ئەڤرۆ، سالار دۆسکی:

پارکا (مەرجان) ل تاخێ زرکا کو ل سەر روویێ ٢٣ ھزار مەترێن چار گۆشە ھاتیە دروستکرن، ڤەکێشانا خەلکێ تاخی و ئەندامێن پەرلەمانێ کوردستانێ نڤسینگەھا دھۆکێ و بوویە بابەتێ گەرمێ تۆرێن جڤاکیێن فێسبوکی، باژێرڤانیا دھۆکێ ژ لایەکێ دی ڤە یا ل سەر بجھئینانا پرۆژێ خوە رژدە و ب قانوونی ل قەلەم ددەت. ژڤانە ئەڤرۆ ١٩/ ١٠ چەندین ئەندامێن پەرلەمانێ کوردستانێ داخواز ژ باژێرڤانیێ بکەن، دەست ژ پرۆژەی بەردەت بۆ دووڤچوونا بابەتی ئەڤرۆ چەندین بۆچوون وەرگرتینە.

زیاد عابد ژ پێش خەلکێ تاخی ڤە دیار کر، وەک خەلکێ تاخی و دەردوران دەنگێ خوە گەھاندیە گەلەک جھان و دیسان گەلەک خەلک ھاتیە بەرھەڤە ئیمزا بکەت و ھەتا چێکرنا ڤێ راپورتێ (٥٠) ئیمزا ھاتبوونە کومکرن ھەلویستێ خوە وەربگریت و نە ب تنێ بەرامبەر ڤێ پارکێ، بەلکو بەرامبەر ھەر پارکەکا بۆ بەرژەوەندیێن بازرگانی بھێتە بکارئینان بۆ مەرەمێن ھندەک کەسان ب ئێکجاری بھێتە قەدەغەکرن و چەندین ئەندامێن پەرلەمانێ کوردستانێ ھەولیستێ خوە بوو دیارکرینە وەک (دلشاد شەعبان، د. عەبدولا رێکانی، بەیار تاھر دۆسکی) ھەموویان پشتەڤانیا خوە دیارکریە کو ئەڤ کێشە د بەرژوەندیا گشتی و یا خەلکێ دەڤەرێ دا بھێتە ئێکلاکرن.

عابد ئاشکراکر ژی کو دەنگێ خوە گەھاندیە ئەنجوومەنێ جڤاتا پارێزگەھا دھۆکێ ب رێیا تەلەفونێ و یاداشت بۆ ھاتیە بەرھەڤکرن. خویاکر ژی کو گەلەک ھونەرمەندێن ناڤدار کەساتیێن رەوشەنبیر و یاساناس و ئەندامێن پەرلەمانێ کوردستانێ بەرھەڤیێن خوە دیارکرینە  کو خوپیشاندان بھێنەکرن و دێ چنە دادگەھێ ژی و دبیتە کێشەک نە ب تنێ ل سەر ڤێ پارکێ، بەلکو ببیتە کێشا رایا گشتی ل سەر ھەر پارکەکا دھۆکێ و کەسکاتیەکا کو پێشتر و نوکە و پاشی ژی  تەعدا ل سەر ھاتیەکرن.

زیاد عابد ئاکنجیێ تاخی دیارکر ژی، کومبوون پێشتر ل گەل ئەندامێن پەرلەمانێ کوردستانێ و رێڤەبەرێ باژێرڤانیێ و خەلکێ تاخی ئەنجام داینە کو ئەڤ پارکە نابیت بدەنە چو کەسان و دێ ھەرمینیت پارکا تاخی و ئیمزا ل سەر ھاتینە و چووینە دەست ئێک دوو.

زیاد ھێشتا گۆت: پشتی بورینا ھەشت ھەیڤان و د پشت مە را ئەڤ کارە یێ دھێتەکرن و ئەڤە دکەڤیتە د چارچووڤێ ھندێ کو نەپێگێریکرن ب ئەنجامێ کومبوونەکێ کو خەلک تێدا یێ بەرھەڤ تێدا و بریار دا بوو ئێدی ئەڤ کارە تێدا نەھێتەکرن ڤە.

ناڤبری ئاشکراکر ژی کو چو بەرژوەندیا وان تێدا نینە و ب تنێ بۆ بازرگانەکی باشە و دێ بۆ خوە نارگیلان فرۆشیت. ئەڤە جھێ ژن و زارۆیانە و خەلک ئێڤاریان دھێت و ئەڤە جھێ ئارامکرنا وانە و دیسا پیرەمێر ب خوە وەرزشێ دکەن.

زیاد عابد گۆت ژی: وەک خەلکێ تاخی نە ب تنێ بۆ ڤی تاخی دێ دەنگێ خوە بلند کەین بۆ ھەر تاخەکێ تەعدا ل سەر پارک و ملاکێ گشتی بھێتە کرن قەبوول ناکەین.

ھێشتا ژی گۆت: سەردەمێ کابینا حەفتێ، ئەندامێ پەرلەمانێ کوردستانێ دلشاد شەعبان ب رێیا تەلەفونێ ل گەل دلشاد شەھاب وەزیرێ باژێرڤانیێ ئاخفتیە وەزیری دیارکر بوو کو پارکەکا گشتیە و نابیت بدەنە چو کرێیان، پشتی وەزیر ھاتیە گوھۆرین ب دەلڤیە یا ھاتیە زانین و وەزیرا نوو نزانیت بابەت چیە.

ناڤبری ئاماژە دا وێ چەندێ کو ل سەر زارێ بازرگانێ ئەڤ کارە کری زانیە کو ١٥٠ ملیۆن دینار داینە باژێرڤانیا دھۆکێ.

ئەندازیار شەوکەت محەمەد ئەمین سەرۆکێ باژێرڤانیێ دھۆکێ گۆت: پێشتر مە راگەھاند بوو کو کەسەک وەربگریت دا خزمەتا ڤێ پارکێ بکەت و ب رووبەرێ ٣٠٠ مەتران ئاڤا بکەت دا بشێت خزمەتا وێ ژی بکەت، ئەڤە ل ھەموو دونیایێ ھەیە پارکێن مەزن نە ب تنێ ١% بەلکو دورستە و دشێی ١٠% ژ پارکێ وەربگری دا خزمەتێ وەلاتیێن دەڤەرێ ژی بکەت. پشتی ھاتیە راگەھاند و خەلکی پێشکێشکرین بۆ کەسەکی دەرکەفت و خەلکێ تاخێ نەرازیبوونێن خوە ل سەر دیارکرن چوونە پەرلەمانی.

سەرۆکێ باژێرڤانیێ ھێشتا ژی گۆت: کارێ پەرلەمانی دانانا قانوونانە و پشتی نەرازیبوونا مە ھنارتیە وەزارەتێ وەزارەتێ لیژنەک ھنارت و گۆت دروستە و دەست بکارێ خوە بکەنە ڤە، ل ھەمبەر گۆتنێن وەزیرێ باژێرڤانیێ یێ بەرێ ژی کو ل سەر زارێ خەلکێ تاخی کو گۆتیە ئەندام پەرلەمانێن کوردستانێ نابیت دەست کاری پارکا ڤی تاخی دا بھێتەکرن.

سەرۆکێ باژێرڤانیێ گۆت: کا ب چو رەنگ و شرۆڤە بابەت و کێشە بۆ وەزیری ھاتیە ڤەگوھاستن و ب تنێ (شەفی) وەزیری گۆت بوو قەبوول ناکەم و لیژنە بھێتە ھەلوەشاندن، رێڤەبەرێ باژێرڤانیێ بەردەوامی دا گۆتنێن خوە و ئاماژە دا وێ چەندێ کو لیژنە نەھاتیە ھەلوەشاندن و ھەتا مە دوڤچوون ل سەر بابەتی کری، چونکو ئەڤە گرێبەستە نەھاتیە ھەلوەشاندن، گرێبەست ھەیە و دێ دەست ب کارێ خوە کەت.

ناڤبری ئاشکراکر ژی کو کار ھەموو قانوونیە، دیزاینەکا نوو دکتورەکێ ئاڤەدانیێ چێکریە ب شێوەکێ باشتر و رۆژ بۆ رۆژ دا باژێرێ مە پێش کەڤیت، سەرۆکێ باژێرڤانیێ دیارکر کو دێ ھاتن بۆ ناڤ پارکێ بێ بەرامبەر بیت و دێ چەندین یاریان کەتە د ناڤ دا و ھەر بۆ خزمەتا وەلاتیان بیت و ئارمانج ھەموو خزمەتکرنا وەلاتیانە و ئەڤە پشتەڤانیکرنا کەرتێ تایبەتە.

عەبدولکەریم عومەر ھاریکارێ سەرۆکێ لیژنا خزمەتگوزاریا گشتی و باژێرڤانیێ جڤاتا پارێزگەھا دھۆکێ دیار کر، ئاگەە ژ ڤێ کێشێ نینە و گەلەک کێشە گەھشتینێ و ھەتا نوکە چو کێشە ب ڤی رەنگی وەک نڤێسار نەگەھشتینە بەر دەستێن مە.

ھاریکارێ سەرۆکێ لیژنا خزمەتگوزاریا گشتی و باژێرڤانیێ جڤاتا پارێزگەھا دھۆکێ ئاشکراکر ژی کو ھەر تشتەکێ د چارچووڤێ قانوونی دا بیت دێ ل گەل دابین و خزمەتا وەلاتیان ب گشتی کو ل بەرچاڤ بھێتە وەرگرتن و دێ بەرڤانیێ ژ مافێن وەلاتیان کەین.

عەبدولکەریم ھێشتا گۆت: پشتی جەژنێ لیژنە ئەنجوومەنی ھاتینە پێکئینان و دیسا کێشێن وەلاتیان بەردەوامێ دگەھەنە لیژنێ ل سەر کێشە و گلە و گازندان، ناڤبری ئاماژە دا وێ چەندێ ژی کو نەبوونا بۆدجێ گرفت بۆ ھەموو فەرمانگەھێن خزمەت گوزاری چێکرینە.

دلشاد شەعبان غەفار ئەندامێ پەرلەمانێ کوردستانێ ل سەر بابەتی گۆت: ل گەل ھەموو ئەندامێن پەرلەمانێ کوردستانێ نڤیسینگەھا دھۆکێ ئاخفتینە و ھەموو نەرازینە ژ ھەولیستێ نوو ھاتیە پێش، دیارکرینە کو رێڤەبەریا باژێرڤانیێ رێز ل بریارا خوە ناگریت کو ل دەسپێکێ بریارا راوەستاندنا پارکێ دابوو، دیسا رێز ل ئەندامێن پەرلەمانێ کوردستانێ ژی ناگریت کو چەندین جاران رونشتینە خوارێ و گەھشتینە وێ باوەریێ کو د بەرژوەندا گشتی دا نینە ئەڤ پارە بھێتە گوھۆرین، دیسا رێزێ ل بریارێن وەزارەتا خوە ناگرن کو پێشتر وەزیری بریار دابوو نابیت ئەڤ پارکە بھێتە خرابکرن.

دلشاد شەعبان ھێشتا گۆت: رژدیا سەرۆکاتیا باژێرڤانیێ ل سەر بابەتی کو پارکێ ژ گشتی بکەتە پارکەکا تایبەت، ئەڤە جھێ پرسیار و ئەندامێن پەرلەمانێ کوردستانێ نڤسینگەھا دھۆکێ گەھشتینە وێ باوەریێ ڤێ رژدیێ تشتەک ھەیە مە بریار دایە ل دووڤ رێیێن قانوونی دوڤچوونێ بکەین و ل دووڤ پەیرەوێ ناڤخوە یێ کوردستانێ.

ئەندامێ پەرلەمانێ کوردستانێ ئاماژە دا وێ        چەندێ ژی کو دێ دەسپێکێ دگەل خەلکی سەرۆکاتیا باژێرڤانیێ روونەخوارێ کو دەست بەردایێ بریارێ بن و بھێتە ھەلوەشاندن، ھەکە رژد بوون ل سەر وەزیرا باژێرڤانیێ دگەل سەرۆکێ باژێرڤانیا دھۆکێ دێ گازیکەینە پەرلەمانی و دێ ب رێیێن قانوونی دێ سەرەدەریێ دێ ل گەل  کەین و ب چو رەنگا قەبوول ناکەین. دلشاد شەعبان گۆتژی: ھەکە د بەرژوەندیا من تاکە کەس نابیت ب چو رەنگان قەبوول ناکەم شێوازێ پارکێ بھێتە گوھۆرین.

دلشاد شەعبان گۆتژی: وەزیرێ پێشتر باژێرڤانیێ پشتی دگەل من ئاخفتی دگەل سەرۆکێ باژێرڤانیا دھۆکێ ژی ئاخفت بوو، دیسا بێی ئەڤە، کارێ پەرلەمانی چاڤدێریا کارێ حوکمەتێ یە و ل گۆری دەستھەلاتا مە ھەی، نوکە نابیت پارکەکا پارەکێ زور ھاتیە مەزاختن و رۆژانە خەلک قەستا ڤی پارکی دکەن، رووبەرێ پارکێ نێزیکی ٢٣ ھزار مەترێن چار گوشەنە، ژلایێ ژینگەھێ ڤە یا دورستە خەلک بچیت ئارامی و تەناھی یا خوە دناڤ دا بەت، ل سەر چ بنیات پارک بیتە کەرتێ تایبەت، مە پەیوەندی دگەل رێڤەبەریا (تختیت عمرانی) کریە، دیارکرینە  کو گەلەک باخچە ھەنە ھێشتا عەردە ، دلشاد گۆت: ھەکە باژێرڤانیا دھۆکێ گەلەک ڤێت خزمەتا خەلکی بکەت بلا بچیت ئەڤان عەردا بکەتە باخچە و بدەتە وبەرھێنەران و خەلک مفای ژێ وەربگریت… نە پارکەکێ ملیارەکا دیناران ھاتبیتە مەزاختن و ئەم قەبوول ناکەین.