ئەڤرۆ نیوز ، زنار تۆڤی:
فلمێ دکیۆمێنتاری یێ ب ناڤێ (روو ب رووبوونا مرنێ ب کەتەری)، كو ل سەر پێشمەرگێ کوردستانێ يه، دێ پشکداریێ د فلمە فیستەڤالەکێ دا کەت ل وەلاتێ هۆلەندا.
سەروەر عەبدوللا دەرهێنەرێ فلمێ دکیۆمێنتاری یێ رد ب روو بونا مرنێ ب کەتەری بۆ ئەڤرۆ نیوز گۆت: ئەڤ فلمە دێ ل ئەمستردام ل ھۆلەندا هێتە نیشاندان كو یێ تایبەتە ب پێشمەرگێن ئەندازیاریا سەربازی یا فەرماندا ھێزێن پشتەڤانیا ئێک و د پشکا پێشبرکێ دایە ل فلمە فیستەڤالا مەنیفێستو ل باژێرێ ئەمستردام ل هۆلەندا و دێ ل 8-9-2019 هێتە نیشاندان.
ئه‌ڤرۆ نيوز:
پۆليسێن دهۆكێ راگه‌هاند كو به‌رى ده‌مه‌كى ل گوندێ بانیێ كه‌سه‌ك ب ناڤێ (حسێن سالح) و كورێ وى (سه‌ركه‌ت حسێن) ل دەمێ پاقژکرنا بیرا ئاڤێ ل گۆندێ بانيێ سه‌ر ب ناحيا زاويته ڤه د خەندقن و گیانێ خوه ژ دەست د دەن.
پۆليسێن دهۆكێ دياركر ژى كو پەرێن ڤەکولینێ ل بنگەهێ پولیسێن زاویتە بۆ ڤێ روودانێ هاتینە ڤەکرن.
ئه‌ڤرۆ نیوز:
وه‌زیرێ په‌روه‌ردێ ل هه‌رێما كوردستانێ ئه‌ڤرۆ پێنجشه‌مبى 5/9/2019 راگه‌هاند، ئه‌و ده‌نگوباسێ ل دۆر جوداكرنا قوتابیێن كور و كچ هاتیه به‌لاڤكرن، هیچ بنه‌مایه‌ك بۆ نینه.
ئالان حه‌مه سه‌عید، وه‌زیرێ په‌روه‌ردێ ل هه‌رێمێ د داخۆیانیه‌كا رۆژنامه‌ڤانى دا گۆت” هیچ بریاره‌ك بۆ جوداكرنا قوتابیێن كور و كچ نه‌هاتینه دان، به‌لكو هه‌ر به‌حسێ وێ چه‌ندێ ژى نه‌هاتیه كرن و چو بنه‌ما بۆ وێ چه‌ندێ نینن”.
ل شه‌ڤا بۆرى 4/9/2019 پشكه‌ك ژ ده‌زگه‌هێن راگه‌هاندنێ و تۆرێن جڤاكى ده‌نگوباسه‌ك ل دۆر جوداكرنا ژۆرێن مامۆستایێن زه‌لام و ژن، هه‌روه‌سا جوداكرنا قوتابیێن كچ و كور ل قوتابخانان به‌لاڤكربوو.
ئه‌ڤرۆ نیوز:
وه‌زاره‌تا پلاندانانێ ل هه‌رێما كوردستانێ به‌لاڤكر كو ب مه‌ره‌ما رێكخستنا ئاراستا گۆتارا وه‌زاره‌تێ، بریار هاته دان كو بێ رازیبوونا وه‌زاره‌تێ نابیت فه‌رمانبه‌رێن وێ داخۆیانیان بۆ ده‌زگه‌هین راگه‌هاندنێ بده‌ن.
ل دووڤ نڤیساره‌كا وه‌زاره‌تا پلاندانانێ كو ل رۆژا 3/9/2019 ب ئیمزایا ره‌شید مه‌حمود وه‌زیرێ پلاندانانێ هاتیه ده‌ركرن وتێدا رادگه‌هینیت” ب مه‌ره‌ما رێكخستنا گۆتارا وه‌زاره‌تێ و مامه‌له‌كا ته‌ندروست ل گه‌ل ده‌زگه‌هین راگه‌هاندنێ، مه بریار دا كو هیچ فه‌رمانبه‌ره‌ك ب هه‌موو پلێن فه‌رمانبه‌ریێن خوه ڤه داخویانى و پشكداریێ د هیچ به‌رنامه‌كى دا نه‌كه‌ن كو په‌یوه‌ندى ب كار و چالاكیێن وه‌زاره‌تێ ڤه هه‌بیت بێ وه‌رگرتنا رازیبوونا مه”.
ئه‌ڤرۆ نیوز:
رێڤه‌به‌رێ گشتى یا پۆلیسێن هاتنوچوونێ ل عیراقێ راگه‌هاند، هه‌ر كه‌سه‌كێ مۆبایلێ ل ده‌مێ هاژۆتنا ترۆمبێلێ بكاربینیت دێ ب گۆژمێ 100 هزار دیناران هێته سزادان.
لیوا زوهێر عه‌باده، رێڤه‌به‌رێ گشتى یێ پۆلیسێن هاتنوچوونێ ل عیراقێ بۆ كه‌نالێ دیجله زێده‌تر گۆت” هه‌ر كه‌سێ راسته‌وخوه پاره‌ى ب پۆلیسێن هاتنوچوونێ بده‌ت دێ ب به‌رتیل هیته حسابكرن”.
دیاركر ژى” هه‌ر شوفێره‌كێ ل ده‌مێ 72 ده‌مژمێران دا سزایێ خوه بده‌ت دێ بۆ ب نیڤى هێته هژمارتن”.
ئاماژه كر ژى”دێ كار ب ڤان بریاران ل 6/10/2019 هێته كرن”.
ئەڤرۆ نیۆز، سالار دۆسكی:
ل دووڤ ئاگه‌هداریه‌كا كولیژا پەروەردا بنیات ل زانكۆیا دهۆكێ كو دانەیه‌ك ب دەست ب ئەڤرۆ نیۆز كەفتیە ئەڤ سالە دەرگەهێ خواندنێ بۆ مامۆستا و فەرمانبەرێن پەروەردێ و مامۆستاێن سەر ب چاڤدێریا جڤاكی ڤە هاتیە ڤەكرن كو خواندنا خوە تەمام بكەن ل كولیژا ناڤبری و ببنە خودان باوەرنامێن بەكالوریوسێ.
دهەمان ئاگه‌هدارى دا بەحسێ مەرجێن وەرگرتنێ هاتیە كرن كو ئەو مامۆستا یان فەرمانبەرێ پێشكێش دكەت دڤێـت دو سالان خزمەت ل كەرتێ پەروەردێ یان چاڤدێریا جڤاكی هەبیت و دڤێت یێ دامەزراندی بیت.
تێدا هاتیە ژى كو ژڤانێ بەلاڤەكرنا فورمان ل رێكەفتی 27/8/2019 هەتا 27/9/2019 و فورم ل دەمژمێر چاری ئێڤاری دهێنە بەلاڤكرن.
ئەڤرۆ نیوز، نەوزاد هلوری:
حەجی یاسین سلێڤانەی ئەڤە پتری 40 سالایە وەکو دوکاندار ل بازارێ کەڤنێ زاخۆ کار دکەت، ئەو دیار دكه‌ت کو دیرۆکا بازارێ کەڤنێ زاخۆ ژ سەد سالا بوری یە، وی گەلەک بیرهاتنێن خوش و نەخوه‌ش ل وی بازاری یێن هەین و دبێژیت”بازارێ کەڤنێ زاخۆ چو گوهۆرین ب سەر دا نەهاتینە و وەکو بەرێ یە تنێ گوهۆرین ل بوهایێن تشتان په‌یدا بوویه”.
ئه‌ڤرۆ نیوز:
لژنا دووفچوونا دەرمانان ب سەرۆکاتیا جەهوەر عەلی قایمقامێ قەزا دهۆکێ ئەڤرۆ پێنجشه‌مبى ۲۰۱۹/۹/٥ ل تاخێ شێلێ ل باژێرێ دهۆکێ كۆگەهەکا دەرمانێین قەچاخ گرت.
جەهوەر عەلی، قایمقامێ قەزا دهۆکێ دیاركر كو ئەڤە دەمەکە پشکا ئابوری ل ئاسایشا دهۆکێ دووفچوونا كۆگەهەکا دەرمانان دکەت کو جهەکێ نەگونجای وهێژایە وچو رێنمایێن لژنێ تێدا نەبوون وگۆت” د ڤێ كۆگەهێ دا چەندین جۆرێن دەرمانان هەبوون كو پتریا وان ب رێیێن قەچاخ ونە قانوونی هاتینه ود قەدەغەکرینە و ئیناینە ودفرۆشتە دەرمانخانان”.
قایمقامێ قەزا دهۆکێ دیارکر” دێ خودانێ كۆگەهێ هێتە رەوانەکرن بۆ دادگەهێ وپێرابونیێن قانوونى دێ د دەرهەق دا هێنە وەرگرتن”.
ئه‌ڤرۆ نیوز:
سه‌رۆك مه‌سعود بارزانى ئه‌ڤرۆ پێنجشه‌مبى 5/9/2019 ب هه‌لكه‌فتا سالڤه‌گه‌را داستانا خواكورك په‌یامه‌ك به‌لاڤكر.
سه‌رۆك بارزانى د په‌یاما خوه دا گۆت” ئه‌ڤرۆ 31 سالڤه‌گه‌را داستانا خواكوركه، د وێ داستانێ دا پێشمه‌رگه‌ى ب خوراگرى قوربانیدان بۆ دۆژمن و داگیركه‌رى سه‌لماند كو ئیرادا قوربانیدانێ ژ هه‌موو چه‌كه‌كى ب هیزتره و سه‌ركه‌فتن بۆ وانه یێن خودان دۆزه‌كا ره‌وا”.
سه‌رۆك بارزانى گۆت ژى” ل داستانا خواكوركى سه‌ره‌راى نه به‌رامبه‌رى د چه‌كى و له‌شكرى دا پێشمه‌رگه‌ى شیا گورزه‌كێ مه‌زن ل دوژمنى بده‌ت و ئومێد د ناخێ گه‌لێ كوردستانێ دا ب زیندى هێلا”.
ئه‌ڤرۆ نيوز:
ئه‌ڤرۆ پێنجشه‌مبى 5/9/2019 لژنا دووڤچوونا بازارى ل قايمقاميا قه‌زا دهۆكێ چه‌ندين كۆمپانيێن كه‌ره‌ستێن خوارنێ ل باژێرێ دهۆكێ ب گوژمەکێ پارەی سزادان.
ملله‌ت زكرى، ئه‌ندامێ لژنا دووڤچوونا بازارى دياركر” د بەردەوامیا دووفچوونا بازاری دا، ئەڤرۆكۆمپانیا (گیز) بگۆژمێ مليۆن دیناران هاتە سزادان ژبەر هەبوونا نێزیکی (۳۰۰)كيلۆیێن چەرەزاتێن خراب بووی و چەرەزات ژی هاتن دەستەسەرکرن”.
زێده‌تر گۆت” كۆمپانیا (چەلو) ژبەر کو چەندین کارتونیێن چبسا دگەل رونێ ترومبێلان د ئێک کوگا ڤە بوون ب گۆژمێ (٥۰۰)هزار دیناران هاتە سزادان”.
خوياكر” هەبوونا چەندین تەنێن پسكێت وشەربەتا ئکسپایر ل كۆمپانیا (بەروشکی) ب مليۆن دیناران هاتە سزادان وکەره‌ستە ژی هاتن ده‌سته‌سه‌ركرن وکومپانی ژی هاتە داخستن”.
دياركر ژى” خوارنگەها سەرکەت ب (۲۰۰)هزار دیناران هاتە سزادان ژبەر نەپێگريكرنێ ب رێنمایێن لژنێ”.
بۆ گه‌هاندنا هه‌ر گازنده‌كێ بۆ لژنا دووڤچوونا بازارى ل قايمقاميا قه‌زا دهۆكێ وه‌لاتى دشێن په‌يوه‌نديێ ب ڤێ هژمارێ بكه‌ن :
(۰۷٥۰۱٦۱۲٦۲۲)
نيشاندان