ئه‌ڤرۆ نیوز، نه‌وزاد هلۆرى:

ده‌مه‌كێ كێم به‌رى نوكه‌ ل ئاڤاهیێ قایمقامیا دهۆكێ هه‌رئێك ژ رێڤه‌به‌ریا گشتى یا باژێرڤانیان ل پارێزگه‌ها دهۆكێ و قایمقامیا دهۆكێ و سه‌رۆكاتیا باژێرڤانیا دهۆكێ و رێڤه‌به‌ریا گشتى یا به‌ره‌ڤانیا باژێرى و رێڤه‌به‌ریا گشتى یا پۆلیسێن پارێزگه‌ها دهۆكێ و رێڤه‌به‌ریا گشتى یا هاتن و چوونا پارێزگه‌ها دهۆكێ و رێڤه‌به‌ریا گشتى یا ساخله‌میا پارێزگه‌ها دهۆكێ و رێڤه‌به‌ریا سه‌خبێریا رێك و پرا ل پارێزگه‌ها دهۆكێ، كومبوونه‌ك ل بارا ره‌وشا كه‌شوهه‌واى و بارینا به‌فرا پێشبینیكرى یا ئه‌ڤ شه‌ڤه‌ و سوبه‌هى ئه‌نجام دا.

دیار به‌حرى ره‌سول، رێڤه‌به‌رێ گشتیێ باژێرڤانیان ل پارێزگه‌ها دهۆكێ ل بارا ناڤه‌رۆكا كومبوونێ بۆ ئه‌ڤرۆ نیوز گۆت: (ده‌مه‌كێ كێم به‌رى نوكه‌ ل ئاڤاهیێ قایمقامیا دهۆكێ كومبوونه‌ك ل بارا ره‌وشا كه‌شوهه‌واى ب ئاماده‌بوونا هه‌موو سازیێن په‌یوه‌ندیدار هاته‌كرن، ئه‌وا پێدڤى بۆ رامالینا به‌فرێ و ڤه‌كرنا رێیێن سه‌ره‌كى و لاوه‌كى هاته‌كرن).

زێده‌تر گۆت: (ژبلى رامالینا به‌فرێ ئه‌گه‌ر ب گوره‌ى پێشبینێن كه‌شوهه‌واى بارى، ب رێیا كومپانیا ئه‌رتوش رێژا خوێیا پێدڤى بو حه‌لاندنا به‌ستى هاتیه‌ به‌رهه‌ڤكرن بۆ ڤه‌كرنا رێیا ئه‌گه‌ر به‌ستى درۆست بو ب تایبه‌تى ل رێیێن سه‌ره‌كى).

ژلایێ خوڤه‌ قایمقامێ دهۆكێ د كونگره‌یه‌كێ رۆژنامه‌ڤانى دا دیاركر كو ئاماده‌كارییه‌كا باشتر ژ به‌رێ هاتیه‌كرن و گۆت: (مه‌ شانه‌كا به‌رنگاربوونا قه‌یرانان ب ئه‌ندامه‌تیا هه‌موو سازیێن په‌یوه‌ندیدار پێكئنایه‌، ب گوره‌ى پێشبینێن كه‌شوهه‌واى دێ به‌فره‌كا زۆر ل سنورێ پارێزگه‌ها دهۆك و سه‌نته‌رێ باژێرى باریت، هه‌موو ئاماده‌كارى هاتنه‌كرن و تیمێن پێدڤى بۆ رامالینا به‌فرێ و حه‌لاندنا به‌ستى هاتنه‌ پێكئینان داكو چو كێشه‌ بۆ شوفێر و وه‌لاتیان دروست نه‌بیت).

ژلایێ خوڤه‌ سه‌رۆكێ باژێرڤانیا دهۆكێ دیاركر كو ب رێیا 10 ئامیرێن رامالینا به‌فرێ دێ سه‌نته‌رێ باژێرێ دهۆكێ هێته‌ پاقژكرن، ئه‌ڤه‌ زێده‌بارى وێ یه‌كێ كو خوێیا پێدڤى ب رێیا سێ تیما دێ به‌ستى هێته‌ حه‌لاندن.

 
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویا کرن: د روودانەکا ترافیکێ دا کەسەک بریندار بوو.

ناڤهاتی زێدەتر دا دیار کرن: ئەڤرۆ چارشەمبی 2020/2/12 ل دەمژمێر (6:30) شەڤ دناڤا سەنتەرێ قەزا زاخۆ دا و ل جادا شوقا دو ترۆمبێلا لێکدا، کو ( ترۆمبێلەکا تایبەت مازدا ل گەل ترۆمبێلەکا بارهەلگر کەیا دوتەن)، د ئەنجامدا کەسەک بریندار بوو، هەروەسا زیانێن مادى ب وان هەردو ترۆمبێلان كەفتن، هەروەسا ترۆمبێلا کەیا دوتەن وەرگەریایە.