ئەڤرۆ نیوز:
رێڤەبەریا خوەسەر یا رۆژئاڤایێ کوردستانێ د داخۆیانیەکێ دا راگەهاند د دەمەکێ دا کو ل هەموو جیهانێ بابەتێ کۆرۆنایێ بوویە ئاریشەکا مەزن و مەترسیێن وێ ل سەر مرۆڤاتیێ رۆژ ب رۆژێ زێدەتر لێ دهێن، تورکیا و هێزێن سەر ب وێ ب چەکێن گران هێرشی خەلکێ سڤیل یێ رۆژئاڤایی کوردستانێ ل عەین عیسا و دەوروبەرێن وێ دکەن.
رێڤەبەریا خوەسەر داخواز ژ جڤاکێ نێڤدەولەتی دکەت کو ل هەمبەر هێرشێن تورکیا و هێزێن سەر ب وێ ڤە بێدەنگ نەمینن.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٨٦٠ کەسێن دی ل هەرێما کوردستانێ تووشی کۆرۆنایێ بووینە و ٢٦ نەخوش ژی مرینە.
ل گۆر ئامارا وەزارەتا ساخلەمیێ ٤٥٤ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ٣٨٣ کەسێن دی تووشی کۆرۆنایێ بووینە و ١١ نەخوش ژی مرینە، هەروەسا ٢٥٨ نەخوشێن کۆرۆنایێ ژی ل پارێزگەها دهۆکێ چارەسەر بووینە.
ئەڤرۆ نيوز. زنار تۆڤی:
رێڤەبەریا به‌ره‌ڤانيا باژێری ل پارێزگه‌ها دهۆكێ بۆ ئەڤرۆ نيوز دیار کر: ئه‌ڤرۆ شەمبیێ، گه‌نجه‌كێ 15 سالى د رووبارێ خابیری دا ل زاخۆ خه‌ندقى.
بێوار عه‌بدولعه‌زيز، به‌رپرسێ راگه‌هاندنا به‌ره‌ڤانيا باژێرى زێدەتر ئاشکرا کر: سنێلەک ب ناڤێ (ع، خ، ع)، كو خه‌لكێ زاخۆيه كه‌فتیە د ئاڤا پرۆژێ زاخۆ دا، د ناڤبه‌را جه‌م سيرمۆ و پرۆژه‌يى دا و خه‌ندقیە.
ئەڤرۆ نیوز:
دەزگەهێن راگەهاندنا ئیسرائیلێ دیار دکەن کو پشتی سودانێ راگەهاندی وان دڤێت پەیوەندیێن خوە ل گەل ئیسرائیلێ ئاسایی بکەن نها ژی ٥ وەلاتێن دی یێن عەرەبی بریار داینە کو پەیوەندیێن خوە ل گەل ئیسرائیلێ ئاسایی بکەن کو ئێک ژ وان ژی سعوودیێ یە.
لێ هەتا نها ژ بلی سعوودیێ ناڤێ چار وەلاتێن دی یێن عەرەبی نەهاتیە راگەهاندن.
ئەو یەک د دەمەکێ دایە کو هەتا نها ئیمارات، بەحرێن، ئوردن، سودان و مسرێ پەیوەندیێن خوە ل گەل ئیسرائیلێ ئاسایی کرینە.
ئه‌ڤرۆ نیوز، زنار تۆڤی:
چه‌ند ده‌مژمێره‌ك ماینه د كلاسیكۆیا ئێكێ ل ڤى وه‌رزى، دناڤبه‌را هه‌ردو یانێن ریال مه‌درید و بارسێلۆنا د گه‌را حه‌فتێ یا خولا ئیسپانى دا.
کلاسیکۆیا ڤێ جارێ دناڤبه‌را رۆنالدۆى و میسی دا نابیت، دێ دناڤبه‌را ڤینیسیۆس جۆنیۆرى و ئەنسۆ فاتی و نیشاندانێن مه‌زن یێن لاواندا بیت، هه‌ر چه‌نده ململانا دناڤبه‌را فاتی و ڤینیسیۆسى ب چ ره‌نگان ناهێته بەراورد کرن ل گه‌ل وێ ململانا دناڤبه‌را رۆنالدۆ و میسی دا هەى.
فاتی گه‌نجترین یاریزانێ بارسێلۆنایە ل سەده‌یا 21 پشكداریێ د یاریێن فەرمیدا بكه‌ت، ژیێ وى ب تنێ 17 سال و 48 ڕۆژن، ڤینیسیۆس ژى بوویه گه‌نجترین یاریزان كو شیابیت دیاریەكا كلاسیكۆدا ل سەدەیا 21 گۆلێ تۆمار بكه‌ت ، د وی یاریێ دا ریال شیا ب ئەنجامێ دو گۆلان یاریێ ببه‌ت.
هەردویان 12 گۆل هەنه، هەردو ل هەمان جهـ یاریێ دکەن ، ل ره‌خێ چەپێ، هەردویان پشكداری د چار یاریان دا كریە ل خولا ئیسپانی، بەلێ فاتی زێده‌تر كاریگەرى هه‌یه، د 231 خولەكان دا پشكداری كریە ، سێ گۆل تۆمار كرینە و گۆله‌ك ژى دروست كریە، بەلێ ڤینیسیۆسى 280 خولەكان پشكداری كریە و دو گۆل تۆمار كرینە و چ گۆل دروست نەكرینە.
ئه‌ڤرۆ نیوز، زنار تۆڤى:
ده‌سته‌یا ده‌سپاكیا عیراقى راگه‌هاندیه: دێ مووچێ وان په‌رله‌مانتار و به‌رپرسێن حكومى هێته راگرتن، ئه‌وێن قه‌بارێ مولك و سامانێ خوه ئاشكرا نه‌كرین.
رۆژناما سه‌باح یا عیراقى، ئه‌ڤرۆ شه‌مبیێ راگه‌هاندیه، ل سه‌ر داخوازیا ده‌سته‌یا ده‌ستپاكیێ مووچێ وان په‌رله‌مانتار و به‌رپرسێن ئه‌منى ناهێته خه‌رج كرن، یێن سامانێ خوه ئاشكرا نه‌كرین، هه‌ر چه‌نده 94% یا په‌رله‌مانتارێن عیراقى پابه‌ند بووینه ب ڤێ بریارێ.
ئه‌و ژى گۆتیه: هه‌ر ئێك ژ سه‌رۆكاتیا په‌رله‌مانى، سه‌رۆكاتیا جڤاتا وه‌زیران، وه‌زیر و جێگرێن وان، ئه‌ندامێن په‌رله‌مانى و ئه‌وێن د وان پله‌یان دا، سه‌رۆكێ جڤاتا بلند یا دادى، داواكارێ گشتى، سه‌رۆك و ئه‌ندامێن دادگه‌ها بلند یا فیدرالى لدووڤ قانوونا ده‌سته‌یا ده‌ستپاكیێ دڤێت سامانێ خوه ئاشكرا بكه‌ن.
موعته‌ز عه‌باسى، رێڤه‌به‌رێ خوه پارێزیێ ل ده‌سته‌یا ده‌ستپاكیێ گۆتیه: هه‌رسێ سه‌رۆكاتیان و هه‌موو وه‌زیران، ژ بلى وه‌زیرێ دارایى و په‌یوه‌ندیان سامانێ خوه ئاشكرا كریه، لیستا ناڤێن په‌رله‌مانتاران و به‌رپرسێن دیتر و وه‌زیران هاتینه هنارتن بۆ جهێن شۆله‌ژێ، داكو مووچێ وان بهێنه راگرتن، هه‌تا وى ده‌مێ زانیاریان دده‌نه ده‌سته‌یا ده‌ستپاكیێ، هه‌كه ئه‌و به‌رپرسه د به‌رده‌وام بن ژ ئاشكرا نه‌كرنا زانیاریان ده‌رباره‌ى سامانێ خوه، دێ ده‌سته‌یا ده‌ستپاكیێ رێكارێن تۆندتر ل دژى وان گرته‌به‌ر.
ئه‌ڤرۆ نیوز:
ئه‌ڤرۆ شه‌مبیێ، گۆره‌كێ ب كۆم یێ ژنێن كوردێن ئێزدى ل شنگالێ هاته هه‌لكۆلان، كو پێشبینى دهێته كرن رۆفاتێن زێده‌تر ژ 75 ژنێن كوردێن ئێزدى تێدا بیت، ئه‌ڤه ئێكه‌م گورێ ب كۆم یێن ژنێن كوردێن ئێزدى یى دهێته هه‌لدان.
رێوره‌سمه‌ك بۆ هه‌لدانا گۆرێن ب كۆم برێڤه دچیت و سوبه‌هى ئێكشه‌مبى دێ ده‌ست ب هه‌لدانا رۆفاتان هێته كرن، ئه‌و ژنێن د وى گۆرى دا ب كۆم هاتینه ڤه‌شارتن، ژیێ هه‌موویان د سه‌ر 40 سالیێ دایه و هه‌موو خه‌لكێ گوندێ كۆچۆ نه.
د وى رێوره‌سمى دا نوونه‌رێ سه‌رۆك وه‌زیرێن عیراقێ و نوونه‌رێ وه‌زراه‌تا شه‌هید و ئه‌نفالكریان یا هه‌رێما كوردستانێ، نوونه‌رێ ده‌سته‌یا ڤه‌كۆلینێ د به‌لگه‌نامێنتاوانێن شتگالێ ل هه‌رێما كوردستانێ و هژماره‌كا چ كه‌سوكارێن قوربانیان به‌رهه‌ڤ ببوون.
ئەڤرۆ نیوز:
شارەزایەکێ ترۆمبێلان دبێژیت، وەک شارەزایەک و چەندین ئەندازیارێن میکانیکی ژی ب چ شێوان ل گەل چەتەلکرنا ترۆمبێلان دا نینن، بتایبەتی ئەو ترۆمبێلێن مۆدێلاوان بلند و سەر 2013 دا، چونکی مەترسیا سۆتنا عەقلی هەیە، هەکە گەلەک پێدڤی کر، دڤێت بزاڤێ بکەی ب شێوازەکی زانستی چەتەل بکەی، بۆ هندێ کێمترین مەترسی هەبیت ل سەر سۆتنا عەقلێ ترۆمبێلێ.
شێرزاد وەسۆ، شاره‌زا و ئه‌ندازیارێ میكانیكی دیار کر: شێوازێ چەتەلکرنا پاتریا ترۆمبێلێ ب شێوەکێ زانستی ئەنجام بدە:
. دەستنیشانکرنا گەرم + و سار – یا ھەردو پاتریان، بەلێ باشترە دەستپێکێ خەتێ سار گرێدەی پاشی یێ گەرم.
. ئەو ترۆمبێلا چەتەلی پێ دکەی باشترە کار بکەت و لائێتان ژی هەل بکەی.
. ب کێمی دو خولەکان وێ ترۆمبێلا پاتریا وێ مری کارپێ بهێته کرن.
. هەکە کار کر، پاشی چەتەلی ژێ ڤەکە، بەلێ باشترە ل دەستپێکێ خەتێ گەرم ژێ ڤەکەی پاشی یێ سار.
پاتریێن ھندەک ترۆمبێلان دناڤا ترۆمبێلێ دانە، ئانکو د سندوقێ یان ل ژێر کورسیێ سەکەنی دایە، زۆربەیا وان ترۆمبێلان دناڤ بۆندی دا جهێ تایبەت بۆ هاتیە ڤەکرن بۆ چەتەلکرنێ و پێدڤی ناکەت راستەوخۆ وێ پاتریێ چەتەل بکەی.
دیسان ترۆمبێلا ئەمریکی یا د سەر 2014 دا، ب تایبەتی Jeep ، هەکە گەلەک پێدڤی نەبیت، نابیت بهێتە چەتەل کرن.
عەقلێ ترۆمبێلێ چاڤەرێی سەر نەهـ ڤۆلتیێ دکەت تۆ ب کار بینی، بەلێ دەمێ پاتری ژ پێنج ڤۆلتیێ ب چەتەلی بلند دبیت بۆ 12 ڤۆلتیێ، دێ گەلەک مەترسیا سۆتنێ ل سەر عەقلێ ترۆمبێلێ دروست کەت.
ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: ل چیایێ پیرس یێ گرێدایی قەزا ئاکرێ ڤە، ئاگر بەربوو ترۆمبێلەکێ و ب تەمامی سۆت.
ناڤهاتی گۆت ژی: ئەڤرۆ ئەینیێ، ٢٣ چریا ئێکێ ٢٠٢٠، ل چیایێ پیرس ل ناحیا دینارتە یا گرێدایی قەزا ئاکرێ، ئاگر بەربوو ترۆمبێلەکێ ژ جۆرێ جێب تایبەت و ب تەمامی سۆتیە.
ئەو ژی دیار کریە: د وێ روودانێ دا چ زیانێن گیانی نەبووینە و لێ زیانێن مادی هەبووینە.
نيشاندان