ئەڤرۆ نیوز:
موراد ئاکباشلی کرێکارەکێ کورد کو ل دەمێ کاری دا سترانان ب کوردی دبێژیت ب رێیا تۆرێن جڤاکی گەلەک ناڤدار بوویە، پشتی بەلاڤبوونا چەندین سترانێن وی گەلەک هونەرمەندێن ناڤدارێن تورکیا پشتەڤانیا خوە بۆ وی دیار کرن و راگەهاندن ئەو بەرهەڤن هاریکاریا وی بکەن دا ببیتە ئێک ژ ستێرێن گەش بۆ پاشەرۆژا تورکیا.
موراد ئاکباشلی خەلکێ پارێزگەها وانێ یێ باکورێ کوردستانێ یە و د ژیێ ٢٠ سالیێ دایە.
ئەڤرۆ نیوز:
ل گۆر راپرسیەکێ ل تورکیا د ماوەیێ ٥٠ رۆژێن بۆری دا نێزیکی ١٥ هزار ئەندامێن ئاکپارتیێ ژ وێ پارتیێ جودا بووینە.
ل ئالیێ دی بەرپرسەکێ پارتیا پاشەرۆژێ یا تورکیا کو ئەحمەد داوود ئوگلۆ سەرۆک وەزیرێن بەرێ یێ تورکیا سەرۆکاتیا وێ دکەت ژی راگەهاند کو هەموو کەسێن ژ ئاکپارتیێ جودا ببن دێ دەنگێ خوە دەنە پارتا پاشەرۆژێ.
ئەڤرۆ نیوز:
ئیلهام ئەحمەد هەڤسەرۆکا جڤاتا سووریا دیموکرات راگەهاند کو د هەڤدیتنا وان یا ل گەل شاندێ روسیا، رژێما سووریێ قەبوول کریە کو ب چاڤدێریا روسیا ل گەل رێڤەبەریا رۆژئاڤایێ کوردستانێ هەڤدیتنان بکەت.
ناڤهاتیێ راگەهاند کو روسیا بەردەوام فشارێن خوە ل سەر رژێما ئەسەدی زێدە دکەت دا ل گەل رێڤەبەریا رۆژئاڤایێ کوردستانێ دەست ب دانوستاندنان بکەت، دهێتە چاڤەرێکرن کو ل رۆژێن داهاتی گەرەکا نوو یا دانوستاندنان ل گەل شامێ دەستپێ بکەت.
ئەڤرۆ نیوز:
ل گۆر راپۆرتەکا ئاژانسا سپوتینگ یا روسیا ژ دوهی وەرە هێزێن سووریێ ب پشتەڤانیا فرۆکێن شەری یێن روسیا شیاینە ١٨ جهێن ستراتیژی و چەندین رێیێن سەرەکی یێن ئدلبێ کۆنترۆل بکەن و هێزێن تورکیا ژی نەچار ماینە پاشڤە ڤەگەرن.
دەزگەهێن راگەهاندنا تورکیا ژی دیار دکەن کو ژ دوهی وەرە هێزێن تورکیا ب چەکێن گران بەرێ خوە داینە ئدلبێ دا نەهێلن رژێما سووریێ ئدلبێ کۆنترۆل بکەت.
ئەڤرۆ نیۆز، قائید میرۆ:
بڕیارە ھژمارەک دیدارێن ئابوری دناڤبەرا بازرگانێن ھەرێما کوردستانێ بھێنە رێڤەبرن و بەرپرسەکێ ژۆرا پیشەسازی و بازرگانی ژی ئاشکراکر، ئەڤان دیداران دێ کاریگەری لسەر بزاڤێن بازرگانی ھەبیت.
ئەسکەندەر محەمەد، بەرپرسێ راگەھاندنا ژۆرا پیشەسازی و بازرگانیا ھەرێما کوردستانێ بۆ ئەڤرۆ نیۆز دیارکر” بڕیارە ئەڤسالە ھژمارەک دیدارێن بازرگانی دناڤبەرا بازرگانێن جیھانێ و یێن ھەرێما کوردستانێ بھێنە ئەنجامدان و تێدا دێ چەندین ولات پشکداریێ بکەن.
ئەسکەندەر محەمەد دبێژیت” ئەنجامدانا ڤان دیدارێن بازرگانی دێ کاریگەری لسەر زێدەبوونا بزاڤێن بازرگانی دناڤبەرا ھەرێم و جیھانێ ھەبیت، بتایبەتی ئەڤسالە رەوشا بازرگانی بەرەف گەشە کرنێ دچیت و پێشبینی دھێتەکرن ھێشتا رەوشا ئابوری باشتر بیت ل سالێن بۆری.
ئەڤرۆ نیوز:
دەزگەهێن راگەهاندنا روسیا دیار دکەن کو شاندێ روسیا دوهی پەیاما پوتینی گەهاندیە ئەردۆگانی و تێدا پوتین داخواز ژ تورکیا کریە کو هەموو هێزێن خوە ژ ئدلبێ و دەڤەرێن دی یێن سووریێ ڤەکێشیت و پشتەڤانیێ ل گرۆپێن تیرۆرستی ژی نەکەت.
پوتینی ئەو یەک ژی دیار کریە کو ئێدی دەم یێ هاتی کو تورکیا هەموو هێزێن خوە ژ ئاخا سووریێ ڤەکێشیت، چونکو پێدڤیە حوکمەتا سووریێ هەموو ئاخا سووریێ کۆنترۆل بکەت و پێدڤی ب مانا هێزێن بیانی ل سووریێ ناکەت.
ئەڤرۆ نیوز:
د. ڤیان سەبری سەرۆکا فراکسیۆنا پارتی ل پەرلەمانێ عیراقێ راگەهاند کو بریارە رۆژا سێشەمبیێ سەرۆکێ هەرێما کوردستانێ نێچیرڤان بارزانی ل گەل سەرۆکێ فراکسیۆنێن کوردی ل پەرلەمانێ عیراقێ کۆمبیت.
ناڤهاتیێ راگەهاند کو د کۆمبوونێ دا دێ بەحسێ رەوشا عیراقێ و کابینا نوو یا حوکمەتێ و هەروەسا پەیوەندیێن هەولێرێ و بەغدایێ هێتە کرن و گۆت: (مەرەم ژ کۆمبوونا سەرۆکێ هەرێمێ بۆ ئێک هەلویستیا هەموو فراکسیۆنێن کوردی ل بەغدایە).
نيشاندان