ئه‌ڤرۆ نیوز، ره‌مه‌زان هه‌رنی:
شانوڤان فرمێسك مسته‌فا ددیداره‌كێ‌ دا دیار كر كو به‌ری نوكه‌ ب رێیا شانۆیێ‌ ل نیڤا هۆلێن شانۆیێ‌ ل ئورۆپا چه‌ندین داستانێن كوردی ب رێیا شانویێ‌ وان نیشا خه‌لكێ‌ جیهانێ‌ داینه‌ كو ئه‌و شانۆ بۆ وان مه‌زنترین ده‌سكه‌فت بوون كو شیان قه‌هره‌مانیا خه‌لكێ‌ كوردستانێ‌ ب جیهانێ‌ ئاشنا بكه‌ن و دێ‌ د به‌رده‌وام بن ل سه‌ر گه‌هاندنا په‌یاما خوه‌ یا هونه‌ری بۆ ناساندنا كه‌لتۆر و داستانێن كوردستانێ‌ تایبه‌ت شانۆیا پێنج خۆله‌ك كو به‌حسێ‌ كۆمه‌كا ئافره‌تان دكه‌ت ل كارگه‌هه‌كا رستن و چنینێ‌ كاردكه‌ن.
ناڤهاتیێ‌ دیار كر كو هه‌تا نوكه‌ من پشكداری د چه‌ندین فلم و درامایان دا كریه‌ و گۆت: “حه‌ش هه‌موو پشكێن هونه‌ری دكه‌م هه‌ر كاره‌كێ‌ من ئه‌نجام دابیت د ناڤ بوارێ‌ هونه‌ری دا ب باوه‌ری ڤه‌ من ئه‌نجام دایه‌ له‌وڕا چو جارا په‌شیمان نه‌بوویمه‌، من ڤیایه‌ ب رێیا هونه‌رێ‌ خوه‌ د ژیانێ‌ بگه‌هم و بشێم په‌یاما خوه‌ ب راستی و دروستی بگه‌هینمه‌ ناڤ جڤاكی”.
فرمێسكێ‌ گوت: “بۆ ده‌مێ‌ دو سالایه‌ ل شانۆیه‌كا ئه‌لمانی پشكدارم و وه‌ك ئه‌كته‌ر نیشادانێ‌ دكه‌م، ل ده‌مه‌كێ‌ نێزیك دێ‌ شانۆگه‌ریه‌كا كوردی ب زمانێ‌ ئه‌لمانێ‌ نیشاده‌ین”.

ئه‌ڤرۆ نیوز ، زنار تۆڤی:
سه‌رۆك و رێكخه‌رێ‌ گه‌را پێنجێ‌ یا فیسته‌ڤالا سینه‌مایی یا دژی تیرۆرێ‌ دیار كر كو وه‌سا بریار بوو، ل بیره‌وه‌ریا شه‌هیدێن ئێكی شواتێ‌، فیسته‌ڤالا سینه‌مایی یا دژی تیرۆرێ‌ ل هه‌ولێرا پایته‌خت ده‌ست ب كارێن خوه‌ بكه‌ت و بۆ ده‌مێ‌ چار رۆژان دا یا به‌رده‌وام بیت، لێ‌ ئه‌ڤ فیسته‌ڤاله‌ بۆ ده‌مه‌كێ‌ دی هاته‌ پاش خستن، هه‌روه‌سا 36 كورته‌ فلم دا پشكداریێ‌ د ڤێ‌ فیسته‌ڤالا سینه‌مایی دا كه‌ن ژ وان ژی 27 كورته‌ فلمێن كوردی و 9 كورته‌ فلمێن عیراقی، لێ‌ ژ به‌ر چه‌ند ئه‌گه‌ران ئه‌ڤ فیسته‌ڤاله‌ بۆ ناڤه‌راستا ڤێ‌ هه‌یڤێ‌ هاته‌ پاش خستن و گۆت: “ئه‌گه‌رێ‌ سه‌ره‌كی یێ‌ نه‌گێڕانا ڤێ‌ فیسته‌ڤالێ‌ دده‌مێ‌ خوه‌ دا وه‌زاره‌تا ره‌وشه‌نبیری و لاوان یا حوكمه‌تا هه‌رێما كوردستانێ‌ بوو”.
پشتیوان عه‌بدوللا، سه‌رۆك و رێكخه‌رێ‌ گه‌را پێنجێ‌ یا فیسته‌ڤالا سینه‌مایی یا دژی تیرۆرێ‌ ل هه‌ولێرێ‌ زێده‌تر گۆت: “ل سالا بوری وه‌زاره‌تا ره‌وشه‌نبیری یا حوكمه‌تا هه‌رێما كوردستانێ‌ پشته‌ڤانیه‌كا ته‌مام ل فیسته‌ڤالێ‌ كر و بێی كو مه‌ پێدڤی ب سپۆنسه‌ران هه‌بیت، لێ‌ ئه‌ڤ ساله‌ مه‌ نڤیساره‌ك دایه‌ وه‌زیرێ‌ ره‌وشنبیری ل سه‌ر ئه‌نجامدانا ڤێ‌ فیسته‌ڤالێ‌، هه‌ر چه‌نده‌ ئه‌و نڤیساره‌ ل ده‌ف وه‌زیرێ‌ ره‌وشه‌نبیری ب خوه‌یه‌، لێ‌ وه‌زیری گۆت: ئه‌نجامدانا فیسته‌ڤالا سینه‌مایی یا دژی تیرۆرێ‌ كارێ‌ وه‌زاره‌تا ره‌وشه‌نبیری نینه‌، هه‌روه‌سا وی گۆتیه‌، ئه‌ڤه‌ كارێ‌ حزبێ‌ یه‌، یان ژی كارێ‌ وه‌زاره‌تا شه‌هیدانه‌، ل دووڤ دا مه‌ سه‌ره‌دانا پارێزگارێ‌ هه‌ولێرێ‌ ژی كریه‌، پارێزگاری گۆتیه‌ ئه‌ڤه‌ كارێ‌ وه‌زاره‌تا ره‌وشه‌نبیری یه‌، پاشی ئه‌م چووینه‌ وه‌زاره‌تا شه‌هیدان، لێ‌ وان ژی گۆتیه‌، ئه‌م دێ‌ پشته‌ڤانیێ‌ ل هه‌وه‌ كه‌ین، لێ‌ وه‌زاره‌تا دارایی گۆتیه‌ ئه‌ڤه‌ كارێ‌ وه‌زاره‌تا ره‌وشه‌نبیری یه‌، هه‌ر چه‌نده‌ ژ روویێ‌ دارایی ڤه‌ كه‌سێ‌ پشته‌ڤانی ل مه‌ نه‌كر و ئه‌م ژی نه‌چاربووین فیسته‌ڤالێ‌ پاش بێخین”.
ناڤهاتی زێده‌تر ئاشكرا كر كو د ئه‌ڤ ساله‌ دا وان كۆمه‌كا سپۆنسه‌ران هه‌بوون، لێ‌ ئه‌ڤ فیسته‌ڤالا مه‌زن ب هیڤیا وان سپۆنسه‌ران ڤه‌ ب تنێ‌ برێڤه‌ ناچیت، له‌وما وان بریار دا ئه‌ڤ فیسته‌ڤاله‌ هه‌تا ناڤه‌راستا ڤێ‌ هه‌یڤێ‌ بهێته‌ پاشخستن، ژ پێخه‌مه‌ت وێ‌ چه‌ندێ‌ ئه‌و بشێین هنده‌ك سپۆنسه‌رێن دی په‌یدا بكه‌ن و ڤێ‌ فیسته‌ڤالێ‌ برێڤه‌ ببه‌ن و گۆت: “مخابن وه‌زاره‌تا ره‌وشه‌نبیری یا حوكمه‌تا هه‌رێما كوردستانێ‌ پشته‌ڤانی ل فیسته‌ڤالا سینه‌مایی یا دژی تیرۆرێ‌ نه‌كر”.

ئه‌ڤرۆ، هه‌رهین محه‌مه‌د:
گه‌له‌ك جاران هونه‌رمه‌ندان به‌رنامێن هونه‌ری یێن جودا ل كه‌نالێن جودا جودا پێشكێشكرینه‌ ب ره‌نگه‌كێ‌ سه‌ركه‌فتیانه‌ و جوداهیه‌كا مه‌زن هه‌بوویه‌ ل گه‌ل وان پێشكێشكارێن به‌رنامێن هونه‌ری پێشكێش دكه‌ن و د بوارێ‌ هونه‌ری دا شاره‌زایی نه‌بیت ل دۆر ڤێ‌ یه‌كێ‌ ژی هونه‌رمه‌نده‌ك دیاردكه‌ت كو دڤێت ئه‌و هونه‌رمه‌ندێ‌ دبیته‌ پێشكێشكار نه‌بتنێ‌ ب ناڤ هونه‌رمه‌ندبیت، به‌لكو دڤێت كارێ‌ وی یێ‌ دروست یێ‌ هونه‌رمه‌ندان بیت.
هونه‌رمه‌ند ئیسماعیل جومعه‌ ل دۆر بابه‌تی دبێژیت: ل سالا 2001 من ده‌ست ب پرۆگرامێ‌ سیلاڤ كر ل كه‌نالێ‌ كوردستان تیڤی بۆ ده‌مێ‌ دو سال و حه‌فت هه‌یڤان یێ‌ به‌رده‌وام بۆ هه‌تا 210 خه‌له‌كان من پێشكێشكرن ب سه‌ركه‌فتیانه‌ و هه‌رچه‌نده‌ ئه‌و سه‌رده‌مه‌ گه‌له‌ك یێ‌ ب زه‌حمه‌ت بوو ئه‌و ئامیر و ته‌كنه‌لۆژیا نوكه‌ هه‌ی ل وی ده‌می نه‌بوو و گۆت: “هه‌كه‌ هونه‌رمه‌ندێ‌ سترانبێژ به‌رنامه‌كی پێشكێش بكه‌ت دێ‌ جوداتر بیت ژ پێشكێشكاره‌كێ‌ دی، چونكو مه‌له‌ڤانتره‌ و شاره‌زاتره‌ و پێزانین پتر ل ده‌ف وی هه‌نه‌ هه‌روه‌سا هه‌لبژارتنا مێڤانێن پرۆگرامی دێ‌ پتر یا ب كارتێكرن بیت و كه‌سێن شاره‌زا دێ‌ كه‌سێن شاره‌زا هه‌لبژێریت، چونكو هونه‌ر كاره‌كێ‌ مه‌زن و پیرۆزه‌ و ب زه‌حمه‌ته‌، هونه‌رمه‌نداتی نه‌كاره‌كێ‌ بچووكه‌ ب په‌یڤا بهێته‌ ب كارئینان، ژ به‌ر كو هونه‌رمه‌ند وه‌لاتێ‌ خوه‌ ئاڤا دكه‌ت زمانێ‌ ملله‌تێ‌ خوه‌ به‌لاڤ دكه‌ت ب رێكا سترانێ‌ و دشێت كارێن شوره‌شگێری و نه‌ته‌وه‌یی بكه‌ت ب رێیا ده‌نگێ‌ خوه‌، به‌لێ‌ دڤێت ئه‌و هونه‌رمه‌ندێ‌ دبیته‌ پێشكێشكار نه‌بتنێ‌ ب ناڤ هونه‌رمه‌ندبیت، به‌لكو دڤێت كارێ‌ وی یێ‌َ دروست یێ‌ هونه‌رمه‌ندان بیت و ئه‌و هونه‌رمه‌نده‌ دێ‌ یێ‌ سه‌ركه‌فتی بیت هه‌كه‌ دوی ده‌می دا بتنێ‌ كارێ‌ خوه‌ بكه‌ته‌ پێشكێشكاری و پێڤه‌ بهێته‌ گرێدان و ئه‌و كارێن دی دكه‌ت ده‌ست ژێ‌ به‌رده‌ت و بتنێ‌ وی كاری ئه‌نجام بده‌ت”.
ناڤهاتی خویا كر كو گه‌له‌ك هونه‌رمه‌ند یێن هه‌ین بۆ ده‌نگێ‌ خوه‌ و كارێ‌ هونه‌ری یێ‌ سه‌ركه‌فتی یه‌، به‌لێ‌ دبیت دبوارێ‌ پێشكێشكاریێ‌ دا گه‌له‌ك پێزانینێن گشتی نه‌بن و گه‌له‌ك جاران ژی وه‌كو ترسه‌كێ‌ ژی هه‌مبه‌ری كامیرێ‌ هه‌بیت ئه‌و ژی دبیته‌ ئه‌گه‌رێ‌ سه‌رنه‌كه‌فتنا هونه‌رمه‌ندێ‌ پێشكێشكار، له‌وڕا پێشكێشكاری نابیته‌ پیڤه‌ره‌ك كو هونه‌رمه‌ند بیته‌ پێشكێشكار، لێ‌ هه‌كه‌ پێشكێشكاری ژی كر دڤێت یێ‌ شاره‌زا و په‌هله‌وان و قه‌هره‌مان و خودان شیان هه‌بیت د ئاخفتنێ‌ دا و پێزانینێن باش ل سه‌ر مۆزیكێ‌ و دابونه‌ریتێن كوردان هه‌بن و گۆت.
سترانبێژێ‌ كوچكو دیوانانا هاشم بوسه‌لی گۆت: گه‌له‌ك یا گرنگه‌ هونه‌رمه‌ندێ‌ سترانبێژ پێشكێشكاربیت، چونكو سترانبێژ چیرۆكێن سترانا و سه‌رهاتیا دزانیت، چونكو ستران نه‌یا ده‌ڤه‌را مه‌ بخوه‌یه‌ و هه‌ر ده‌ڤه‌ره‌كێ‌ سترانا خوه‌ یا هه‌ی و گه‌له‌ك پێشكیشكارل كوردستانێ‌ هه‌بووینه‌ و ب ره‌نگه‌كێ‌ نه‌جوان به‌رنامێن هونه‌ری پێشكێش دكرن و دبنیات دا كارێ‌ وان نه‌بوویه‌ و هندی به‌رنامێن هونه‌ری وه‌كو سترانبێژ و مۆزیكژه‌ن و شێوه‌كار و هتد…. به‌رنامێ‌ خوه‌ پێشكێش بكه‌ن دێ‌ سه‌ركه‌فتی تر بن بۆ هه‌لبژارتنا پرسیار و مێڤانان و گه‌له‌ك جاران ژی ئه‌و كه‌سێن مرۆڤ مێهڤان دكه‌ت پرسیاران ژ مرۆڤی دكه‌ت مرۆڤ دێ‌ شێت به‌رسڤا خوه‌ ده‌ت، له‌وڕا ژ به‌ر ڤێ‌ چه‌ندێ‌ یا گرنگه‌ پێشكێشكار دبواره‌كێ‌ هونه‌ری دا كاربكه‌ت، ئه‌ڤه‌ دده‌مه‌كی دایه‌ كو بۆ ده‌مێ‌ چه‌ندین سالانه‌ ل كه‌نالێن جوداجودان به‌رنامێن هونه‌ری پێشكێش دكه‌م.
هونه‌رمه‌ندێ‌ شێوه‌كار دلشاد توڤی، پێشكێشكارێ‌ به‌رنامێ‌ كه‌ڤال ل دهۆك تیڤی گۆت: هه‌كه‌ هونه‌رمه‌ند بتنێ‌ به‌رنامێن هونه‌ری پێشكێش بكه‌ت دێ‌ تامه‌كا دی ده‌ته‌ وی به‌رنامه‌ی و پێشكێشكار و مێڤانی َخوه‌ دێ‌ پتر دئێك و دو گه‌هن و د دانوستاندنان و پسیار و به‌رسڤان دا و ئه‌ڤه‌ بۆ ده‌مێ‌ 13 سالانه‌ به‌رنامه‌كێ‌ هونه‌ری پێشكێش دكه‌م و من سه‌ربۆر هه‌نه‌ به‌رامبه‌ر هونه‌رمه‌ندان بۆ پێشكێشكرن و توماركرنا به‌رنامان.