ئەڤرۆ نیوز:
ژ بۆ پاراستنا ژ ڤایرۆسێ کۆرۆنا وەزارەتا پێشمەرگەی بریار دایە کو هەتا پشتی نەورۆزێ راهێنانێن هێزێن پێشمەرگێن کوردستانێ بهێنە راگرتن.
د ڤێ دەربارێ دا بابەکر فەقێ ئەحمەد رێڤەبەرێ دەزگەهێ رەوشەنبیری و هشیاریا نەتەوی ل وەزارەتا پێشمەرگەی راگەهاند کو ژ بۆ پاراستنا هێزێن پێشمەرگێن کوردستانێ ژ ڤایرۆسێ کۆرۆنایێ گەلەک رێنمایێن هاتینە دان و پێگیری ژی پێ دهێتە کرن و ژ بەر هندێ ژی بریار هاتیە دان هەتا نەورۆزێ راهێنان ب هێزێن پێشمەرگەی نەهێنە کرن.
ئەڤرۆ نیوز:
وەزارەتا ساخلەمیێ یا ئیرانێ راگەهاند کو هەتا نها ١٩٤ کەسان ب ڤایرۆسێ کۆرۆنا ل ئیرانێ جانێ خوە ژ دەست داینە.
وەزارەتا ساخلەمیێ یا ئیرانێ ئەو یەک ژی دیار کریە کو هەتا نها شەش هزار و ٥٠٠ کەس ل ئیرانێ تووشی کۆرۆنایێ بووینە و ژ دوهی وەرە هەتا نها ٧٠٤ تووشی ڤایرۆسێ کۆرۆنایێ بووینە.
بەرپرسەکێ رێکخراوا ساخلەمیێ یا جیهانی ژی دیار کریە کو ئیران نەشێت وەکو پێدڤی رێگریێ ژ بەلاڤبوونا کۆرۆنایێ بکەت و ئەو یەک دشێت مەترسیەکا مەزن بۆ جڤاکێ ئیرانێ هەبیت.
ئەڤرۆ نیوز، نەوزاد هلۆری:
د رێورسمەکێ دا ب بەرهەڤبوونا دیار بەحری رەسول، رێڤەبەرێ گشتیێ باژێرڤانیان ل پارێزگەها دهۆکێ، جەهوەر عەلی، قایمقامێ قەزا ناڤەندی یا دهۆکێ، هوزان جاسم یەحیا وەکو سەرۆکێ نوو یێ باژێرڤانیا زاویتە ل شوونا سالح تاهر هاتە دانان.
دچارچوڤێ رێورسمێن گوهرینا سەروکێ باژێرڤانیا زاویتە، دیار بەحری رەسول، رێڤەبەرێ گشتیێ باژێرڤانیان ل پارێزگەها دهۆکێ دیارکر کو گوهورینا سەرۆکێن باژێرڤانی و فەرمانگەهێن حوکمەتێ گورانکاریێن کارگێری و یاسایی و سروشتی و سوپاسیا ماندبوون و کار و بزاڤ و چالاکیێن سەرۆکێ بەرێ یێ باژێرڤانیا زاویتە، سالح تاهر سالح دکەین، دیسان داخوازا سەرکەفتنێ بۆ هوزان جاسم یەحیا ژی دکەین کو وەک سەرۆکێ نوو یێ باژێرڤانیا زاویتە هاتەدانان، وەکو رێڤەبەرییا گشتی پشتەڤانیا خوە بۆ دوپات دکەین و ئومێدەوارین سەرکەفتی بیت و بشیت خزمەتەکا باش بۆ خەلکێ دەڤەرێ بکەت، پیروزباهیێ لێ دکەین.
ژلایێ خوڤە، هوزان جاسم، سەرۆکێ نوو یێ باژێرڤانیا زاویتە بۆ ئەڤرۆ نیوز گۆت: سوپاسیا رێڤەبەرییا گشتی یا باژێرڤانیان دکەم کو ئەز وەکو سەرۆکێ باژێرڤانیێ هەلبژارتیم و ئومێدەوارم ل گورەی قانون و رێسایێن وەزارەتا باژێرڤانی و رێنمایێن رێڤەبەریا گشتی یا باژێرڤانیان، ل گورەی ئەوان بەرنامە و پلانێن بۆ باژێرڤانیان هاتینە دانان کار و خزمەتا خەلکێ دەڤەرێ بکەین.
ئەڤرۆ نیوز،عەلی حاجی:
په‌یڤدارێ دەروازا نێڤ دەولەتیا ئیبراهیم خەلیل د داخویانیەکێ دا بۆ ئەڤرۆ نیوز ئاشکرا کر پشتی دەریێن سنوری ل هەمبەر رێڤینگ و گەشتیاران دناڤبەرا وەلاتێ تورکیا و کوردستانێ دا هاتیە گرتن بتنێ هەلگرێن ناسنامە و نشینگەها وەلاتێ تورکیا دشێن قەستا وی وەلاتی بکەن.
زێدەتر کامی کەمال گۆت : ژبەر کو دەریێ سنوریێ دناڤبەرا وەلاتێ تورکیا و هەرێما کوردستانێ دا ل هەمبەر پاسەپورتێن عێراقی دا یێ گرتی یە بەلێ هەلگرێن نشینگەهـ و ناسنامەیێن وەلاتێ تورکیا دشێن ب رێیا دەرگەهێ دەروازا نێڤ دەولەتیا ئیبراهیم خەلیل قەستا وەلاتێ تورکیا بکەن و گەلەک قوتابیێن هەرێما کوردستانێ ژی هەلگرێن نشینگەها وەلاتێ تورکیانە و ئەو ژی دشێن ب رێیا وی دەرگەهی قەستا وەلاتێ تورکیا بکەن،بەلێ هندەک رێکار هاتینە گهورین و دبیت رێکارێن ب زەحمەتر ژلایێ وەلاتێ تورکیا ڤە بەرامبەر وان بهێنە وەرگرتن و هەتا نوکە ژی حالەت هەبوینە کو هەلگرێن نشینگەهـ و ناسنامەیێن تورکی ب رێیا دەرگەهێ ئیبراهیم خەلیل قەستا وی وەلاتی کربن بێ هیچ کێشەیەکێ و هەتا نوکە ژی دەرێی بازرگانی دناڤبەرا هەرێما کوردستانێ و وەلاتێ تورکیا دا یا بەردەوامە .
ئەڤرۆ نیۆز، قائید میرۆ:
ئینانا کەلوپەلان بۆ بازاڕێن ھەرێما کوردستانێ وەک بەرێ بەردەوامی ھەیە و سەرۆکێ ژوورا بازرگانیا ھەرێما کوردستانێ ژی دبێژیت، ڤایرۆسا کۆرۆنا زیان ب ئابوورێ جیھانێ گەھاندینە.
دارا جەلیل خەیات، سەرۆکێ ژوورا بازرگانیا ھەرێما کوردستانێ بۆ ئەڤرۆ نیۆز دیارکر” ئینانا کەلوپەلان بۆ بازاڕێن ھەرێما کوردستانێ یا بەردەوامە و ھێشتا نەھاتیە راگرتن، لەوڕا ئەم وەلاتیان پشتڕاست دکەین چو کێماسی ل ئینانا ئەرزاقی و کەلوپەلێن پێدڤی نینە.
سەرۆکێ ژوورا بازرگانی ئاماژەکر” چەندین رێکار وەک خۆپارستن ل کۆرۆنا ل خالێن سنوری ھاتینە بجە ئینان، لەوڕا گۆھڕین ل ھاتنا کەلوپەلان پەیدابوویە.
دارا جەلیل خەیات گۆتژی” ڤایرۆسا کۆرۆنا کاریگەری لسەر بزاڤێن بازرگانی ھەبوویە، بەلێ نەگەھشتیە ئەڤی ئاستی ئینانا کەلو پەلان بھێتە راگرتن، بەلێ ئابورا جیھانێ بگشتی تووشی زیانێن مەزن کریە.
ئه‌ڤرۆ نیوز، مه‌حمود نهێلى:
ژبۆ خوه‌پارستنێ ژ ڤایروسێ كورونایێ ل هه‌ژماره‌كا فه‌رمانگه‌هێن سنورێ ناحیا دێره‌لۆك هێمایێ (نه‌چونا ده‌ستى باشتره) ل سه‌ر دیوارێ فه‌رمانگه‌ها داینه و داخازێ ژ وه‌لاتیان دكه‌ن دڤێ هه‌یڤێ دا چوونا ده‌ستێ ئێك راگرن.
سامى ئوشانه رێڤه‌به‌رێ ناحیا دێره‌لۆك بۆ ئه‌ڤرۆ نیوز دیاكر، كو ئه‌وان ئه‌ڤ ده‌ستپێشخه‌ریه ژ پێخه‌مه‌ت سلامه‌تیا وه‌لاتیان و دووركه‌فتن و خوه پاراستن ژ ڤایروسێ كورونایێ ئه‌نجامدایه‌یه و گۆت: داخازێ وه‌لاتیان دكه‌ین نه‌بتنێ ل فه‌رمانگه‌هان به‌لكو ل هه‌موو جهه‌كێ چوونا ده‌ستێ ئێك راگرن و ل دووڤ رێنمایێن ساخله‌میێ كار بكه‌ن.
ناڤهاتى ته‌كه‌ز ژى كر، كو باشترین چاره‌سه‌رى بۆ ڤێ نه‌خوشیێ خوه پاراستنه و ژ به‌ر وێ یه‌كێ ژى پێدڤیه ل په‌ى وان رێنمایان بچین یێن ژلایێ ساخله‌میێ ڤه دهێنه ده‌ركرن.
ئه‌ڤرۆ نیوز:
وه‌زیرێ ساخله‌میا حوكمه‌تا هه‌رێما كوردستانێ د پرێس كۆنفرانسه‌كی دا ل گه‌ل قونسلخانێ چینێ راگه‌هاند: هه‌رێما كوردستانێ داخازا هه‌ڤكاریكرنا ساخله‌میێ و راویژكاریێ ژ چینێ كریه.
د.سامان به‌رزنجی وه‌زیری ساخله‌میا حكومه‌تا هه‌رێما كوردستانێ راگه‌هاند: وه‌لاتێ چینێ ب رێكا قونسلێ گشتی ره‌زامه‌ندی نیشاندایه ئه‌و پێدڤیێن وان دابینكرین نه‌به‌نه ده‌رڤه‌یی هه‌رێما كوردستانێ بۆ هه‌رێمێ دابین بكه‌ن، د ئیكه‌م قوناغ دا 200 هه‌زار ده‌مامكێن ئاسایی دابینكرینه و كۆ ئه‌ڤه‌ژی دێ ب سه‌ر نه‌خوشخانه و بنگه‌هێن ساخله‌میی دا هێنه پارڤه‌كرن.
وه‌زیری ساخله‌میا حكومه‌تا هه‌رێما كوردستانێ ئه‌و چه‌نده ژی راگه‌هاند: هنده‌ك ژ ئه‌وان پێدڤیێن كۆ 50 هزار ئامیرێن تیستا تایبه‌ت ب ڤایرۆسێ كورونایه بۆ عیراقێ هاتینه ژ چینێ كۆ ژ وان 50 هزاران ژی پشكا هه‌رێما كوردستانێ تێدا هه‌یه كو هنده‌ك جورێن تایبه‌تێن ده‌مامكانه و پێدڤیێن ئامێرین نوژداری و هه‌ناسه‌دانا ده‌ستكرد و ئامێرێن چاڤدێریكرنا چر.
د.سامان به‌رزنجی وه‌زیری ساخله‌میا حكومه‌تا هه‌رێما كوردستانێ دیاركر ب شێوه‌یه‌كێ فه‌رمی داخازێ ژ وه‌لاتێ چینێ دكه‌ین هه‌ڤكاریا مه بكه‌ن، چونكو ل ده‌مێن بوری ئه‌و وه‌لات ب خودان شاره‌زا و سه‌ربوره دبیاڤێ ریب ری بوونا كورنایێ دهێته دانان، ب سوپاسی ڤه قونسلێ چینێ ل هه‌رێمێ بریار دا ئه‌و تیما شاره‌زا كو نوكه ل به‌غدایه بهینته هه‌رێما كوردسانێ، بۆ كۆمبوونێ و هه‌ماهه‌نگی ل گه‌ل وه‌زاره‌تا ساخله‌میا حكومه‌تا هه‌رێما كوردستانێ بكه‌ن.
ئه‌ڤرۆ
وه‌زاره‌تا دارایی و ئابووری یا حكومه‌تا هه‌رێما كوردستانێ خشته‌یه‌كێ نوو یێ موچه‌یێ هه‌یڤا 12 سالا بوری راگه‌هاند.
وه‌زاره‌تا دارایی و ئابووری یا حكومه‌تا هه‌رێما كوردستانێ د راگه‌هاندنه‌كێ دا به‌لاڤكریه كۆ سوبه‌هی موچه‌یێ وه‌زاره‌تا ساخله‌میێ هێته پارڤه‌كرن.
ئه‌ڤه ل ده‌مه‌كی دایه كۆ وه‌زاره‌تا پێشمه‌رگه وه‌ك ئیكه‌م وه‌زاره‌ت موچه وه‌ردگرت، به‌لی ب ئه‌گه‌ری به‌لاڤ بوونا ڤایرۆسێ كورونایێ، وه‌زاره‌تا ساخله‌میێ وه‌ك ئێكه‌م وه‌زاره‌ت دێ موچه‌ی وه‌رگرن.
ئەڤرۆ نیوز،عەلی حاجی :
قایمقامێ زاخۆ د داخویانیەکێ دا بۆ ئەڤرۆ نیوز دیار کر ب سێ تیمان دێ باژێرێ زاخۆ ب دەرمانێن دژی ڤایرۆسێ کورونا ل جهێن گشتی هێتە رەشاندن و ئەڤ کارە ژی دێ ب شەڤ هێتە ئەنجام دان.
زێدەتر بوتان محسن گۆت : ل شەڤا ئێک شەمب یا دو شەمبێ ب رێیا سێ تیمان پێک ژ رێڤەبەریێن ڤێتیرنەری و چاندن و ساخلەمیا زاخۆ د ناڤ سەنتەرێ باژێرێ زاخۆ دا ل جهێن گشتی و پارک و بازارێن زاخۆ دا ب دەرمانێ دژە ڤایروسێ کورونا هێتە رەشاندن و ئەڤ چەندە ژی ژبەر وێ چەندێ یە دا کو ئەڤ ڤایروسێ دناڤ سەنتەرێ باژێری دا بەر بەلاڤ نەبیت ئەڤجا داخاز ژ وه‌لاتیان دکەین هاریکار بن دگەل تیمێن مە دا کو ب شێوەیەکێ سەرکەڤتی ئەڤ هەوە ب دوماهی بهێت و ب ڤی رەنگی ژی باژێر بهێتە پاقژ کرن.
ئه‌ڤرۆ نیوز:
چین ئێكه‌م وه‌لات بوو ڤایرۆسێ كورونایێ تێدا به‌ربه‌لاڤ بوو، نوكه هه‌تا ئاسته‌كێ ره‌وشا توشبوویێن وێ باش بوویه بوویه سه‌ربوره‌ك بۆ چاره‌كرنا توشبویێن ڤایرۆسێ كورونا، له‌ورا بۆ ریب ری بوونا ڤایرۆسێ كورونایێ شه‌ش ته‌نێن ده‌رمانێن تایبه‌ت بڤێ ڤایرۆسێ و چه‌ندین ئامێرین نوژداری بۆ عیراقێ فرێكرن.
عه‌بدللا لوعێبی وه‌زیرێ ڤه‌گۆهاستنا عیراقێ راگه‌هاند ب فروكه‌یه‌كا عیراقی ل ده‌مێ 36 ده‌مژمێران چون و هاتن زێده‌تری شه‌ش ته‌نێن ده‌رمان و ئامرێن نوژداری بۆ ریب ری بوونا ڤایرۆسێ كورونایێ ژ وه‌لاتێ چینێ گه‌هشتنه عیراقێ.
وه‌زیرێ ڤه‌گۆهاستنا عیراقێ ئه‌و چه‌نده ژی راگه‌هاند: ده‌رمان و ئامێرێن چاره‌كرن و ژناڤبرنا ڤایرۆسێ كورونایێ ل ناڤا ئه‌وان تشتان دانه یێن كۆ ژ وه‌لاتێ چینێ هاتین، كۆ نێزیكی 50 هه‌زار كه‌ره‌سته‌یێن هه‌لگرتن و پاراستنا پشكنینیان دناڤا ئه‌وان ئامێرین ساخله‌میی دا هه‌نه یێن ژ چینێ هاتینه هنارتن بۆ عیراقێ.
نيشاندان