ئەڤرۆ نیوز:
ئەڤرۆ ئەینیێ 21.2.2020 وەلاتیێن ئیرانێ ب مەرەما هەلبژارتنێن پەرلەمانی بەرەف سندوقێن دەنگدانێ ڤەچوون.
ئەڤرۆ هەلبژارتنێن خولا ١١ یا پەرلەمانێ ئیرانێ برێڤە چوون، وەلاتیێن ئیرانی ل دەمژمێر ٨ سپێدێ چووینە سەر سندوقێن دەنگدانێ هەتا دەمژمێر ٦ ئێڤاری دێ هەلبژارتن د بەردەوام بن، د دەمەکێ دا کو بانگەشا هەلبژارتنان ل وى ولاتی دەمێ ١٣ رۆژانە دەست پێکریە.
هەر ل گەل هەلبژارتنێن خولا ١١ یێن پەرلەمانێ ئیرانێ دێ هەلبژارتنا ناڤەندێن جڤاتێن باژێرڤانیان ژی بۆ خولا پێنجێ ئەڤرۆ برێڤەچن.
ئەڤرۆ نیوز:
ژ ئەگەرێ بەلاڤبوونا ڤایرۆسێ کۆرۆنایێ ل ئیرانێ، ب بڕیارا حوکمەتا هەرێما کوردستانێ، هاتنوچوونا گەشتیاری ب ڕێیا دەروازێ نێڤدەولەتی یێ حاجی ئۆمەران هاتە داخستن.
ڕاگەهاندنا کۆمەلگەها دەراوازێ نێڤدەولەتی یێ حاجی ئۆمەران ڕاگەهاند، پشتی بڕیارا وەزارەتا ناڤخۆیا حکومەتا هەرێما کوردستانێ، ژ دەمژمێر ١٢ شەڤا دەربازبوویی ڤە هاتنوچوونا گەشتیاران ل عێراقێ بۆ ئیرانێ و بەرۆڤاژی هاتیە راگرتن.
د ڕاگەهاندنێ دا هاتیە، مە بڕیار دایە ب ڕاگرتنا پێدانا ڤیزەیا هاتنە ژوورا هەلگرێن پاسپۆرتا ولاتێ ئیرانێ ب ڕێیا دەروازێن سنوری و ڕاگرتنا گەشتێن وەلاتیێن هەرێما کوردستانێ و عێراقێ بۆ ولاتێ ئیرانێ هەتا دەمەکێ نەدیار، هەروەسا ئەو وەلاتیێن هەرێما کوردستان و عێراقێ کو ل ولاتێ ئیرانێ ڤەدگەڕن دهێنە جۆداکرن و پشکنیێن هوور بۆ وان دهێتە کرن، ب مەرەما پشتڕاستبوون ژ توشنەبوونا وان ب ڤایرۆسێ کۆرۆنایێ.
دەربارەی ڤەلڤینێن بازرگانی دیارکریە، پشتی شێورێ دگەل وەزارەتا ناڤخۆ و وەزارەتا دارایی و ئابووری دێ ئاگەهداریێ دەربارەی وێ چەندێ ژی بەلاڤ کەین.
هەروەسا گۆتیە، داخوازێ ژ وەلاتیێن هەرێما کوردستانێ دکەین ب مەرەما گەشتکرنێ بۆ ئیرانێ سەرەدانا دەروازێ نەکەن و وەلاتیێن ئیرانێ ژی ب مەرەما گەشتکرن بۆ هەرێما کوردستانێ سەرەدانا دەروازێ حاجی ئۆمەران نەکەن.
ئەڤرۆ نیوز:
وەزیڕێ بەرگریا تورکیا دیار کر: مە روو ب ڕووبوونا سه‌ربازی ل گه‌ل رووسیا نەڤێت، لێ ئه‌گه‌ر پێدڤی بكەت دێ هێزێ ب كار ئینین بۆ هندێ داکو ئاگربه‌ست ل ئدلبێ هەبیت.
خولوسی ئاكار، وه‌زیرێ به‌رگریا توركیا بۆ میدیایێن وەلاتێ خوە راگه‌هاند، به‌رده‌وامین ل سەر هنارتنا هێزان بۆ سووریا، ئه‌گه‌ر پێدڤی بكەت دێ هێزێ ب كار ئینین بۆ ڤەگه‌ڕاندنا ئاگربه‌ستێ بۆ ئدلبێ، ئەم درژدین ل گرتنه‌به‌را ڤێ سیاسه‌تێ، بۆ ڤێ ژی مە پلانێن ئه‌ی و بی و سی هەنە.
گۆتیە ژی، به‌رده‌وامبوونا هێرشێن سووریێ دێ بیتە رێگه‌خۆشكه‌ر بۆ هاتنا شه‌پۆلەکا نوو یا كۆچبه‌ران به‌ره‌ف سنۆرێن توركیا، هەروەسا گۆت ژی، هەتاکو سووریا سه‌قامگیر نەبیت، دستۆرەکێ نوو دهێتە دارێژتن، حوکمه‌تەکا دیموكراسی ب رێیا هه‌ڵبژارتنان ده‌ست ب كار دبیت و ئاشتی به‌رقه‌رار دبیت، ئەم هێزێن خوە ژ ئاخا سووریێ ڤەناکێشین.
وەزارەتا بەرگریا رووسیا داخواز ژ تورکیا کربوو، کو پاڵپشتیا تیرۆریستان راوەستینیت، و راگەهاندبوو کو فڕۆکێن تورکیا ئەو گرووپە کربوونە ئارمانج یێن و کو ژ ئالیێ تورکیا ڤە پاڵپشتی لێ دهێتە کرن، لێ خولوسی ئاكار دبێژیت، ب چ رەنگان مە نیەت و مه‌به‌ستا روو ب رووبوونا سه‌ربازی ل دژی رووسیا نییه، دیسان دیدار و كۆمبوون ژی نه‌گه‌هشتینه بنبرکرنێ و ل سه‌ر هه‌موو ئاستان دێ به‌رده‌وام بین.
ئەڤرۆ نیوز:
کوریا باشور راگەهاند، ئێکەمین حالەتێ ژیان ژ دەست دانێ ب ڤایرۆسی کۆرۆنا هاتە تۆمار کرن.
بنگەهێ نەهێلانا نەخوشیێن دهێنە ڤەگوهاستن یێ کوریا باشور راگەهاند، ئێکەمین حالەتێ ژیان ژ دەست دانێ یێ نوو ب ئەگەرێ ڤایرۆسێ کۆرۆنا هاتە تۆمار کرن و بەردەوامن ل سەر ڤەکولینان.
هەروەسا گۆتیە ژی، ٢٢ حالەتێن نوو یێن توشبوونێ ب ڤی ڤایرۆسی تومار کرینە، هژمارا گشتى یا توشبوویان بۆ ١٠٤ کەسان بلندبوویە.
ئەڤرۆ نیوز:
ژ بۆ رێگریکرنێ ل بەلاڤبوونا ڤایرۆسێ کۆرۆنا، وەزارەتا ساخلەمیا هەرێما کوردستانێ، هژمارەکا پێشنیاران ئاراستەی وەزارەتا نافخۆ کریە، ئەو پێشنیار ژی ئەڤەنە:
– رێگریكرن ژ هاتنا وان هه‌موو وەلاتیێن کو ژ ئیرانێ دهێنە هەرێما کوردستانێ ل هەموو خالێن سنوری، چ راسته‌وخۆ و یان نەڕاسته‌وخۆ، هەتا دەمەکی نەدیار ژبلی شاندێن دیبلۆماسیی، كو پشكنینا نۆشداری بۆ بهێتەکرن.
– ئه‌ڤ رێگرییه وەلاتیێن هه‌رێما كوردستانێ ناڤەگریت كو نوکە ل كۆمارا ئیسلامیا ئێرانێ نە، ب مه‌رجەكێ پێگیری ب رێكارێن وه‌زاره‌تا ساخەمیێ بکەن، كو بۆ گه‌ره‌نتی و چاڤدێریكردنێ بۆ دەما 14 رۆژان دێ ڤەکێشیت.
– رێگریكرن ژ هەموو وەلاتیێن هه‌رێما كوردستانێ و عێراقێ بۆ سه‌رەدانا كۆمارا ئیسلامیا ئیرانێ هەتا دەمەکێ نەدیار.
ئەڤرۆ نیوز:
وەزارەتا ڤەگوهاستن و گەهاندنا عیراقێ بۆ رێگریکرنێ ژ بەلاڤنەبوونا ڤایرۆسێ کۆرۆنا هەموو گەشتێن ئەسمانى د ناڤبەرا عیراق و ئیرانی دا راگرتن.
د بەیاننامەیەکی دا وەزارەتا ڤەگوهاستن و گەهاندنا عیراقێ راگەهاند، ئەڤرۆ ٢٠ شواتا ٢٠٢٠ و پشتى راگەهاندنا چەند حالەتێن کۆرۆنا یێ ل ولاتێ ئیرانێ، وەزارەتا ڤەگوهاستنا عیراقێ هەموو گەشتێن ئەسمانى و هێلێن ئەسمانى بۆ وى ولاتی راگرتن.
د وێ بەیاننامێ دا هاتیە ژى، بریارا راگرتنا گەشتێن ئەسمانى د ناڤبەرا ئیران و عیراقێ دا بەرسڤا داخوازیا وەزارەتا ساخلەمیا عیراقێ یە، کو داخوازا راگرتنا هەموو گەشتان کربوو.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویا کرن: د روودانەکا ترافیکێ دا وەلاتیەکێ گیانێ خوە ژ دەست دا.
ناڤهاتی زێدەتر دیار کر: ئەڤ شەڤە روودانەکا هاتنوچوونێ ل سەر جادا گشتی یا ناحیا مانگێشکێ بۆ کومەلگەها باگێرا و ل نێزیک گوندێ گوندک نەبی دناڤبەرا دو ترۆمبێلان دا هاتیە روودان، کو ترۆمبێلەک ژ وان هوندا ئەکسنت تایبەت دهۆک و ترۆمبێلا دیتر نیسان سەنی كرێ دهۆك بوویە، د ئەنجامدا کەسەکێ گیانێ خوە ژ دەست دایە و دو کەسێن دیتر بریندار بووینە و هاتینە رەوانەکرن بۆ نەخوشخانا تەنگاڤیا ل پارێزگەها دهــوکێ.
ئەڤرۆ نیوز:
راگه‌هاندنا كومه‌لگه‌ها ده‌روازێ نێڤده‌وله‌تى یێ ئیبراهیم خه‌لیل دیار کریە، کو ل رێكه‌فتى 2020/1/1 هه‌تاكو 2020/1/31 ژ لایێ تاقیگه‌ها كۆمه‌لگه‌ها ده‌روازێ نێڤده‌وله‌تى یێ ئیبراهیم خه‌لیل ڤه 4008 تون و 796 كیلوگرامێن كه‌ل و په‌لێن جۆدا یێن وەکی (فێقى، گوشتێ مریشكێ، كه‌ره‌ستێن پاقژكرنێ و پێدڤیێن نۆشدار …هتد) هاتینه زڤراندن، ژبه‌ركو لدووڤ رێنمایی یێن پێدڤى نه‌بوون.
ئەڤرۆ نیوز:
ل شەڤا بوری د دو هێرشان دا ل دەڤەرەکا سەر ب فرانکفۆرتا ئەڵمانیا ڤە نەهـ کەس هاتنە کوشتن و وی چەکداری دایکا خوە کوشتیە و پاشی خوە ژی کوشتیە، چار ژ وان کوشتیان کورد بوون، هەڤدەم ناڤێ وان سێ کوردان ژی هاتنە ئاشکرا کرن.
ئەو چار کوردێن د وان دو هێرشێن دا هاتینە کوشتن خەلکێ باکورێ کوردستانێ نە و ئێک ژ وان خەلکێ مێردینێ یە ل باکورێ کوردستانێ، هەرسێ کەس خەلکێ باکورێ کوردستانێ نە، ب ناڤێن گۆكھان گولتەكین، فەرھاد ئونڤار و بیلال گۆكچە، هەتا نوکە ناڤێ ئێکێ نەهاتیە زانین.
ل شەڤا بوری 19-2-2020 د دو هێرشان دا ل هانوو یا سەر ب فرانکفۆرت ڤە 11 کەس هاتنە کوشتن.
ئەڤرۆ نیوز:
وەزارەتا بەرگریا توركی كوشتنا دو سەربازێن تورکی و برینداربوونا پێنج سەربازێن دیتر راگەهاند و ئاشكرا كر، ل بەرامبەر كوشتنا سەربازێن وان، مە چەند پێگەهێن سوپایێ سوری بۆردومانكرینە و مە زێدتر ژ 50 سەربازێن وی وەلاتی كوشتینە.
وەزارەتا بەرگریا توركیا راگەهاند ژی، ژ ئەنجامێ بۆردومانکرنا سەر ئیدلبێ ژ ئالیێ سوپایێ سوریێ ڤە، دو سەربازێن مە هاتینە كوشتن و پێنج سەربازێن دیتر ژی بریندار بووینە.
نيشاندان