ئەڤرۆ نیوز:

رۆژناما یێنی شەفەق یا تورکیا کو سەر ب ئاکپارتیێ یە دیار دکەت دەزگەهێن راپرسیان یێن سەر ب ئاکپارتیێ ل چەندین پارێزگەهێن تورکیا دەست ب راپرسیەکا نوو کرینە و ل گۆر ئەنجامێن راپرسیان هەکە نها ل تورکیا هەلبژارتن بهێنە کرن دێ دەنگێ ئاکپارتیێ ٣٠% بیت و ئەو یەک ژی نیشا ددەت کو خەلکێ تورکیا وەکو جاران پشتەڤانیێ ل ئاکپارتیێ و ئەردۆگانی ناکەن.

بسپۆرێن سیاسی ل تورکیا ژی دیار دکەن کو شەرێ ل سووریێ و هنارتنا سەربازان بۆ لیبیا وەسا کریە کو خەلک ژ ئەردۆگانی و ئاکپارتیێ بێزار ببن و ئەو یەک دێ کارتێکرنا خوە ل هەلبژارتنێن داهاتی ل تورکیا کەت.

ئەڤرۆ نیوز:

ئەڤرۆ پەرلەمانێ ئیرانێ ل دۆر کوشتنا قاسم سلێمانی و ئالۆزیێن ڤێ دووماهیێ کۆمبوو و ئەندامێن پەرلەمانێ ئیرانێ دیار کرن کو پێدڤیە ب توندی بەرسڤا ئەمریکا بهێتە دان.

ئەندامێن پەرلەمانێ ئیرانێ دیار کرن کو ئەمریکا ب کوشتنا قاسم سلێمانی شەر ل دژی ئیرانێ راگەهاندیە و دڤێت لەشکرێ ئیرانێ و هێزێن دی یێن سەر ب ئیرانێ ژی ب توندی بەرسڤا ئەمریکا بدەن، چونکو هەکە بەرسڤا ئەمریکا نەهێتە دان دێ مەترسیا ئەمریکا ل سەر ئیرانێ و هەموو دەڤەرێ زێدەتر لێ هێت.

ئەڤرۆ نیوز:

جۆزێف بۆریل بەرپرسێ پەیوەندیێن دەرڤە یێ ئێکەتیا ئورۆپا راگەهاند کو پشتی کوشتنا قاسم سلێمانی رەوشا دەڤەرێ گەلەک ئالۆز بوویە و وان دڤێت رێگریێ ل ئالۆزیێن نوو ل رۆژهەلاتا ناڤین بگرن و گۆت: (ژ بۆ هندێ ژی مە داخواز ژ محەمەد جەواد زەریف وەزیرێ دەرڤە یێ ئیرانێ کریە کو ل دووماهیا ڤێ حەفتیێ دا سەرەدانا برۆکسەل بکەت).

ناڤهاتی راگەهاند ژی کو نابیت چو شەرێن نوو ل رۆژهەلاتا ناڤین دەستپێ بکەن چونکو ئەو یەک دێ مەترسیا خوە بۆ هەموو جیهانێ هەبیت.

ئەڤرۆ نیوز:

زەینەب سلێمانی کچا قاسم سلێمانی راگەهاند کو حەسەن نەسروللا ئەمیندارێ گشتی یێ حزبوللا لوبنانێ دێ تۆلا بابێ من راکەت و دێ دربێن کوژەک ل ئەمریکا دەت.

کچا قاسم سلێمانی راگەهاند ژی کو ب هزاران کەس ل جیهانێ ژ بەر بابێ وێ خەمگین بووینە و ئەو کەسە ل هەمبەر ئەمریکا بێدەنگ نامینن.