ئه‌ڤرۆ نيوز:
د ماوێ 24 ده‌مژمێرێن بۆرى دا، رێژه‌كا باشا بارانێ ل ده‌ڤه‌رێن جودا يێن هه‌رێما كوردستانێ باريه و ل پارێزگه‌ها دهۆكێ ژى سه‌رجه‌مێ گشتى ژ 300 ملم بۆراند پشتى 12 ملم بارانێ ل سه‌نته‌رێ باژێرێ دهۆكێ بارين.
د ڤى خشته‌يى دا رێژا باران بارينێ ل سه‌رانسه‌رى هه‌رێما كوردستانێ دا ديار دبيت:
ئەڤرۆ، مللەت جەمال:
ل رۆژا ئەینی یا بۆری ل بارەگایێ یانا گارە و د سەرەدانەکا فەرمی دا سەروکێ جڤاتا کومپانیێن نەوروز تلیکوم کاوە عەبدوللا جونەید سەرەدانا یانا گارە کر و کومبونەکا بەرفرەە جودا جودا ل گەل دەستەکا کارگێریا یانێ و یاریکەرێن تیما پێشکەفتیا و تیما لاوان کومبوو.
د ڤێ کومبوونێ دا کاوە عەبدوللا جونەید بریار دا ب ھەمی شیانێن خوە پشتەڤانیا یانا گارە بکەت و ب دو شێوان ئەڤ ھاریکاریە دێ ھێتە کرن و ھەروەسا د ئێکەم سەرەدانا خوە دا بریاردا پاێەکا دووماھیک مودێل بو تیمێ بکریت بو ھاتن وچوونا یاریکەران و شاندێت تیمێ.
لدور ڤێ پێنگاڤێ کاوە عەبدوللا جونەید تایبەت بۆ رۆژناما ئەڤرۆ گوت:مە چ مەرەم ب ڤێ پێنگاڤێ نینن بتنێ مەرەما مە ھاریکاری و خزمەتکرنا باژێرێ دھوکێ و وەرزشا ڤی باژێری یە و دێ ب ھەمی شیانا ھاریکاریا یانا گارە کەین بو وێ چەندێ بشێت کاروبارێت خوە ب رێڤەببەت یێن نوکە کو پشکدارە د خۆلا پلە ئێک دا و ھەروەسا دێ ھاریکاریەکا دوم درێژ کەین کو مە پلانێن باش و زانستی ھەنە وەک ڤەکرنا ئەکادیمیێن وەرزشی ل ڤێ یانێ و ئینانا راھێنەرێن بیانی یێن ل ئاست ل وەلاتێن ئەوروپا و بەرازیل و مە شیان ھەنە یاریکەرێن ڤان ئەکادیمیا فرێکەینە ژدەرڤە یاریێ بکەن بو وێ چەندێ ل پاشەرۆژێ باژێرێ دھوکێ یاریکەر ھەبن نەکو پێدڤی یانێن دەرڤە ببین بو ئینانا یاریکەران.
زێدەتر ناڤبری دیارکر کو دێ ھەولدەن ئەردێ یانێ یێ دەوروبەرێ یارگەھێ مفا ژێ بھێتە وەرگرتن و ب ھەروە نەچیت چ ب ئاڤاکرنا جھێن وەبەرھێنانێ بیت یان بو تشتەکێ دی کو ھەر مفایێ یانێ تێدا بیت.
بەرامبەر ڤێ چەندێ سەرۆکێ یانا گارە شێروان بشار گوت: گەلەک د دلخوشین کو کەسەکێ وەرزشڤان خوە لمەکریە خودان و چەندین یاریە ھاریکاریا مە دکەت بو وێ چەندێ یاریێن خوە بکەین و ھەر دیسان پشکەکا مەزن ژمووچێن یاریکەران دابین کریە کو بوویە جھێ دلخوشیا تیمێ ھەموو یان و مە ھیڤی ھەنە دێ شێیت کارەکێ ئەکادیمی و لسەر رێکێن زانستی یێ باش ئەنجام دەت.
لدووماھیێ شَروان بشار دیارکر پشتی وێ ھاریکاریا گروپێ کومپانیێن نەوروز تلیکوم پێشکێشی وان کری دەستەیا کارگێری یا یانێ ب فەر دیت ماموستا کاوە عەبدوللا جونەید وەک سەرۆکێ فەخری یێ یانا گارە بھێتە دانان.
لدووماھیێ راھێنەرێ تیمێ و یاریکەران سوپاسیا ناڤبری کر بو وێ ھاۆیکاریا وی یا بێ سنور بو یانا گارە و ھیڤی خواست کو یێ بەردەوام بیت لسەر ھاریکاریا خوە پشتی کو گەلەک دەرگەھێن لایەنێن حکومەتێ قوتاین و بێ بەرسڤ ماین.
ئەڤرۆ:
بریارە ئەڤرۆ ب فەرمێ ناڤێ راھێنەرێ نوو یێ ھەلبژارتیێ عیراقێ یێ تەپا پێ بو پشکداریا قارەمانیا کاسا نەتەوێن ئاسیا 2015 ل ئوسترالیا بھێتە راگەھاندن پشتی دوھی شاندێ ئێکەتیا تەپا پێ یا عیراقێ ب سەروکاتیا عەبدولخالق مەسعود گەھشتینە قەتەر پشتی ب تەلەفونێ دان و ستاندنێن دەستپێکێ ل گەل راھێنەرێ عیراقێ و یێ یانا قەتەر یا قەتەری رازی شنێشل کرین.
شاندێ ئێکەتیال عیراقێ نەشیان دوھی دان و ستاندنا د گەل ڤی راھێنەری بکەن ب ئەگەرا ھەبونا کارێ راھێنەری د گەل یانێ و ھەبونا یاریا وان د خولێ دا و ئەف راھێنەرێ عیراقێ دێ ئەرکێ راھێنەریا ھەلبژارتیێ عیراقێ بەروەخت وەرگریت و پشتی ب دووماھی ھاتنا ھەڤرکیێن قارەمانیا ئاسیا دێ ڤەگەریتە یانا خوە و ئێکەتیا تەپا پێ یا عیراقێ ئەف داخوازیە دایە کارگێریا یانا قەتەری ئەوێن رازیبونا خوە دیارکری.
ژلایەکێ دووڤە راھێنەرێ عیراقێ رازیل شنێل رەتکریە کو ناڤێن دو ھاریکارێن راھێنەرێ ھاتبنە راگەھاندن ئەوێن دێ ل کگەل وی کار کەن و ئەو چەندە ژی ئاشکەراکر ئەو کەێن د گەل وی دێ کار کەن دێ ئەو بن یێن بەری نوکە د گەل ھەلبژارتیێ عیراقێ کارکری.
دھێتە زانین ئەف چەندە ھاتیە پێش پشتی ل دووماھیا حەفتیا بوری دان و ستاندنێن ئێکەتیا تەپا پێ یا عیراقێ ل گەل راھێنەرێ بەرازیلی لازارونی ل سەر نەگرتین و ناڤبری رەتکری ل بەغدا کارێ راھێنەریێ بکەت و ھەولێر و دوبەی وەکو پێگوھور داناین.
ئه‌ڤرۆ نيوز:
وه‌زاره‌تا به‌ره‌ڤانيا بريتانيا راگه‌هاند كو ل ده‌سپێكا سالا نوو ئه‌و دێ ب سه‌دان له‌شكرى ره‌وانه‌يى هه‌رێما كوردستانێ و عيراقێ كه‌ت.
ماليك فالۆن وه‌زيرێ به‌ره‌ڤانيا بريتانيا ئاشكه‌را كر كو ل ده‌سپێكا سالا نوو، دێ ب سه‌دان له‌شكرێ بريتانى ره‌وانه‌يى هه‌رێما كوردستانێ و عيراقێ كه‌ن ب مه‌ره‌ما مه‌شقكرنا پێشمه‌رگه و سۆپايێ عيراقێ.
وه‌زيرێ به‌ره‌ڤانيا بريتانيا بۆ رۆژناما ته‌لگراف گۆت: ” د كانوونا دويێ يا داهاتى دا به‌ريتانيا دێ هێزێن نوو ره‌وانه‌يى چار سه‌بازگه‌هێن له‌شكرى ل عيراق و هه‌رێما كوردستانێ كه‌ت كو ژ لايێ هێزێن وان و ئه‌مريكا مه‌شق دێ ب پێشمه‌رگه‌يى و له‌شكرێ عيراقێ هێته كرن”.
د چريا ئێكێ يا ئه‌ڤ ساله دا، ئه‌مريكا 12 ئه‌فسه‌رێن پله بلند ره‌وانه‌يى هه‌رێما كوردستانێ كربوون و ل رۆژا 26 ئيلۆنێ دا، پشتى په‌رله‌مانێ بريتانيا ره‌زامه‌ندى ل سه‌ر ئه‌نجامدانا چالاكيێن له‌شكرى يێن وه‌لاتێ خوه دا ل عيراقێ دايى، فرۆكێن شه‌ركه‌رێن ئه‌وى وه‌لاتى پشكدارى د هێرشێن ئه‌سمانى ل دژى داعش دا كريه.
ئه‌ڤرۆ نيوز:
ئيبراهيم جه‌عفه‌رى وه‌زيرێ ژ ده‌رڤه يێ عيراقێ ئاشكه‌را كر كو ب ڤان نێزيكان دێ دوسيا تاوانبارێن راده‌تسكرنا مووسل ب داعش بۆ رايا گشتى ئاشكه‌را كه‌ين.
ته‌كست ل سه‌ر وێ چه‌ندێ ژى كر كو هنده‌ك ژ كه‌ساتيێن گرنگ د دوسيێ دا يێن هه‌ين و گۆت: “هه‌ڤپه‌يمانيا دژى داعش كاردانه‌ڤه‌كا دره‌نگ بوو”.
جه‌عفه‌رى د ديداره‌كا كه‌نالێ مه‌يادين دا گۆت: “هه‌ڤپه‌يمانێن نێڤده‌وله‌تى كاردانه‌ڤه‌كا دره‌نگ بوو، ل دژى داعش، كو پێشتر ل سوريا هه‌بوون و ئه‌زموونا ته‌مام وه‌رگرتبوو. هه‌كه چ بنگه‌هێن ئه‌منى ل سوريا هه‌تا راده‌كى د ره‌ق و شدايى ژى بن، به‌لێ ده‌ما هاتيه عيراقێ تێك شكه‌ت و نوكه ته‌رازيا هێزێ هاتيه گۆهاڕتن.
ده‌رباره‌يى ڤه‌كۆلينێن كه‌يێ مووسل ژى گۆت: “پێزانينێن ته‌مام ل ده‌ف من نينن، به‌لێ دزانم ڤه‌كولين يێن هاتينه كرن، چه‌ندين كه‌ساتى هاتينه تۆمه‌تباركرن و د داهاتيه‌كێ نێزيك دا دێ بۆ رايا گشتى هێنه راگه‌هاندن”.
زێده‌تر گۆت: “ئه‌ڤا روودايى نابيت چاڤێن خوه ل سه‌ر بگرين، د جيهانا ئه‌ڤرۆ دا تاوانێن ب ڤى ره‌نگى ناهێنه ئه‌نجام دان، نابيت بێى لێپرسين ژى ببوريت، دڤێت هه‌ر كسه‌ك حه‌قێ خوه وه‌ربگريت، يا ژيوارى نينه باژێره‌كێ هوسان بكه‌ڤيته ده‌ستێ داعش و كه‌سێ هاريكارى نه‌كربيت”.
ئه‌ڤرۆ نيوز:
دوهى سپێدێ رێكه‌قتى 13\12 ل سه‌ر جادا گشتى به‌رامبه‌ر گوندێ گه‌ڤه‌ركێ ترۆمبێله‌كا ته‌كسى كوردستان ژ جاديێ ده‌ركه‌فتيه و چوويه ب كاژێن ناڤا جادێ كه‌ڤتيه و پاشان ژى چوويه د سايدێ دى دا و وه‌رگه‌ريايه و ژ ئه‌نجامێ وێ ژى ترۆمبێله‌كا ديتر ژى ده‌عميه.
شۆفێرێ ترۆمبێلێ يێ ب سلامه‌ته به‌لێ زيانێن مه‌زن گه‌هشتينه ترۆمبێلێ ب گۆره‌يى وان وێنێن ل خوارێ د ديار يێن ژ په‌يچێ رێلات بناڤى ڤه هاتينه وه‌رگرتن.
ئەڤرۆ:
بەرپرسێ لقێ 14 یێ پارتی ل مووسل دیار کر کو ژ ئەگەرێ نەدانا فتوایێن تالانکرنا سەروسامانێ وەلاتیان چەکدارێن رێکخراوا تیرۆرستیا داعش مەلایەک سێدارە دا و تەرمێ وی ژی پارچە پارچە کر.
عسمەت رەجەب، بەرپرسێ لقێ 14 یێ پارتی دیموکراتی کوردستان ل مووسل بۆ خەندان راگەھاند، تیرۆرستێن داعش ئیمامێ مزگەفتا نەبی ئیبراھیم کو دکەڤیتە دەڤەرا غەزلانی ل پەرێ راستێ یێ باژێرێ مووسل ب ناڤێ شێخ نەعمان فایەق سێدارە دا و گۆت “تیرۆرستێن داعش داخواز ژ مەلایێ ناڤھاتی کر بوو فەتوا تالانکرنا سەروسامانێ کورد، تورکمان و مەسیحیێن ناڤ باژێرێ مووسل بدەت، لێ ژ بەر کو ئەو مەلایە یێ رازی نەبوو چ فەتوایێن ب وی رەنگی بدەت، سێدارە دا و پشتی سێدارەدانێ ژی لەشێ وی پارچە پارچە کریە”.
بەرپرسێ لقێ 14 یێ پارتی ئاشکرا ژی کر، دوھی ئێڤاری 13\12 ل دەڤەرا کەسکێ یا رۆژئاڤایێ باژێرێ مووسل، گرۆپێن چەکدار یێن دناڤ باژێرێ مووسل دا ھێرش کریە سەر ترۆمبێلەکا بارھەلگرا داعش کو دو موەلیدێن کارەبێ بارکر بوون و دڤیان بەرەڤ باژێرێ رقە یێ سووری ببەن و گۆت ” گرۆپێن چەکدار ئەو بارھەلگرە سۆت و دو تیرۆرست ژی کوشتن”.
ئەڤرۆ نیوز:
د دیدارەکێ دا بۆ رۆژناما ئەڤرۆ کو سەرجان مەحمود بەرھەڤکریە، سەرۆکێ بەرێ یێ باژێرڤانیا ئامەدێ و سیاسەتمەدارێ ناڤدارێ باکورێ کوردستانێ دیار دکەت کو کۆبانێ نموونا ھەری بەرچاڤ یا ئێکەتیا کوردانە و ئەزموونا کوبانێ نیشا دا دەمێ کورد ئێکگرتی بن چو ھێزەک نەشێت وان ژناڤ ببەت و ئەڤرۆکە نێرینا جیھانێ ل ھەمبەر کوردان ھاتیە گوھۆرین و کورد پتر ژ ھەر دەمەکێ ب ھێزن و دڤێت ھێزێن سیاسی یێن کورد ژی د زووترین دەم کۆنگرێ نەتەوی بگێرن و سەرکەڤتنا گەلێ کورد ژی دێ وەسا ھێتە مسوگەر کرن.
ئۆسمان بایدەمیر سەرۆک بەرێ یێ باژێرڤانیا مەزن یا ئامەدێ و سیاسەتمەدارێ ناڤدارێ کورد د دیدارەکا تایبەت دا بۆ رۆژناما ئەڤرۆ دیار کر کو ھێزێن کوردی شیان د شەرێ داعشێ دا سەرکەڤتنێن مەزن تۆمار بکەن، کوردان شیا ل ھەمبەر مەزنترین رێکخراوا تیرۆری یا جیھانێ شەری بکەن و وان لاواز بکەن و ژ بەر ڤێ یەکێ ژی ئەڤرۆکە ل ھەموو جیھانێ کورد وەک قارەمانێن ئازادیێ دھێنە دیتن و ژ بەر ڤێ یەکێ ژی وەلاتێن جیھانێ بەرھەڤن ھاریکاریا کوردان بکەن و گۆت: “چوونا پێشمەرگەی بۆ کۆبانێ و گەھاندنا چەکی بۆ شەرڤانێن کورد ب رێیا فرۆکێن ئەمریکا براستی ژی روودانێن دیرۆکی نە و دڤێت ئەم ژبیر نەکەین و ئەو یەک ژی نیشا ددەت کو ئەڤرۆکە جیھان ھزرەکا مەزن بۆ کوردان دکەت و دەلیڤەکا مەزن ژی بۆ کوردان ھاتیە پێش و ژ بەر ڤێ یەکێ ژی دڤێت ھێزێن سیاسی یێن کوردی د زووترین دەم دا کۆنگرێ نەتەوی دروست بکەن و پێکڤە ل سەر ستراتیژیەکا نەتەوی کار بکەن”.
ئۆسمان بایدەمیر د بەردەوامیا ئاخڤتنا خوە دا ئەو یەک ژی دیار کر کو ئەم ھەر دەم دبێژین دەمێ کورد ببنە ئێک کەس نەشێت وان ژناڤ ببەت، نموونا شەرێ ل کۆبانێ و پێکڤە شەرکرنا پێشمەرگە و شەرڤانان ل دژی تیرۆرستان ئەو راستی جارەکا دی نیشا مە دا و ژ بەر ڤێ یەکێ ژی دڤێت ئەزموونا کۆبانێ ببیتە دەستپێکا قۆناغەکا نوو و فەرە ھەموو ھێزێن کوردی ئێدی دەست ب لاپەرەکا نوو بکەن و دژبەریا ھەڤدو نەکەن و پێکڤە کار بکەن، چونکو دۆژمنێن کوردان جارەکا دی پێکڤە شەرێ کوردان کر دا کوردان ژناڤ ببەن و دەمێ دۆژمنێن مە وەسا پێکڤە دژی مە کار دکەن دڤێت ئەم ژی د ناڤا خوە دا ئێکگرتی بین و گۆت: “گەلێ کورد دەمەکە ئێکەتیا خوە دروست کریە، روودانێن ل شنگال و کۆبانێ ئەڤ راستی جارەکا دی نیشا مە دا، گەلێ مە ب ھەر رەنگەکێ خوەدان ژ ھەڤدو دەرکەڤتن، ژ ئورۆپا ھەتا رۆژھەلات و باکور و ھەرێما کوردستانێ کوردان پێکڤە دژی داعشێ ھەلویستەک نەتەوی نیشا د و لاوێن کورد بەرێ خوە دانە سەنگەرێن شەری دا بەرەڤانیێ ژ کوردستانێ بکەن، پێشمەرگە چوونە کۆبانێ و ئەو یەک ژی نیشا ددەت کو کورد بووینە ئێک و نھا دڤێت پارتێن سیاسی یێن کوردی ژی ئێکەتیا خوە دروست بکەن و گۆت: “چ دبیت بلا ببیت، ئێدی چو کوردەک قەبوول ناکەت کو پارتێن مە یێن سیاسی ژ بەر ھندەک ئەگەران دژبەریا ھەڤدو بکەت، نھا مەترسیەکا مەزن ل سەر رۆژئاڤایێ کوردستانێ ھەیە و رێککەفتنا ل دھۆکێ گەلەک گرنگ بوو، ھیڤی دکەم کو ھێزێن رۆژئاڤایێ کوردستانێ پێکڤە کار بکەن و نەھێلن تیرۆرست وەلاتێ مە خراب بکەن”.
سەبارەت ب قۆناغا ئاشتیێ و پرسا کوردی ل تورکیا ژی ئۆسمان بایدەمیر راگەھاند کو ھەرچەندە گەلەک جاران بەحسێ چارەکرنا پرسا کوردی و پرۆژێن حوکمەتا تورکیا دھێتە کرن، لێ یا راست ھەتا نھا د بیاڤێ پراکتیکی دا چو پێنگاڤێن وەسا بەرچاڤ نەھاتنە ئاڤێتن و ژ بەر ڤێ یەکێ ژی ئەڤرۆکە بێ باوەریەک مەزن د ناڤبەرا کوردان و حوکمەتا تورکیا دا دروست بوویە، چونکو دەمەکە بەحسێ چارەکرنا پرسا کوردی دھێتەکرن و چو نەھاتیە کرن و ژ بەر ڤێ یەکێ ژی ھەکە براستی تورکیا بڤێت پرسا کوردی چارە بکەت دڤێت بەری ھەر تشتەکێ نێرینا دەولەتێ ل ھەمبەر کوردان بھێتە گوھۆرین و نابیت ھێشتا وەک وەلاتیێن دەرەجە دو سەرەدەری ل گەل کوردان بھێتە کرن.
سەرۆکێ بەرێ یێ باژێرڤانیا مەزن یا ئامەدێ د دووماھیا ئاخڤتنا خوە دا ژی ئەو یەک دیار کر کو ھەکە کورد ل تورکیا نەگەھنە مافێن خوە یێن سیاسی و جڤاکی پرسا کوردی ژی چارە نابیت، ھەتا نھا ب ھزاران لاوێن کورد جانێ خوە فیدا کرینە و چو کەسەک ژی قەبوول ناکەت کو ب ھندەک درووشمان دەولەت بزاڤا خاپاندنا کوردان بکەت و گۆت: “دڤێت زۆرداریا ل سەر کوردان بھێتە راکرن و چو ئاستەنگی ل ھەمبەر پەروەردا ب زمانێ کوردی نەمینن، دڤێت سەرۆک کۆمار و سەرۆک وەزیرێن تورکیا زمانێ خوە یێ توند ل ھەمبەر کوردان بدەنە گوھۆرین و یا ھەرا گرنگ ژی دڤێت بەندێ ١٠% یێ ھەلبژارتنان ل تورکیا بھێتە راکرن، چونکو ئەو بەندە ل دژی گەلێ کورد ھاتیە دانان و ب تەمامی ل دژی دیموکراسیێ یە”.
ئه‌ڤرۆ نيوز:
زانايێن ئۆسترالى گه‌هشتنه ده‌رئه‌نجامه‌كێ نوو كو شيان جۆره‌كێ نوو يێ ستيان ل شوونا يێن نوكه بۆ ژنان ببينن كو ئه‌و ژى يێن ئه‌لكترۆنى نه ب ره‌نگێ خۆيى (ئۆتۆماتيك) ب گۆره‌يى جۆرێ روونشتنێ كار بكه‌ن كو ئه‌و ب خوه بچيته تێكرا و ژێك بهێته دره و نه‌رم و ره‌ق بيت كو ب چو ره‌نگه‌كى زيانێ ناگه‌هينيته وێ كه‌سا وان ئێله‌كان ل به‌ر دكه‌ت.
ناڤێ ڤان ستيان كريه bionic bra و بڕياره د كۆنگرێ رۆژنامه‌ڤانى يێ زانكۆيا گۆنگۆركا ئۆسترالى دا بهێنه نمايشكرن و بێخنه به‌ر چاڤێن ره‌خنه‌گران هه‌كه هاته په‌سه‌ندكرن دێ ل بازاران هێته فرۆتن.
هه‌كه ئه‌ڤه 15 ساله داهێنانێن ژڤى ره‌نگى دهێنه كرن، به‌لێ ب گۆره‌يى گۆتنێن ڤان داهێنه‌رێن ئه‌ڤ كاره كرى، ئه‌ڤه ژ هه‌موو ئه‌وان كارێن به‌رى نوكه باشتره.
ب گۆره‌يى راپرسيه‌كێ 85% ژ ژنان نزانن ستيانێن درۆست هه‌لبژێرن و د ئه‌نجام دا كێشه بۆ سينگێ وان په‌يدا دبن، ژ به‌ر هندێ ده‌ركه‌فتنا ڤان ستيانان دبيت رێژا تووشبوونا ب په‌نجه‌شێرا مه‌مكى كێم ببيت.
ئەڤرۆ نیوز، بارزان سلێمان مزووری :
ژێدەرکی ژ ھێزێن ئیمناھیێ ل پارێزگەھا مووسل بۆ ئەڤرۆ نیوز دیار کر کۆ ئەڤرۆ دانێ سپێدێ 13\12 چەکدارێن تیرورستێن داعش زیندانیا بادوش سەر ب پارێزگەھا مووسل ڤە ب تمامیTNT کر ل دووڤ دا پەقاند ب ھەموو وان بەش و ھولێن ب سەرڤە .
خۆیا ژی کر کۆ 900 زیندانی تێدا بوون بۆ جھەکێ نەدیار ڤەگوھاستن ل 10\12 ھزارەھا زیندانی تێدا سێدارەدان گەلەک ژ وان بۆ باژێرێ سوریا ڤەگوھاستن .
دا زانین ژی کو زیندانیا بادوش زیندانیا سێ بۆ ل سەر وەزارەتا داد یا عێراقێ ۆ ئێکەم زیندانیا داعش بۆ کو ئەوێن وەلاتیێن دەستەسەردکرن تێدا ماوەک زیندانی کرن پاشان بۆ جھەکی ڤەدگوھاستن یان سێدارەدان .
ل چەند روژێن بوری بەشەک ژ ڤێ زیندانیێ ھاتبوو پەقاندن، نوکە ب تمامی ھاتە پەقاندن .
نيشاندان