NO IORG
نووترين نووچه
Twitter

سێمێل، بەرەڤان دەرگەلی:

لژنا ناوچا سێمێل یا پارتی ديموكراتى كوردستان ئەڤرۆ رۆژا چارشه‌مبى رێكه‌فتى 1\10 ھەوەکا خوین بەخشینێ ل سێمێلێ ئەنجام دا كودڤێ ھەوێ دا سەرجەم رێڤەبەرێن حکومی و حزبی و خەلکەکێ زۆر پشكدار بوون.
مازن محمد سەعید قائمەقامێ قەزا سێمێلێ ئێك ژ وان کەسان بوو يێن خوین بەخشی بۆ رۆژناما ئەڤرۆ گۆت: “ئەڤرۆ وەکو دەست پێشخەریەک بۆ پشتەڤانیکرن ل وان پێشمەرگێن ل سەر سنورێن هه‌رێما کوردستانێ شەرێ تیرورستا دكه‌ن بۆ ھندێ خەلکێ مە ب ئازادانە ژیانا خوه‌ ببه‌تە سەر، خەلکێ سێمێلێ و فەرمانبەر و کەسێن حزبی ئامادەیا خوه‌ نیشان دان و خوین بەخشی بۆ وان پێشمەرگێن تێنە بریندارکرن”.

مازنی گۆتژی: “ئەڤە ژی کێمترین وەفاداریە بۆ وان کو ئەڤرۆ مە دەست ب ڤێ ھەوێ کری، کو ب رێکخراوێن جەماوەری ڤە و خەلکێ مە ڤە، ئەڤە ژی وێ دگەھینت کو راستە ئەم ل مالێن خوه‌نە، لێ دلێ مە ھەر د گەل پێشمەرگەیە”.

قائيمەقامێ قه‌زا سێمێل گۆتژی: “ئەڤە دەست پێشخەریا لژنا ناوچا سێمێك يا پارتى ديموكراتى كوردستان بوو و ھەروەسا دەرگەھێ نەخوشخانێ یێ ڤەکریە بۆ ھەر کەسەکێ شیانێن خوین بەخشینێ ھەبن، چونکی بەخشینا خوینێ دەربرینە ژ بۆ ڤى خاکێ کو خودانێن خو ھەنە و ھەروەسا فەرمانبەرێن مە و دەزگەھێن دی نە ب تنێ ڤێ خزمەتێ دکن بەلکو مل ب ملێ پێشمەرگەی ل سنورێ قەزایێ خزمەتا ئاواران دكه‌ن ئەڤە ژی خزمەتەکە”.

ئه‌سيل نوجێفى پارێزگارى نه‌ينه‌وا

ئه‌ڤرۆ نيوز، نيوار محه‌مه‌د سه‌ليم:

پارێزگارێ نەینەوا ل ھەولێرا پایتەختێ ھەرێما کوردستانێ د کۆنگرەکێ رۆژنامەڤانی دا دیارکر کو ئەوان باوەری یا ھەیی دێ عەبادی ژ مالکی باشتر بیت و ھیڤی خواست کو دەستێن خراب ژ ناڤ دەستەلاتێ دا لاببەت و نەھێلیت.
نوجێفی دیارکر کو ئێک ژ وان بابەتێن ھەستیار ئەو بەحسکرنە یا دبێژیت خەلکێ نەینەوا ھەموویان دەستێن ل گەل داعش ھەین و گۆت: “خەلکەکێ کێمە ھاریکاریا وان دکەت و ھەکە ملیۆنەک و ٦٠٠ ھزار کەس ھەڤکاریا داعش بکەن دنیا ھەموو نەشێت ژ ناڤ ببەت، ب تنێ خەلکانەکێ کێم ھاریکاریا وان یا کری، خەلکێ ل ناڤ مووسل ژی ھەیی یێ ئامادەیە ھەڤکاریا مە بکەت”.
پارێزگارێ مووسل زێدەتر گۆت: “گەنجێن نەینەوا ل ناڤ مووسل و دەرڤە دێ پشکداری شەرێ دژی داعش بن”.
دەربارەی پێشڤەچوونێن پێشمەرگەی ژی گۆت: “ھێزێن کوردی ل رەبیعە یێ بەر ب پێش دچن و چاڤەرێینە بەغدا ژی ھاریکاریێ بکەت دا کو بشێین ل ھەموو دەڤەران داعش نەھێلین”.
ل دۆر مووچێ فەرمانبەرێن پارێزگەھا نەینەوا ژی گۆت: “فەرمانبەرێن مووسل دێ ل کەرکووک و ھەولێر وەرگرن، بەلێ کێشەکا ھەیی و ئەو مووچە دێ گیرۆ بن ژبلی یێ پۆلیسان ئەوێ کو نوکە ب ئێکجاری ھاتیە راوەستاندن”.

ئەڤرۆ نیوز، نیوار محەمەد سەلیم:
رێڤەبەریا پۆلیسێن پارێزگەھا دھۆکێ راگەھاند کو ب ھەلکەفتا ھاتنا جەژنا قوربان ئەوان وەکو رێڤەبەریا پۆلیسێن پارێزگەھا دھۆکێ پلانەک دارێتیە دا کو ئێمناھیا باژێری ب پارێزن و پتر خزمەتا وەلاتیان بکەن و د ڤێ پلانێ دا ھەموو ئەفسەر و پۆلیس د پشکدارن و ل سەر تاخێن باژێری ھاتینە بەلاڤکرن.
نەقیبێ مافپەروەر ھێمن سلێمان بەرپرسێ راگەھاندنا پۆلیسێن پارێزگەھا دھۆکێ راگەھاند کو دێ پشکا پشکا پولیسێن ھەوارھاتنێ ترۆمبێلێن وان دێ ل سەر ٢٥ خالان د ناڤ باژێری دا بەلاڤ بن و گۆت: “زێدەباری ژوورا کۆنترولی ٢٤ دەمژمێرا دێ د کاری دا بیت کو ھەر وەلاتیەکێ ئاریشەک ھەبیت دشێت پەیوەندیێ ب ھەردو ھێلێن ١٠٤ و ١٤٠ بکەت”.
زێدەتر گۆت: “پشکا پۆلیسێن چالاکیێن مەدەنی دێ ل سەر شەش خالان د بەلاڤەکری بن زێدەباری ھێزەکا ئامادە بۆ ھەر روودانەکا نەچاڤەرێکری”.
دەربارەی ناڤ تاخان ژی دیارکر کو پشکا پۆلیسێن نەھێلانا گۆنەھباریان دێ پۆلیسێن خوە ب جلکێن مەدەنی ل ناڤا تاخان بەلاڤ کەت و دیسا ل نڤیسینگەھێن نەھێلانا گۆنەھباریان دێ ئەڤسەر و پۆلیسێن نۆبەدار ھەبن”.
نەقیبێ مافپەروەرد گۆتژی: “ھەمی بنگەھێن پۆلیسان یێن سەر ب پشکێن پۆلیسێن رۆژھەلات و رۆژئاڤا دێ ئەڤسەر و پۆلیسێن نۆبەدار ھەبن بۆ ھەر وەلاتیەکێ سکالایەک ھەبیت تۆمار بکەت یان کێشەک بۆ دروست بیت”.
ل دووماھیێ ژی گۆت: “ئەڤ پلانە دێ ل ھەمی قەزایێن سەر ب پارێزگەھا دھۆکێ ڤە دھێتە ب جە ئینان”.

ئەڤرۆ نیۆز ، سالار دۆسکی

ژڤانە ئەڤرۆ ئێڤاری ١/١٠ ل باخچێ پانۆراما ئازادی و ب ھەلکەفتا رۆژا جیھانی یا مۆزیکێ چەندین بزاڤ و چالاکی، ژ لایێ رێڤەبەریا ھۆنەرێ مۆزیکێ بھێنە ئەنجامدان.
سەمەدار مایی رێڤەبەرێ ھۆنەرێ مۆزیکێ بۆ ئەڤرۆ نیۆز دیارکر کو دێ ئێڤارەکا مۆزیکێ ھێتە سازکرن ب ژەنینا مۆزکێن رۆژلاتی و رۆژئاڤایی ل پانۆراما ئازادی وەکو دەربڕین ژ ڤێ رۆژا جیھانی.
مایی گۆت: “ئەڤ بیرھاتنە د چارچووڤێ ئەڤان کاودانان دا دھێتە ساخکرن کو کاودانێن ئابووری نەدباشن، بەلێ ھەر نەبوویە رێگر ھەمبەر بزاڤ و کارێ مە، وەکو پێشتر دێ بەردەوام بین ل سەر خەباتا خوە و ئەڤە مۆزیکە دیاری نە بۆ ێشمەرگێ کوردستانی”.

ئه‌ڤرۆ نيوز، نيوار محه‌مه‌د سه‌ليم:

ئه‌ميندارێ گشتى يێ وه‌زاره‌تا پێشمه‌رگه‌ى ل حوكمه‌تا هه‌رێما كوردستانێ ره‌تدكه‌ت كو ل ده‌مێ كۆنترۆلكرنا ره‌بيعه‌ و گۆندێن ده‌وروبه‌ر ژبلى هێزێن پێشمه‌رگه‌ى چو هێزێن دى پشكدارى تێدا كربيت ب تايبه‌ت هه‌ردو هێزێن يه‌په‌گه‌ و په‌كه‌كه‌.

د رۆهنكرنه‌كێ دا، سكرتێرێ رۆژنامه‌ڤانى يێ فه‌ريق جه‌بار ياوه‌ر، ئه‌ميندارێ گشتى يێ وه‌زاره‌تا پێشمه‌رگه‌ى و ئه‌ندام و ئاخفتنكه‌رێ فه‌رمى يێ فه‌رمانده‌يا گشتى هێزێن پاراستنا هه‌رێمێ، د به‌رنامێ رووداوى ئه‌مرۆ يێ كه‌نالێ رووداو دا ده‌رباره‌ى پشكداريكرنا هێزێن گه‌ريلايێن په‌كه‌كێ و شه‌رڤانێن يه‌په‌كێ دا ئاماژه‌ ب وێ چه‌ندێ كربوو كو ب گۆره‌ى ژێده‌رێن ميدياى و ده‌نگوباسان پشكدارى يا تێدا كرى، به‌لێ پشتى دووڤچوونێ و پێزانينێن له‌شكرى يێن وه‌زاره‌تا پێشمه‌رگه‌ى و ژوورا ئۆپه‌راسيۆنا مووسل، ديار بوو كو هه‌ردو هێزێن گه‌ريلايێن په‌كه‌كێ و شه‌رڤانێن يه‌په‌گێ ب چو ره‌نگه‌كى پشكدارى د شه‌رێ ره‌بيعه‌ و زۆمار دا نه‌كريه‌.

دايه‌ زانين ژى كو د پێشڤه‌چوونێن ره‌بيعه‌ دا ب تنێ هێزێن پێشمه‌رگه‌ى و فه‌رمانده‌يا گشتى يا پاراستنا هه‌رێمێ پشكدارى تێدا كريه‌.

سه‌ليم جبورى سه‌رۆكێ جڤاتا نوونه‌رێن عيراقێ

ئه‌ڤرۆ نيوز، نيوار محه‌مه‌د سه‌ليم:

ئه‌ڤرۆ سپێدێ سه‌رۆكێ جڤاتا نوونه‌رێن عيراقێ سه‌ليم جبوره‌ ب رێيا فرۆكخانا هه‌ولێر گه‌شته‌ باژێرێ هه‌ولێر و ل گه‌ل سه‌رۆكێ په‌رله‌مانێ كوردستانێ كۆمببوو و بڕياره‌ ل گه‌ل هه‌ر ئێك ژ سه‌رۆكێ وه‌زيران و سه‌رۆكێ هه‌رێما كوردستانێ ژى كۆم ببيت.

سه‌ليم جبورى ئه‌ڤه‌ ژ ماوێ ده‌ست بكاربوونا وى وه‌كو سه‌رۆكێ جڤاتا نوونه‌رێن عيراقێ بۆ جارا دويێ يه‌ سه‌ره‌دانا هه‌رێما كوردستانێ دكه‌ت.

ژێده‌رێن ده‌نگوباسان ئاماژێ ب وێ چه‌ندێ دكه‌ن كو بڕياره‌ ل گه‌ل سه‌رۆكێ په‌رله‌مانێ كوردستانێ و سه‌رۆكێن فراكسيۆنێن ناڤا په‌رله‌مانى و سه‌رۆك وه‌زيرێن هه‌رێمێ و سه‌رۆكێ هه‌رێمێ كۆمبيت.

وه‌كو هاتيه‌ زانين مه‌ره‌م ژ هاتنا سه‌رۆكێ جڤاتا نوونه‌رێن عيراقێ ژبوو به‌حسكرنا ره‌وشا ئاوارا و چه‌ند پرسێن ئێمناهيێ يه‌ و دبيت به‌حس ل ڤه‌گه‌ريانا وه‌زيرێن كورد ژى بۆ عيراقێ بهێته‌ كرن ب تايبه‌ت ل ده‌مێ كۆمبوونا وى ل گه‌ل سه‌رۆك وه‌زيران و سه‌رۆكێ هه‌رێمێ.

فازل ميرانى سكرتێرێ پارتى ديموكراتى كوردستان

ئه‌ڤرۆ نيوز، نيوار محه‌مه‌د سه‌ليم:

فازل ميرانى سكرتێرێ پارتى ديموكراتى كوردستان د ديداره‌كێ دا بۆ رۆژناما هه‌ولێر دا ئاماژه‌ ب وێ چه‌ندێ كر كو بۆ پارتى ئێكرێزيا مالا كوردى گه‌له‌ك گرنگتره‌ ژ وه‌زاره‌تان ل به‌غدا و گۆت: “هه‌كه‌ ب خالبه‌ندى بيت، غه‌در يا ل پارتى هاتيه‌ كرن”.

فازل ميرانى ديار كر كو گوهۆڕينا مالكى زيانه‌ك بوو ب وى كه‌فتى و ده‌ستكه‌فته‌كا مه‌عنه‌وى بوو بۆ كوردان ب تايبه‌ت سه‌رۆك بارزانى يێ پێداگرى ل سه‌ر وێ چه‌ندێ كرى كو نابيت بۆ جارا سيێ مالكى ببيته‌ سه‌رۆكێ وه‌زيران.

دا زانين ژى كو وى گه‌له‌ك جاران ب عه‌ره‌بان گۆتيه‌ كو كێشا كوردا ل گه‌ل شيعه‌ و سونا نينه‌، كێشا حوكمه‌تا ژى نينه‌، كێشا وان ل گه‌ل عه‌قليه‌تا عه‌ره‌بايه‌ كو هه‌كه‌ ته‌ماشه‌ى دونيايێ بكه‌ن ئه‌ڤ هه‌موو گوهۆڕينێن وارێ ته‌كنولۆژى و خواندن و پێشكه‌فتنێ ب ده‌ست هاتينه‌، به‌لێ ناڤ عه‌ره‌بان هێشتا بابه‌تێ قه‌بۆلكرنا خه‌لكێ دى د سه‌رێ وان دا نه‌چوويه‌ خوار، ژخوه‌ كێمتر ديتنا خه‌لكێ دى ئێش و دوريشمێ مه‌زنێ وانه‌.

ئاماژه‌ ب وێ چه‌ندێ ژى كر كو قه‌ده‌را كوردان وه‌سا يا چێبووى هه‌تا ب زمانێ خوه‌ ب خوونن دڤێت هزار شه‌هيدان بده‌ن، هه‌تا قايمقام و رێڤه‌به‌رێن ناحيا هه‌بن دڤێت هزار شه‌هيدان بده‌ن، هه‌تا پارێزگار و وه‌زيره‌كى ددانن دڤێت هزار شه‌هيدان بده‌ن، هه‌تا فيدراليه‌ت هه‌بيت دڤێت بيست هزار شه‌هيدان بده‌ن، هه‌كه‌ به‌حس ل ده‌وله‌تا كوردى ژى بكه‌ن، ب خيانه‌ت و جوداكرن ل قه‌له‌م دهێته‌ دان و دێ قيامه‌ت رابيت، ئانكو ئه‌ڤه‌ بابه‌ته‌كێ تاكه‌ كه‌سى نينه‌ و يێ عه‌قليه‌تێ يه‌ و ئه‌ڤه‌ ژى شانسێ مه‌يه‌، هه‌كه‌ ژ ل گه‌ل وه‌لاته‌كێ وه‌كو ئێنگليز يان ئێكێ ئه‌ورۆپا ژياباين دا تشته‌كێ دى بيت.

فازل ميرانى گۆت: “مالكى و عه‌بادى يێن ئێك قوتابخانه‌ و حزبن و مه‌زهه‌بن، به‌لێ كاودانێن مانا مالكى ل گه‌ل حكمرانيا كاودانێن ئاغايێ عه‌بادى جوداهى يا هه‌ى”.

ده‌رباره‌ى هه‌ڤپشكيا د پشكداريا حوكمه‌تا به‌غدا ژى گۆت: “دڤێت به‌لاڤكرنا وه‌زاره‌تان ب كوردان بۆ ئێكرێزيا مالا كوردى بيت، مه‌ چاوان وه‌زير بۆ پارتى دڤێن وه‌سان بۆ ئێكه‌تى و گۆڕان و يه‌كگرتوو و كۆمه‌لێ ژى دڤێن، پارتى بێى هه‌ڤپشكێن خوه‌ يێن كوردستانى ناچيته‌ به‌غدا، بلا مه‌ وه‌زاره‌ت نه‌بن، به‌لێ هه‌ڤگرتن هه‌بيت”.

ده‌رباره‌ى وێ چه‌ندێ كا هه‌كه‌ خالبه‌ندى بيت دێ چاوان بيت، ميرانى دا زانين كو هه‌كه‌ خالبه‌ندى بيت ئێكه‌تيێ وه‌زاره‌ت ب به‌رناكه‌ڤيت و مافێ خوه‌ يێ وه‌رگرتى چونكو سه‌رۆكێ كۆمارێ يێ وه‌رگرتى، سه‌رۆكێ كۆمارێ نێزيكى 32 خالان يێ ل سه‌ر هه‌ين و گۆت: “هه‌كه‌ ب خالبه‌ندى بيت غه‌در يا ل پارتى هاتيه‌ كرن”.

151

ئەڤرۆ، ئەمیر ئەترووشی – ھەرھین محەمەد:

مەلایەکێ پارێزگەھا دھۆکێ راگەھاند، ھەر کەسێ شیانێن دراڤی ھەبن دڤێت ل جەژنێ قوربانی بدەت و نابیت پشتگوە پاڤێژیت، ھندەک زانایێن ئاینی وان کەسێن شیان ھەبن و قوربانی نەدەت گونەھکار دبینیت و گۆت ژی، ئێک پەز تێرا خێزانێ ھەموویێ ھەیە و حەفت خێزان ژی دشێت گولکەکی بدەن. رێڤەبەرێ ڤێتێرنەریا دھۆکێ ژی دیار کر کو رەنگە بۆ جەژنا ئەڤ سالە نێزیکی ١٠ ھزار سەرێن پەزی بھێنە سەرژێکرن.

سەمیر مزوری خودان خێزانە و ژ حەفت کەسان پێک دھێت، ھوسا دیار کر کو وی ل بەرە بۆ جەژنا قوربانا ئەڤ سالە گولکەکی بکەتە قوربان دا خێر بۆ ھەر حەفت ئەندامێن خێزانا وی بھێتە نڤێسین، بەلێ مەلایەکێ دھۆکێ د خوتبەیا ئەینیا بووری دا ل سەنتەرێ پارێزگەھا دھۆکێ راگەھاند کو خەلکەک دشێت پەزەکی بۆ خێزانێ ھەموویێ بدەت و ئێک گولک ژی دشێن بۆ حەفت خێزانان بھێتە دان نەکو بۆ حەفت کەسان پێکڤە.

د. دیار تەیب محەمەد، رێڤەبەری ڤێتێرنەری ل پارێزگەھا دھۆکێ دیار کر، سەرژێکرنا پەزی ل بەر دەرگەھێن مالا دیاردەکا جڤاکیە و گەلەک یا ب زەحمەتە کۆنترۆل ل سەر بھێتە کرن، ژ بەر ڤێ چەندێ بزاڤێ دکەین ل گەل وان پێرابوونێن قانوونی وەربگرین و دێ ھەوڵدەین گڤاشتنێ ل سەر جڤاکێ رەوشەنبیرببن ل شوونا زەحمەتێ ببەن ل جھێن نەگونجای پەزی سەرژێ کەن، ئەڤ چەندە ژی دبیتە دەرگەھەک بۆ وان گۆشتفروشان یێن مۆلەتا سەرژێکرنا پەزی ھەی.

ناڤبری گۆت ژی: رێگری ل چو کەسا ناھێتە گرتن ئەگەر پەزی بکرن و بفرۆشن، بەلێ سەرژێکرنا وان ل وان جھان نەیا دروستە وەک ل مەیدانکا دولبێ پولیس ل حەفتیێ جارەکێ سەرەدانا وان جھان دکەن ئەوێن پەز لێ دھێتە فروتن، ئەگەر ببین ئەو کەس ل وان جھان ئەوێن پەز لێ دھێتە فروتن پەز لێ بھێتە سەرژێ کرن، بەلێن نامەکێ ژێ وەردگرین، ھەروەسا دھێنە رەوانەکرن بۆ دادگەھێ و جۆرەکێ سزای دکەفیتە سەر ئەگەر ئەڤ سەرپێچیە دووبارە بیت دبیت بچیتە دزیندانێ ڤە.

مەلا جیھاد، رێڤەبەرێ ئەوقافا دھۆکێ بۆ ئەڤرۆ دیار کر، قوربان سونەتەکە ل سەر بوسلمانان نەکو ئەرکە ھەموو کەس قوربانی بدەن، گەلەک زانایێن ئاینی ژی ھوسا دبینن کو ئەو کەسێن شیانێن دراڤی ھەبن دڤێت قوربانی بدەن و گۆت: پێغەمبەری سلاڤێن خودێ ل سەر بن دو پەز کرینە قوربانی، یا گۆت ئێک ژ پێش من ڤە و یێ دی ژ پێش گەلێ بوسلمانان ھەموویێ ڤە و ھەر کەسێ شیان نەبن قوربانی بدەت ئەو پەزێ پێغەمبەری کریە خێر وەکو قوربان دێ خێر بۆ وی ھێتە نڤێسین.

د. دیار زێدەتر دبێژیت: ل نێزیک دێ ھەموو دەزگەھێن راگەھاندنێ ھێنە ئاگەھدارکرن ل سەر ھشیارکرنا خەلکی، ھەروەسا روونشتنێن تایبەت ل گەل گۆشتفروشان و ل گەل وان کەسان ئەوێن پەزی دفرۆشن، ل سالا بوری ئەڤ چەندە ھاتبوو کرن نێزیکی ٥٠٠ سەرێن پەزی ل سەرژێگەھا دھۆکێ ل خانکێ ھاتینە سەرژێکرن، لێ ئەڤ سالە ژی دێ ھەول دەین ل گەل وان کۆمپانیا ئەوێن سەرژێگەە د دەستێ وان دا گۆشتفرۆشت دھۆکێ خەلکێ دھۆکێ ئەوێن پێدڤی قوربانا گونجاندنەکێ د ناڤبەرا وان دا ھەبیت پەزێ وان بھێتە سەر ژێ کرن بگەھیتە وی جھی یێ وی دڤێت ل ڤی جەژنێ پێشبینی دکەین کو نێزیکی ١٠ ھزار سەرێن پەزی دێ ھێنە سەرژێکرن.

مەلا جیھاد ئاماژە دا وێ چەندێ، ئەو پەزێ دبیتە قوربانی نابیت یێ پەککەفتی بیت و ژیێ وی ژ سالەکێ پتر بیت و چوو بیتە د سالا دویێ دا، ھەروەسا ئێک کەس ژی دشێت ب تنێ بۆ خوە بدەت گۆت: دەمێ پەزەک دبیتە قوربان ژی دشێن گۆشتێ وی بکەنە سێ پشک، پشکەک بۆ خودانێ قوربانی، پشکەک بۆ ھەژاران و پشکا دی دشێت بدەتە ناسیارێن خوە و بلا ھەتا کەسێن دەولەمەند ژی دناڤ دا بن چو ئاریشە نینە.

رێڤەبەرێ ئەوقافا دھۆکێ ئاشکرا ژی کر کو دروستە قوربان ل سەرژێگەھێ بھێنە سەرژێکرن نەکو ب تنێ ل مال و بۆ مریا ناڤێ وی ل سەر بینیت دروستە.

مەجید ئەحمەد مەجید، خودانێ کۆمپانیا بلان بازار گۆت: دەمێ نێزیکبوونا جەژنا قوربانی  پەزی گران دکرین، لێ وی تشتی ل بەرچاڤ وەرناگرین و ئەو قازانجە ژ بلان بازار دچیت، راستە ل دەمێ نێزیکبوونا جەژنا قوربانی ل مەیدانکێن پەزی  پەز گران دبیت و خەلک ھەموو ھزردکەن کو ل بلان بازار ژی دێ گۆشتێ خوە گران کەن، لێ خەلکەکێ گەلەک باوەری ب بازارێ بلان بازار ھەیە و مە کوالەتی گوشتێ خومالی رۆژ بۆ رۆژێ بەر ب زێدەبوونێ دچیت، لێ گەلەک جاران قازانج کەین و ھندەک جاران ژی وەک ھەڤ دەردکەڤین چو قازانج ناکەین، بەلێ ھەر کەسەکێ کارەکی بکەت نابیت ب تنێ چاڤێ وی ل قازانجکرنێ بیت دڤێت بەرێ مرۆڤی ل خزمەتا خەلکی بیت ئەگەر د رێیا خزمەتێ دا قازانجەک بۆ مرۆڤی بھێت گەلەک باشە.

مەجید ھێشتا ژی گۆت: گەلەک جاران پەز کێم دبیت ناچار دبین پەزی ب گرانی بکرین و ھەر بوھایی جاران دەینە بکران، دا کو باوەریا وان ب مە بمینت ل بلان بازار (٩٥%) گۆشتێ خومالی دھێتە فرۆتن بەری ڤان کاودانا پەز ژ دەڤەرا شنگالێ و دەوروبەرێن مووسل دھات، لێ نوکە پەز ژ (ھەڤلێری و سوران وقەلادزێ) دھێت، لێ گەلەگ خەلک ھەنە دێ گۆشتەکێ پیر ژ جھەکی ب ئەرزانی کرن، دەمێ دھێنە بلان بازار دبێژن بۆچی گۆشتێ وە یێ گرانە و نزانن گۆشتی مە یێ خومالی یە.

حسێن زکری گۆشت فروشەکە ل دور بابەتی گۆت: نوکە نێزیکی جەژنا قوربانیە، پەز گران دبیت، چونکو خەلک گەلەک دھێن قوربانا دکرن دبیت گەلەک کەس ژی ھەنە ژبەر قوربانی پەزی ناکرن بۆ کورێن خوە بێن پێشمەرگە دکرن و دکەنە خێر، راستە دەمێ نێزیکبوونا جەژنێ ھەموو تشت گران دبیت، لێ خەلکێ دھۆکێ گەلەک ھاریکارە، دبیت بەری نوکە ب تنێ گۆشت فرۆشان ب تنێ پەز دکری، لێ نوکە ھەموو خەلک دکرن، بەلێ  ھندەک کەس ھەنە بازرگانیێ ب پەزی دکەن، ھەموو دزانن کو پەزە نەیێ خومالی یە دەمێ ئەڤ کەسە پەزی دھێن ھەموو کەس دزانن ئەڤ  کەسە نە بازرگانێن پەزی نە ل بازارێ گۆشتفروشان ژی بھایێن وان نەھاتینە گران کرن.

سعود مه‌لا،سكرتێرێ پارتى ديموكراتى كوردستان-سوريا

ئەڤرۆ، ڤەگێر سەعدولا:

سکرتێرێ پارتی دیموکراتی کوردستان-سووریا PDK-S د ھەڤپەیڤینەکێ دا بۆ رۆژناما ئەڤرۆ دیار کر کو بارودوخێ سووریێ یێ خرابە و گەلەک ئاستەنگ یێن ھاتینە پێشیا گەلێ کورد و گۆت: (ل ڤێ دووماھیێ رژێمێ دەستێ خوە دا دەستێ رێکخراوێن ئیسلامی یێن توندرەو و ب رێکا وان شەرێ شورەشا سووریێ کرن و ئەو بھێز ئێخستن و دەولەتا ئیسلامی دامەزراند و ل سەر ڤی بنیاتی دەڤەرا کوردی ژی کەفتە بەر گەلەک ئاستەنگیان و ژ ئەنجامێ رەفتارێن شاش یێن ھندەک ئالیان، کوردان باجەک مەزن دا).

سعود مەلا سکرتێرێ پارتی دیموکراتی کوردستان-سووریا دیار کر کو نوکە شەر یێ ل گەلەک دەڤەرێن کوردی ھەی، لێ شەرێ مەزن یێ ل کوبانێ و نھا  یا ھاتیە دۆرپێچکرن و د بن مەترسیەکا مەزن دایە و گۆت: (ژ بەر رەوشا تایبەت یا کوبانێ، ژ مە ھەموو کوردان دھێتە خواستن کو ئەم ئێکرێز بین ھەتا کو بشێین ل بەر سینگێ ڤێ مەترسیا مەزن راوەستین، لێ مخابن ھەتا نوکە PYD کار ژ بۆ ئێکرێزیێ ناکەت و ئەڤە شاشیەکا مەزنە، ژ بەر کو مەترسی یا ل سەر ھەموو مللەتێ کورد ھەی نە بتنێ ل سەر PYD).

سعود مەلای ئاشکرا کر کو ئەو وەکو ئەنجومەنێ نیشتیمانی یێ کوردی د بەرھەڤن مل ب ملێ پارتیێن دی یێن کوردان شەری ل دژی گرۆپێن تیرورستی بکەن و وەلاتێ خوە و مللەتێ خوە ب پارێزن و گۆت: (خورتێن کورد یێن ژ بەر گەفێن رژێما ئەسەد رۆژئاڤایێ کوردستانێ بجە ھێلای، ل ھەرێما کوردستانێ راھێنانێن لەشکری پێ ھاتینە کرن، ئەو د بەرھەڤن بچن ل کوبانێ شەری بکەن، لێ PYD رێ نادەت. پێشمەرگێن رۆژئاڤا ھەر دەم دبێژن مە نەڤێت ئەم بچینە رۆژئاڤا شەرێ براکۆژیێ روو بدەت، لەوما فەرە ئالیێ دی تێ بگەھیت کو ئەڤە نە ژ ترسێ یە، بەلکو مە نەڤێت ئەو کارێ خراب د ناڤ مللەتێ مە دا ل رۆژئاڤا روو بدەت ھەکە ئەو د ئامادەنە ل رۆژئاڤا و باشور ژی شەری بکەن و بەرەڤانیێ ژ کوردان بکەن).

د بەردەوامیا ئاخڤتنێن خوە دا سعود مەلا گۆت: (ل کوبانێ نە تنێ PYD یان YPG شەری دکەن، بەلکو ھەر کوردەکێ ل کوبانێ نوکە بەرەڤانیێ ژ نامیس و کەرامەتا خوە دکەت و نوکە ئەندام و لایەنگرێن مە ژی ب ناڤێ جڤاتا نیشتیمانیێ کوردی ENKS د ناڤ کوبانێ دا چەکدارن و بەرەڤانیێ دکەن).

سعود مەلای ئەو یەک ژی دیار کر کو ھەڤالێن پارتیا وان ل سەر ئاستێ وەلاتێن ئەورۆپی و ئەمریکا و نەتەوێن ھەڤگرتی کارەکێ خورتێ دبلوماسی دکەن ژ بۆ پشتەڤانیا کوبانێ و گەلێ کورد و گۆت: (ئەڤرۆ ل سەر ئاستێ جیھانێ کێشا کوردی جھێ خوە گرتیە و دانوستاندن ل گەل دھێنە کرن، بەری رۆژەکێ وەزیرێ بەرەڤانیا ئەمریکا دیار کر کو ئەو د ئامادەنە ھاریکاریێ و چەکی بدەنە گەلێ کورد ل سووریێ و ئەڤە پێشکەفتنەکا مەزنە).

ل دۆر وێ یەکێ کا دێ وی چەکی دەنە کیژ ئالیێ کوردی سعود مەلای گۆت: (یا گرنگ ئەوە دێ دەنە کوردان، یا دی ھێشتا نەھاتیە ئێکلاکرن و دێ ل سەر دانوستاندنان و ھەڤپەیمانیان مینیت، ژ بەر کو ھەتا نوکە ئەمریکا یا ئامادە نینە سەرەدەریێ ل گەل YPG بکەت و دبێژن ئەو یێ ل گەل رژێمێ).

ئەندامێن پارتی داخوازێ ژ سەرکردایەتیا خوە دکەن رۆلێ خوە ئەکتیف تر بکەن بۆ کوبانێ، ل دور وێ یەکێ کا پلانێن پارتیا وان بۆ ڤێ چەندێ چنە، سکرتێرێ پارتی گۆت: (نوکە ئەم کارەکێ رژد دکەین کو رێکێن چارەسەریێ بۆ وان ئاستەنگان ب بینین یێن ھاتینە پێشیا مە و جھێ خوە د ناڤ مللەتێ مە دا موکمتر لێ بکەین، لێ ڤێ چەندێ وەخت بۆ دڤێت و مە بریار یا دا ب رژدی ل سەر کار بکەین).

ل دووڤ گۆتنێن سعود مەلای، ھەتا بەری کارەساتا کوبانێ وان چو بریار نەبوون کو د ناڤ رۆژئاڤایێ کوردستانێ دا کارێن لەشکری بکەن، لێ ژ نوکە وێ ڤە جڤاتا نیشتیمانیێ کوردی ل کوبانێ بریار دایە کو کارێن لەشکری بکەت و گۆت: (ژ ئەڤرۆ وێ ڤە، مە پێدڤی یا ب ھێزەکا لەشکری ھەی).

ل دۆر وێ یەکێ کا بۆچی نوکە وان پێدڤی ب ھێزەکا لەشکری ھەیە، بۆچی بەری دو سالان پێدڤی پێ نەبوون، سعود مەلا گۆت: (ل دەستپێکێ مە کارێن ئاشتیانە و دیموکراسی دکرن ژ بۆ کو رژێمێ بگوھۆرین، لێ رژێمێ شورەشا دیموکراسی ڤەگوھاست بۆ شورەشا لەشکری، وی دەمی ژی مە دخواست دەڤەرا کوردی نەبیتە دەڤەرەکا لەشکری و شەر لێ روو نەدەت، لێ مخابن ئەڤە نێزیکی سالەکێ یە دەڤەرا کوردی ژی بوویە جھێ شەری و گەلەک ئاریشە بۆ کوردان دروست دبن، لەوما ئەم دخوازین بەرەڤانیێ بکەین ژ بۆ کو زێدەتر خراب نەبیت).

دھۆک، لەزگین جۆقی:

بریکارێ وەزارەتا باژارڤانی و گەشتوگوزاری ل ھەرێما کوردستانێ بۆ ئەڤرۆ دیار کر کو ھەر وەلاتیەکێ خانیەکێ زێدەگاڤی ئاڤا کربیت و نەیێ مفادار بیت دێ ل سەر ناڤێ وی ھێتە تاپۆکرن و گۆت “بۆ ھەر مەترەکا دوجارکی ١٠ ھزار ھەتا ٥٠ ھزار دینار دێ ژێ ھێنە وەرگرتن و ھەکە وەلاتیێ خانیەکێ زێدەگاڤی ھەبیت و ژ حوکمەتێ یێ مفادار بیت وی دەمی ئەو خانی ل سەر ناڤێ وێ ناھێتە تاپۆکرن”.

خسرۆ کەمال بریکارێ وەزارەتا باژارڤانی و گەشتوگوزاریێ ھەرێما کوردستانێ دیار کر کو گەلەک وەلاتیان زێدەگاڤی ل سەر ئەردێ چاندنێ و وەزارەتا دارایی کرینە و ھەکە پێرابوون ھەمبەری وان نەبن دێ دیاردا زێدەگاڤیێ ل سەر ئەردێ حوکمەتێ یا بەردەوام بیت و گۆت “پەسندکرنا پرۆژێ قانوونا تاپۆکرنا خانیێن زێدەگاڤی ل پەرلەمانێ کوردستانێ گیرو بوویە و داخوازی دکەین لەز د پەسەندکرنا پرۆژێ قانوونی دا بھێتە کرن داکو ژ ئاریشا خانیێن زێدەگاڤی خلاس بین، ھەر چەندە ١٠٠% ژ ئاریشا تاپۆکرنا خانیێن زێدەگاڤی خلاس نابین، چونکی زێدەگاڤی ل ھەموو دونیایێ دھێنە کرن”.

خسرۆ کەمال بریکارێ وەزارەتا باژارڤانیێ گۆت ژی “د پرۆژێ قانوونێ دا ھاتیە دەستنیشانکرن کو ھەر مەترەکا دوجارکی ب ١٠ ھزار ھەتا ٥٠ ھزار دیناران دێ بۆ وان وەلاتیان ھێتە تاپۆکرن کو زێدەگاڤی ل سەر ئەردێ حوکمەتێ کری، لێ ھەر دەمێ پرۆژێ قانوونێ ھاتە پەسەندکرن پەرلەمانێ کوردستانێ دشێت ڤی کۆژمێ پارەی زێدە بکەت”.

website security
WP Facebook Auto Publish Powered By : XYZScripts.com