ئەڤرۆ نیوز:
یانا ئەتلەتیکو مەدرید ل سەر مالپەرێ خوە یێ فەرمی ھەڤبەستا ھێرشبەرێ سربی و یانا بەنفیکا یا پورتوگالی ئیڤان ساپونیتچ یێ ٢١ سالی راگەھاند کو ئەڤە د بیتە یاریزانێ دوێ ل ڤەگوھاستنێن نوکە دا ژ یانا بەنفیکا پەیوەندی ب ئەتلەتیکو مەدرید دکەت پشتی بەری نوکە ھەڤبەست ل گەل ستێرا گەنچ یا پورتوگالی جواو فیلکیس ئیمزاکری.
ھەژی گوتنێ ھەتا نوکە یانا ئەتلەتیکو مەدرید ھەڤبەست ل گەل شەش یاریزانان ئیمزاکریە بۆ وەرزێ نوو ئەوژی ھەر ئێک ژ مارکوس یورینتی ژ ریال مەدرید و ھیکتور ھیریرا ژ پورتو یا پورتوگالی و رینان لودی ژ ئەتلەتیکو پاراناینسی یا بەرازیلی و جواو فیلکیس و ئیڤان ساپونیتچ ژ بەنفیکا.

ئەڤرۆ نیوز:
یانا ئەھلی یا قەتەری ب فەرمی ھەڤبەستا ستێرا سنگالی و یانا نیوکاس محەمەد دیامی بۆ ماوێ دو سالان راگەھاند پشتی گەھشتی نە رێککەفتنێ ل گەل وی یاریزانێ ناڤبری .
ھەژی گوتنێ یە محەمەد دیامی یێ ٣٢ سالی یاری ل چەندین یانێن ئنگلیزی کریە ژ ئەوانان ل سالا ٢٠٠٩ ھەتا ٢٠١٢ ل ئەتلەتیکو ویگان و ژ ٢٠١٢ ھەتا ٢٠١٤ ل وێسھام یوناید و ٢٠١٤ ھەتا ٢٠١٦ ل یانا ھال سیتی و ژ ٢٠١٦ ھەتا ٢٠١٩ ل یانا نیوکاس و ل گەل ئەوان یانان پشکداری د ٣٠٠ یاریان دا کریە دخۆلا ئنگلتەرا دا .

ئەڤرۆ نیوز:
یانا پاریس سانجێرمان ھزر ل ئینانا ستێرەکا یانا ریال مەدرید کریە ل ڤەگوھاستنێن ھاڤینا نوکە دا بۆ ب ھێز ئێخستنا ھێلا ناڤینا خوە بۆ وەرزێ نوو.
رۆژناما بلێد یا ئەلمانی ئاشکراکریە یانا پاریس سانجێرمان دخوازیت ھەڤبەستێ ل گەل ستێرا کولومپی و یانا ریال مەدرید خامێس رودرێگیز ئیمزا بکەت ئەوێ ل دو وەرزێن بوری ب شێوەیێ خواستن یاری ل یانا بایرن میونیخ یا ئەلمانی کری .
ئەوێ رۆژنامێ دیارکریە ژی ھەکە یانا پاریس د ڤەگوھاستنا رودرێگیز دا ب سەرکەفت دێ دربەکێ مەزن ل یانا ناپولی دەت ژبەرکو نوکە ئەو یاریزان ئێک ژ ئارمانجێن سەرەکی یێن راھێنەرێ وێ یانا ئیتالی یە کو ماوێ زێدەتر ژ ھەیڤەکێ یە ئەو یانە دانوستاندنان ل گەل یانا ریال دکەت بوو رازیکرنا ئەوی یاریزانی .
ھەردیسان ئەوێ رۆژنامێ دیارکریە ژی یانا ریال مەدرید داخوازیا ٤٠ ملیون یورۆیا وەکو بھایێ ھەلوەشاندنا ئەوی یاریزانی ژ ناپولی خواستی یە بەرامبەر ھەتا نوکە ناپولی بەرھەڤیا خوە دیارنەکریە و بەرامبەر ئەو کوژمێ پارەی بۆ یانەکا وەکو پاریس دێ گەلەک یێ ب سانەھی بیت.