ئەڤرۆ نیوز:
بەری دەمەکێ حەسەن رۆحانی سەرۆک کۆمارێ ئیرانێ د کۆمبوونەکێ دا ل پارێزگەها خوراسان دیار کر کو ئیسرائیل و سعوودیێ هاریکاریا ئەمریکا کرن و وەسا ل ترامپی کرن کو دەست ب سزادانا ئیرانێ بکەت و گۆت: (ئیران د رەوشەکا گەلەک خراب دایە و رەوشا مە یا نها ژ سەردەمێ شەرێ ل گەل عیراقێ خرابترە و دڤێت ئەم خوراگر بین).
سەرۆک کۆمارێ ئیرانێ ئەو یەک ژی دیار کر کو ئیسرائیل و سعوودیێ دڤێن ب رێیا سزایێن ئەمریکا وەلاتێ مە لاواز بکەن و ئەم دێ ل هەمبەر وان خوراگر بین و پیلانێن وان ژناڤ بەین.
ئەڤرۆ نیوز:
رۆژناما دی وولت یا ئەلمانیا د راپۆرتەکێ دا دیار کریە کو تورکیا ب کڕینا سیستەمێ موشەکی ژ روسیا ب فەرمی خاترا خوە ژ رۆژئاڤا خواست و بەرێ خوە دا روسیا، ژ بەر هندێ ژی ئێدی چو رامانا مانا تورکیا د ناڤ ناتۆیێ دا نەمایە.
ئەو یەک د دەمەکێ دایە کو تورکیا سیستەمێ موشەکی ژ روسیا کڕی و بەرپرسێن وی وەلاتی ژی دیار دکەن کو بۆ پاراستنا وەلاتێ خوە نەچار بوون موشەکان ژ روسیا بکڕن.
ئەڤرۆ نیوز:
محەمەد ئارسلان دەرهێنەرێ ناڤدارێ باکورێ کوردستانێ و هەڤالێ نێزیکی یلماز گونەی دەرهێنەرێ ناڤدارێ کورد راگەهاند کو وی بەرهەڤی ب فلمەکێ ل دۆر ژیانا پێشەوا قازی محەمەد سەرۆک کۆمارێ کۆمارا کوردستانێ ل مهابادێ یا کری و داخوازا هاریکاریێ ژ سەرمایەدارێن کورد دکەت دا ب کارێ سپۆنسەریا فلمی رابن.
ناڤهاتی راگەهاند من دڤێت فلمێ قازی محەمەد ببیتە بەرهەمەکێ گەلەک هێژا بۆ سینەما کوردی و هەتا نها ب باشی من کار ل سەر کریە و دێ مفایی ژ نێرینێن کورێ قازی محەمەد و گەلەک کەسێن دی یێن وی دەمی وەرگرم و نها ئەز پێدڤی ب هاریکاریا سەرمایەدارێن کوردم.
ئەڤرۆ نیوز:
دەزگەهێن راگەهاندنا تورکیا ئاماژە ب هندێ دکەن کو ب فەرمانا ئەردۆگانی تیمەکا تایبەت یا پارێزەرێن ئاکپارتیێ دۆسیایەکێ ل دژی عەلی باباجانی ئامادە دکەن دا ب تومەتا ئەندامەتیا رێکخراوا فەتحوللا گولەن وی زیندانی بکەن.
عەلی باباجان جێگرێ سەرۆک وەزیرێن بەرێ یێ تورکیا حەفتیا بۆری دەست ژ ئەندامەتیا ئاکپارتیێ بەردا و راگەهاند وی دڤێت پارتەکا نوو ل تورکیا ئاڤا بکەت و پشکداریێ د سیاسەتێ دا بکەت، نێزیکی چل پەرلەمانتارێن ئاکپارتیێ پشتەڤانیێ ل باباجانی دکەن.
ئەڤرۆ نیوز ، عەلی حاجی :
بەری دەمەکێ کێم ل کومەلگەھا پێشابیرێ ل سەر ئاڤا خابیری تەرمێ ھاولاتیەکێ ژلایێ چەند کەسەکان ڤە ھاتە دیتن و ھەتا نوکە ئەڤ تەرمە نەھاتیە ناسین .
ئەمیر عەلی بەرپرسێ راگەھاندنا ساخلەمیا زاخۆ بۆ ئەڤرۆ نیوز دیار کر ئەڤرۆ ل دەمژمێر 11ی سپێدێ ئەم ھاتینە ئاگەھدار کر ل سەر ڤەدیتنا تەرمێ کەسەکێ ل کومەلگەھا پێشابیرێ ل سەر ئاڤا خابیری ، پشتی تیمێن مە ل ناحیا رزگای گەھشتنیە جھێ دەست نیشان کری ، تەرمێ ھاولاتیەکێ باکورێ کوردستانێ یە و کەسەکێ دانعەمرە و چاکێتەکێ زڤستانێ ل بەر بوو، ھیچ بەلگەنامەکێ فەرمی دگەل دا نەبوو، پشتی ھاتیە رەوانە کرن بۆ پزیشکیا داد ل زاخۆ ، دیار بو ئەڤ کەسە ھێشتا دوەرزێ زڤستانێ دا خەندقە یی و ژبەر ڤێ چەندێ مە رەوانە کر بۆ پزیشکیا داد ل باژێرێ دھوکێ .
ئەڤرۆ نیوز، نەوزاد هلوری:
دەمەکێ کێم بەری نوکە گەشتیارەک ل گەلیێ شێرانە یا سەر ب ناحیا دێرەلوکێ خەندقی، تەرمێ وی ژلایێ تیمێن بەرەڤانیا باژێری هاتیە دەرئینان و رەوانەکرن بۆ دهۆكێ.
ئەحمەد سوفی، وەلاتیەکێ دێرەلوکێ یە بۆ ئەڤرۆ نیوز گۆت: (دەمەکێ کێم بەری نوکە گەشتیارەک ل ئاڤا شین یا گەلیێ شێرانە خەندقی و تەرمێ وی ژلایێ تیمێن نقومڤانێن بەرەڤانیا باژێری و وەلاتیان هاتیە دەرئینان و رەوانەکرن بۆ نوشداریا داد ل دهوکێ).
زێدەتر گوت: (ل دووڤ وان پێزانين دناڤ خەلکێ دەڤەرێ هاتینە بەلاڤکرن ناڤێ وی موستەفا فەوزی یە و ژیێ وی 20 سالە، ب مەرەما گەشتوگۆزارێ قەستا گەلیێ شێرانە کریە).
ئەڤرۆ نیوز، عەلی حاجی :
دروودانەکێ دا ل نێزیک کومەلگەھا دێرەبونێ ترومبێلەکا بارھەلگر خوە ل دوو ژنەکێ ددەت و دبیتە ئەگەرێ گیان ژدەست دانا ژنا دانعەمر و کەسەکا دیتر ژی بریندار دبیت .
ئەمیر عەلی ، بەرپرسێ راگەھاندنا ساخلەمیا زاخۆ بۆ ئەڤرۆ نیوز دیار کر ئەڤ روودانە ل روژا شەمبیێ ل نێزیکی دەمژمێر 5:30ێ ئێڤاری ل نێزیک گومەلگەھا دێرەبوونێ روودایە ، دەما ھندەک ژن ژ زاخۆ ب مەرەما چوونا بەھیەکێ ل گوندێ مێسکا ، ترومبێلان ژنان کو ترومبێلەکا کوستەر بو ژکار دکەڤیت ، ئەو ژن ل بەر لێڤێن جاددەیێ درونن خارێ ، بەلێ ترومبێلەکا بارھەلگر ژئەگەرێ نەمانا ستوپێ وان دھێتە لایێ وان ژنان، دو ژ وان ژنان شیان خوە رزگار بکەن ، بەلێ ژنەکا دانعەمر دژیێ 65 سالیێ دا دمینیتە بن ترومبێلێ ڤە و ئێکسەر گیانێ خوە ژدەست دەت ، ژنەکا دی ژی بریندار دبیت ، بەلێ ئەڤرۆ ل روژا ئێک شەمبێ رەوشا وێ باشتر بوویە و ھاتیە رەوانە کرن بۆ مال .
ئەڤرۆ نیوز:
وەزیرێ ژ دەرڤە یێ عیراقێ محەمەد عەلی حەکیم ل گەل نوونەرا بلندا ئێکەتیا ئورۆپا بۆ پەیوەندیێن ژ دەرڤە و کاروبارێن ئاسایشێ، فێدریکا مۆگرینی کۆمبوو و پاشان کۆنگرەکێ رۆژنامەڤانیێ هەڤپشک ئەنجام دا.
د کۆنگرێ رۆژنامەڤانی دا، وەزیرێ ژ دەرڤە یێ عیراقێ راگەهاند کو وەلاتێ وی کار دکەت بۆ کاراکرنا کەرتێ گەشتیاری و ئاماژە ب وێ چەندێ کر کو ل گەل مۆگرینی دانوستاندن ل سەر پرسا دووبارە دەستپێکرنا گەشتێن ئەسمانی د ناڤبەرا عیراقێ و ئورۆپا دا کر کو بۆ رەوشا جاران ب ڤەگەرن.
ژ لایێ خوە ڤە مۆگرینیێ راگەهاند کو هەتا نها عیراقێ پێدڤی یا ب ئێکەتیا ئورۆپا هەی.
ئاماژە ب وێ چەندێ ژی کر کو ئێکەتیا ئورۆپا ژ سالا 2014ێ هەتا نها کۆژمێ 1.2 ملیار یورۆیان د وارێ هاریکاریێن مرۆڤی، سەقامگێری، گەشەپێدان و وارێ ئەمنی هاریکاریا عیراقێ کریە.
ئەڤرۆ نیوز ، عەلی حاجی :
پشتی زێدەتری سێ روژان ژئەگەرێ ئاریشەیەکێ دناڤبەرا شوفێرێن ترومبێلێن راکرنا بەرمایکا و کومپانیا هیزل دا و نەراکرنا بەرمایکان دناڤ سەنتەرێ باژێری دا ؍ئاریشەیا وان ژلاێ باژێرڤانیا زاخۆ ڤە هاتە چارە سەر کرن .
ل دور ڤێ چەندێ بژار مونیب ؍ سەروکێ باژێرڤانیا زاخۆ بۆ ئەڤرۆ نیوز ئاشکەرا کر ژبەر وێ لێک نەتێگەهشتنا دناڤبەرا شوفێرا و کومپانیا هیزل دا، ببو ئەگەر ماوەیێ سێ روژان بەرمایک و گلێش دناڤ سەنتەرێ باژێری زاخۆ دا نەهێتە راکرن، خەلکەکێ زور گازندە ل سەر وێ چەندێ کرن ؍ پشتی چەندین هەولان، ب خوەش حالی ڤە من شیا ئاریشەیا شوفێرا و وێ کومپانیێ چارەسەر بکەم، ماوەیێ دو روژایە بەرمایکێن دناڤ سەنتەرێ باژێری دا دهێنە راکرن و باژێر دهێتە پاقژ کرن ؍ لەورا ل ڤێرە دا من دڤێت دیار بکەم، مەکومپانیلسەر ڤێ چەندێ ئاگەهدار کری یە ب هیچ رەنگەکێ نابیت ب ڤی رەنگی سەرەدەریێ بکەت و بەردەوام کار بکەت، ئەڤە ژی جهێ قەبیل کرنێ نینە ژئەگەرێ وان کێشەیان هاولات باجا وێ چەندێ بدەن و باژێرێ مە بمینیتە دناڤ گێشی و بەرمایکان دا .
ل گوەری دیفچوونەکا تایبەت یا ئەڤرۆ نیوز دا، ل دووڤ بریارا ئەنجومەنێ وەزیران، پێدڤی یە ل پارێزگەها دهوکێ و دەوروبەرێن وێ، هەڤبەستا کومپانیێن راکرنا بەرمایکان بۆ ماوەیێ سالەکێ بهێنە درێژ کرن، ب تنێ کومپانیا راکرنا بەرمایکان ل زاخۆ هاتە گوهارتن و هەڤبەستا کومپانیا پێشتر یا راکرنا گلێشی ل زاخۆ نەهاتە درێژ کرن، هەتا نوکە ئیمزا سەر هەڤبەستا د ناڤبەرا کومپانیا هیزل و کارگێریا پارێزگەها دهوکێ ژلایێ وەزیرێ وەزارەتا باژێرڤانیێ ڤە نەهاتیە ئیمزا کرن و کومپانیا ناڤبری ژی ل رێکەڤتی ۱/۷/۲۰۱۹ دەست ب کار بویە ل باژێرێ زاخۆ .
ئه‌ڤرۆ نيوز:
سه‌رۆك بارزانى، په‌يامه‌ك ل دۆر ره‌وشا نها يا كه‌ركووكێ به‌لاڤكر و دا زانين كو كێشا كه‌ركووك ب تنێ ئاريشا سياسى يا ناڤبه‌را دو لايه‌نان نينه، د راستى دا كێشا كه‌ركووك بابه‌ته‌كێ مێژوويى و كه‌ڤنه د هه‌مان ده‌م ژى دا يێ فره‌ره‌هه‌ندى و مه‌زنه. سه‌رۆك بارزانى دا زانين ژى كو ئه‌و كاودانێن نها ل كه‌ركووك هه‌ين نابيت د به‌رده‌وام بن.
ده‌قێ په‌ياما سه‌رۆك بارزانى:
ب ناڤێ خودێ مه‌زن و دلۆڤان
كێشا كه‌ركووك ب تنێ ئاريشا سياسى يا ناڤبه‌را دو لايه‌نان نينه، د راستى دا كێشا كه‌ركووك بابه‌ته‌كێ مێژوويى و كه‌ڤنه د هه‌مان ده‌م ژى دا يێ فره‌ره‌هه‌ندى و مه‌زنه.
ژ ئه‌گه‌رێ وى كاودانێ نه‌ئاسايى يێ ب سه‌ر كه‌ركووك دا هاتى و ژ به‌ر پێدڤيا ئاسايكرنا ره‌وشا ئه‌منى و ئيدارى يا باژێرى و خزمه‌تكرنا خه‌لكێ كه‌ركووكێ و چاره‌كرنا هه‌موو كێشان، ئه‌م ل گه‌ل وێ چه‌ندێ ينه كو رێكه‌فتن و هه‌ڤڕاييا لايه‌نێن كوردى، پێنگاڤه‌كا گرنگه به‌لێ ل گه‌ل وێ چه‌ندێ ژى پێدڤيه كێشێن كه‌ركووك ب پارێزگار ژى ڤه ل ده‌سپێكێ د ناڤبه‌را هه‌ولێر و به‌غدا دا، بهێنه ئێكلاكرن و چاره‌سه‌ركرن، هه‌ر ئه‌نجامه‌كێ هه‌بيت ژى جهێ ره‌زامه‌نديا هه‌موو پێكهاتێن كه‌ركووكێ بيت.
نها ره‌وشه‌كا ئه‌رێنى د په‌يوه‌نديێن ناڤبه‌را هه‌ولێر و به‌غدا دا هاتيه پێش و ئه‌ڤه ژى ده‌رفه‌ته‌كا گه‌له‌ك باشه كو ب مفاوه‌رگرتن ژ وان ره‌وشێن ئه‌رێنى ئاريشێن ئه‌منى و ئيدارى يێن كه‌ركووك بهێنه چاره‌كرن و د چارچۆڤێ دستوورى دا كه‌ركووك ب ڤه‌گه‌ريته سه‌ر ره‌وشا خوه يا ئاسايى، چونكو ئه‌و كاودانێن نها ل كه‌ركووك هه‌ين نابيت د به‌رده‌وام بن.
نها و به‌رى نها ژى بۆچوونا مه ئه‌و بوويه كو چو ده‌ستبه‌رداريه‌ك ل سه‌ر كوردستانيبوونا كه‌ركووكێ ناكه‌ين و دڤێت كه‌ركووك ببيته نمۆنا پێكڤه‌ژيانا نه‌ته‌وه‌ى و ئاينى يا هه‌موو پێكهاتان دا كو بشێن ب ئاشتى و برايه‌تى و ته‌بايى ل كه‌ركووك ل گه‌ل هه‌ڤدۆ بژين.
مه‌سعود بارزانی
13ـی 7ـی 2019
نيشاندان