ئه‌ڤرۆ نيوز:
د وه‌رزێ زڤستانێ دا، ئێك ژوان كێشێن به‌رده‌وام شۆفێر گازندان ژێ دكه‌ن گرتنا جامێن ترۆمبێلانه ب خیسارێ یانژی ب به‌فرێ، تایبه‌ت ژی د دانێ سپێدێ دا.
په‌یجێ رادیۆیا فه‌رمیا رێڤه‌به‌ریا هاتن و چوونا سلێمانیێ پارچه ڤیدیۆیه‌ك به‌لاڤكریه و دیاركریه باشترین چاره بۆ نه‌هێلانا وێ به‌فرێ بڤێ رێكێ یه، كو ئه‌و ژی پێدڤیه هنده‌ك ئاڤا تێنشیر بكه‌نه دناڤ كیسه‌كێ نایلۆنی دا و ل دانێ سپێدی هێدی هێدی وی كیسی ب جامێن ترۆمبێلێ دا بخشینن و بڤێ رێكێ ئه‌و به‌فر نامینیت.
ئه‌ڤرۆ نيوز:
زه‌ینه‌ب ئه‌لعه‌سكه‌ری، ئه‌كته‌ر و وه‌ربه‌رهێنه‌ر و نڤیسكارا به‌رنیاسا به‌حره‌ینی، د دیداره‌كێ دا ره‌ت كر كو ئه‌و جاره‌كا دی بهێته ناڤ وارێ هونه‌ری و وه‌ك ئه‌كته‌ر پشكداریێ د فلمه‌كی یان ونجیره درامایه‌كیێ دا بكه‌ت.
زه‌ینه‌ب، كو ژ دایكبوویا سالا (1974) یه و د سالێن هه‌شتێیان دا وه‌ك ئه‌كته‌ر خوه دایه نیاسین و هه‌تا سالا 2009 پشكداری د هژماره‌كا زۆرا فلم و دراما و فلمێن سینه‌مای دا كریه، به‌رچاڤترین پشكداریا وێ ژی دزنجیره‌كا عه‌ره‌بی دا بوو كو ناڤێ وێ (مه‌شاعل) بوو بۆ كه‌ناله‌كێ وه‌لاتێ خوه گۆت: راسته ئه‌ز و هونه‌ر ژێك نه ڤه‌قه‌تیاینه لێ ئه‌ڤه ده‌ه ساله من چو پشكداریێن نوو نیین و د هزرا من ژی دا نینه جاره‌كا دی بزڤرم.
ل دۆر ئه‌گه‌رێن وێ دوور كه‌فتنێ ژی گۆت: ئه‌ز یا به‌رهه‌ڤ نینم چو رۆنكرنان بده‌م چونكو ئه‌و بابه‌ته‌كه گرێدای منه.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو ل رۆژێن چارشه‌مبى و هه‌تا ئه‌ينى هه‌رێما كوردستانێ دێ كه‌ڤيته بن فشارێن نزمێن ده‌ريا ناڤه‌راست و باران دێ باريت و ل سه‌ر كێليێن چيايا دبيت به‌فر ژى بباريت ب تايبه‌ت رۆژهه‌لاتێ هه‌ولێر و سلێمانيێ.
پشكا پێشبينيان ل رێڤه‌به‌ريا گشتى يا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كريه دا زانين رۆژا چارشه‌مبى 27ى چريا دويێ 2019 هه‌رێما كوردستانێ دێ كه‌ڤيته بن كارتێكرنا درێژبوونا فشارێن نزمێن ده‌ريا ناڤه‌راست، ل ده‌ستپێكێ باران بارين دێ ل سنورێ پارێزگه‌ها دهۆكێ، ده‌ڤه‌رێن چيايى ده‌ست پێ كه‌ت و پاشان ل ده‌مێن ب شه‌ڤێ كارتێكرن دێ درێژ بيت بۆ هه‌موو ده‌ڤه‌رێ و پێشبينى دهێته كرن دابارين ل سنورێ پارێزگه‌هێن هه‌ولێر و سلێمانيێ و ب تايبه‌ت ل ده‌ڤه‌رێن چيايى يێن رۆژهه‌لات ل سه‌ر روويێ ناڤه‌ندى بيت و به‌فر و باران ژى ل سه‌ر كێليێن بلند يێن چيايان ب بارن و له‌زاتيا باى دێ گه‌هيته د سه‌ر 15كم د ده‌مژمێره‌كێ دا و پلێن گه‌رمێ ژى (3-5) پلان دێ نزم بن.
رێڤه‌به‌ريا گشتى يا كه‌شناسى و بيڤه‌له‌رزێ ل هه‌رێما كوردستانێ خۆيا ژى دكه‌ت كو رۆژا ئه‌ينى كارتێكرنا ڤان فشاران ب نزمى دێ هێته ديتن.
ئەڤرۆ نیوز ، زنار تۆڤی:
ئەڤرۆ سێشەمبی 26.11.2019 سەرۆکێ ھەرێما کوردستانێ نێچیرڤان بارزانی ل گه‌ل ھەردو جێگرێن خوە، مستەفا سەید قادر و جەعفەر شێخ مستەفا دێ سه‌ره‌دانا سلێمانیێ كه‌ن و دێ ل گەل چەندین ئالیێن سیاسی ل وێ پارێزگەھێ کۆم بن.
وەسا بریارە د وێ کۆمبوونێ دا سەرۆکێ ھەرێما كوردستانێ پرسێن راستڤەکرنا دستورێ عیراقێ و دۆخێ نوکە یێ عیراقێ پشکا هه‌رێمێ د بودجێ گشتی یێ عیراقێ دا و دروستکرنا ھەڤپەیمانیا کوردستانی و رەوشا ناڤخۆ یا ھەرێمێ ل گەل وان ئلیان گۆتوبێژ بکەن.
ئه‌ڤرۆ نيوز:
كچه‌كا 23 سالی كو ل قوناغا دویێ یا زانكویێ یه دلێ خوه بو ئه‌ڤرۆ ڤه‌دكه‌ت و دبێژیت: ئه‌ز گه‌نجه‌كێ 21 سالی حه‌ز ژ ئێكدو دكه‌ین، به‌لێ ئاریشه ئه‌وه خوشتڤیێ من یێ بێ كاره و خواندنا خوه ژی یا هێلای، بارێ وی یێ دارایی چنینه و حه‌تا وی راده‌ی فلسه‌ك د به‌ریكێ دا نینه، ل گه‌ل دایك و بابێن خوه دژیت، ئه‌و بخو جاران دبێژیته من ئه‌ز نه‌شێم دلێ ته خوش كه‌م و ته به‌خته‌وه‌ر بكه‌م و من چنینه، ئه‌ز چ بكه‌م ئه‌رێ هه‌كه ژیانا هه‌ڤژینیێ ل گه‌ل پێك بینم دێ ژیانا من ل گه‌ل وی خوش بیت هیڤیه بو من رێیه چاره‌سه‌ریه‌كێ بێژه؟
كچا هێژا:
جارێ تو یا د ژیه‌كێ بچووك دا، باشتره هزرا ته ل خواندنا ته بیت و خواندنا خوه ب دووماهی بینی، داكو ببیه خودان داهات و كاره‌ك باش، ژبه‌ركو گرنگه كچێ داهاته‌ك هه‌بیت، ژلایه‌كێ دیڤه ئه‌ز تێناگه‌هم بوچی كور د ڤی ژیی دا یێ بێ كاره، هزرا خوه بكه تو دێ شێی ل گه‌ل زه‌لامه‌كێ هوسا ژی، ئاموژگاریا من ئه‌وه بو ته شوو ب كه‌سه‌كێ هوسا نه‌كه، چونكی نه‌شێت ته به‌خته‌وه‌ر بكه‌ت، مه‌به‌ستا من ئه‌و نینه كو یێ هه‌ژاره، به‌س دڤێت ئه‌م د كه‌تواری بین و ب ژیرانه هزرا خوه بككه‌ین، هه‌كه هاتو ته ژیانا هه‌ڤژینیێ ل گه‌ل پێكئینا و نه‌شیا مه‌زاختنێ ل ته بكه‌ت دێ چ ل كه‌سه‌كێ هوسا كه‌ی حه‌زژێكرن فایدێ ته ناكه‌ت خۆ هه‌موو تشت حه‌زژێكرن نینه.
ئه‌ز پشت راستم د ڤی ژیی دا هه‌كه بزاڤێ بكه‌ت دێ هه‌ر كاره‌ك ب ده‌ست كه‌ڤیت هه‌ر چ كار بیت، ئه‌ڤجا دڤێت خوه زیره‌ك بكه‌ت و چ شه‌رم تێدا نینه، به‌س شه‌رم ئه‌وه د ڤی ژیێ گه‌نج دا یێ بێ كار بیت، سه‌ره‌رای ڤێ چه‌ندێ قوتابخانه ژی هێلایه، دیاره ئه‌و ژی ل هیڤیا هندێ یه كه‌سه‌ك ده‌ستێ وی بگریت و كاری بو په‌یدا كه‌ت و رزگار كه‌ت ژ بێ كاریێ و هه‌ژاریێ ئه‌ڤ تشته قه‌ت چێنابیت.
هه‌كه یێ زیره‌ك بیت و حه‌ز ژ ته بكه‌ت دێ بزاڤێ كه‌ت هه‌ر بو خوه كاره‌كێ په‌یدا كه‌ت و پارێ خوه ب سه‌رفرازی ئینیت، داكو ده‌ستێ خوه ل به‌رامبه‌ر دایك و بابێن خوه درێژ نه‌كه‌ت و ئه‌ڤه زه‌لامینیه و ژنان زه‌لامێن زیره‌ك و خودان كار و داهات دڤێن.
به‌رسڤدان: ده‌روونناس ئاواز
ئه‌ڤرۆ نيوز، نيوار محه‌مه‌د سه‌ليم:
ب گۆره‌يى نڤيساره‌كا وه‌زاره‌تا پێشمه‌رگه‌ى كو ب ده‌ست ئه‌ڤرۆ نيوز كه‌فتيه وه‌زاره‌تا پێشمه‌رگه‌ى چار بڕيار بۆ زێده‌تر ب دامه‌زاوه‌يكرنا وه‌زاره‌تێ ده‌ركينه.
ب گۆره‌ى وێ نڤيسارا وه‌زاره‌تێ يا ژماره 18112 كو ئيمزار شوره‌ش ئيسماعيل وه‌زيرێ پێشمه‌رگه‌ى ل سه‌ر و ل رێكه‌فتى 5ى چريا دويێ ده‌ركيه تێدا چه‌ند كار ل ناڤ وه‌زاره‌تێ قه‌ده‌غه كرينه.
وه‌زيرێ پێشمه‌رگه‌ى ل د وێ نڤيسارێ دا ئاماژه ب وێ چه‌ندێ دكه‌ت كو ئه‌نجامدانا كارێ حزبى ل ناڤ وه‌زاره‌تێ قه‌ده‌غه‌يه و نابيت بهێته ئه‌نجام دان.
هه‌ر ديسان ته‌كست ل سه‌ر سزادانا قانوونى و ئه‌نجامدانا چالاكيێن سياسى و حزبى ل ناڤ وه‌زاره‌تێ هاتيه كرن ل گه‌ل وه‌رگرتنا ئابۆنا.
هه‌ر ب گۆره‌ى ڤێ نڤيسارا وه‌زاره‌تا پێشمه‌رگه‌ى هه‌ر كه‌سێ لاريێ ل سه‌ر ڤان خالێن ل سه‌رى دياركرى بكه‌ت دێ هێته سزادان.
ئەڤرۆ نیوز ، زنار تۆڤی:
ئەڤرۆ سێشەمبی 26/11/2019 ل دەمژمێر 4 ئێڤاری، ل ئیمپایەر سینەما ل فاملی مۆل، رێڤەبەریا هونەرێ سینەمایێ ل هەولێرێ، د وەرزێ چالاكیێن خوە دا دێ ئێكەمین دیدارا نێڤدەولەتی یا كورتە فلمێن ئەنیمەیشن ساز کەت، چالاكیێن ڤێ دیدارێ هەتا 28 ڤێ هەیڤێ د بەردەوام بن.
شاخەوان مستەفا رێڤەبەرێ هونەرێ سینەمایێ ل هەولێرێ، بۆ ئەڤرۆ نیوز گۆت: د ڤێ دیدارێ دا دێ 50 كورتە فلم ژ کوردستانێ و 17وەلاتێن دیتر پشکدار بن، هەروەسا دێ چەندین كار و بەرهەمێن تازە یێن كورتە فلمێن ئەنیمەیشن یێن كوردی، کو بەرهەمێ رێڤەبەریا سینەما هەولێرێ پشکدار بن.
ناڤهاتی گۆت ژی: دێ چار پەنەلێن تایبەت ل سەر سینەما ئەنیمەیشن و گرنگیێن وێ د هەموو وارێن ژیانێ دا هێنە ساز كرن، لیژنا دادوەر یا ڤێ دیدارێ ژ هونەرمەندێن كورد و بیانی پێك دهێن، كۆمەکا مێهڤانێن بیانی و وەلاتێن مێهڤان ژی دێ پشکدار بن، هەروەسا فلمێن ئەنیمەیشن هونەرەکێ نوویە د فیستەڤالێن سینەمایی دا، کو گرنگی پێ دهێتەدان و مە ژی وەك كورد گرنگیەکا باش ب ڤی واری دایە و ب چەند كورتە فلمان سەركەفتنەکا مەزن و دیار د فیستەڤالان دا ب دەستڤە ئینایە، نموونێن وەکو ڤێ دیدارێ ل ڤێ دەڤەرێ نینن، لەوما دڤێت ئەم پتر گرنگیێ ب وارێن هونەری و سینەمایێ بدەین.
شاخەوانی دیار کر ژی: ڤەكرنا ڤێ دیدارێ و كاركرن د ئێكەمین فلمێ دێژ یێ ئەنیمەیشن یێ شەری دێ هێتە راگەهاندن و ترایلەرێ فلمی ژی ب ناڤێ پێشمەرگێ ئەفسانەشكێن دێ هێتە نیشادان، دڤێ دیدارێ دا دێ مێهڤان و نوونەرێن حەفت وەلاتێن پشکدار و ئامادە بن، ئێک ژ وان ژی خانما هونەرمەند موزنە ئەترەشە، نەڤیا هونەرمەند فەرید ئەترەشیە، كو ئێکەم جارە سەرەدانا هەولێرێ و كوردستانێ دکەت.
رێڤەبەرێ هونەرێ سینەما هەولێرێ ئەو ژی ئاشکرا کر: د رێوڕەسمەکێ تایبەتدا ل دووماهیک رۆژا ڤێ دیدارێ دا دێ 4 خەلاتێن سەرەكی ل سەر فلمێن سەرکەفتی هێنە دابەشکرن، وەك: باشترین فلم، باشترین هزر، باشترین دەرهێنەرێ جێبەجێكار، باشترین فلمێ نێڤدولەتی.
ئه‌ڤرۆ نیوز:
چاڤه‌رێ دهێته‌كرن ئه‌ڤ شه‌ڤه ل ده‌مژمێر 10:45 یانا ریال مه‌درید مێڤانداریا یانا پاریس سانجێرمان بكه‌ت ژ چارچوڤێ یاریێن گه‌را 5 ژ قوناغا كومان یا قاره‌مانیا چامپیونیز لیگ ئورۆپا .
بوو ڤێ یاریێ راهێنه‌رێ یانا ریال مه‌درید زێدان هه‌شت یاریزان داخوازى پێكهاتیێ یانێ نه‌كرینه ژ ئه‌گه‌رێن جودا جودا و ئه‌و یاریزان ژى هه‌ر ئێك ژ یاریزانان ئودوریزولا و رودرێگیز و ڤینیسوس و ماریانو دیاز و ڤاسكێز و ئیبراهیم دیاز و ناچو و ئه‌سینسیو .
ئه‌و یاریزانێن هاتینه داخوازن كرن ئه‌ڤێن خوارێ نه
گولچیى: كورتولا و ئه‌ریولا و ئالتوبى
هێلا به‌ره‌ڤانیێ كارڤاخال ، میلیتاو ، راموس، ڤاران ، مێندى و مارسێلو.
هێلا ناڤین مودرێتچ، كروس و كاسمێرو، ڤالڤێردى و ئیسكو.
هێلا پێشیێ : كه‌ریم بن زیما،هازارد ، بێل و یوڤیچ و رودرێگو
ئه‌ڤرۆ نیوز:
ئه‌ڤرۆ دوشه‌مبى 25/11/2019 ل رۆژا جیهانیا نه‌هێلانا توندوتیژیا دژى ئافره‌تان، مه‌سرور بارزانى سه‌رۆكێ حوكمه‌تا هه‌رێما كوردستانێ سه‌ره‌دانا ئێك ژ سه‌نته‌رێن ڤه‌حه‌واندنا ئافره‌تان ل باژیرێ هه‌ولێرێ كر.
سه‌رۆكێ حوكمه‌تێ ل گه‌ل كوێستان محه‌مه‌د وه‌زیرا كار و كاروبارێن جڤاكى سه‌ره‌دانا پشكێن سه‌نته‌رى كر و گوهێ خوه دا داخوازیێن وان و ده‌زگه‌هین حوكمه‌تێ راسپاردن پێدڤیێن وان بۆ دابین بكه‌ن.
سه‌رۆكێ حوكمه‌تێ گۆت” من پێ باشتر بوو ل شوونا تنێ په‌یڤه‌كێ بخوینم، ژ نێزیك سه‌ره‌دانا هه‌وه بكه‌م و گوهێ خوه بده‌مه داخوازیێن هه‌وه”.
هه‌روه‌سا گۆت” ئه‌م دخوازین جڤاكێ مه یێ دوور بیت ژ هه‌موو توندوتیژیه‌كێ و ئافره‌ت نه ب تنێ د پاراستى بن، به‌لكو هه‌موو مافه‌كێ ژیانێ و خوه‌پێگه‌هاندنا وان یێ پاراستى بیت، پێدڤیه ئافره‌ت ژى وه‌كو هه‌ر تاكه‌كێ جڤاكى، مافێ ژیانه‌كا ساخله‌م د جڤاكه‌كێ ساخله‌مدا هه‌بیت، بێگومان ئه‌ڤه ژى یا گرێدایه ب هه‌بوونا كۆمه‌كا قانوون و ره‌فتارێن جڤاكى به‌رامبه‌ر ئافره‌تێ، پێدڤیه حوكمه‌ت ژى پارێزه‌را وان مافان بیت و ژ ئه‌ڤرۆ و وێڤه ئه‌م چو كه‌مترخه‌میه‌كێ ناكه‌ین”.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ ب هەلکەفتا رۆژا جیهانی یا بەرهنگاریا توندوتیژیا ل دژی ئافرەتێ پەیامەک بەلاڤکر و راگەهاند کو کەیفخوەشم ئەڤرۆکە ل جڤاکێ مە هژمارەکا زێدە ئافرەت کار بۆ یەکسانیێ و بدەستڤەئینانا مافێن خوە دکەن.
سەرۆکێ حوکمەتێ ئەو یەک ژی دیار کر کو دڤێت هەموو تاکێ جڤاکێ مە بزانن کو توندوتیژیا ل دژی ئافرەتێ زیانەکا مەزن دگەهینتە جڤاکێ مە و دڤێت پێکڤە بۆ نەهێلانا وێ دیاردێ کار بکەین.
نيشاندان