ئه‌ڤرۆ نيوز:
د راگه‌هاندنه‌كێ سۆپايێ توركيا ئاماژه ب وێ چه‌ندێ دكه‌ت كو ئامانجه‌كا پارتيا كرێكارێن كوردستانێ – په‌كه‌كه ل چيايێ گاره‌يى ل نێزيك ئامێديێ كريه ئارمانج و دو سه‌ركردێن وێ پارتيێ كوشتينه.
ب گۆره‌ى راگه‌هاندنه‌كا سۆپايێ توركيا، ئه‌و دو سه‌ركرده د ليستا سۆر يا داخوازكريان دا بووينه ب ناڤێن سێرڤه‌ت ئايدن و سۆلمه‌ز يه‌شار.
هه‌تا نها په‌كه‌كێ چو داخۆيانيه‌ك د ده‌رباره‌ى وێ هێرشا له‌شكرێ توركيا و ب ئارمانج گه‌هاندنا دو سه‌ركردێن خوه به‌لاڤ نه‌كريه.
ئه‌ڤرۆ نیوز:
په‌یڤدارێ وه‌زاره‌تا بازرگانى و پیشه‌سازى ل هه‌رێما كوردستانێ راگه‌هاند، ل هه‌رێما كوردستانێ سالانه دشێین زێده‌تر ژ 540 هزار ته‌نێن گه‌نمى عمبار كه‌ین و مه خواست یا هه‌ى بگه‌هینینه ملیۆن ته‌نان، هه‌روه‌سا ئاشكراكر كو بریاره پێنج سایلۆیێن نوو ل هه‌رێما كوردستانێ بهێنه دروستكرن.
فه‌تحى مه‌جید، په‌یڤدارێ وه‌زاره‌تا بازرگانى و پیشه‌سازى ل هه‌رێما كوردستانێ گۆت” ل دووڤ وێ پلانا هاتیه دانان، بریاره پێنج سایلۆیێن دى ل هه‌ولێرێ و دهۆكێ و سلێمانیێ بهێنه دروستكرن، كو هه‌ر سایلۆیه‌ك بشێت 40 هزار ته‌نێن گه‌نمى عمبار بكه‌ت، چونكى به‌رهه‌مێ چاندنێ ل هه‌رێما كوردستانێ زۆره و جهێن مه د كێم، له‌وما ئه‌و سایلۆ دێ هێنه دروستكرن بۆ وێ چه‌ندێ مه كێشه د وى بیاڤى دا نه‌مینن”.
ناڤبرى زێده‌تر بۆ مالپه‌رێ فه‌رمى یێ پارتى دیموكراتى كوردستان گۆت” ئه‌م پشكه‌كین ژ ئاسایشا خۆراكى و دخوازین پشكداریێ د وى بوارى دا بكه‌ین، د نوكه دا ل هه‌رێما كوردستانێ شه‌ش سایلۆ یێن هه‌ین و 540 هزار ته‌نێن گه‌نمى ب خوه‌ڤه دگرن، به‌لێ مه خواست یا هه‌ى بگه‌هینینه ملیۆن ته‌نان، وى ده‌مى مه كێشا گه‌نمى نامینیت، كو خواستا ئێكێ یا وه‌لاتیانه، له‌وما هه‌مه هه‌ر گرفته‌ك ژى روو بده‌ت، وى ده‌مى دى بۆ ده‌مێ چه‌ندین سالان ب وى گه‌نمێ عمباركرى خوه راگرین ئه‌ڤه ژى گاڤه‌كا گرنگه”.
ئه‌ڤرۆ نیوز:
رێڤەبەریا گشتی یا ساخلەمیێ ل پارێزگەها دهۆکێ رێنمایێن نوو بۆ نەخوه‌شێن ل نه‌خوه‌شخانا و بنگەهێن سەرەکی و پزیشکی داد دەركرینه.
رێنمایێن رێڤه‌به‌ریا گشتى یا ساخله‌میێ، ل دووڤ مالپه‌رێ نوش نیوز پێك دهێن ژ:
۱- پێدڤیە بۆ هەر نەخوه‌شەکێ ل نەخوه‌شخانێ دهێتە نڤاندن، کۆپیەک ژ کارتا نیشتمانی یان کۆپیەک ژ ناسناما بارێ کەسایەتی و پسۆلا خوراکی ب فایلا وى ڤە بهێتە هەڤپێچکرن.
۲- پێدڤیە باوەرناما مرنێ ژلایێ نۆشداریا داد د ده‌مێ 24 دەم هژمێران دا بهێتە رێکخستن.
ئه‌ڤرۆ نيوز:
وه‌زاره‌تا ساخله‌ميێ ل هه‌رێما كوردستانێ راگه‌هاند، ب پشكداريا نوونه‌رێن هژماره‌كا وه‌زاره‌تان، حوكمه‌تا هه‌رێمێ دێ فه‌رمانگه‌هه‌كا تايبه‌ت ب ده‌رمان و خۆراكى دامه‌زرينيت.
محەمه‌د قادر، په‌يڤدارێ وه‌زاره‌تا ساخله‌ميێ گۆت” نوونه‌رێ هه‌ر ئێك ژ وه‌زاره‌تا ناڤخوه و كواليتيا جۆره‌يى و خالێن گۆمركى دێ ل ێ فه‌رمانگه‌هێ دا پشكدار بن و دێ رۆلێ سه‌ره‌كى د ئيدارا فه‌رمانگه‌هێ دا هه‌بيت”.
گۆت ژى” ئارمانج ژ دروستكرنا وێ فه‌رمانگه‌هێ، رێكخستنا كه‌رتێ ده‌رمانى يه د ئينانێ دا و كواليتيێ و چاڤدێريا بهايان و ده‌ست ب سه‌ر داگرتنا ده‌رمانێن خراب و ئيكسپايه‌ر، هه‌روه‌سا چاڤدێريا كه‌رتێ خۆراكى ژ ئينانا وى ژ ده‌رڤه و فرۆشتن و كوالێتيا وى”.
ئاماژه كر” ژ روويێ كارگيرى ڤه ئه‌و فه‌رمانگه‌هه دێ ب سه‌ر وه‌زاره‌تا ساخله‌ميێ بيت”.
ئه‌ڤرۆ نيوز:
لیژنا دوفچوونا جوانکاری وسەنتەر وکلینیکێن جوانکاریێ ل قايمقامیا قەزا دهوکێ بریارا سزادانا جوانكاريا جيهان ب گۆژمه‌كێ پاره‌ى دا ژبەر هەبونا چەند بویاغا نینوکا یا ئکسپایر ونەهلاویستنا بهایێن جوانکاریێ.
هه‌روه‌سا لژنا ناڤبرى جوانكاريا خوناڤ ب گوژمەکێ پارەی سزادا، ژبەر نەبوونا مولەتا کارێ تاتوی، کو نابیت نوشدارێ ددانان کارێ جوانکاریا بوتس وفلر ولێزەر بکەت، كو بتنێ کارێ نوشدارى پیستی یە.
لژنا ناڤبرى جوانکاریا (MH) بۆ ده‌مێ 24 ده‌م هژمێران داخست، ژبەر ب سەرڤەچوونا مۆلەتا ساخلەمیێ.
د هه‌مان ده‌م دا لژنێ ده‌ستخوه‌شى ل جوانكاريا له‌يلا كر، ژبەر پێگریا وێ ب رێنمايێن ساخله‌ميێ.
ئەڤرۆ نیوز،عەلی حاجی :
ئەندامەكێ لژنا هەڤپشك یا سەر ب رێڤەبەریا ساخلەمیا زاخۆ ڤە د داخویانیەكێ دا بۆ ئەڤرۆ نیوز دیار كر ژ ئەگەرێ نەپێگریا خوارنگەهەكێ و ماركێتەكێ ب رێنمایێن رێڤه‌به‌ریا ساخله‌میا زاخۆ، ب كوژمەكێ پارەی هاتنه سزادان و بۆ ده‌مێ پێنج روژان هاتنە داخستن .
زێدەتر مەهدی رەمەزان گوت : ئەڤرۆ چار شەمبێ 23/10/2019 مە سەرەدانا چەندین جهێن بازرگانی ل زاخۆ كر و مە خوارنگەهەكەك بناڤێ (بابێ حەسەن) ى ب كوژمێ 150 هزار دیناران سزا دا ژبەر نەبوونا رێك وپێكیێ و نەپاقژیێ د ناڤ خوارنگەهێ دا، هه‌روه‌سا ماركتەك بناڤێ (ماركت ئاكرەیی) ب كوژمێ 50 هزار دیناران هاتە سزا دان وبۆ ده‌مێ پێنچ رۆژان هاتە داخستن ژبەر كو دناڤ وێ ماركتێ دا 120 كێلویێن كەرەستەیێن جورا و جور یێن ئیًكسپایەر دهه‌بوون”.
گۆت ژى” هەتا نوكە مە شیایە ب رێیا لژنا هەڤپشك زێدەتری 75% كونترولێ ل سەر جهێن بازرگانی بكه‌ین و رۆژانە ژی ئەم كارێ لێگەریانێ دكەین دناڤ بازاری دا و ئەڤ چەندە ژی پشتی كارێ مە یێ رۆژانە دهێتە ئەنجام دان”.
ئه‌ڤرۆ نیوز:
ئه‌ڤرۆ چارشه‌مبى 23/10/2019 جڤاتا وه‌زیرێن هه‌رێما كوردستانێ ب سه‌رپه‌رشتیا مه‌سرور بارزانى سه‌رۆكێ جڤاتا وه‌زیران و ب به‌رهه‌ڤبوونا قوباد تاله‌بانى جێگرێ سه‌رۆكێ جڤاتا وه‌یزران كۆمبوو.
ل ده‌ستپێكا كۆمبوونێ سه‌رۆكێ جڤاتا وه‌زیران ئاماژه كر كو ل رۆژێن داهاته و پشتى ب دووماهى هاتنا 100 رۆژێن كاركرنا كابینا نه‌هێ یا حوكمه‌تا هه‌رێما كوردستانێ، راپۆرته‌كا به‌رفرهه دێ هێته به‌لاڤكرن و تێدا دێ ئاماژه ب وان كار و پرۆژان هێته كرن كو هاتینه ئه‌نجامدان و ئه‌وێن دشیان دا نه‌بوون بهێنه ئه‌نجامدان ل گه‌ل رۆهنكرنا ئه‌گه‌رێن ئه‌نجام نه‌دانا وان، ل دۆر ڤێ چه‌ندێ سه‌رۆكێ جڤاتا وه‌زیران گۆت” حوكمه‌ت یا خه‌لكى یه و پێدڤیه د خزمه‌تا خه‌لكى دا بیت و مافێ وه‌لاتیانه بزانن حوكمه‌تێ هه‌تا نوكه چ كریه”.
پاشى سه‌رۆكێ جڤاتا وه‌زیران رۆناهى خسته سه‌ر گوهۆرینێن عیراقێ و ئاماژه ب وێ چه‌ندێ كر كو ئه‌م ل گه‌ل داخوازیێن ره‌وا و قانوونى یێن خه‌لكێ خوه‌نیشانده‌رێن عیراقێ نه، به‌لێ ب هیچ شێوه‌كى ل گه‌ل توندوتیژیێ دا نینین، ئه‌ڤجا ژ هه‌ر لایه‌كى بیت، پشته‌ڤانیێ ژى ل گاڤێن چاكسازیێ یێن حوكمه‌تا عیراقێ دكه‌ین، به‌لێ دخوازین وه‌لاتى ب شێوه‌كێ ئاشتیانه داخوازیێن خوه به‌رچاڤ بكه‌ن و داموده‌زگه‌هێن حوكمه‌تا عیراقێ ژى به‌رپرسیارانه به‌رسڤا داخوازیێن ئاشتیخوازانه یێن خوه‌نیشانده‌ران بده‌ن”.
هه‌روه‌سا گۆت” سه‌قامگیربوونا ره‌وشا عیراقێ د به‌رژه‌وه‌ندیا هه‌موو خه‌لكێ عیراقێ دا یه ب هه‌رێما كوردستانێ ژى ڤه، هه‌روه‌سا هیڤیدارین كێشێن د ناڤبه‌را هه‌رێما كوردستانی و حوكمه‌تا فیدرال ب گۆره‌ى دستوورى بهێنه چاره‌سكرن و به‌غدا به‌رسڤه‌كا ئه‌رێنى بۆ پێشنیازێن حوكمه‌تا هه‌رێما كوردستانێ بده‌ت”.
سه‌باره‌ت ره‌وشا رۆژئاڤایێ كوردستانێ و باكوورێ رۆژهه‌لاتا سووریێ ژى، مه‌سرور بارزانى نیگه‌رانیا خوه ژ ره‌وشا ل وان ده‌ڤه‌ران نیشان دا و ئاماژه ب ڤه‌رێژێن خراب بۆ سه‌ر هه‌رێما كوردستانێ كر كو هه‌تا نوكه زێده‌تر ژ 8 هزار په‌نابه‌ران ژ به‌ر وێ ره‌وشێ به‌ر ب هه‌رێما كوردستانێ هاتینه و دیاركر ژى كو حوكمه‌تا هه‌رێما كوردستانێ هه‌ر چ یا پێدڤى بیت بۆ هاریكاریا وان، دێ ئه‌نجام ده‌ت، به‌لێ پێدڤی ب هاریكاریا حوكمه‌تا فیدرال و جڤاكێ نێڤده‌وله‌تى یه ژى كو د ڤى وارى دا هاریكاریا حوكمه‌تا هه‌ریما كوردستانێ بكه‌ن”.
پاشى جڤاتا وزیران دانوستاندن ل دۆر پێداچوونێ ب پێكهاتێ كارگێرى و دارایى یێ وه‌زاره‌ت و ده‌سته و لایه‌نێن نه گرێداى ب وه‌زاره‌تان ڤه كر ل دووڤ به‌رچاڤ وه‌رگرتنا ره‌وشا نوكه، بۆ ڤێ مه‌ره‌مێ ژى بریار هاته دان هه‌ر وه‌زاره‌ته‌ك ژ لایێ خوه‌ڤه ب هوورى پێداچوونێ د پێكهاتێ وه‌زاره‌تێ و ده‌زگه‌هێن وێ دا بكه‌ت ل دووڤ پلان و خشته‌كێ دیاركرى ب ئاراسته‌یا زێده‌تر ب دامه‌زراییكرن و كێمكرنا مه‌زاختیان هه‌روه‌كو د هێلێن گشتى یێن كارناما كابینا نوو یا حوكمه‌تێ دا هاتی.
ئه‌ڤرۆ نیوز،عه‌لى حاجى:
پشتى زێده‌ترى پێنچ سالان ماینه ده‌ستێ رێكخراوا تیروریستیا داعش دا ، ب به‌رامبه‌ر كوژمه‌‌كێ پاره‌یى كچ و كوره‌كێن ئێزدیان هاتنه ئازاد كرن و دوهى ل روژا سێ شه‌مبێ ڤه‌گه‌ریانا ناڤ كه‌س و كاریێن خوه ل كه‌مپا بێرسڤێ باژێرێ زاخۆ.
ئیسماعیل بابێ ئێك ژ كه‌سێن رزگار بویى بۆ ئه‌ڤرۆ نیوز دیار كر رێواز ئیسماعیل كو دبیته كورێ من ل ده‌ڤه‌ره‌كا جه‌رابلوس ل وه‌لاتێ سوریا هاتبوو دیتن و پاشى ب رێیا كه‌سه‌كێ ئێزدى په‌یوه‌ندى ب مه هاته كرن كو پشتى ماوه‌یێ 10 روژان به‌رده‌وام په‌یوه‌ندى ب كه‌سه‌كێ عه‌ره‌ب دكر بۆ ئازادكرنا وى زارویێ خوه‌یێ 11 سالى ل دووماهیێ ئه‌و كه‌سه رازیبوونا ب ئازادكرنا كورێ من ل به‌رامبه‌ر 25 هزار دولارێن ئه‌مریكى و هه‌ر دیسان عه‌یشان كو دبیته كچا برایێ من ئه‌و ژى ل به‌رامبه‌ر 3500 دولارێن ئه‌مریكى هاتنه ئازاد كرن.
ئه‌ڤرۆ نیوز، عه‌لى حاجى:
رێڤه‌به‌رێ وه‌به‌رهێنانێ ل پارێزگه‌ها دهوكێ د داخویانیه‌كێ دا بۆ ئه‌ڤرۆ نیوز دیار كر ل دووڤ وى به‌رنامه‌یێ هاتیه دارێشتن وه‌كو حكومه‌ت ئه‌م پلانه‌كا 10 سالى دارێژن ل دووڤ پێدڤیێن هه‌مى ده‌ڤه‌ران و ل دووڤ را ئه‌ڤ پروژه‌یه ب رێیا پروژه‌یێن وه‌به‌رهێنانێ بهێنه راگه‌هاندن.
زێده‌تر كوردو ئیحسان دیار کر ل دووڤ پروژه‌یێ ده‌سته‌یا وبه‌ه‌رهێنانێ ئه‌ڤرۆ مه كومبوونه‌ك دگه‌ل رێڤه‌به‌رێن سێ ناحیێن باتیفا و ده‌ركارێ و رزگارى و هه‌مان ده‌م دا دگه‌ل قایممقامێ زاخۆ و سه‌روكێ باژێرڤانیا زاخۆ و رێڤه‌به‌ریێن چاندنێ و گه‌شتوزارى ل زاخۆ ئه‌نجام دا ژبو گه‌نگه‌شه‌كرنا چه‌ند پروژه‌یێن گرنگ ل دووڤ پێدڤیێن ده‌ڤه‌را زاخۆ و ئه‌ڤ كومبونه ژبه‌ر وێ چه‌ندێ یه ئه‌م پلانه‌كا 10 سالى رابگه‌هینن و هه‌ر دیسان ل ڤان كومبونان دا دارێشتنا چه‌ند پروژه‌یه‌كێن گرنگ بكه‌ین و پاشى ئه‌ز پروژه‌یه بهێنه بلند كرن ل دووڤ یاسایا وه‌به‌رهێنانێ بهێنه راگه‌هاندن و ئه‌ڤ پروژه‌یه گه‌ڤنه دخزمه‌تا هاولاتیان دا كو ژبه‌ریا نوكه دارێشتنا پروژه‌یان ژلایێ وه‌به‌رهیچنه‌ران ڤه بوو به‌لێ مه پێخوشه‌ه وه‌كو حكومه‌ت ب كارێ گه‌نگه‌شه‌كرنا پروژه‌یان رابیت دا كو بشێن پلانه‌كا دروست بدانین و جێه‌جێ بكه‌ین.
ناڤهاتى زێده‌تر گوت: (ئه‌م ل ده‌ست پێكێ دێ وان پروژه‌یان جێبه‌جێ كه‌ین كو دگرنگ بن و ئه‌ڤ پروژه‌یه نوكه دقوناغێن گه‌نگه‌شه‌كرنێ دانه و دێ پێدڤى ب هه‌یڤه‌كێ بیت هه‌تا كو ئه‌ڤ گه‌نگه‌شه‌كرنه ب دوماهى بهێن ژبه‌ر كو ئه‌م دێ رێڤه‌به‌رێن ناحیان و قایممقام و خه‌لكى ئازاد كه‌ین ل دوور ده‌ست نیشان كرنا پروژه‌یان ژبه‌ر كو ئه‌و دزانن پێدڤیێن ده‌ڤه‌رێ ب چو پروژه‌یانه).
نيشاندان