ئه‌ڤرۆ نيوز:
ل ئێك ژ وه‌لاتێن ئه‌ورۆپى، گوهدرێژه‌كى رێ نه‌دا خودانا خوه كو خوارنا وى بده‌ته گيانه‌وه‌ره‌كا دى و هه‌ست ب غيرێ كر، دخواست ب تنێ بده‌ت وى و ل گه‌ل وى بيت.
د ئێك ژ وان ديمه‌نێن دێ هوون بينن دا، بزاڤێ دكه‌ت ژ پشتى ڤێ پێن خوه بلند بكه‌ت و وێ گيانه‌وه‌را دى ب ده‌ته پاش كو ب راستى ژى ل دووڤ ناڤێ خوه يه.
ئه‌ڤرۆ نيوز:
د ده‌مه‌كى دا كو روحا مرۆڤان ل ڤان وه‌لاتيێن رۆژهه‌لاتا ناڤين و ب تايبه‌ت يێن وه‌كو عيراق و سوريا گه‌له‌ك بێ بها بوويه و رۆژانه چه‌ندين كه‌سێن بێ گۆنه‌هـ ژ ئه‌گه‌رێ تاوانێن بێ رامان و بێ تاوانى دهێنه كوشتن، ل وه‌لاتێن رۆژئاڤا ژى هه‌ڤدژى ڤێ چه‌ندندێ گيانێ گيانه‌وه‌ره‌كى گه‌له‌ك يێ ب بهايه و باشتر دێ چاوانيا ئه‌نجامدانا نشته‌رگه‌ريان د ڤان وێنان دا بينين يێن بۆ هاتينه كرن.
ئه‌ڤرۆ نيوز:
سه‌رۆك ئه‌ركانێ ئه‌مريكى، جه‌نرال راى ئوديرنۆ، پشتراستيا خوه هه‌تا راده‌كى ده‌بڕى كو هێزێن عيراقى دبيت ل سه‌ر چه‌كدارێن داعش زال ببن و ب تايبه‌ت ل به‌غدا، دا زانين ژى كو عيراق يا خوه دگريت كا دێ چ ل سه‌ر ئه‌ردى رووده‌ت.
ئۆديرنۆى ل كۆنگره‌كێ له‌شكرى ل واشنتۆن گۆت: “گه‌فێن رێكخستيا داعش دكه‌ت و كارێن له‌شكرى يێن رۆسى دبيت پلانێن واشنتۆن گيرۆ بكه‌ت بۆ كێمكرنا هژمارا هێزێن وان يێن چه‌كدار”.
زێده‌تر گۆت: “كێشه ئه‌وه خه‌لك يێ دهێته گوهۆڕين… ئه‌م يێ دوژمنكاريا رۆسيا ل رۆژئاڤا ئه‌ورۆپا دبينين و رێكخستيا داعش ژى، هنده‌ك كارێن دى ل هنده‌ك ده‌ڤه‌رێن دى ژى يێن دهێنه كرن، ژ به‌ر هندێ هه‌ست ب دودليێ دكه‌م ل هه‌مبه‌ر كێمكرنا هژمارا سه‌ربازا”.
ل دۆر گه‌فێن داعش، جه‌نرالێ ئه‌مريكى گۆت: “ب گۆره‌ى ئه‌و پێزانينێن ل به‌ر ده‌ست، هه‌تا راده‌كى من باوه‌رى يا هه‌ى كو دێ هێزێن عيراقى شێن به‌ره‌ڤانيێ ژ فرۆكخانا به‌غدا كه‌ن، دربێن ئه‌سمانى ژى ده‌ليڤێ بۆ هێزێن عيراقى خۆش دكه‌ن، راهێنانان ب سه‌ربازان بكه‌ن”.
له‌شكرێ عيراقێ به‌رى نوكه گه‌له‌ك ده‌ڤه‌ر يێن ژ ده‌ست داين ل رۆژانێن بۆرى، ب تايبه‌ت پشتى ل ڤان رۆژان بنگه‌هه‌كێ گرنگێ سه‌ربازى ل ئه‌نبار ژ ده‌ست دايى د به‌رژه‌وه‌ندا داعش دا ئه‌وێن دهێن و ده‌ست ب سه‌ر روويه‌كێ به‌رفره‌هـ يێ ئه‌ردێ د ناڤبه‌را ره‌قه يا سورى و پايته‌ختێ عيراقێ دا ددانن.
ژێده‌ر: CNN
ھەولێر، قائید میرۆ:
جێگرێ سەرۆکێ رێکخراوا سەلامەتی و رەوشەنبیریا ھاتن و چوونێ راگەھاند ل نەە ھەیڤێن بۆری یێن ئەڤ سالە روودانێن ھاتن و چوونێ ھەڤبەری ل گەل سالا بۆری زۆر زێدە کریە.
یوسف بازیانی جێگرێ سەرۆکێ رێکخراوا سەلامەتی و رەوشەنبیریا ھاتن و چوونێ بۆ رۆژناما ئەڤرۆ دیارکر کو ل نەە ھەیڤێن بۆری یێن ئەڤ سالە نێزیکی ٧٥٠ کەسان ب ئەگەرێ بۆیەرێن ھاتن و چوونێ گیانێ خوە ژ دەست دایە و پتر ژ ھەشت ھزاران ژی بریندار بووینە و بووینە کێم ئەندام و ب ملیۆنان دیناران زیانێن ماددی گەھشتینێ.
گۆت ژی ئەگەرێ زۆربوونا بۆیەرێن ھاتن و چوونێ ژ بۆ نەبوونا ھشیاریا ھاتن و چوونێ ڤەدگەڕیت، چونکو نوکە ل وەلاتێن پێشکەفتی بزاڤێن نەھێلانا بۆیەرێن ھاتن و چوونێ دھێنە کرن، ئەڤە ژی ب رێیا تێگەھاندنا تاکێن ناڤا جڤاکی و ب تایبەتی شوفێران، کو چاوا شەھرەزابن ب قانوونێن ھاتن وچوونێ و رێنمایێن د ڤی بیاڤی دا دھێنە دەرکرن، ھەتا بزانن چاوا رێک و پرا بکار بینن، نوکە شەڕەکێ بەردەوام یێ رێک و پرا ھەیە و پێدڤیە بەڕەڤانیێ ژ خوە بکەین.
بازیانی گۆت ژی ھەڤبەرکرن ل گەل سالا بۆری رێژا بۆیەرێن ھاتن و چوونێ ئەڤ سالە زۆر زێدەکریە و کێم نەبوویە، پشتی دو ھەیڤێن دی دێ بۆ مە دەرکەڤیت چەند زێدەبوویە و جھێ پرسیارێ یە، ئەگەرەکێ دی یێ زێدەبوونا ڤان بۆیەران گەنجن لەوڕا پێدڤیە گەنج پتر پێگیریێ ب رێنمایێن ھاتن وچوونێ بکەن.
ئامێدیێ، مەحمود نھێلی
رێڤەبەرێ پەروەردا قەزا ئامێدیێ بۆ رۆژناما ئەڤرۆ دیار کر کو تەڤایا قوتابخێن دەڤەرا ئامێدیێ ژ دەربەدەران ھاتنە ڤالاکرن و نھا دەوما فەرمی ل سەر سەرجەم قوتابخانا ھاتە کرن.
ناسر محەمەد سەعید رێڤەبەرێ پەروەردا قەزا ئامێدیێ دیار کر پشتی گەلەک بزاڤان ژ پێخەمەت بەردەوامیدان ب پرۆسا خواندنێ ل دەڤەرێ و ھەروەسا چارەکرنا ئاریشا جھێ ئاکنجیبوونا دەربەدەران نھا تەڤایا قوتابخانێن سنوورێ پەروەردا ئامێدیێ ھاتنە چولکرن.
رێڤەبەرێ پەروەردا قەزا ئامێدیێ دیار کر ژی ل دەڤەرا ئامێدیێ دورێن ١٠٠ قوتابخانە پر بوون ژ دەربەدەران و گۆت “ل سنوورێ پەروەردا ئامێدیێ ١٦٠ قوتابخانە ھەنە ژ وانا ٩٩ دەربەدەر تێدا ھاتبوونە ئاکنجیکرن”
ئەڤرۆ، رەوان نھێلی:
ل ھەردو تاقیکرنێن خولێن ئێکێ و دویێ یێن قووناغا ١٢ ئامادەیی ل سنوورێ پارێزگەھا دھۆکێ، پشکا زانستی ٧٦٢٩ قوتابی دەرنەچووینە و پشکا وێژەیی ژی ٧ ھزار و ١٩ قوتابی دەرنەچووینە کو سەرجەمێ ھەر دو خولان ١٤ ھزار و ٦٨٤ قوتابی دەرنەچووینە و ب ڤەمایی ماینە.
خۆرشید یەحیا ھاریکارێ رێڤەبەرێ گشتی یێ پەروەردا پارێزگەھا دھۆکێ بۆ کاروبارێن تەکنیکی بۆ ئەڤرۆ ئەنجامێن زانستی و وێژەیی یێن خولا دویێ یێن دوازدێ ئامادەیی ئاشکرا کرن و گۆت “پشکا زانستی ١١ ھزار و ٦٤٤ پشکدار ھەبوون، ئەڤێن ئەزموون کرین دبوونە ١١ ھزار و ١٨٤ قوتابی و یێن دەرچووین ٣ ھزار و ٥٥٩ قوتابی بوون، رێژا پشکداران ٣٠.٥٧% بوو و رێژا ئەزمووندەرا ٣١.٨٢% بوو.
سەبارەت پشکا وێژەیی، ١١ ھزار و ٢٥٢ قوتابیان پشکداری تێدا کربوو و یێن ئەزمووندەر ١٠ ھزار و ٥٨٣ قوتابی بوون و یێن دەرچوویی ٣ ھزار و ٥٧٧ قوتابی بوون، رێژا دەرچوونێ یا پشکدارا ٣١.٧٩% بوو و یا ئەزمووندەرا ٣٣.٨٠% بوو.
سەبارەت ھەردو خولێن ئێکێ و دویێ یێن قووناغا دوازدێ ئامادەیی ل سنوورێ پارێزگەھا دھۆکێ، خۆرشید یەحیا گۆت “پشکا زانستی ١٣ ھزار و ٨٨٧ قوتابیان مافێ پشکداریێ ھەبوو، ئەڤێن ئەزموون کرین ١٣ ھزار و ٤٢٧ قوتابی بوون، ژمارا دەرچوویان ٥ ھزار و ٧٩٨ قوتابی بوون و رێژا دەرچوونێ یا پشکدارا ٤١.٧٥% بوو و یا ئەزمووندەرا ٤٣.١٨% بوو.
سەبارەت پشکا وێژەیی یێن ھەردو خولا، ١٣ ھزار و ٥١٩ قوتابیان مافێ پشکدایێ ھەبوو و ئەڤێن ئەزموون کرین ١٢ ھزار و ٨٥٠ و ژمارا دەرچوویا ٥ ھزار و ٨٣١ بوو و رێژا دەرچوونێ یا پشکدارا ٤٣.١٣ % بوو و رێژا دەرچوونێ یا ئەزمووندەرا ٤٥.٣٨% بوو.
سەبارەت ئەنجامێن پار سال، خۆرشید یەحیا دیار کر کو دەرچوویێن خولا ئێکێ ١٥% بوو یێن پشکا زانستی و یێن وێژەیی ٢١% بوو و خولا دویێ رێژا دەرچوونا زانستی ٤٥% بوو و وێژەیی ٣٧% بوو.
ئەڤرۆ نیوز، قەیس ئیسماعیل:
کوڕی پارێزگەھا دھۆکێ و یاریکەرێ یانا ئامێدیێ دومان رەجەب دیرۆکەکا مەزن بۆ خوە تۆمار کر پشتی شیایی د پشکداریا خوە یا ئێکێ دا د قارەمانیا عەرەبان یا پایسکلا ل سەر ئاستێ تازە پێگەھشتیا ل رێزا سیێ بھێت و مەدالیا زیڤی ببەت، د ھەڤرکیێن قارەمانیێ دا ئەوا نوکە ل وەلاتێ جەزائر دھێـتە ئەنجامدان.
یاریکەرێ ناڤبری بۆ ئەڤرۆ نیوز گۆت: قارەمانی گەلەک یا بزەحمەت بوو، ب تایبەت بۆ من وەک پشکداریا ئیکێ د ناڤبەرا ٦٠ یاریکەرا.
زێدەتر گۆت: پشکداران، ژ ١٠ وەلاتین عەرەبی پشکداریی کربوو، ئەز شیام ٣٦ کیلۆمەترا ب ئێک دەم ژمێر و ٤٠ دەقیقا ب دووماھی بینم.
دومان رەجەب دا زانین کو یانا ئامیدێ چ پشتەڤانی نەکریە و گۆت: من پایسکل ژ پارێن خوە یا کری و پشتەڤانێن من د ڤێ سەرکەفتنێ دا راھێنەرێ من تارق سەعید و سەرۆکێ ئێکەتیا پایسکلا ل پارێزگەھێ ھشیار فەریق و دایک و باب و برایێن من بوون.
ئەڤرۆ:
مەسعود بارزانی سەرۆکێ ھەرێما کوردستانێ دوھی ل دھۆکێ ل گەل شاندەکێ ھەڤپشکێ جڤاتا نیشتمانی یا کورد ل سووریێ (ئەنەکەسە) و تەڤگەرا جڤاکا دیمۆکراتیک (تەڤدەم) کۆمبوو.
د دەستپێکا کۆمبوونێ دا سەرۆک بارزانی دوپاتی ل وێ چەندێ کر کو نکە گەلێ یێ د قۆناغەکا ھەستیار را دەرباز دبیت و پێدڤیە ھەموو ئالیەک پتر ژ جاران کار بۆ ئێکرێزیێ بکەین، چونکو ئەو گەفێن ھەین ل سەر ھەموو کوردانە نە ل سەر ئالیەکی یان دەڤەرەکا دیارکری نە و پێدڤیە ھەموو ناکۆکیان بدەینە لایەکی و پێکڤە بەڕەڤانیێ ژ گەلێ خوە و ئاخا خوە بکەین.
سەرۆک بارزانی داخواز ژ ھەموو ئالیێن کوردی یێن رۆژئاڤا کر کو ب رژدی گرفتان چارە بکەن و دیتنەکا ستراتیژی ب پاشەرۆژا گەلێ مە ل رۆژئاڤا ھەبیت و ئەم ژی ل ھەرێما کوردستانێ ئامادەینە ھەر ھاریکاریەکێ بکەین.
سەرۆکێ ھەرێما کوردستانێ گۆتژی ل دەڤ من چو جوداھی د ناڤبەرا ھەولێر و کۆبانێ دا نینن و ئەو ژ دەستێ مە ھاتبیت مە یا بۆ کۆبانێ کری و ئەو بەڕەڤانیا ل کۆبانێ دھێتە کرن جھێ جھێ رێزگرتنێ یە و سەرکەفتنا کوردان ل ھەر جھەکی سەرکەفتنا مە ھەمووانە.
ئەڤرۆ:
رێڤەبەرێ گشتی یێ وەرشی ل وەزارەتا رەوشەنبیری و لاوان یا حکومەتا ھەرێما کوردستانێ بو روژناما ئەڤرۆ خویاکر کو سێ کومپانیێن بازرگانی یێن پارێزگەھا دھوکێ فروکەکا تایبەت بو شاندێ یانا ھەولێر بو یاریا دووماھیا قارەمانیا کاسا ئێکەتیا ئاسیا کرێکر.
زێدەتر دکتور شاکر ئەحمەد سمو گوت: ھەرسێ کومپانیێن بازرگانی یوبی ھولدینگ و ئوھی تانی و سیکنیچەر ھوبینگ کو یێن پارێزگەھا دھوکێ کریا فروکا ڤەگوھاستنا شاندێ یانا ھەولێر ژ فروکخانەیا ھەولێر بو دوبەی ب ستویێ خوەڤە گرت و کوژمێ پێنجی ھزار دولاران ئەداکرینە بو ڤەگوھاستنێ و دیسان بریکارێ وەزارەتا ڤەگوھاستنا عیراقێ بەنگین رێکانی ژی ٥٠% داشکاندن بو ڤەگوھاستنا شاندی وەکو ھاریکاری کریە و دوھی شاند ب رێکەفت و بریارە ل روژا ئێکشەمبی ڤەگەرن پشتی کرنا یاریا دووماھیێ.
ل دوماھیێ رێڤەبەرێ گشتی یێ وەرزشی سوپاسیا ھەرسێ کومپانیا و بریکارێ وەزارەتا ڤەگوھاستنێ کر بو ڤێ ھاریکاری و پشتەڤانیا تەرخانکری.
تیما تەپا پێ یا یانا ھەولێر ل روژا شەمبیا بھێت ل ئیمارات دێ یاریا خوە یا دووماھیا قارەمانیا کاسا ئێکەتیا ئاسیا د گەل یانا قادسیە یا کوێتی کەت پشتی د یاریا قوناغا پێش دووماھیێ دا ل سەر کیستی یانا کتشی یا ھونک کونگی دەربازبوی و سەرکەفتن ل سەر تومارکری و ئەڤە دبیتە جارا دویێ یانا ھەولێر د گەھیتە یاریا دووماھیێ پشتی ل جارا ئێکێ بەری دو سالان ل یاریگەھا فرەنسو حەریری ل ھەولێرێ خوسارەت بووی د گەل یانا کوێت یا کوێتی.
ئه‌ڤرۆ، حه‌مزه ره‌زيكى:
ھەکە تووشبۆی د سەر ژیێ چل سالیێ دا بیت، و ھەست ب ئێشانێ د سینگێ خۆ دا کر، گەلەک گیرو نەبە و ئێکسەر وی ب ڤەگوھێزە پشکا تەنگاڤیان ل نەخۆشخانێ.ئێشانێن سینگی دبیت ژ ئەنجامێ نوبەیەکا دلی پەیداببن، نوشدار ھەتا رادەیەکی دشێن زیانێ ل سەر وی کێم بکەن ھەکەر زوو دەست ب چارەسەریێ کر.
گەلەک تشت ھەنە کو پێدڤیە پالپشتیێ ل سەر بکەین دەما نەخوشی دبەینە پشکا تەنگاڤیان ژوانژی: ژیێ نەخوشی، مێژووا وی یا نەخوشیی، فاکتەرێن ترسناک ل سەر وی، ئەوی چ کار کریە ل وێ رۆژێ و رۆژا بەری وێ، دگەل ھندەک فاکتەرێن دی، بەلێ پێزانینێن ل خوارێ دیارکری دێ بۆ وە دیارکەن کا کەنگی پێدڤی یە تو قەستا پشکا تەنگاڤیان بکەی و بێ گیرۆبوون، ئەوژی ل دەمێ ئەڤ نیشانە ل دەڤ نەخۆشی ھەبن:
١- ئێشانێن سینگی: رەنگە پتریا خەلکی دزانن دەما ئێکی ئێشا دلی ھەبیت دێ چاوا سینگێ وی ئێشیت ئەوژی: ھەستکرن ب گرانیەکێ یە ل سینگی، ھندەک دبێژن ئەو گرانی یا وەسایە ھەر وەکو فیلەک ل سەر سینگێ مرۆڤی را دەربازدبیت، ھەکە ئێشانەکا ب ڤی رەنگی ل دەڤ تە پەیدابوو ئێکسەر قەستا نەخوشخانێ بکە، بەلێ پێدڤیە مرۆڤ جێوازیێ دناڤبەرا ئێشانا سینگی و سوتنا گەدەی دا بزانیت، سوتنا گەدەی ژی ئێشانەکە ھەر ل وی جھی پەیدادبیت، و ئەگەرێ وێژی ھندەک ترشاتینە کو ژ گەدەر بەر ب سورلانچکێ دبورن ، دیسان ئێشێن دلی ھندەک نیشانێن دیتر ژی ھەنە، ئەوژی ئێشانا وان دگەھیتە ناڤ ملان و دەستی و ب تایبەت ل لایێ چەپێ یێ لەشی و ھندەک تووشبۆیێن وێ ھەست ب ئێشانا پشتێ ژی دکەن.
٢- بێھن تەنگبوون:دەربارەی مرۆڤێن دانعمر، بێھن تەنگبوون ئێک ژ نیشانێن ئێشێن دلی یە، بێھن تەنگی نە ئێشانێن سینگی، ھەکە ھات و ژمارا ڤەژاندنێن بێھن تەنگیێ ل دەف کەسەکی گەھشتە پتر ٢٠ جاران د خولەکەکێ دا، و دگەل وێ چەندێ وی ھەست ب ھندەک حالەتێن نەخۆشیێ یێن بەرزە کر ل وی دەمی پێدڤیە بێ گیرۆبوون قەستا پشکا تەنگاڤیان بکەتن.
٣- لەمزێن دلی: ئەڤی زاراڤەی ب کاردئینن بۆ ھەستکرنا مرۆڤی ب زێدەلێدانا دلی، زێدەڤەخوارنا کافایینی، یان ب کارئینانا ھندەک دەرمانێن دەستنیشانکری، رەنگە ببنە ئەگەرێ زێدەلێدانا دلی، یان ببنە ئەگەرێ ھەستکرنا مرۆڤی ب ترسێ یان ئالوزیێ، ھەکە بۆ جارا ئێکێ بیت تو تووشی ڤێ چەندێ ببی و ژیێ تە کێمتر بیت ژ چل سالیێ و رەوشا تە یا ساخلەمیێ بەری دەمی یا باش بیت، گەلەک نورمالە خۆ بۆ دەمێ ٢٠-٣٠ خولەکان بگرە دا بزانی دێ داھێت یان نە، چونکو ھندەک جاران زێدەبوونا لەمزێن دلی ھەکە چ گێژبوون دگەل نەبیت ئەو کێم جاران نیشانەکا ب مەترسی یە، بەلێ ھەکە ھاتبیتە دەستنیشانکرن کو وی مرۆڤی نەخوشیەکا دلی ھەیە و بێھنا وی تەنگ دبیت و ئێشان د سینگی دا ھەیە، پێدڤیە بێ گیرۆبوون قەستا نوشدارەکی ل پشکا تەنگاڤیان بکەت.
٤- ئێشانا زکی: پتریا جاران ( بەلێ نەھەموو جاران) رەنگە ئێشانا زکی ژبەر ئاریشەیێن ھەرسکرنێ بیت، و دبیت ئەڤ ئاریشە جھێ مەترسیێ بن ھەکە ژ ئەنجامێ ژەھراویبوونێ پەیداببن، ل وی دەمی و پشتی بوورینا چەند دەمژمێران نەدوورە ببنە ئەگەرێ مرنێ و مەترسیێ ل ژیانا مرۆڤی پەیدابکەن، بەلێ ژبەرکو ئاریشەیێن ھەرسکرنێ وەکو یێن سوتن و ھەودانا گەدەی نە، دبیت ببنە پەرژانەک بۆ ڤەشارتنا ئاریشەیێن دلی، میناک ل دور ڤێ چەندێ ئەو ئێشانێن زکی یێن پەیدادبن ژ ئەنجامێ پەقینا خوینگێران، ھەکە کەسەکێ دانعمر ب ناگەھی و ئێکسەر تووشی ئێشانێن زکی بوو، ل وی دەمی جھێ ئالوزیێ یە و پێدڤیە ھزر ل پشکا تەنگاڤیان بھێتە کرن.
٥- خوین بەربوون: ھەکە خوین بەربوون یا دژوار بوو ھەلبەت ب زەحمەتە ب راوەستیت و دێ پێدڤی ب چاڤدێریا نوشداری بیت، ژ نیشانێن دی یێن خوین بەربوونێ ھەبوونا خوینێ یە دگەل دلرابوونێ و دگەل دەستئاڤا نەخوشی و ئەڤ نیشانە رەنگە نیشانا خوین بەربوونەکا ناڤخۆ یا ب مەترسی بن، بەلێ ھندەک جارا ھەبوونا پیچەک خوینێ دگەل دەستئاڤا ستوور نیشانا باوەسیرێ یە.
٦- گێژبوون: پتریا جاران گێژبوون نیشانەکە ژ نیشانێن ھاتنە خوارا فشارا خوینێ، کو کارتێکرنێ دکەت و دبیتە رێگر د ھاندانا خوینێ دا بۆ مێشکی، گێژبوون ل دەڤ گەنجان گەلەک جاران دبیتە جھێ مەترسیێ، بەلێ ژلایێ پزیکی ڤە نەنیشانەکا ب مەترسیە، رەنگە
ھندەک جاران شەرشوویەکا گەرم ببیتە ئەگەرێ گێژبوونێ، بەلێ ھەکە مرۆڤەکێ دانعمر ئێکسەر گێژبوو ، ل وی دەمی جھێ مەترسیێ یە ژبەرکو دبیت تووشبونا وی ب ئێک ژ نیشانێن دلی بیت، رەنگەژی ژئەگەرێ وێ چەندێ بیت کو سەرێ وی ب تشتەکێ رەق کەفت بیت، مرۆڤ یێ مەزن یان بچووک بیت، ھەبوونا خوین بەربوونێ د سەری دا پێدڤی ب پشکنینا نوشداری ھەیە و ب شێوەیەکێ راستەوخو ل پشکا تەنگاڤیان.
نيشاندان