دھۆک، لەزگین جۆقی:

نوونەرێ تایبەتێ سەرۆکێ حوکمەتا ھەرێما کوردستانێ بۆ کاروبارێن ئاواران بۆ ئەڤرۆ دیارکرکو پرۆسا کۆمکرنا دیکیومێنتان ل سەر کارەساتا شنگالێ دێ یا درێژخایەن بیت و رۆژانە خەلک دیکیومێنتان دئینن و ھەتا نوکە گەلەک دیکیومێنت ھاتینە خرڤەکرن و چو بەلگەنامێن وەسا نینن بێژن کڕین و فرۆتن ب کچێن رەڤاندی یا ھاتیە کرن، ھەلبەت تیرۆرستان کچێن رەڤاندی دابەشکرینە ڤێچا ب چ رێ بیت ئەم نوزانین وگۆت، ھەر تشتەکێ پێدڤی بیت بۆ رزگارکرنا وەلاتیێن ماینە ئاسێکری ھەتا یێن رەڤاندی ژی ئەم دێ کەین و سەرۆکێ حوکمەتا ھەرێما کوردستانێ ھەر ژ رۆژا ئێکێ فەرمان  داینە کو ھەر تشتەکێ پێدڤی بیت بۆ رزگارکرنا کەسێن ھاتینە رەڤاندن و ئاسێکری ئەم دێ ئەنجام دەین.

 د. نوری عوسمان نوونەرێ تایبەتێ سەرۆکێ حوکمەتا ھەرێما کوردستانێ بۆ کاروبارێن ئاواران بۆ ئەڤرۆ دیارکرکو کار یێ دھێتە کرن بۆ زانینا ئامارێن دروست یێن کوشتی و بێ سەروشێن کریا و کچێن رەڤاندی و چەند ڤەگەریاینە وچ رەفتار د گەلدا ھاتیە کرن، لێ ھەتا نوکە چو ئامارێن دروست دیار نەبووینە و بەردەوام سەردەان دھێنە کرن و پرسیار ژ خەلکێ دھێنە کرن کا چەند ماینە و چەند شەھید بووینە، لێ ھەتا وەلاتیێن شنگالێ نەزڤرنە سەر مال و مولکێن خوە، چو ئامارێن دروست دیار نابن، چونکو ھندەک کەس یێن ماینە ئاسێ و ھندەک ژی ژ مروڤێن خوە ھاتینە ڤەقاتاندن و بەری چەند رۆژان حالەت دیاربووینە من ب خوە ژی سەرپەرشتیا ئینانا وان دکر کو د ساخ بوون، لێ مابوونە ئاسێ ل شنگالێ و مە یێن ئیناین و نوکە یێن ل دھۆکێ کو ل گۆندی (نسیریێ) ل شنگالێ مابوونە ئاسێ و دەمێ پێزانین ل سەر ڤێ چەندێ گەھشتینە مە، ئەم رابووین ب قورتالکرنا وان و ب چ رەنگەکی ھەبیت ئەم بەردەوام کار دکەین بۆ قورتالکرنا وەلاتیێن ماینە ئاسێ و ل کیش جھی ژی بن.

د. نوری عوسمان زێدەتر گوت” ئەو کەسێن ھەتا نوکە مە ئیناین دگەھنە ٢٠ ژنان و دۆرێن ٨٠ حالەتان ژی کەسێن ماینە ئاسێ مە ئیناینە و ھەر تشتەکێ پێدڤی بیت ئەم دێ کەین بۆ رزگارکرنا وەلاتیێن ساخ و د ئاسێ، دیسا بەری چەند رۆژان ژی کچەکا دی ژی مە ژ مووسل ئینایە و نوکە یا ل باعەدرێ”.

دەرباری بزاڤێن جینۆساید ناساندنا کارەساتا شنگالێ، د. نوری عوسمان  گوت” دیکیومێنت یێن دھێنە خرڤەکرن و لیژنەک یا ھاتیە پێکئینان بۆ جینۆساید ناساندنا کارەساتا شنگالێ و ئەڤ لیژنە ژ چار وەزارەتان یا ھاتیە پیکئینان ئەوژی وەزارەتێن شەھید وئەنفالکریان، کار و کاروبارێن جڤاکی، ناڤخوەیی و داد ل گەل فەرمانگەھا پەێوەندیێن دەرڤە و ھەکە پێدڤی بیت، ھەر دامودەزگەھەکێ دی ژی بیت دێ ھێتە د لیژنی دا و کار یێ بەردەوامە و ئەم نەشێین بێژین کا کەنگی دێ ب دووماھی ھێت، بەلێ نوکە پێزانین یێن دھێنە کۆمکرن و خرڤەکرنا وان ژی پێدڤی ب دەمی یە”.

نوونەرێ تایبەتێ سەرۆکێ حوکمەتا ھەرێما کوردستانێ بۆ کاروبارێن ئاواران دیارکرکو کارێ مە ھەمەھانگی یە دناڤبەرا دامودەزگەھێن میری و جڤاتا وەزیران دا بۆ خەلکێ ئاوارەبووی خزمەتێ بکەین  و ئەو فەرمانا ئەز پێ ھاتیمە راسپاردن بۆ ڤی کاری ئاوارێن ھەولێر و سلێمانیێ ژی ب خوەڤە دگریت وھەڤکاریێ ل گەل رێکخراوان و ئاژانسین نەتەوێن ئیکگرتی و ھەموو وەزارەتێن حوکمەتا ھەرێما کوردستانێ دکەین بۆ دابینکرنا خزمەتێن پێدڤی بۆ ئاواران و کار یێ بەردەوامە بۆ دابینکرنا جھێن ڤەحەواندنێ ودابینکرنا قوتابخانان ژی بۆ سالا نوو یا خواندنێ بۆ زارۆیێن ئاواران و دابینکرنا کەلوپەلێن خوارنێ”.

د. نوری عوسمان ئاماژە دا وی چەندی کو  ١٧٠ ھزار ئاوارێن شنگالێ ل دھۆکێ نە و ھندەک ژی چووینە ھەولێرێ و سلێمانیێ و گوت” لیژنەک ژلایێ پارێزگەھا دھۆکێ ڤە ژی یا ھاتیە پێکئینان کو ئەو کاری مەیدانی پتر ئەنجام ددەت و ئەم ژی ھەڤکاریێ ل گەل حوکمەتێ و نەتەوێن ئێکگرتی و جڤاتا وەزیران ورێکخراوان دکەین بۆ ھندی کارێن وان بجە بھێن”.

ناڤبری ئەوژی خویا کر کو ھەتا نوکە چو بەلگەنامێن وەسا نینن کو بێژن کڕین و فرۆتن ب کچێن رەڤاندی یا ھاتیە کرن، ھەلبەت چەکدارێن تیرۆرستێن داعش یێن ل سەر خوە بەلاڤکرین، ڤێچا چاوا بیت ئەم نوزانین”.

د. نوری ئاشکرا کرکو  عەرەبێن دەڤەرا شنگالێ دووپاتکر کو پێکڤەژیان دگەل وان دا ناھێتە کرن، چونکو عەرەبان خیانەت ل شنگالێ کر و ئەم د زانین کا چ عەشیرەتێن عەرەب ل شنگالێ دەست د کارەساتا شنگالێ دا ھەبووینە”.

ناڤبری زێدەتر گۆت” پرۆسا کۆمکرنا دیکیومێنتان ل سەر کارەساتا شنگالێ دێ یا درێژخایەن بیت و رۆژانە خەلک دیکیومێنتان دئینن و ئەڤ نڤیسینگەھا ھاتیە ڤەکرن دێ یا وەختی بیت و ئەم سۆپاسیا خەلکێ کوردستانێ و تایبەتی پاریزگەھا دھۆکێ دکەین بۆ پێشوازی و ھاریکاریا وان ل گەل ئاواران”.