ئه‌ڤرۆ نیوز:
جڤاتا ئاسایشا هه‌رێما كوردستانێ ئه‌نجامده‌رێ سه‌ره‌كى یێ ته‌قینا هه‌ولێرێ ئاشكرا كر و راگه‌هاندیه كو شه‌ڤا چوویى شیاینه ئه‌نجامده‌رێ سه‌ره‌كى ل عه‌ینكاوه بگرن.
رژدى ل سه‌ر وێ یه‌كێ كریه كو : ڤه‌كولین د روودانێ دا یا به‌رده‌وامه و دێ وه‌لاتیان ژ هویرده‌كاریان ئاگه‌هداركه‌ن.
د ئه‌نجامێ ته‌قینا عه‌ینكاوه یا تیرورستى دا ، دو وه‌لاتیێن باكوورێ كوردستانێ شه‌هید بوون و ل گه‌ل هژماره‌كا وه‌لاتیان.
ئه‌ڤرۆ نيوز:
بڕياره سوبه‌هى په‌رله‌مانێ كوردستانێ دانوستاندنێ ل سه‌ر دو پرۆژێن قانوونان كه‌ت و خواندنا ئێكێ ژى بۆ حه‌فت پرۆژێن قانوونا كه‌ت و رۆژا جينوسايدا شنگال دێ هێته دياركرن.
په‌رله‌مانێ كوردستانێ د راگه‌هاندنه‌كێ دا ئاماژه ب وێ چه‌ندێ كريه كو سوبه‌هى په‌رله‌مانێ كوردستانێ دێ كۆمبوونا خوه يا ئاسايى يا نه‌هێ ژ وه‌رزێ بهايێ ئه‌نجام ده‌ت و ب گۆره‌يى به‌رنامێ كارى، كۆمبوون ژ سێ ته‌وه‌ران پێك دهێت؛ دانوستاندن ل سه‌ر پرۆژێ قانوونا پێكهاتێن ئاينى و نه‌ته‌وى وتيرێن ئياينى و دانوستاندن ل سه‌ر بڕگا راستڤه‌كرنا قانوونا ده‌سته‌يا ده‌سپاكيێ ژ به‌ر كو سه‌رۆكێ هه‌رێمێ ڤه‌گه‌رانديه په‌رله‌مانى و په‌سه‌ند نه‌كريه.
د ته‌وه‌رێ سيێ ژى دا، خواندنا ئێكێ دێ بۆ چه‌ند پرۆژێن قانوونان و بڕيارهكێ بيت ژ وان ژى پرۆژێ قانوونا به‌ركاربرنێ و راستڤه‌كرنا قانوونا هژماره 9 يا سالا 2006ێ و ئينان و فرۆتنا به‌رهه‌مێن په‌ترۆلێ ل گه‌ل پرۆژێ قانوونا كۆمپانيا كوردستانێ بۆ پارزنينا په‌ترۆلێ و به‌رهه‌مێن وێ و پرۆژێ بڕيارا دياركرنا 8ى ته‌باخا 2014ێ وه‌كو رۆژا جينوسايدا شنگال.
ئه‌ڤرۆ نيوز:
به‌رى ماوه‌كى مه‌سعود بارزانى، سه‌رۆكێ هه‌رێما كوردستانێ، ل پيرمام ل گه‌ل لايه‌نێن سياسى يێن پشكدار د حوكمه‌تا هه‌رێما كوردستانێ دا كۆمبوو و هێشتا ژى ئه‌ڤ كۆمبوونه يا به‌رده‌وامه.
ب گۆره‌يى ئه‌و پێزانينێن ب ده‌ست ئه‌ڤرۆ نيوز كه‌فتين ماوێ سه‌رۆكاتيا هه‌رێمێ و دستوورێ هه‌رێمێ ته‌وه‌رێ، سه‌ره‌كى يێن كۆمبوونێ نه ل گه‌ل دانوستاندنێ ل به‌رنامێ چوونا سه‌رۆكێ هه‌رێما كوردستانێ بۆ ئه‌مريكا.
بڕياره رۆژا سێشه‌مبى ژى 21ى نيسانا 2015 سه‌رۆكێ هه‌رێما كوردستانێ ب سه‌ره‌دانه‌كا فه‌رمى به‌ر ب وه‌لاتێ ئه‌مريكا ب رێ ب كه‌ڤيت ژ بۆ دانوستاندنێ ل سه‌ر چه‌ند پرسێن گرێدايى عيراقێ و كوردستانێ و شه‌رێ داعش.
ئه‌ڤرۆ نيوز:
د ده‌مه‌كى دا كو هێزێن پێشمه‌رگه‌يى و هێزێن ئه‌منى يێن عيراقى بۆ هێرشا ئێكلاكه‌ر ل سه‌ر مووسل و ئازادكرنا وى باژێرێ ژ ده‌ستێ داعش ئاماده‌كاريان دكه‌ن، مه‌سعود بارزانى سه‌رۆكێ هه‌رێما كوردستانێ راگه‌هاند كو ئيران پشكداريێ د شه‌رێ ئازادكرنا وى باژێرى دا ناكه‌ت.
باسنيوز به‌لاڤكريه كو مه‌سعود بارزانى د ديداره‌كێ دا ل پشكا فارسى يا راديۆيا ده‌نگێ ئه‌مريكا ئاماژه ب به‌رنامێ كارێ هه‌ڤپشكێ هێزێن پێشمه‌رگه‌يى و هێزێن ئه‌منى يێن عيراقێ بۆ ئازادكرنا باژێرێ مووسل ژ چه‌كدارێن داعش كر و گۆت: “وه‌كو ل گه‌ل عيراقێ رێكه‌فتين، ئيران پشكدارى شه‌رێ رزگاركرنا مووسل نابيت”.
د هه‌يڤێن بۆرى دا ب ره‌نگه‌كێ ئاشكه‌را چه‌كدارێن ئيرانى ب ره‌نگه‌كێ ئاشكه‌را ل گه‌ل ميليشياتێن شيعه پشكدارى د شه‌رێ دژى چه‌كدارێن داعش دا ل پارێزگه‌ها ئه‌نبار و سه‌لاحه‌دين كريه.
بارزانى ئاماژه ب وێ چه‌ندێ ژى كريه كو ئيران دشێت وه‌كو وه‌لاته‌كێ هه‌ڤسۆ هاريكاريا عيراقێ بكه‌ت و ب مه‌رجه‌كى شێوازێ هه‌ڤسه‌نگيا هه‌ڤسۆيێن خوه ب پارێزيت.
ئەڤرۆ:
لێدەرا کەمانێ ڤیلان عسمەت، د ھەڤدیتنەکێ دا ل گەل بەرپەرێ ھونەری یێ رۆژناما ئەڤرۆ ئاشکراکر کو ژ بچووکاتیا خوە حەزا ھونەری ھەبوویە پاشی ل پەیمانگەھا ھونەرێن جوان پشکا مۆزیکێ خواندی یە و کولیژا ھونەرێن جوان ژى ته‌مامكريه، گۆت: یا گرنگە بۆ ھەر کەسەکێ بڤێت دوارێ خوە دا پێش بکەڤیت ماندی بوون و خواندنا بەردەوام دڤێت و دڤێت ھونەرمەند یێ راستگۆ بیت ل گەل کارێ خوە.
ڤیلان عسمەت، ھێشتا گۆت: کێمبوونا مۆزیک ژەنێن کچ ب راستی جھێ داخێ یە و ڤێ چەندێ بۆ جڤاکێ مە ڤەدگەرینم، ژ بەرکو مە جڤاکەکێ گرتی ھەیە و ئەڤە ب تنێ شاشیا کچێ یە و ئەو ب خوە دشێت ئازادییێ بدەتە خوە ئەگەر نە بۆچی کچ دێ چیتە پەیمانگەھێ و ل پشکا مۆزیکێ خوونیت یا گرنگە کچ ژی مل ب ملێ زەلامی بەردەوامیێ بدەتە ھونەری ب شێوەیەکێ گشتی.
پاشان گۆت: من کلیپ نینن و ئەز نە ل گەل دروستکرنا کلیپانم، ژ بەرکو ئەڤێن نوکە کلیپان دروست دکەن باراپتر بۆ ناڤ و دەنگیا خوەیە و مرۆڤ دشێت ب رێکەکا دیتر خزمەتێ بکەت.
ھێشتا گۆت: ئامیرێ سەرەکێ یێ ئەز دژەنم کەمانە و سازێ ژی دژەنم و ل زانکۆیێ ژى من ده‌نگ يێ خواندى و ئەنداما تیپا رۆبادم و مە گەلەک کار یێ درێکێ دا ھەین و من ل گەل چەندین گرۆپان کار کری یە ل کوردستانێ و ژ دەرڤەی وەلاتی.
پاشان گۆت: ب کورتی مۆزیک ژیانە و یا ل گەل ھەر تشتەکی ھەی و ئامیرێ کەمانێ ھەڤالەکە ل گەل من و ھەتا مرنێ ژی دێ ل گەل وی ھەڤالی بم و ب شێم ب رێکا وی ھەڤالی خزمەتا وەلاتی خوە بکەم.
پاشان گۆت: ئاستێ مۆزیکێ ھەتا رادەیەکی باشە بەس ئەز دبینم سالێن ھەشتێ یاندا گەلەک باشتر بوویە مە گرۆپێ کچێن مۆزیکژەن ھەبوون ل گەل ماموستا (دلشاد محەمەد سەعید) کو ھەموو پارچێن کوردستانێ شانازی پێ دبەن، گۆت: بەردەوام یا بزاڤێ دکەم جارەکا دی باژێرێ دھوکێ گرۆپەکێ مۆزیکژەنێن کچ ھەبیت.
گۆت ژی: یا گرنگە مۆزیکژەن ب خوە بچیتە دناڤ خەلکی دا و مۆزیکێ ب ژەنیت وەکو گێرانا کونسێرتان ل سەر جادەیان و پارکان بۆ ھندێ پتری ژیانا خەلکی تێکەلی مۆزیکێ ببیت.
ل دوماھیکێ گۆت: مرۆڤ دشێت خزمەتێ بکەت و نابیت خەلکێ مە بەس بێژیت حکومەت و خوە بھێلیتە ب ھیڤیا حکومەتێ ڤە، ژ بەرکو مرۆڤ ب خوە ژی دشێت گەلەک کاران بکەت و ھیڤیدارم ئەو کچێن پێنج سالان ل پەیمانگەھێ ل پشکا موزیکێ دخوونن دەستان ژ کارێ خوە بەرنەدەن و بەردەوام بن.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 19ى نيسانا 2015ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1297 |
| 1 يۆرۆيێ ئه‌ورۆپى | 1380 |
| 1 ليرێ توركى | 480 |
ژ به‌ر كو ره‌وشا دراڤى به‌رده‌وام دهێته گوهۆڕين بۆ زانينا نووترين گۆڕانكاريان سه‌ره‌دانا مالپه‌رێ ئه‌ڤرۆ نيوز بكه.
ئه‌ڤرۆ نيوز:
ب گۆره‌يى پێزانينێن رۆژناما سه‌باح جه‌ديد يا عيراقى رێكخراوا تيرۆرستى يا داعش هه‌موو بيرێن بيستانێن په‌ترۆلا نه‌جمه ل ده‌ڤه‌را عين جحش يا سه‌ر ب ناحيا گه‌ياره ل باشوورێ مووسل مينرێژكرينه و بۆ ته‌قاندنێ ئاماده‌كرينه.
ب گۆره‌يى ئه‌وى ژێده‌رێ رۆژنامێ پشت به‌ستن ل سه‌ر كرى و ناڤێ خوه ئاشكه‌را نه‌كرى مه‌ره‌ما داعش ژ ڤێ كرياريێ ئه‌وه كو پشتى ژ وى باژێرى دچيت ژێرخانا ئابوورى يا وان ژ ناڤ ببه‌ت و به‌رى نوكه هه‌موو ئاڤاهيێن گه‌ياره يێن حكومى ژى ته‌قاندينه و نوكه فرۆكخانه ژى هه‌موو يا مينرێژكرى.
ئه‌ڤرۆ نيوز:
له‌يلا علوى هۆنه‌رمه‌ندا به‌رنياسا مسرى ب ره‌نگه‌كێ ده‌سپێكى رازى بوويه پشكداريێ د فلمێ “موتعه بۆ كرێ” دا بكه‌ت و ب ڤێ چه‌ندێ ژى دێ دووباره ڤه‌گه‌ريته سينه‌مايێ، پشتى ل ماوێ بۆرى خوه ژێ دوور كرى.
له‌يلا علوى سيناريۆيا فلمى خواند پشتى محه‌مه‌د سامى يێ ده‌رهێنه‌ر دايه ده‌ستى و ب ره‌نگه‌كێ ده‌سپێكى رازى بوويه رۆلى تێدا بگێريت ئه‌وێ دێ ژ لايێ كۆمپانيا “باترۆس” هێته به‌رهه‌م ئينان و محه‌مه‌د ئه‌مين رازى چيرۆكا فلمى يا نڤيسى و محه‌مه‌د سامى ژى دێ ب كارێ نڤيسينا سيناريۆيێ رابيت و ئێخيته به‌ر ده‌ستێ ئه‌كته‌ران.
ب ڤێ چه‌ندێ دێ علوى دێ دووباره ڤه‌گه‌ريته ناڤ سينه‌مايێ پشتى بۆ ماوێ بۆرى ژ ئه‌گه‌رێ ره‌وشا ئابوورى يا سينه‌مايا مسرى ده‌ست ژ وى كارى به‌ردايى.
ئەڤرۆ:
شیرەتکارێ وەزیرێ کار و کاروبارێن کۆمەلایەتی بۆ چاکسازیان سەرکەفتە رەش بۆ رۆژناما ئەڤرۆ دیارکر نوکە ل چاکسازیێن ھەرێما کوردستانێ پتری 100 کەسان حوکمێ سێدارێ بۆ دەرچوویە، بەلێ ھاتیە راگرتن چونکو بجە ئینانا سزایێ سێدارێ ب تنێ د دەستھەلاتا سەرۆکێ ھەرێمێ دایە و ئەڤە چەند سالە نەھاتیە بجە ئینان و سەرۆک ئیمزا ناکەت.
سەرکەفتە رەش گۆت ژی بۆ چارەنڤیسێ ڤان کەسان ب تنێ دو رێ ھەنە یان سەرۆکاتیا ھەرێمێ یان پەرلەمانێ کوردستانێ چارەنڤیسێ وان دیار بکەت، چونکو چو قانوون نینن نوکە بۆ راگرتنا سزادانا وان، پەیوەندیا وەزارەتا کار و کاروبارێن کۆمەلایەتی ل گەل وان ب تنێ ئەڤ کەسە د ناڤ چاکسازیێن وان دانە.
سەرکەفتە رەش ھەروەسا گۆت وەزارەتێ ھەموو رێکخستینە و ل ھەرسێ چاکسازیێن ھەولێر و دھۆک و سلێمانیێ ئەڤ کەسێن سزایێ سێدارێ بۆ دەرچووی ژ کەسێن دی یێن گرتی ھاتینە جودا کرن و تێکھەلی ئێک نابن، ھەروەسا گورەی قانوونێ و مافێن مرۆڤی سەرەدەری ل گەل دھێتە کرن و ھەموو مافێن وان وەکو مرۆڤ دپاراستینە.
نيشاندان