ئەڤرۆ نیوز:
پشتی شەرێ دو رۆژێن بۆری یێن د ناڤبەرا هێزێن سووریا دیموکرات و رژێما سووریێ دا دوهی ئەمریکا کاروانەکێ دی یێ سەربازی رەوانەی رۆژئاڤایێ کوردستانێ کر و هێزێن ئەمریکا ب چەکێن گران ل نێزیکی باژێرێ دێرکی بجه بووینە.
ژێدەرێن میدیایی ل رۆژئاڤایێ کوردستانێ ژی دیار دکەن کو هێزێن ئەمریکا دبێژن ئەو رێ نادەن هێزێن رژێما سووریێ بەر ب رۆژئاڤایێ کوردستانێ ڤە بهێن و دێ بەرسڤا رژێما سووریێ دەن.
ئەڤرۆ نیوز:
ناڤەندا چاڤدێریا مافێن مرۆڤی ل سووریێ راگەهاند کو پشتی گەفێن روسیا، تورکیا هندەک هێزێن خوە یێن ل حەما و دەوروبەرێن ئدلبێ ڤەکێشایە و بەرپرسەکێ وەزارەتا دەرڤە یا روسیا ژی دیار کریە کو وان داخواز ژ تورکیا کرینە هندەک دەڤەران ل سووریێ چۆل بکەت دا وەلاتی بشێن ڤەگەرنە ڤە مالێن خوە.
چاڤدێرێن سیاسی ژی دیار دکەن کو پشتی تورکیا چەکدارێن تیرۆرست ژ سووریێ و لیبیا برنە هەرێما قەرەباخێ ئەو یەک بوویە ئەگەر کو پەیوەندیێن تورکیا و روسیا پتر ئالۆز ببن.
ئەڤرۆ نیوز:
بالیۆزخانا بریتانیا ل بەغدا دیار دکەت کو هێرشا ل سەر بارەگایێ لقێ پارتی دێ بیتە ئەگەرێ ئالۆزبوونا رەوشا عیراقێ و ئەو یەک د خزمەتا پێکڤەژیانێ و دیموکراسیێ دا نینە و دڤێت حوکمەتا عیراقێ وان کەسان سزا بدەت یێن کو هێرشی بارەگایێ لقێ پارتی ل بەغدا کرینە.
بالیۆزخانا بریتانیا ئەو یەک ژی دیار کریە کو دڤێت هەموو پرسێن ل عیراقێ ب رێیا دیالوگێ و دانوستاندنان بهێنە چارەسەر کرن و ب توندوتیژیێ چو پرسەک چارەسەر نابیت و دێ رەوش ئالۆزتر لێ هێت کو ئەو یەک د بەرژەوەندیا چو ئالیەکێ دا نینە.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٧٩٧ کەسێن دی ل هەرێما کوردستانێ تووشی کۆرۆنایێ بووینە و هەروەسا ٣٢ نەخوشێن کۆرۆنایێ ژی مرینە.
ل گۆر ئامارا وەزارەتا ساخلەمیێ د ماوەیێ ٢٤ دەمژمێرێن بۆری دا ٤٦٥ نەخوشێن کۆرۆنایێ ژی ب تەمامی چارەسەر بووینە کو ٢٦٠ ژ وان ل پارێزگەها دهۆکێ نە.
ئه‌ڤرۆ نیوز، زنار تۆڤى:
هونه‌رمه‌ند عه‌مه‌ر گوندى، د دیداره‌كێ دا بۆ ئه‌ڤرۆ نیوز دیار كر: نوكه ئه‌و مژوولى كلیپ كرنا سترانه‌كێ یه ب ناڤێ دینێ و دینۆ، كو ئه‌ڤ سترانه ژ ئه‌لبۆما وى یا سالا 2009 یا ب ناڤێ ” ناڤێ ته چیه” یه، وى ل وه‌لاتێ ئه‌لمانیا ئه‌ڤ سترانه كلیپ كریه، هه‌روه‌سا ئه‌ڤ سترانه ژ په‌یڤ و ئاوازێن هه‌لبه‌ستڤان یوسف رۆمانى نه، وى ئه‌ڤ سترانه ب شێوى دویت ل گه‌ل خانما سترانبێژ فه‌یرۆز شاه گۆتیه، كو سترانبێژه‌كا باكورێ كوردستانێ یه، كارێ وێنه‌كرنێ و ده‌رهێنانێ ژ ئالیێ كچا وى ژینێ ڤه هاتیه كرن، لێ ژبه‌ركو فه‌یرۆز شاه ل توركیا بوویه، له‌وما ل ده‌مێ چێكرنا كلیپێ نه‌شیا ل ئه‌لمانیا به‌رهه‌ڤ ببیت، سترانبێژه‌كا فارس ب كارێ فه‌یرۆزێ رابوویه د وێ كلیپێ دا و ل ڤان نێزیكان دێ وى كلیپێ به‌لاڤ كه‌ت.
ناڤهاتى گۆت ژى: ئه‌ڤه ده‌مێ یازده سالانه وى چو ئه‌لبۆمێن نوو به‌لاڤ نه‌كرینه، لێ لدووڤ شیانێن خوه ئه‌و دێ ئه‌لبۆمان ژى چێكه‌ت، هه‌ر چه‌نده نوكه بازارێ چێكرنا ئه‌لبۆمان نه‌مایه، لڤان سالێن بورى ژى وى هژماره‌كا سترانێن سینگل تۆمار كرینه و به‌لاڤ كرینه و دیسان چه‌ندین كلیپ ژى چێكرینه، د هه‌مان ده‌مدا ته‌له‌فزیۆنا دهۆك و وار گه‌له‌كا خزمه‌تا من كریه و هندى د ژیانێ دا مابم دێ خزمه‌تا هونه‌رێ كوردى كه‌م، دیسان هه‌موو مه‌زاختیێن چێكرنا ستران و كلیپێن خوه ژ كیستێ خوه دكه‌ت، هه‌تا نوكه د وارێ هونه‌رى دا وه‌كو پێدڤى هاریكاریا وى نه‌هاتیه كرن، پشتى ڤێ كلیپێ وى لبه‌ره هنده‌ك كارێن دیتر یێن هونه‌رى تۆمار بكه‌ت و به‌لاڤ بكه‌ت.
ئەڤرۆ نیوز:
ناسر شبلی وەزیرێ ڤەگوهاستنا عیراقێ راگەهاند: رۆژانە 270 فرۆكێن مەدەنی د ئەسمانێ عیراقێ دا دەرباز دبن و بەرامبەر دەربازبوونا هەر فرۆكەكێ حوکمەت 450 دۆلاران وەردگریت.
ناڤهاتی گۆتیە ژی: هژمارا فرۆكێن مەدەنی، یێن کو رۆژانە ئەسمانێ عیراقێ بۆ گەشتێن خوە بكار دئینن گەهشتیە 270 فرۆكان، كۆمپانیا فرۆكەڤانیا عیراقێ دەست ب كاری كریە ل سەر گرێبەستێن تایبەت ب رادار و پەیوەندیان.
هەروەسا گۆتیە: رۆژانە حوکمەتا عیراقێ 121 هزار و 500 دۆلاران بەرامبەر دەربازبوونا وان فرۆكان وەردگریت.
ئەڤرۆ نیوز:
سه‌رۆك مەسعود بارزانی، د پەیامەکێ دا سۆتنا بارەگایێ لقا پێنج یێ پارتی دیموکراتی کوردستان ل بەغدا شەرمزار کر و دیارکریە: ئەو چاڤەرێنە حوکمەتا عیراقێ پێرابوونێن پێدڤی بگرنە بەر.
سه‌رۆك بارزانی دیار کریە ژی: ئەڤرۆ شەمبیێ، تاقمەکێ تێکدەر سفکاتی ب ئالایێ کورستانێ و ئالایێ پارتی کریە و ئەو هێرش و دەستدرێژیە و ب چو رەنگان ژ پێگەهێ کوردان و پیرۆزیێن بلند یێن گەلێ کوردستانێ کێم ناکەن، لێ ب روونی پاشکەفتن و بێ فەرهەنگی و عەقلیەتا تاقمەکێ تێکدەر بۆ هەموو ئالیان دیار دکەت.
بارزانی ئەو ژی ئاشکرا کریە: ئەو چاڤەرێنە حوکمەتا فیدرال پێرابوونێن پێدڤی ل بەرامبەر وێ هێرشێ بگرنە بەر و دیسان ئەوێن دخوازن هێرشێ بکەنە سەر پارتی و سفکاتیێ ب پیرۆزیێن گەلێ کوردستانێ بکەن، دێ باجا کریارێن خوە دەن.
ئەڤرۆ نیوز:
سەرۆک بارزانی سەبارەت ب هێرشا ئەندامێن حەشدا شەعبی ل سەر بارەگایێ لقێ ٥ یێ پارتی پەیامەک بەلاڤکر و راگەهاند کو هێرشا ل سەر بارەگایێ لقێ پارتی و سڤکاتیکرن ب ئالایێ کوردستانێ نیشا ددەت کو ئەو کەسێن ئەو کارە کری چەند بێ رەوشتن و پاشکەفتی نە و دڤێت حوکمەتا عیراقێ وان کەسان سزا بدەت.
ئەڤە ژی دەقێ پەیاما سەرۆک بارزانی یە:
بەناوی خوای بەخشندە و میهرەبان
هەواڵی پەلاماردانی بارەگای لقی ٥ـی پارتی لەلایەن تاقمێکی گێرەشێوێنمان پێ گەیشت، کە لە ئەنجامی ئەو کردەوە نایاساییەدا سووکایەتییان بە ئاڵای پیرۆزی کوردستان و ئاڵای پارتی کردووە.
بە توندترین شێوە ئیدانەی ئەو پەلامارە نامەردانەیە دەکەین و لێرەدا ڕایدەگەیێنین ئەم جۆرە پەلامار و دەستدرێژییانە بە هیچ شێوەیەک لە پێگەی کورد و بەها باڵاکانی گەلی کوردستان کەم ناکەنەوە، بەڵام بەڕوونی دواکەوتوویی و بێ فەرهەنگی و عەقڵیەتی ئەو تاقمە شەڕانگێزە بۆ هەموو لایەک دەردەخات.
ئەو چاوەڕوانییەمان لە حکومەتی فیدڕاڵی عێراق هەیە کە ئیجرائاتی پێویست لە بەرامبەر ئەو پەلاماردەرانە بگرێتە بەر، لە هەمان کاتدا جەختیش لەوە دەکەینەوە ئەوانەی بیانەوێ پەلاماری پارتی بدەن و سووکایەتی بە بەهاکانی گەلی کوردستان بکەن، دواجار باجی ئەو کارەیان دەدەن.
مەسعود بارزانی
17ی تشرینی یەکەمی 2020
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٧٢٣ کەسێن دی تووشی ڤایرۆسێ کۆرۆنایێ بووینە و هەروەسا ٢٣ نەخوش ژی مرینە.
وەزارەتا ساخلەمیێ ئەو یەک ژی دیار کریە کو د ماوەیێ ٢٤ دەمژمێرێن بۆری دا ٣٩١ نەخوشێن کۆرۆنایێ ژی چارەسەر بووینە.
ل پارێزگەها دهۆکێ ژی ٣٦٥ کەسێن دی تووشی ڤایرۆسێ کۆرۆنایێ بووینە و ٨ نەخوش ژی مرینە و هەروەسا ١٩٦ نەخوش ژی چارەسەر بووینە.
ئەڤرۆ نیوز:
نێچیرڤان بارزانی سەرۆکێ هەرێما کوردستانێ د پەیامەکێ دا سوتنا بارەگایێ لقێ پارتی ل بەغدا شەرمزار کر و راگەهاند کو سوتنا بارەگایێ پارتەکێ کو رۆلەکێ سەرەکی د ژناڤبرنا رژێما بەعسی دا هەبوویە هێرشە ل سەر خەباتا هەڤپشک یا گەلێ کورد و هێزێن دی یێن شورەشگێرێن عیراقێ.
ئەڤە ژی دەقێ پەیامێ یە:
سه‌رله‌به‌يانيى ئه‌مڕۆ گرووپێكى له‌ياساده‌رچوو بارەگای لقی پارتی دیموکراتی کوردستانیان لە شاری بەغدا سووتاند و لە کاتی هێرشەکەدا ئاڵای کوردستان و وێنەی سیمبولەکانی کورد سووتێندراون و ئاڵای حەشدی شەعبی هەڵکراوه.
ئێمە ئەو هێرشە شەرمەزار دەکەین و بە کردەوەیەکی ئاژاوەگێڕانەی دادەنێین. هێرش بۆ سه‌ر باره‌گاى حزبێك كه هێزێكى سه‌ره‌كيى ڕووخاندنى دكتاتۆرى بووه له عێراق، هێرشه بۆ سەر مێژووی خەباتی هاوبەشی کورد و هێزە عێراقییە شۆڕشگێڕەکان لەپێناو نەهێشتنی زۆرداری و دیکتاتۆری. هەڕەشه‌يە بۆ سەر پێکەوەژیانی ئاشتیانە، لەباربردنی ئاشتيی کۆمەڵایەتی و سیاسييه و لەگەڵ بنەماکانی دەستوور و دیموکراسى و مافەکانی مرۆڤ، ناكۆكه.
هێزی پێشمەرگە و حەشدی شەعبی و هێزە چەکدارەکانی عێراق مێژوویەکی تازەی هاوبەشیان لە شەڕی داعشدا تۆمار کرد، ئێمە هیوادارین ئەو هاوبەشییە هاوکارییەکی زیاتری بەدوادابێت لەڕووی سیاسییەوە لەپێناو دەربازکردنی هەموو خەڵکی عێراق لەو بارودۆخە ناخۆشەی تێیکەوتووە.
نابێ هیچ لێدوان و مشتومڕێک لە هیچ بوارێکدا ئەو هاوبەشییە تازەیەی نەتەوە و پێکهاتەکانی عێراقى تازه‌دا تێکبدات، دەبێ هەموو لایەک ئەو هاوخەباتییەی ڕابردوو بەکار بێنین بۆ یارمەتیدانی حکوومەتی فیدرالیی عێراق لەپێناو هێنانەکایەی بەڕێوەبردنێکی باشتر کە لە خزمەت خەڵکی عێراقدا بێت.
داوا لە هەموو لایەک دەکەین بە ئارامی مامەڵە لەگەڵ ئەو ڕووداوە بکەن و دەزگا پەیوەندیدارەکانی حکوومەتی عێراق لێکۆڵینەوە و لێپێچینەوە یاساییيەکانیان بە شێوەیەکی جددی و خێرا دەستپێ بکەن و تێكده‌ران ڕووبه‌ڕووى ياسا بكرێنه‌وه.
نێچیرڤان بارزانی
سەرۆکی هەرێمی کوردستان
17/10/2020
نيشاندان