ئەڤرۆ نیوز:
وەزارەتا پەترۆلێ یا عیراقێ د داخۆیانیەکێ دا ئەڤرۆ دیار کر کو کارمەندێن ئەمریکی یێن کو ل بەسرە کار دکەن ئەڤرۆ ڤەگەریاینە ڤە ئەمریکا و رەنگە ل هندەک جهێن دی ژی کارمەندێن ئەمریکی کارێن خوە بجه بهێلن.
ئەو یەک پشتی هندێ هات کو وەزارەتا دەرڤە یا ئەمریکا داخواز ژ وەلاتیێن خوە کر کو د زووترین دەم دا عیراقێ بجه بهێلن.
ئەڤرۆ نیوز:
پشتی کوشتنا قاسم سلێمانی و ئالۆزبوونا رەوشا عیراقێ وەلاتێن ئەندامێن ناتۆ کو نێزیکی ٧٠٠ شیرەتکار و بسپۆرێن سەربازی یێن وان ل عیراقێ راهێنانان ب هێزێن سەربازی یێن عیراقێ دکەن بریار دان کو مەشقکرن ب هێزێن عیراقێ رابگرن.
بەرپرسەکێ ناتۆ دیار کریە کو جارێ دیار نینە کا دێ هەتا کەنگێ کار ب ڤێ بریارێ هێتە کرن، لێ هەکە رەوشا عیراقێ ئاسایی بیت رەنگە جارەکا دی ئەو دەست ب مەشقکرنا هێزێن عیراقی بکەن.
ئەڤرۆ نیوز، مەحمود نهێلی:
پێلەکا بەفر بارینێ سپێدەهیا ئەڤرۆ ٤/۱/۲۰۲۰ دەڤەرا ئەمێدیێ ڤەدگریت و ل سەنتەرێ قەزایێ دورێن چار سەمتیمێن بەفرێ هاتینە. ئەندازیار هەکا ئامێدی رێڤەبەرێ چاندنا قەزا ئامێدیێ بو ئەڤرۆ نیوز دیار کر، کو ئەڤ پێلا بارینا بەفرێ ئەڤرۆ سپێدێ دەستپێکریە و تا دانێ نیڤرۆ دورێن چار سەمتیمێن بەفرێ بارینە. و گۆت: (ئەڤێ بەفرێ پتریا دەڤەرا ئامێدیێ ڤەگرتیە و ل ناحیا کانی ماسێ و دەرگەهێ سەر زێری پترین رێژە باریە . و ئاشکرا کر تا نوکە ژی بارینا بەفرێ ل دەڤەرێ یا بەردەوامە).
ئه‌ڤرۆ نيوز:
ده‌زگه‌هێن راگه‌هاندنێ ل عيراقێ به‌لاڤكر كو به‌رى ده‌مه‌كێ كێم كاروانه‌كێ ترومبێلێن حه‌شدا شه‌عبى ل قه‌زا تاجى ل باكوورێ به‌غدا هاته بوردومانكرن.
هه‌روه‌سا راگه‌هاند كو كو ئه‌و هێرشه ب رێيا فرۆكه‌كا بێ فرۆكه‌ڤان هاتيه ئه‌نجامدان ودبيت هژماره‌كا به‌رپرسێن حه‌شدا شه‌عبى دناڤ وى كاروانێ ترومبێلان دا بيت، به‌لێ هێشتا يا ديار نينه.
ژێده‌ره‌كێ له‌شكرێ عيراقێ ژى راگه‌هاند كو ژ ئه‌نجامێ وێ هێرشێ ل سه‌ر كاروانێ ترومبێلێن حه‌شدا شه‌عبى ل باكوورێ به‌غدا شه‌ش كه‌س هاتنه كوشتن.
ئەڤرۆ نیوز، رێوار محەمەد رەشید:
سترانبێژا باکوورێ کوردستانێ رێزان کازۆ کو نوکە ل باژێڕێ ئیستەنبۆلێ یێ وەلاتێ تورکیا دژیت نووترین کلیپا خوە بناڤێ (ئاڤا شین) ئەڤرۆ رۆژا 3/1/2020 بەلاڤکر.
سترانبێژ رێزانێ بۆ ئەڤرۆ نیوز دیار کر کو وێ گەلەک دڤیا سترانا خوە یا نوو یا ب ناڤێ (ئاڤا شین) ل باشوورێ کوردستانێ کلیپ بکەت، چونکو رووبارێ ئاڤا شین یێ ل وێرێ، بەلێ ژ بەر هندەک کاودانان نەشیا بەرهەڤ ببیت ژ بەر ڤێ چەندێ نەچاربوو کلیپا خوە یا نوو ل باژێرێ (دێرسمێ) یێ باکوورێ کوردستانێ کلیپ بکەت و گۆت: “ئەڤ سترانا من کلیپ کری ژ دەرهێنانا (زانیار ئوسکان) بوو و (یاشار باش ئوزدەش) ژی ب کارێ بەلاڤکرنا مۆزیکێ راببوو.
ناڤهاتیێ ئاماژە دا وێ چەندێ کو پەیڤ و ئاوازێن ڤێ سترانێ یێن (هەڤال بێ ناڤ)ن و بەری ئەو ڤێ سترانێ کلیپ بکەت ژ لایێ بابێ وێ دەنگبێژێ بەرنیاسێ باکوورێ کوردستانێ (کازۆ) ڤە هاتبوو گۆتن.
ئه‌ڤرۆ نيوز:
كه‌نالێ سى ئێن ئێن يێ ئه‌مريكى به‌لاڤكر كو پشتى ئۆپه‌راسيۆنا (بريسيا شين) و كوشتنا قاسم سلێمانى، هێزێن ئه‌مريكى و ده‌زگه‌هێن دبلۆماسى يێن ئه‌مريكى ل رۆژهه‌لاتا ناڤه‌راست د حاله‌تا ئهاماده‌باشيێ دانه و به‌حسێ وان جهان ژى كر كو دبيت ئيران ئه‌مريكيان لێ بكه‌ته ئارمانج.
د راپۆرته‌كا وى كه‌نالى دا هاتيه كو پشتى وێ دربا ئه‌مريكى ئه‌وا ل ئيرانێ وه‌شاندى، پێشبينى دهێته كرن ل داهاتيه‌كێ نێزيك دا ئيران بزاڤا تۆلڤه‌كرنێ بكه‌ت و به‌يروت و هه‌ولێر وه‌كو دو ئارمانجێن كۆمارا ئيسلامى يا ئيرانێ دانان، كو دبيت ل وان جهان ئيران تۆلڤه‌كرنێ ژ ئه‌مريكيان بكه‌ت، له‌وما ئه‌مريكا هێز و دبلۆماتكارێن خوه ل وان هه‌ردو باژێران خستينه د حاله‌تا ئاماده‌باشيێ دا.
ئەڤرۆ نیوز:
بەری دەمەکێ سوپایێ پاسدارێن ئیرانێ ب فەرمی کوشتنا قاسم سلێمانی ل عیراقێ پشتراست کر و راگەهاند کو دێ تولا وی راکەین.
ل ئالیێ دی حەسەن رۆحانی سەرۆک کۆمارێ ئیرانێ ژی راگەهاند کو ئەمریکا ب کوشتنا سلێمانی شەر ل دژی ئیرانێ راگەهاندیە و ئەو دێ تولا قاسم سلێمانی راکەن.
دەزگەهێن راگەهاندنا ئیرانێ ژی دیار دکەن کو نها شەرێ ئەمریکا و ئیرانێ ب فەرمی ل عیراقێ دەستپێکریە و ئیران خوە بۆ چالاکیێن مەزن ل دژی ئەمریکا ل رۆژهەلاتا ناڤین بەرهەڤ دکەت.
ئەڤرۆ نیۆز، هەرهین محەمەد:
هونەرمەندێ ئاوازدانەر (هەلكەوت زاهر) د پەیجێ خوە یێ تایبەت یێ فیسبووكی دا بەلاڤ كریە كو مژوولی نووترین و ئێكەمین بەرهەمە یێ سالا 2020 بناڤێ (شێرپەنجە) كو هەردو سترانبێژێن گەنج میرا عەلی و دینا ب شێوێ دوقولی گۆتیە و ژپەیڤێن نەوژین سوران و ئاواز هەلكەوت زاهر و دابەشكرنا مۆزیكێ رێناس كورد داخ و ژدەرهێنانا بریار فەتاح و راگەهانكار دلێر تێلی وەكو ئەكتەرپشكداری كریە و ژڤانە ل دەمەكێ نێزیك بهێتە بەلاڤكر.
ناڤهاتی بۆ ئەڤرۆ نیۆز گۆت: مەرەم ژچێكرنا ڤێ كلیپێ ئەوە هەست كرنە ب ئازاركرنا وان كەسان یێن كو توشی نەخوشیا پەنجەشێرێ دبن و ژیان یا بەردەوامە و دڤێت مرۆڤ ژ نەخوشیا پەنجەشێرێ ب هێزتر بیت و ل هەموو وەلاتان ژی ستران ب نەخوشیا پەنجەشێری گۆتینە و ل وەلاتێ مە ئەڤ سترانە نەهاتو چێكرن و گۆتن، لەورا مە حەزكر ئەم ژی سترانەكێ ب وان كەسان چێكەین یێن كو توشی ڤێ نەخوشیێ دبن و ئەڤ كارە دبیتە ئێكەمین كارێ من دئەڤ سالە دا و ب ئانەهیا خودێ من پلان هەنە بۆ جەژنا ئەڤینداران و هەیڤا رەمەزانا پیرۆز و ل هەموو بیرهاتنان مە ستران هەنە.
ئه‌ڤرۆ نيوز:
وه‌لاتێ (نێدرلاند) ب ئێكجارى ده‌سته‌بردارى ناڤێ هوله‌ندا بوو و ب فه‌رمى بوونا خوه ب ناڤێ هوله‌ندا ل 1/1/2020 ل سه‌ر نه‌خشه‌ى نه‌هێلا.
ل دووڤ راپۆرته‌كا كه‌نالێ NOS يێ وه‌لاتێ نێزه‌رلاندس، ئێدى ئه‌و وه‌لاتى ئورۆپى ناڤێ وى نێدرلاند ( ئه‌ردێن نزم) و ناڤێ وى هوله‌ندا نينه.
ل دووڤ وى كه‌نالى، پێدڤيه ده‌ستهه‌لاتدارێٍن خوه‌جهى و زانكۆ و كومپانيێن تايبه‌ت و ده‌زگه‌هين راگه‌هاندنێ و ده‌زگه‌هێنى چاپه‌مه‌نيێ، ناڤێ (نێدرلاند) ل شوونا هوله‌ندا بكاربينن، چونكى نێدرلاند هه‌موو ده‌ڤه‌رێن وى وه‌لاتى ب خوه‌ڤه دگرن نه‌كو تنێ وان ده‌ڤه‌رێن ب ناڤێ هوله‌ندا ل ده‌رڤه دناڤدارن.
ئه‌ڤرۆ نيوز:
رۆژنامه‌ڤانا لوبنانى و بێژه‌ر و پێشكێشكارا ناڤدار يا كه‌نالێن (العربيه و العربيه حه‌دس)، نه‌جوا قاسم، ئه‌ڤرۆ پێنجشه‌مبى 2/!/2020 دژيێ 52 ساليێ دا وه‌غه‌ركر.
كه‌ىنالێ العربيه راگه‌هاند كو سپێده‌يا ئه‌ڤرۆ نه‌جوا قاسم ل مالا خوه ل دوبه‌ى وه‌غه‌ركر.
نه‌جوا قاسم، بێژه‌ر و پێشكێشكارا پرۆگرامێن سياسى بوو كو ديارترين وان پرۆگرامان (حدث اليوم) بوو ل كه‌نالێ العربيه و العربيه حه‌ده‌س، وه‌كو په‌يامنێر ژى رۆمالا شه‌رێ ئه‌فغانستانێ و عيراقێ و لوبنانێ كريه و 11 سالان ژى ل كه‌نالێ (المستقبل) يێ لوبنانى كار كريه، به‌رى ل سالا 2003 بچيته كه‌نالێ (العربيه).
نيشاندان