادگه‌ها سه‌ربازی دێ هێنه دادگه‌هكرن، كۆ لگوری ئه‌وێ ماده‌یی سزایێ وان دگه‌هته 10 سال زیندانكرن و هه‌كه دزی ل ده‌مێ شه‌ری دا هاتبیته‌كرن سزایێ وان دبیته 15 سال زیندانیكرن.
ئه‌ڤرۆ نیوز:
پشتی دو هه‌یڤان ژ كه‌ره‌نتینه‌كرنێ باژێرێ ئوهان یێ چینێ كۆ ژێده‌رێ سه‌رهلدانا ڤایرۆسێ كورونایێ بوو رێك هاته دان ب وه‌لاتی و قه‌ده‌غه‌یا هاتنوچونێ هاته راكرن.
لگۆری بریارێن چینێ وه‌لاتی دشێن بتنێ سه‌ره‌دانا باژێرێ ئوهان بكه‌ن، به‌لێ بۆ كه‌سێ باژێرێ ئوهان نینه بهێته ده‌رڤه‌ی باژێرێ خۆ.
باژێرێ ئوهان كۆ ژیده‌رێ ڤایرۆسێ كورونایێ بوو، زێده‌تری 50 هزار كه‌س توشبوون، وه‌لاتێ چینێ تانوكه زێده‌تری 81 هزار كه‌س توشی ڤایرۆسی بوون و زێده‌تر 3 هزار كه‌سان ژی بڤی ڤایرۆسی مرینه.
نيشاندان