ئه‌ڤرۆنیۆز، سالار دۆسكى:

ب ئاماده‌بوونا هه‌ژماره‌كا باش ژ هه‌ڤال و دوست و كه‌س و كارو وه‌رزشڤانێن هه‌رێمێ و عیراقێ، ئێڤاریا ئه‌ڤرۆ ل هۆلا كۆنگران ل باژێرێ دهۆكێ چل رۆژیا وه‌رزشڤانێ دێرینێ باژێرێ دهۆكێ(بشار مسته‌فا پیرۆمه‌رى) هاته‌ ساخكرن.
رێوره‌سمان ده‌ستپێكرن ب خواندنا چه‌ند ئایه‌تێن قورئانا پیرۆز و خۆله‌كه‌كێ بێ ده‌نگى وه‌ك رێزگرتن بۆ گیانێ پاكێ شه‌هیدێن كوردستانێ، دویف دا چه‌ند په‌یڤه‌ك هاتنه‌ خواندن، فلمه‌كێ دوكومێنتارى ل سه‌ر ژیانا وه‌رزشڤانێ خودێ ژێ رازى هاته‌ پێشكێشكرن، دووماهیێ په‌یڤا بنه‌مالێ هاته‌خواندن ژلایێ برایێ ره‌حمه‌تى (ئیسلام مسته‌فا پیرۆمه‌رى) ڤه‌ خواندن و سوپاسیا هه‌موو ئالیێن پشكداركر.
جمیل خه‌لیل وه‌رزشڤانێ دێرینێ پارێزگه‌ها دهۆك، ل دور وه‌غه‌ركرنا ره‌حمه‌تى گۆت: ژیانا خۆ هه‌موو ته‌رخانكربوو بۆ وه‌رزشێ ل ده‌سپێكێ وه‌ك یاریكه‌ر و دووڤ دا بیاڤێ كارگێرى و گه‌هشتیه‌ پلێن بلند ل سه‌ر ئاستێ هه‌رێمێ و ده‌رڤه‌، ب زحمه‌ت جهێ وى بهێته‌ پركرن.
جهێ ئاماژه‌كرنێ یه‌، وه‌رزشڤانێ دێرین بشار مسته‌فا پیرۆمه‌رى ژ دایك بوویێ 1/7/1957 ل گوندێ پیرۆمه‌را ل ده‌ڤه‌را دوسكیان ژدایك بوویه‌، خواندنا سه‌ره‌تایى ل قوتابخانا هندرین و ناڤنجى ل قوتابخانا ئاشتى ته‌مامكریه‌، ل سالا 1974 ده‌ست ب وه‌رزشێ كریه‌ وه‌ك یاریكه‌رێ یاریا ڤولیبوولێ، ل سالا 1977 باوه‌رناما دبلوم دبیاڤێ وه‌رزشێ دا ل خانا مامۆستان وه‌رگرتیه‌، ل سالا 1987 ژیانا هه‌ڤژینیێ پێك ئینایه‌، ل سالا 1990 ژلایێ حوكمه‌تا عیراقێ ڤه‌ هاتیه‌ ده‌ست نیشانكرن بۆ سه‌ركێشا شاندێن وه‌رزشى، ل سالا 1996 به‌ر ب جیهانا بازرگانى چوویه‌ل سالا 2003 هاتیه‌ ده‌ست نیشانكرن بۆ نوونه‌راتیا كوردان ل لژنا ئولومپى یا عیراقێ وه‌ك نوونه‌رێ پارتى دیموكراتى كوردسان و بوویه‌ جێگرێ سه‌رۆكێ ئێكه‌تیا بوكسانێ یا عیراقێ، سالا 2004 بوویه‌ جێگرێ سه‌رۆكێ لژنا ئولومپى یا عیراقێ و چه‌ندین كونفرانس و بزاڤێن وه‌رزشى ل سه‌ر ئاستێ جیهانێ پشكدار بوویه‌، ل شه‌ڤا 26-27هه‌یڤا 12/2019 وه‌غه‌را دووماهیێ كر.
ژ ده‌سكه‌فتێن بشار مسته‌ڤا
*به‌ست ڤه‌ ئینانا كوبا ئاسیا یا فوتبوولێ.
*بده‌ست ڤه‌ ئینانا 16 مه‌دالیێن ره‌نگى ل قاره‌مانیا عره‌بى دا ل وه‌لاتێ جه‌زائیر
*سه‌رپه‌ررشتیكرنا فائیلا نووژه‌نكرنا یاریگه‌ها شه‌عب ل به‌غدا
*سه‌رۆكێ شاندێ عیراقێ بوو ل ئولپیاتێن یونان
*رۆله‌كێ سه‌ره‌كى هه‌بوو دپێكئینانا ئولمپیا كوردستانێ دا ل سالا 2006
*چه‌ندین قاره‌مانیێن جودا دا سه‌ركێشیا شاندێن عیراقێ كریه‌
* پشكدارى چه‌ندین كونفرانسێن وه‌رزش یێن نیف ده‌وله‌تى دا كریه‌ ل سه‌ر ئاستێ عیراقێ و ئاسیا و جیهانێ.