ئه‌ڤرۆ نيوز:

رۆژناما واشنتۆن پۆست يا ئه‌ريكى ديار كر كو د رێيا كۆنترۆلكرنا پارێزگه‌ها ئه‌نبار يا رۆژئاڤايێ به‌غدا دا، چه‌كدارێن داعش يێ بزاڤێ دكه‌ن ده‌رگه‌هێ به‌غدا ب قوتن.

ڤێ رۆژنامێ د راپۆرته‌كا خوه‌ دا دياركر كو ئه‌نبار دێ سه‌ركه‌فتنه‌كا مه‌زن بيت بۆ داعش ئه‌وا دێ ب وێ رێ چيته‌ به‌ر ده‌رگه‌هێ به‌غدا و دێ رێ ل به‌ر وێ بۆ چوونا سوريا ژى خۆش بيت و دێ شێت ب ساناهى پێدڤيێن خوه‌ ژ سوريا به‌ر ب عيراقێ ئينيت بۆ هێرشكرنا سه‌ر به‌غدا ئه‌وا وه‌كو داعش دبێژيت ئارمانجا وان يا سه‌ره‌كى.

ئاماژه‌ ب وێ چه‌ندێ ژى كريه‌ كو گرتنا ئه‌نبار دێ ده‌ليڤێ خوشت كه‌ت كو ده‌ست ب سه‌ر ئێك ژ گرنگترين به‌نداڤێن ئاڤێ ل عيراقێ بگريت و ديسا ده‌ست ل سه‌ر گه‌له‌ك جهێن چه‌كى ژى بگريت كو دێ د هاريكار بن بۆ هێرشكرنا سه‌ر به‌غدا.

ئه‌ڤێ رۆژناما ئه‌مريكى ئه‌و ژى دايه‌ ئاشكه‌را كرن كو نوكه‌ داعش ل وێ پارێزگه‌هێ ده‌ست ب سه‌ر گه‌له‌ك گوندان دا گرتيه‌ و ده‌ستێ خوه‌ دانايه‌ سه‌ر بگه‌هێن له‌شكرى و پۆليسان و هێرش كريه‌ سه‌ر له‌شكرێ عيراقى ژى ل رومادى.

واشنتۆن پۆست رۆنى خستيه‌ سه‌ر وێ چه‌ندێ ژى كو نوكه‌ داعش ده‌ستێ خوه‌ دانايه‌ سه‌ر روويه‌كێ به‌رفره‌هـ يێ وێ پارێزگه‌ها پتريا وێ سونى وه‌كو فه‌لۆجه‌ و رومادى كو پايته‌خێ پارێزگه‌هێ يه‌.

ئه‌ڤرۆ نيوز:

پارێزگه‌ها ئه‌نبار ژى يا د كاودانه‌كێ وه‌كو يێ كۆبانێ دا، ژ ئه‌گه‌رێ وان پێشڤه‌چوونێن داعش ل سه‌ر روويێن به‌رفره‌هـ ل ده‌ڤه‌رێ، ب گۆره‌ى به‌رپرسێن پله‌ بلندێن ئه‌مريكى ژى هێزێن عيراقى ده‌ست ب ره‌ڤانيكرنێ كريه‌.

نووترين داخۆيانى د ڤى وارى دا يا وه‌زيرێ به‌ره‌ڤانيا ئه‌مريكا ب خوه‌ بوو، تشاك هيگل بوو ئه‌وێ ته‌كست ل سه‌ر وێ چه‌ندێ كرى كو داعش يا به‌رده‌وامه‌ د نيشادانا زه‌بله‌كێن خوه‌ دا، به‌رده‌وام ژى يا د زێده‌بوونێ دا، سه‌ره‌راى هێرشێن ئه‌سمانى ل گه‌له‌ك لايان ژى سنورێن خوه‌ به‌رفره‌هـ دكه‌ت.

وه‌زيرێ به‌ره‌ڤانيا ئه‌مريكا گۆت: “گه‌له‌ك گۆمانێن تارى يێن هه‌ين ل دۆر كا دێ چو ل پارێزگه‌ها ئه‌نبار يا دكه‌ڤيته‌ رۆژئاڤايێ پايته‌ختێ عيراقێ، به‌غدا، رووده‌ت”.

ئه‌ڤ داخۆيانيه‌ ل گه‌ل وێ چه‌ندێ نه‌ كو به‌رى نوكه‌ ژى به‌رپرسه‌كێ ئه‌مريكى يێ به‌رچاڤ ل به‌نتاگۆنێ بۆ CNN راگه‌هاند بوو كو هێزێن سه‌ربازى يێن عيراقى ل ئه‌نبار هه‌چكو يێ شه‌رى ل گه‌ل ديواره‌كى دكه‌ن.

حوكمه‌تا عيراقێ يا ده‌ست ب بزاڤێن خوه‌ كرى دا كو ئه‌ردێ وێ زێده‌تر نه‌كه‌ڤيته‌ د ده‌ستێن داعش دا، به‌لێ دياره‌ چو مفا تێدا نينه‌، سه‌ره‌راى ل ڤى ماوێ بۆرى ده‌ست ب ده‌رخستنا ئه‌باتشيێن خوه‌ ژى كريه‌، به‌لێ دو ژ فرۆكێن وان ژى ل ڤى ماوێ بۆرى كه‌فتينه‌ خوار.