ئەڤرۆ نیوز، زنار تۆڤی:
د. یلماز ئۆزل دەرهێنەرێ کورتە فلمێ بارێ گران، بۆ ئەڤرۆ نیوز دیار کر: کو کورتە فلمێ بارێ گران 17 خۆلەکان یێ درێژە و ل باژێرێ مێردینێ یێ باکورێ کوردستانێ هاتیە وێنەکرن و هەر دو ئەکتەران عادل عەبدولرەحمان و سامان مستەفای رۆلێ سەرەکی تێدا گێرایه، هەتا نوکە ڤی کورتە فلمی چەندین خەلاتێن جیهانی وەرگرتینە، هەروەسا ئەڤرۆکە پێنجشەمبی، کورتە فلمێ بارێ گران ل 31 مین فلمە فیستەڤالا نێڤدەولەتی یا ئەنقەرە، خەلاتێ باشترین کورتە فلمێ تورکی وەرگرت.
ئەڤرۆ نیوز:
وەزیرێ پەروەردێ یێ حوکمەتا هەرێمێ ئالان حەمە سەعید دیار کر: ئەڤ سالە پرۆسسا خواندنێ ژ بۆ هەموو قۆناغان دێ ب شێوازێ ئۆنلاین دەستپێکەت، ژ بلی پۆلێن ئێکێ و دویێ یێن سەرەتایی و پۆلا دازدێ ئامادەیی، ژبەرکو قوتابیێن وان پۆلان دێ وانان ل ناڤا پۆلان ل قوتابخانێ وەرگرن.
هەروەسا گۆت ژی: ل 27 ئیلۆنێ، دێ خواندنا پۆلا 12 دەست پێکەت، پێدڤیە د پۆلێن خواندنێ دا، ب دووراتیا مەتر و نیڤان د ناڤبەرا قوتابیان دا هەبیت و لدووڤدا وانە بهێتە دەستپێکرن
دیسان دیار کریە: پۆلێن ئێکێ و دویێ یێن سەرەتایی، دێ ل (10/10/2020) د ناڤا قۆتابخانان دا دەست ب خواندنێ کەن و پۆلا سییێ سەرەتایی، هەتا 11 ئامادەیی، دێ ب شێوازێ ئۆنلاین دەست ب خواندنێ کەن.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا چار کەس بریندار بوون.
ناڤهاتی زێدەتر گۆت: ئەڤرۆ پێنجشەمبی ۲۰۲۰/۹/۱۰ ل دمژمێر ۱:۳۰ پشتی نیڤرۆ ل ناڤا سەنتەرێ باژێرێ ئاکرێ و سەر جادا سەرەکی یا گەرەکا سوسنا روودانەکا ترافیکێ ژ جۆرێ لێکدان روودایە و د ئەنجام دا چار کەس بریندار بوون.
ئەڤرۆ نیوز، زنار تۆڤی:
ئەڤرۆ پێنجشەمبی، ل دەمژمێر 5:10 خولەکی پشتی ئێڤاری، تۆپخانێن سۆپایێ تورکی دەردورا گوندێ ئۆرمانا ل ناحیا کانی ماسێ یێ سەر بە قەزا ئامێدیێ ڤە تۆپباران کریە و ترسەکا مەزن ل دەف ئاکنجیێن گوندی پەیدا کریە.
زێرەڤان ئاکنجیەکێ گوندێ ئۆرمانایە بۆ ئەڤرۆ نیوز دیار کر: ل دەمژمێر 5:10 خولەک تۆپخانێن سۆپایێ تورکی دەردورا گوندێ مە تۆپ باران کریە و ئەو جهێ تۆپ ڤێکەفتین 500 مەتران نێزیکی مالانە و پرچکێن وان تۆپان ب نێزیکی مالان کەفتینە و دەنگەکێ مەزن ژێ دهات و ترس ل دەف خەلکێ گوندی پەیدا کریە.
ناڤهاتی گۆت ژی: ژ ئەنجامێ وێ تۆپ بارانێ ئاگرەکێ مەزن بەربوویه رەز و زەڤیێن خەلگێ گوندی و هەتا نوکە رێژەکا مەزن یا دارستانێ ژی هاتیە سۆتن، ژ ئەنجامێ تۆپ بارانێ ئەم نەشێین بچین ئاگری ب ڤەمرینین و ب ڤێ چەندێ دێ زیانەکا مەزن گەهیتە خەلکێ گوندی.
ئەڤرۆ نیوز، زنار تۆڤی:
پشتی مستەفا کازمی سەرۆک وەزیرێن عیراقێ سەرەدانا دهۆکێ و دەروازێ ئیبراهیم خەلیل ل زاخۆ دای، هەر ئەڤرۆ مەغرەب سەرەدانا گەلها نزارکێ دا و چاڤ ب چەندین کەسوکارێن قوربانیێن ئەنفالێ کەفت د وێ کەلهێ دا.
عەلی بەندی، چالاکڤانەکە د وارێ تاوانێن ئەنفالێ دا بۆ ئەڤرو نیوز دیار کر: ئەڤرۆ مەغرەب مستەفا کازمی سەرۆک وەزیرێن عیراقێ سەرەدانا کەلها نزارکێ دا، ل دەمێ ئەنفالێ ل سالا 1988 دەست پێکری، ئەو ل دەڤەرا بەهدینان بوو، لەوما دەمێ ئەڤرۆ وی سەرەدانا دهۆکێ کری، وی دڤیان ژ نێزیک ڤە ڤێ کەلهێ ببینیت و ل گەل وان دایکان روونیتە خوار ئەوێن ل وی دەمی کازمی نانێ وان خواری، وی چەندین کەسوکارێن قوربانیێن ئەنفالێ دیتن و ل گەل وان ئاخفت.
ناڤهاتی گۆت ژی: کازمی ب خوە ژی ئێک ژ پاشمایێن ئەنفالانە و یێ ل ناڤ ئەنفالێ دا ژیای و کازمی گەلەک بیرەوەری ل گەل وی خەلکێ و کەسوکارێن وان هەبووینە ئەوێن دناڤ کەلها نزارکێ دا حوکمەتا بەعسی گرتین و ئەشکەنجە داین، هەروەسا عەلی گۆت: ئەز ب خوە ل گەل کازمی ئاخفتم وی گوتە من، دەمێ ئەنفالێ دەست پێکری ئەز ل دەڤەرا بەهدینان بووم، هەروەسا کازمی گۆتیە وی، ئەو دێ هەموو بزاڤێن خوە ئێخیتە کار بۆ دانەنیاسینا ئەنفالێ ل سەر ئاستێ نێڤدەولەتی و ناڤەندێن بریاردانێ، دیسان دێ بزاڤێ کەت کو قوربانی و زیان ڤێکەفتیێن ئەنفالێ ژ ئالیێ مادی و مەعنەویڤە قەرەبۆ کەت.
ئەڤرۆ نیوز:
مستەفا ئادی گوزەل ئەندامێ پەرلەمانێ تورکیا کو د هەمان دەمی دا نوشدارە ژی راگەهاند کو وەزیرێ ساخلەمیێ یێ تورکیا راستیان بۆ رایا گشتی ئاشکرا ناکەت، چونکو ل تورکیا ٩٨٠ هزار کەس تووشی ڤایرۆسێ کۆرۆنایێ بووینە و هەروەسا ٢٣ هزار کەس ژی مرینە.
ناڤهاتی راگەهاند کو دڤێت حوکمەت راستیێن هەی بۆ خەلکی ئاشکرا بکەت، چونکو تشتێ نها دیار دبیت حوکمەت ژ بۆ بەرژەوەندیێن خوە یاریان ب ژیانا وەلاتیان دکەت و دڤێت پارتێن ئۆپۆزسیۆنێ راستیان بۆ خەلکی ئاشکرا بکەن.
ئەڤرۆ نیوز:
سەرۆک کۆمارێ فرەنسا راگەهاند کو وان ل رۆژهەلاتێ دەریا سپی هێلا سور بۆ تورکیا دیار کرینە و ب چو رەنگەکێ ژی رێ نادەن تورکیا زێدەگاڤیان بکەت.
ئیمانوێل ماکرۆن ئەو یەک ژی دیار کر کو دڤێت هەموو وەلاتێن ئێکەتیا ئورۆپا ل هەمبەر تورکیا هەلویستەکێ توند نیشا بدەن، چونکو یا تورکیا دکەت دێ بیتە مەترسی بۆ هەموو ئورۆپا.
نيشاندان