ده‌وله‌تا ئیسلامى 10 رۆژان موله‌تێ دده‌ته‌ مامۆستایێن زانكۆ و نوشدارێن مووسل

06/10/2014 16:50

ئه‌ڤرۆ نیۆز:
دیوانا دادى و توومه‌تباران یا سه‌رب ده‌وله‌تا ئیسلامى یا عیراق و شامێ (داعش)، د به‌یاننامه‌كێ دا ل پارێزگه‌ها مووسل هاتیه‌ به‌لاڤكرن و دانه‌كا وێ به‌یاننامێ بده‌ست ئه‌ڤرۆ نیۆز كه‌فتیه‌، بتنێ 10 رۆژ داینه‌ مامۆستا یێن زانكویێ و نوشدارێن ئاكنجى ل ده‌ڤه‌رێن ژێر كونترۆلا داعشێ ب زووترین ده‌م ڤه‌گه‌رن ل سه‌ر جهێن ئاكنجى بوونا خوه‌ ئه‌گه‌ر نه‌ دێ هه‌موو خانى و مالكێن وان هێنه‌ فرۆشتن و ده‌سته‌سه‌ركرن، هه‌ڤده‌م دیاركریه‌ قانوونا خزمه‌تكرنا سڤیل دبێژیت بتنێ 10 رۆژ موله‌ت بۆ فه‌رمانبه‌رى هه‌نه‌ بۆ ڤه‌گه‌ریانا ل سه‌ر كراێ خوه‌ ئه‌گه‌ر دێ هێته‌ لادان ل سه‌ر كارێ وى.

وه‌زیرێ به‌رڤانیا فه‌ره‌نسا: 30 هه‌زار چه‌كدارێن داعشێ هه‌نه‌

06/10/2014 16:40

180

ئه‌ڤرۆ نیۆز:
وه‌زیرێ به‌ره‌ڤانی فه‌ره‌نسا جون ئه‌یف لودریان راگه‌هاند، وه‌لاتێ وى دێ هێرشێن ئه‌سمانى یێن ل سه‌ر ل عیراقێ زێده‌كه‌ت، هه‌روه‌سا لوردیانى دوپاتكر، رێكخستنا داعشێ بتنێ رێكخستنه‌كا ئاسایى نینه‌، به‌لكى یا بویه‌ نیمچه‌ له‌شكره‌ك كو هژمارا چه‌كدارێن وێ گه‌هشتیه‌ 30 هه‌زار كه‌سان بشێوه‌كێ باش هاتیه‌ ئاماده‌ كرن.
زێده‌بارى وێ چه‌ندى ژى وه‌زیرێ به‌ره‌ڤانیا فه‌ره‌نسا گۆت: هێزا ئه‌سمانیا فه‌ره‌نسا دێ هژمارا هێرشێن خوه‌ زێده‌ كه‌ت ل گه‌ل 9 فرۆكێن ژ جورێ رافال ل ده‌ڤه‌رێن عیراقێ كو رۆژانه‌ دو هێرش هه‌بن، هه‌ڤده‌م دیاركر، هه‌تا نوكه‌ فرۆكێن فه‌ره‌نسا دو هێرش برینه‌ سه‌ر بنگه‌هێن داعشێ ل عیراقێ.

شه‌رێن دژوار ل قه‌زا به‌له‌د ل باكورێ به‌غدا د به‌رده‌وامن

06/10/2014 16:38

ئه‌ڤرۆ نیۆز:
ئه‌ڤرۆ شه‌روپێكدانێن دژوار د ناڤبه‌را هێزێن له‌شكرێ عیراقێ و چه‌كدارێن تیرۆرستى یێن داعشێ ل قه‌زا به‌له‌د كو دكه‌فتیه‌ باكورێ به‌غدا په‌یادبوون، دڤى شه‌رى دا هه‌موو سه‌ڤك و یێ گران ژى هاتیه‌ بكارئینان زێده‌بارى پشكداریا تانك (72 t )، نڤیسینگه‌ها سیستانى داخواز ژ هێزێن له‌شكرێ عیراقێ و میلیشیاتێن شیعى كرن، به‌ره‌ڤانى و پاراستنا جهێن ئاینى و مه‌زارگه‌هان بكه‌ن.
ل گۆڕ پێزانیان هه‌ژماره‌كا زۆرا كوشتى و برینداران ژ هه‌ردو ئالیان هه‌یه‌، ب تایبه‌تى میلیشیاتێن فه‌یله‌قا به‌در و عسائیب ئه‌هل ئه‌لحه‌ق و له‌شكرێ مه‌هدى، چونكى ده‌ڤه‌را سه‌د دبیته‌ جهێ به‌ره‌ڤانیا ئێكێ بۆ باژێرێ سامه‌را و رێیا هاریكارى و پشته‌ڤانیا هێزێن حوكمه‌تا عیراقێ هه‌موو دوێ رێیێ دا ده‌رباز دبیت یا دكه‌فتیه‌ دناڤبه‌را سامرا و به‌غدا.

شه‌رڤانه‌كا كورد ل كوبانێ كریاره‌كا خوه‌كوژى دژى داعشێ ئه‌نجامدا

06/10/2014 16:33

ئه‌ڤرۆ نیۆز:
ل گۆڕ ده‌نگوباسێن رۆیته‌رز، د ئێكه‌مین كریارا خوه‌كوژیێ دا، شه‌رڤانا كورد (ئارین میرگان) خوه‌ دناڤ كومه‌كا تیرۆرستێن داعشێ ل نێزیكى باژێرێ (كوبانێ) په‌قاند، دئه‌نجامدا هژماره‌كا تیرۆرستان هاتن كوشتن و بریندار كرن، ئه‌ڤه‌ بۆ جارا ئێكێ یه‌ رێزێن داعشێ ژ ئالیێ شه‌رڤانێن كوردانه‌ دهێنه‌ به‌زاندن و داڤدۆزى دناڤ ئه‌ندامێن ده‌وله‌تا ئیسلامى یا عیراق و شامێ (داعش) دهێته‌ ئه‌نجامدان.

“ھەکە فەرمان ب مە بھێتە دان دێ مووسل ژی رزگار کەین”

06/10/2014 15:07

113

ئەڤرۆ نیوز، چەکدار ئەترووشی:

فەرماندێ ھێزا دژە تیرۆر یا پارێزگەھا دھۆکێ دیارکر کو ئەو بۆ ھەر پێشڤەچوونەکێ د ئامادەنە و چەکێ وان یێ باشە و دشێن ب وی چەکی ھەتا ڤی دەمی شەری پێبکەن.

عەقید ئەحمەد گەلی رومانی فەرماندێ ھێزا دژە تیرۆر یا پارێزگەھا دھۆکێ د دیدارەکا تایبەت دا بو ئەڤرۆ نیوز ھێزا دژە تیرۆر راگەھاند و گۆت: “ب فەرمانا راوێژکارێ ئاژانسا پاراستنا ئاسایشا ھەرێما کوردستانێ ھێزا مە یا دەست وەشین ئەڤا سە ب فەرماندەیا دھۆک ڤە ھاتە دەست نیشانکرن وەکو ھێزا دژە تیرۆرێ یا پارێزگەھا دھۆکێ”.

عەقید ئەحمەد ئەو چەندە دیارکر کو ئەو د بەرھەڤن بۆ ھەر پێشرەویەکێ و گۆت: “ئەم د بەرھەڤین بۆ ھەر ھێرشەکێ بۆ سەر ئاخیرێن دوژمنێن مروڤایەتیێ و ئەم نوکە پێش ھەموو خەلکێ جیھانێ ڤە شەری دکەن، ئەڤ چەندە بۆ مە مەزنترین سەربلندیە”.

بۆ رزگارکرنا شنگالێ ناڤبری دیارکر کو وەکو ھەموو ھێزێن دی یێن کوردستانێ درئامادەنە و گۆت: “ئەم د حازرین بۆ رزگارکرنا شنگالێ و مە چو کێماسی نینن، ل گەل ھەموو ھێزێن پێشمەرگەیی ژی مە لێک تێگەھشتنەکا باش یا ھەیی د ھەر پێشڤەچونەکێ دا”.

عەقیدی دیارکر کو ھەتا بۆ پارێزگەھا نەینەوا د ئامادەنە و گۆت: “ئەگەر ل سەرکردایەتی یا مە فەرمان بمە ھاتە کرن بۆ پاقژکرنا مووسل ئەم د ئامادەینە بچین”.

ل دووماھیێ عەقید ئەحمەد ئەو چەندە ئاشکەرا کر کو ل چەند دەمژمێرێن داھاتی دێ گوھۆڕینێن مەزن دروست بن ل رۆژئاڤایێ دیجلەی و ب ھیڤی نە مزگینیەکا مەزن بدەینە خەلکی َخوە”.

به‌ره‌ى نوسره‌ و داعش نێزيكى ئێكدو دبن

06/10/2014 12:59

100

ئه‌ڤرۆ نيوز:

سه‌ركرده‌كێ به‌ره‌ى نوسره‌ دياركر كو هێرشێن هه‌ڤپه‌يمانان بۆ سه‌ر وان، به‌ره‌ى نوسره‌ يا نێزيكى قاعيده‌ و داعش نێزيكى ئێكدو دبن و دده‌ته‌ زانين كو ئه‌و نه‌ د ئاماده‌نه‌ ل دژى داعش ب راوه‌ستن د به‌رژه‌وه‌ندا وه‌كو ئه‌و ب ناڤ دكه‌ين سه‌ليبان دا.

د په‌يوه‌نديه‌كا ب رێيا سكايپى دا، ئه‌بۆ موسه‌نايى ئه‌نصارى بۆ CNN دياركر كو پشتى هێرشێن فرۆكێن هه‌ڤپه‌يمانان، ل سه‌ر هه‌ردو هه‌ڤركێن ئێك، به‌ره‌ى نوسره‌ و داعش، هه‌ردويان كێشێن خوه‌ داينه‌ ره‌خه‌كى پشتى هه‌يڤه‌كێ ژ شه‌ره‌كێ مه‌زن د ناڤبه‌را هه‌ردو لايان دا.

گۆتژى: “ئه‌م نه‌شێين ل گه‌ل صه‌ليبيا شه‌رێ داعش بكه‌ين، هه‌ر كه‌سێ بچيته‌ ل گه‌ل وان ژ وانه‌”.

ئه‌نصارى دياركر ژى كو چو تشتێ فه‌رمى د ناڤبه‌را هه‌ردو لايان دا نينه‌، به‌لێ تێكگه‌هشتنه‌كا ناڤخۆى يا د ناڤبه‌را هه‌ردو لايان دا هه‌يى، بۆ راوه‌ستيان ل دژى رژێما به‌شار ئه‌سه‌د و گۆت: “رێكخستيا داعش هنده‌ك ئێخسيرێن مه‌ يێن به‌رداين”.

وێنه‌: جوانترين ئۆتێل ل جيهانێ

06/10/2014 12:17

811

ئه‌ڤرۆ نيوز:

ئۆتێلا سان رايز كيمبينسكى ژ ئێك ژ جوانترين ئۆتێلێن سه‌ر روويێ ئه‌ردى دهێته‌ هژمارتن ئه‌وا بڕياره‌ ل چريا دويێ ل پكين پايته‌ختێ چينێ بهێته‌ ڤه‌كرن.

درێژاهيا ڤێ ئۆتێلێ 97 مه‌تره‌ و ژ 21 قاتان پێك دهێت ل گه‌ل 306 ژوور ناڤ هولان و ب درێژاهيا 60 كيلۆمه‌تران دكه‌ڤيته‌ سه‌ر روويێ ده‌ريا يانكى.

ئه‌ڤ كاره‌ ژ پرۆژێن كۆمپانيا “شانگهاى هوادو ئه‌رشيتكت ديزاين كۆ” يه‌.

موئه‌يه‌د ته‌يب: داخۆيانيێن عه‌بادى وه‌كو يێن حه‌نان فه‌تلاوى نه‌

06/10/2014 11:44

179

ئه‌ڤرۆ نيوز، نيوار محه‌مه‌د سه‌ليم:

ئه‌ندامه‌كێ به‌رێ يێ جڤاتا نوونه‌رێن عيراقێ ل سه‌ر ليستا هه‌ڤپه‌يمانيا كوردستانى راگه‌هاند كو ئه‌و ژ هه‌لۆيستێن عه‌بادى نه‌يێ گه‌شبينه‌ و دده‌ته‌ زانين كو هه‌لۆيستێ ڤێ دووماهيێ يێ عه‌بادى وه‌كو يێ حه‌نان فه‌تلاوى بوو.

ئه‌ندامێ به‌رێ يێ جڤاتا نوونه‌رێن عيراقێ ل سه‌ر ليستا هه‌ڤپه‌يمانيا كوردستانى، موئه‌يه‌د ته‌يب، بۆ ئه‌ڤرۆ نيوز گۆت: “ئه‌ڤه‌ ژ هه‌لبژارتنا حه‌يده‌ر عه‌بادى و هه‌تا نوكه‌ چو هه‌لويستێن وه‌سان ژێ نه‌هاتينه‌ ديتن كو جهێ گه‌شبينيێ بن”.

زێده‌تر گۆت: “هه‌ر ژ پشتى خوارنا سووندا قانوونى راگه‌هاند كو ئه‌و سه‌ره‌دانا هه‌رێما كوردستانێ ناكه‌ت بۆ پێكئينانا حوكمه‌تێ و به‌رى نوكه‌ هه‌ر كه‌سێ ب ڤى پۆستى هاتيه‌ راسپاردن، سه‌ره‌دانا هه‌رێما كوردستانێ كريه‌”.

ئه‌ندامێ به‌رێ يێ جڤاتا نوونه‌رێن عيراقێ ل سه‌ر ليستا هه‌ڤپه‌يمانيا كوردستانى ئه‌و چه‌نده‌ ژى ئاشكه‌را كر كو هه‌لويستێ وى يێ ڤێ دووماهيێ گه‌له‌ك يێ خراب بوو ده‌ما گۆتى كو كو بۆ كوردستانێ ناچيته‌ سه‌رى په‌ترۆلا وان ژى بۆ وان بيت و يا به‌سرا ژى بۆ وان بيت و گۆت: “ئه‌ڤ داخۆيانيا وى د ده‌مه‌كى دا بوو كو ئه‌و باش دزانيت كوردان ژ به‌هرا خوه‌ زێده‌تر چو تشته‌كێ دى نه‌ڤێت، له‌ورا ئه‌ڤ داخۆيانيا وى وه‌كو يا حه‌نان فه‌تلاوى بوو”.

ئه‌باتشى پشكدارى شه‌رێ داعش ل عيراقێ دبن

06/10/2014 11:09

ئه‌ڤرۆ نيوز:

ژێده‌ۆه‌كى ژ وه‌زاره‌تا ده‌رڤه‌ يا ئه‌مريكا راگه‌هاند كو بۆ جارا ئێكێ دێ ئه‌مريكا ب رێيا فرۆكێن ئه‌باتشى ب ره‌نگه‌كێ نزم هێرشێ كه‌ته‌ سه‌ر چه‌كدارێن داعش ل عيراقێ.

سه‌ركرداتيا ئه‌مريكا راگه‌هاند كو ئه‌و دێ بۆ جارا ئێكێ ب رێيا فرۆكێن سه‌ربازى يێن ژ جورێ ئه‌باتشى AH-64 هێرشێ كه‌ته‌ سه‌ر چه‌كدارێن داعش ل عيراقێ دا كو بشێت ب ره‌نگه‌كێ باشتر ئارمانجێن خوه‌ بجهـ بينيت.

د به‌باننامه‌كێ دا، وه‌زاره‌تا به‌ره‌ڤانيا ئه‌مريكا راگه‌هاند كو ل دووماهيا ڤێ هه‌يڤێ فرۆكێن ئه‌باتشى چار هێرش يێن كرينه‌ سه‌ر چه‌كدارێن داعش ل ده‌ڤه‌را فه‌لۆجه‌.