ئه‌ڤرۆنیۆز، هه‌رهین محه‌مه‌د:
هونه‌رمه‌ندێ‌ شێوه‌كارو باش نڤیس زیاد شینو كو نوكه‌ ل وه‌لاتێ‌ به‌رلین پایته‌خێ‌ ئه‌لمانیا دژیت دیداره‌كێ‌ دا بۆ ئه‌ڤرۆ نیۆز دیاركر كو به‌ری چه‌ند روژان پیشانگه‌هه‌كا هه‌ڤپشك یا شێوه‌كاری و كه‌ڤالێن باشنڤیسینێ‌ ژێر ناڤێ‌ (هه‌ست) ل گه‌ل خانما شێوه‌كار(مه‌نسوره‌ یه‌كتا) كو خه‌لكا وه‌لاتێ‌ ئیرانێ‌ یه‌ ل گه‌له‌ریا گرین هێل ڤه‌كر و پیشانگه‌هه‌ ژ سیه و پێچ كه‌ڤالان پێك هاتبوو و هه‌ژده‌ كه‌ڤال یێن وی بوون و هه‌ڤده‌كه‌ڤال یێن خانما ناڤهاتی بوون پیشانگه‌ه دێ‌ یا به‌رده‌وام بیت بۆ ده‌مێ‌ دوهه‌یڤان.
شینوی زێده‌تر گۆت: دڤێ‌ پیشانگه‌هێ‌ دا پتریا كه‌ڤالێن من تیپێن كوردی لاتینی و ئه‌ره‌بی ل سه‌ركه‌ڤالان ب شێوه‌كێ‌ هونه‌ری هاتبوونه‌ نمایشكرن و ئه‌و گوتنێن كوردی یێن مه‌زنان من ڤه‌گوهاستبوونه‌ زمانێ‌ ئه‌لمانی وب شێوه‌كێ‌ راسته‌و خوه‌ بینه‌رێن پیشانگه‌هێ‌ دكه‌ڤالێن من گه‌هشتینه‌ و چونكو بۆ زمانێ‌ ئه‌لمانی ژی هاتبوونه‌ وه‌رگێران.

ئه‌ڤرۆ نیوز، مه‌حمود نهێلى:

تاوه‌ر و كومه‌لگه‌ها یه‌لماز گووینه‌ى، وه‌ك هه‌شته‌مین سه‌رسورهێنه‌رێن جیهانى، پرۆژه‌یێ كومپانیا هاوار یا فیلم و ناوه‌ندا سینه‌مایى و رۆژنامه‌ڤانیى یا به‌ده‌رخانه‌ ل باژارێ سلێمانیێ.

هاوار موسته‌فا خان خودانێ كۆمپانیا هاوار یا فیلمان بۆ به‌رهه‌م ئینان و دابه‌شكرنا هۆنه‌رى بۆ ئه‌ڤرۆ نیوز دیار كر، كو ئه‌ڤ پرۆژه‌یه‌ ژ هزرا وى بوویه‌ و دێ بیته‌ هه‌شته‌مین سه‌رسوهێنه‌رێن نوو یێن جیهانى و گۆت: ئه‌ڤ پرۆژه‌یه‌ یێ سینه‌مایى و گه‌شتیارى یه‌ و هه‌كه‌ بچیته‌ دبوارێ جێ به‌جێ كرنێ دا دێ بیته‌ ئێكه‌م پرۆژه‌ د بوارێ سنه‌مایى دا ل كوردستانێ.

ناڤهاتى دیار ژى كر، ئه‌ڤ پرۆژه‌یه‌ پێك دهێت ژ دروستكرنا تاوه‌ره‌كی ل سه‌ر شێواز و شكلێ یه‌لماز گووینه‌ى كو بلنداهیا وێ دگه‌هیته‌ 57 میتران كو ژ موزه‌خانه‌یه‌كى و بار و كافى ورێستورات و جهێ بهێنڤه‌دانێ و سه‌ره‌دانكرنێ تێدا هه‌یه‌ و گۆت: ئه‌ڤ پرۆژه‌ دشێت 470 به‌ 620 كه‌سان وه‌ربگریت رۆژانه‌ كو دهێته‌ پیشبینى كرن داهاتى وێ یێ سالانه‌ دورێن 10 ملیۆن دۆلاران بیت.

هاوار موسته‌فا خان كو هه‌ڤده‌م رێڤه‌به‌رێ گشتى یێ ناوه‌ندا سینه‌مایى و رۆژنانه‌ڤانى یا به‌درخانه‌ ژى ئاشكرا كر، كو ل نێزیكى ڤى پرۆژه‌ى نه‌خشه‌یێ دروستكرنا چه‌ندین پر‌وژێن دیتر هه‌یه‌ وه‌ك دروستكرنا زانكۆیه‌كێ بۆ زانستێن میدیایى و سینه‌مایى و جهه‌ك بۆ ئاهه‌نگێن دابه‌شكرنا خه‌لاتێ یه‌لمازه‌ گوونه‌ى ب ئاستێ خه‌لاتێ ئوسكار و یاریگه‌ه و خانه‌یێن ئوپێرایى و هه‌روه‌سا جهێ خلیسكانێ ل سه‌ر به‌ستى و پێشانگه‌ها ترۆمبێلان و به‌ریكانێن نیڤده‌وله‌تى یێن هه‌سپ سواریێ ل گه‌ل چه‌ندین پارك و مه‌له‌ڤانگه‌ه و كابینه‌یێن گه‌شتیارى كو دێ ل سه‌ر رووبه‌رێ 20 هزار دونه‌مین ئه‌ردى هێته‌ چێكرن .

خویا كر، كوژمێ پێدڤى بۆ دروستكرنا ڤى پرۆژه‌ى دگه‌هیته‌ 2 ملیار دۆلاران و 5 بۆ 10 سال دڤێن تا دووماهیك بهێت، و د دوو سالێن ئێكێ به‌شه‌كى زۆرێ پرۆژه‌ى دێ هێته‌ ڤه‌كرن تایبه‌تى یێن گرێدایى ب گه‌شتیاریێ ڤه.

داخاز ژ و سه‌رمایه‌دار و خه‌لكێ كوردستانێ ژى كر، به‌شدار بن د چێكرنا ڤى پرۆژه‌ى دا كو بتنێ ئه‌و دشێن ئه‌نجامدانا ڤى پرۆژه‌ى سه‌ربێخن.