ئه‌ڤرۆ نیوز:
ئێکه‌تیا ته‌پا پێ یا ئه‌مریکا باشور ستێرا ئه‌رژه‌نتینی و یانا به‌شه‌لونا لیونێل میسی سزادا ژبه‌ر ئه‌و داخویانیێن وی یاریزانێ ناڤبری پشتی یاریا هه‌لبژارتیێ ئه‌رژه‌نتین و شیلی داین ل قاره‌مانیا کوپا ئه‌مریکا ٢٠١٩.
ئێکه‌تیا ته‌پا پێ ئه‌مریکا باشور ل سه‌ر مالپه‌رێ خوه یێ فه‌رمی راگه‌هاندی یه میسی بوو ماوێ سێ هه‌یڤان هاته راوستاندن ژ یاریێن نێڤده‌وله‌تی و ماڤێ کرنا یاریێن نێڤده‌ولی نینه هه‌ردیسان ل گه‌ل سزایێ ٥٠ هزار دولاران.
ئه‌ڤرۆ نیوز:
که‌سێ به‌رنیاس یێ سعودی و رێڤه‌به‌رێ گشتی یێ وه‌رزشی یێ به‌ری نوکه ل سعودیێ ترکی ئه‌لشێخ ب فه‌رمی یانا ئه‌لمیریا یا ئیسپانی ئه‌وا دخۆلا پلا دو دا یاریێ دکه‌ت کری به‌رامبه‌ر ٢٥ ملیون یورویا.
مالپه‌رێ وێ یانێ یێ فه‌رمی وێنه‌یێن رێککه‌فتنا ترکی ئه‌لشێخ به‌لاڤه‌کرینه و دیارکریه ئه‌و بوویه مه‌لکێ یانا ئه‌وان یێ نوو، ناڤبری کوژمێ ٢٠٠ ملیون یورو به‌رهه‌ڤکرینه بۆ پشته‌ڤانیا یانا ئه‌لمیریا.
ئه‌ڤرۆ نیوز:
یانا زێنێت سان بترسپورگ یا روسی ل سه‌ر مالپه‌رێ خوه یێ فه‌رمی هه‌ڤبه‌ستا یاریزانێ به‌رازیلی و هێلا ناڤینا یانا به‌رشه‌لونا مالکوم راگه‌هاند پشتی گه‌هشتی یه رێککه‌فتنێ ل گه‌ل وێ یانا ئیسپانی.
ژلایه‌کێ دیڤه روژنامه‌یێن ئیسپانی دیارکرینه یانا زێنێت یا روسی کوژمێ ٤٠ ملیون یورو پێشکێشی یانا به‌رشه‌لونا کرینه به‌رامبه‌ر ده‌ست به‌ردانا وی یاریزانێ به‌رازیلی.
هه‌ژی گوتنێ یه یانا به‌رشه‌لونا ل وه‌رزێ بوری هه‌ڤبه‌ستا مالکوم ئیمزاکر بوو به‌رامبه‌ر ٤١ ملیون یورویا پشتی ژ یانا بوردو یا فره‌نسی ڤه‌گوهاستی.
ئه‌ڤرۆ نیوز:
کابتنێ هه‌لبژارتیێ به‌رازیل و یاریزانێ هێلا به‌ره‌ڤانیا پاریس سانجێرمان دانی ئه‌لڤێس ب فه‌رمی گه‌هشته رێککه‌فتنێ ل گه‌ل یانا ساوپاولو یا به‌رازیلی بو ئیمزاکرنا هه‌ڤبه‌ستا وێ یانێ بوو وه‌رزێ نوو پشتی یانا پاریس هه‌ڤبه‌ستا ئه‌وی نو نه‌کری.
دانی ئه‌لڤێس یێ ٣٦ سالی ژ سالا ٢٠٠٢ وه‌کو یاریزانێ پیشه‌کار ل ئه‌وروپا یاری دکه‌ت کو ژ سالا ٢٠٠٢ هه‌تا ٢٠٠٨ بو یانا سیڤیلیا یاری کریه و ٢٠٠٨ هه‌تا ٢٠١٦ بو به‌رشه‌لونا یاری کر و ٢٠١٦-٢٠١٧ ل یوڤانتوس و ٢٠١٧ هه‌تا ٢٠١٩ بوو پاریس ساجێرمان کر
ئه‌ڤرۆ نیوز:
یانا ریال مه‌درید دخوازیت به‌ری ب دووماهی هاتنا ده‌رگه‌هێ ڤه‌گوهاستنێن هاڤینی هه‌ڤبه‌ستێ ل گه‌ل ستێره‌کا یانا ئه‌یاس ئه‌مستردام یا هوله‌ندی ئیمزا بکه‌ت.
روژناما مارکا ئیسپانی دیارکریه یانا ریال مه‌درید دخوازیت هه‌ڤبه‌ستێ ل گه‌ل ستێرا گه‌نچ یا هێلا ناڤین هه‌لبژارتیێ هوله‌ندا و یانا ئه‌یاکس ئه‌مستردام دون ڤان دیک ئیمزا بکه‌ت بۆ وه‌رزێ نوو.
هه‌ژی گوتنێ یه ڤان دایک یێ ٢٢ سالی نوکه دهێته هژمارتن ئێک ژ یاریزانێن خودان شیان ل سه‌ر ئاستێ هوله‌ندا و ل وه‌رزێ بوری ٥٧ یاری ل گه‌ل یانا خوه کربوون و شیابوو ١٧ گولان توماربکه‌ت کو ٩ ل خۆلا هوله‌ندا بوون و ٣ ل قاره‌مانیا چامپیونیز لیگ بوون.
ئه‌ڤرۆ نيوز:
وه‌زيرێ ناڤخوه ل هه‌رێما كوردستانێ دووپاتيێ ل سه‌ر وێ چه‌ندێ دكه‌ت كو رێ ناهێته دان هيچ كه‌سه‌ك ده‌ستدرێژيێ بكه‌ته سه‌ر مولكێ گشتى وپێدڤيه ب كريار قانوون يا سه‌روه‌ر بيت.
د كۆمبوونه‌كێ دا ل گه‌ل بريكارێ وه‌زاره‌تێ وپارێزگه‌رێن هه‌ولێرێ وسلێمانيێ ودهۆك وهه‌له‌بجه و راوێژكاران وهه‌موو رێڤه‌به‌رێن گشتى يێن وه‌زاره‌تێ، كو يا تايبه‌ت بوو ب دانانا پلانا چار سالێن داهاتى، رێبه‌ر ئه‌حمه‌د، وه‌زيرێ ناڤخوه ل هه‌رێما كوردستانێ راگه‌هاند” ل بن رۆناهيا رێنمايێن سه‌رۆكێ حوكمه‌تا هه‌رێمێ وبه‌رنامێ كابينا نه‌هێ يا حوكمه‌تێ، ئارمانج خزمه‌تكرنا زێده‌تر يا وه‌لاتيانه و ب رێڤه‌برنا كارايه ب زووترين ده‌م وب باشترين شێوه”.
رێبه‌ر ئه‌حمه‌د ئاماژه ب وێ چه‌ندێ ژى كر كو رێ ناهێته دان هيچ كه‌سه‌ك ده‌ستدرێژيێ بكه‌ته سه‌ر مولكێ گشتى وپێدڤيه ب كريار قانوون سه‌روه‌ر بيت.
ئه‌ڤرۆ نیوز:
فراكسیۆنا پارتى دیموكراتى كوردستان ل په‌رله‌مانێ عیراقێ پێشنیازه‌كا نوو بۆ فراكسیۆنێن كوردستانى ل به‌غدا به‌رچاڤ دكه‌ت.
ڤیان سه‌برى، سه‌رۆكا فراكسیۆنا پارتى ل په‌رله‌مانێ عیراقێ د داخۆیانیه‌كا رۆژنامه‌ڤانى دا گۆت” فراكسیۆنا پارتى پێشنیاز دكه‌ت هه‌موو ف اكسیۆنێن كوردستانى ( هه‌ڤپه‌یمانیا كوردستانى) ل په‌رله‌مانێ عیراقێ دروست بكه‌ن، چونكى گه‌له‌ك پرسێن گرنگ د ناڤبه‌را هه‌ولێرێ و به‌غدا یێن ماین وپێدڤیه ب ئێكگرتى پێنگاڤان بۆ بهاڤێژین”.
ڤیان سه‌برى زێده‌تر بۆ باسمیۆز گۆت” فراكسیۆنێن كوردستانى ل په‌رله‌مانێ عیراقێ كو ژ 58 په‌رله‌مانتاران پێك دهێن، ب ئێكده‌نگیێ دێ بسه‌ركه‌ڤن وده‌نگێ كوردستانێ دێ ل به‌غدا ب هێز كه‌ن”.
ئەڤرۆ نیوز، نەوزاد هلۆری:
ل سنوورێ پارێزگەها دهۆکێ د ناڤبەرا 900 بۆ 1000 گوندێن ئاڤەدان هەنە، ل پتریا گوندان ژی چاندن و خودانکرنا تەرش و کەول هەیە، بەلێ نەبوونا بازاری بۆ فروتنا بەرهەمێن وان، کارتێکرن ل کارێ وان کریە، ل قەزا ئامێدیێ جوتیار دخوازن گرنگی ب بەرهەمێن وان بهێتەدان.
نادر خاستوی، جوتیارەکێ گوندێ خاستو ژۆری ل ناحیا شێلادزێ ، بۆ ئەڤرۆ نیوز گۆت: (ئەڤە پتری 60 سالایە ئەم ل سەر گوندێن خوە و ژیانا خوە ب خودانکرنا ته‌رش و کەوال و چاندنێ دبورینین، هه‌كه د بەرێ دا پێدڤیا مە خوارنا بەرهەمی بیت، بەلێ ئەڤرۆ پێدڤیاتی هاتیە گوهۆرین و دڤێت مروڤ بەرهەمی بگوهۆریت و بفروشیت و هندەک پێدڤێن دى پێ بکریت وه‌كو کەرتێ ساخلەمیێ، پەروەردە، بازار).
زێدەتر گوت: (زێدەباری کو بەرهەمێ مە 100% خومالی و سرۆشتی یە، ساخلەم و ب بەرەکەتە، بەلێ زۆر بێ بها بوویە و ناهێتە فروتن، هه‌كه بهێتە فروتن ژی گه‌له‌ك یێ ئەرزانە، بۆ نموونە نوکە خیار گه‌له‌ك یێ ئەرزانه، هێکێن کوردی د ئەرزانن، کاڤر و و گویسک و بزن و شیر و ماست د ئەرزانن، ژبەرڤێ پشکەک ژ جوتیار و خودانکاران نەچارن دەست بەردارێ بەرهەمێن خوە بن).
جیهاد مستەفا، ئەو ژی خودانێ پروژەکێ چێلایە ل ئێک ژ گوندێن دەڤەرێ بۆ ئەڤرۆ نیوز گۆت: (ئەڤ سالە من پتری 30 چێلێن شیری ب خودانکرینە، نوکە کو وەرزێ هاڤینێ یە بەرهەمەکێ باش یێ شیر و ماستی یێ هه‌ى، بەلێ بازار نینە، یان گه‌له‌ك یێ لاوازە بۆ فروتنا وان، ژبلی تەرش و کەوالی د هەمان دەم دا بازار بۆ فرۆتنا بەرهەمێن چاندنێ ژی نینە، بۆ نموونە پسمامێ من زەڤیەکا خیاران کریە، نوکە پێنج کیلویێن خیاران ب هزار دیناران دهێنە فروتن کو ئەڤ یەک ژی زیانەکا گه‌له‌ك مەزنە ب جوتیاران دکەڤیت).
عەبدولخالق هلوری، ئەو ژی جوتیارەکێ شێلادزێ یه گۆت: (سالا بۆری من زەڤیەکا مەزن یا خیار وباجانان د ناڤبەرا شێلادزێ و دێرەلوکێ چاند بوو، رۆژانە د ناڤبەرا 50 بو 100 سندوقان من د هنارتنه بازاری، بەلێ ژبەرکو سندوقا باجانان گه‌له‌ك یا ئەرزان بوو و حه‌قێ وه‌ستیانا مە ژێ نه ده‌ردكه‌ڤت، نەچاربووم ئەڤ سالە دەست بەردارێ چاندنێ بم، گەلەک جوتیارێن دى ژی یێن ب ڤی رەنگی یێن هه‌ین و دەست ژ کارێ خوە بەردایە، چونکی ژلایەکێ ڤە هاریکاری نینە، ژلایەکێ دى ڤە بهایێ بەرهەمى یێ ئه‌رزانه و به‌رهه‌مێ چاندنێ ب چو ناچیت).
نيشاندان