ئەڤرۆ نیوز:

ئاژانسا روسیا تودێی د راپۆرتەکێ دا دیار کریە کو وان بەری نها دەست ب راپرسیەکێ ل دۆر سیستەمێ داهاتی یێ سووریێ کرینە و پتر ژ دو ملیۆن کەسان پشکداری د راپرسیێ دا کرینە و د راپرسیێ دا دیار بوویە کو نێزیکی ٦٠% ژ پشکداربوویان داخواز دکەن سیستەمێ سووریێ یێ فیدرالی بیت و کوردان ژی هەرێمەکا خوە یا فیدرالی هەبیت.

د راپرسیێ دا نێزیکی ٤٠% پشکداربوویان ژی دیار کرینە کو دڤێت سیستەمێ سووریێ وەکو بەری مەرکەزی بیت و سیستەمێ فیدرالی نەشێت ئاریشێن ل سووریێ چارەسەر بکەت.

ئەڤرۆ نیوز:

بەرپرسەکێ وەزارەتا دەرڤە یا تورکیا بۆ ئاژانسا ئاناتولی دیار کریە کو هێزێن رژێما سووریێ ل ئدلبێ ئاگربەستێ بنپێ دکەن و پشتی راگەهاندنا ئاگربەستێ هەتا نها چەندین جاران هێزێن سووریێ هێرشی هێزێن چەکدار ل ئدلبێ کرینە و ئەو یەک ژی بنپێکرنا ئاگربەستێ یە.

هەمان بەرپرسی دیار کریە کو دوهی هێزێن سووریێ ب چەکێن گران ل دەوروبەرێن ئدلبێ هێرشی کاروانەکێ سەربازی یێ تورکیا ژی کرینە.

ئەڤرۆ نیوز:

دەزگەهێن راگەهاندنا ئەلمانیا دیار دکەن کو ئەردۆگانی دخواست کارتا پەنابەران وەکو فشارەکێ ل دژی وەلاتێن ئێکەتیا ئورۆپا بکار بینیت لێ دەمێ وەلاتێن ئورۆپا هاریکاریا یونانێ کرن و سنور باش هاتنە گرتن ئەو کارتا ئەردۆگانی ژی بێ ئەنجام ما.

دەزگەهێن راگەهاندنا ئەلمانیا دیار ژی دکەن کو ئێدی وەلاتێن ئورۆپا بەرهەڤ نینن وەکو سالێن بۆری پارەکێ مەزن ژ بەر پەنابەران بدەنە تورکیا، ئارمانجا سەرەکی یا ئەردۆگانی وەرگرتنا پاران بوو، لێ ئەو یەک ژی بێ ئەنجام ما.